اني اسمي وردة بنية مثل كل البنات حلوة لحد ما حنطاوية عيوني سود كبار وحواجبي كثيفة وكلش حلوة ورموشي طوال عمري هسة ١٧ سنة عشت طفولة تعيسة امي وابوية يومية متعاركين ويومية مشاكل كان ابوية يتعارك وية امي لاتفه الاسباب ويضربها اني جنت وحيدة امي وابوية . امي مارادت تخلف بعدي لان هي حست بان حياتها مامستقرة وياه اني مااتذكر عشت يوم حلو ولاعشت طفولتي مثل باقي الاطفال جنت هاملة دراستي لان جنت اغار من كل الاطفال اللي بالمدرسة اللي جانو يتمتعون بحب وحنان اهاليهم جنت اعيش الحرمان بكل حالاتها حتى المصروف جنت محرومه وجنت من اجوع بالمدرسة وماعندي مصروف واشوف الجهال يشترون اللفات والبسكت والعصاير جنت بداخلي احس بنقص فظيع ليش اني من دون الناس حياتي كلها عذاب وحرمان .
اني اعيش ويا عائلتي بحي شعبي ببغداد وبيت جدي ابو ابوي بنفس المنطقة قريبين من عدنا .
جانت اغلب مشاكلنا انو ابوية مايصرف على البيت لان دخله ضعيف هو موظف بسيط بالبلدية وراتبه على كده يادوب يكفي الايجار والاكل وباقي المصاريف وامي دوم تشتكي وماعدنا وماعدنا . جنا نكضي العيشة .
ولما صار عمري ثمن سنوات بابا طلك ماما وماما رجعت لاهلها وعافتني لان اهلها ماقبلو تاخذني وياها وبقيت ايام ابجي ببيت جدي لان بابا جان مخليني يمهم .
بقيت جم شهر ببيت جدي الى ان عرفت بابا راح يتزوج وحدة ارملة عدها ولد واحد .اما والدتي جنت اشوفها بين فترة ولاخ جانت تشكي من صحتها ومبين عليها الشحوب جنت انقهر عليها هوايةمن جنت اشوفها هيج .واخيرا اتزوج بابا ورة فترة رجعني وياه للبيت لان مرته حبلت وتحتاجني اساعدها بشغل البيت جنت الصبح اروح للدوام وورة الدوم اشتغل دك لحد ماحيلي ينهد وبالليل اريد اقرا انعس وانام والمعلمات جن يرزلن بيه علمود الواجبات والتحضيرات .
وعرفت بعدين بانه زوجه ابوية عايفة ابنها اللي عمره ١٢ سنة ببيت بيبيته بغير محافظة .
زوجة ابوية مو كبيرة كلش عمرها٣٦ سنه وجنت احسها ابد ماتحبني وتتعمد تهينني وتذب عليه الشغل واني بعدني صغيرة .
وجانت تدزني اشتري من الاسواق اللي قريب علينا كل مرة .ومرة من المرات صاحب الاسواق رجال كبير اتحرش بيه وحط ايد على جسمي بطريقة وسخة خفت كلش ركضت على البيت وذبيتةالغراض بالمطبخ ودخلت غرفتي كمت ابجي واندب حظي بحياتي وعمري ماجنت متعرضة لهيج موقف .ورا هاي الحادثة كمت اخاف اطلع برة وثقتي بنفسي مابقت .جانت مرة ابوي عدها فلوس انطته لبابا حتى يفتح بيه مشروع ويزيد دخلنا . وفعلا بابا بدا بالمشروع واشتغل وكام يجي بس بالليل للبيت .
امااني فصورة الرجال ابو الاسواق ماكامت تروح من بالي كمت كلش اخاف وصرت وحدة خوافة وجبانه
مرت الايام وزوجة ابويه جابت طفلين توم ولد ابوية كلش فرح وخبرها لمرته بانوجهالها قدمهم سعد عليه لانه تجارته توسعت وبدا دخله يزيد والفلوس كامت تجري بيده . ابوية جان يدلل مرته هواية ويداريها طبعا جابتله توم ولاد وصاحبة فضل عليه بفلوسها كام يشتغل اني صار عمري عشر سنوات فد يوم دك الباب فتحت لكيت ولد شاب مراهق حلو شكله استغربت لما كال بانه ابن نورا مرة ابوية جان جاي يشوف امه وهاي اول مرة اشوف فيها ابنها فارس .ومرت الايام وامي ماتت حسيت بكسرة جبيرة وبانه اني مابقت بيه نفس لاي شي جنت اشوف ابوية ونورا ووولدهم عايشين عئلة متكاملة وسعيدة اجر الحسرة على حياتي اللي ضاعت كلها كدام عيني . ليش ياربي ليش اني من دون الناس اتعذب جنت انجح بالكوة من المدرسة لان مالحك اقرا دك شغل حتى جهالها التوم مرات تذبهم عليه أداريهم حتى ترتاح شوية او تطلع مرات للسوك او للطبيب .
جنت مرات احس بالياس من حياتي وبانه اني مجرد انسانه محطمة حتى ابوية ماجان يسالني شمحتاجة او مجرد يحسسني بوجودي جان هاملني مجرد كل اسبوع يخليلي مصرف جنت اجمعه واحرم نفسي من كلشي حتى اشتري بيه لبس او احذية اواي شي احتاجه .
حاولت مرة ابوية كم مرة انه تبطلني من المدرسه بس ابوية جان يرفض ويكوللها خلي تخلص سادس اذا جابت معدل اخليها تكمل اذا
ماجابت ابطلها وازوجها .هنا انرعبت شنو زواج شنو ابطل اني لازم اقرا لازم احاول لازم انجح واتفوق حتى والدي مايبطلني ويزوجني .
بقلم الكاتبه lawyer saber
