#معشوقتي 29
أيمن انصدم من قوة ذاكرتها ، كيف قدرت تتفكر ريحة عطر رانيا !
أيمن قعد ساكت وهو يشوف في دموع ملاك
ملاك بكسرة : للدرجة هادي مقدرتش تنساها
أيمن نزل راسه وهو خجلان من نفسه من الحركة العفوية الي دارها وماكان يقصد بيها شي غير اشتايقه لرانيا
ملاك : لهدرجة صعب عليك تشيلها من عقلك ؟ تبيني نسخة منها ؟
أيمن : مش ساهل ننساها في يوم وليلة
ملاك بصوت يرعش : ساهل تحبها في يوم وليلة لكن مش ساهل تنساها في خمسة شهور !
أيمن : مش في ايدي الموضوع !
ملاك بدت تبكي : يا بختها 💔 وربي فوق مني البنت الوحيدة الي حسدتها ! حسدتها ع كمية الحب الي عطيتهالها ، وبالرغم من هذا كله كانت صارمة وقاسية معاك وجفاتك من اول غلطة ! بس اني شنو ؟ تقولي كلمة حلوة وفي نفس اليوم تخوني ونسامحك !
أيمن. وقف وجي باش يطلع بس ملاك وقفت بعده وقالتله بإنفعال : ياسرك ناقشني.! احكي يلي في قلبك تكلم نبي نفهم اني وضعي شنو توا بالنسبة ليك
أيمن تلفتلها : تبي تعرفي يلي في قلبي ؟ تبي تعرفي روحك شني ؟
ملاك بعيونها الحمر : ياريت ! 💔
أيمن : انتِ مرتي وع عيني وراسي ، انسي كل شي ملاك انسي الفتفت الزايد كله ! في النهاية وصلتي لوين ما تبي ! متزوجة وحامل ووضعك مستقر ! خلاص شن مزال تبي تاني ؟
ملاك : وهي ؟!
أيمن : نصيحة مني ! متسأليش خير !
وجي باش يطلع بس هي لحقت عليه وحطت ايدها ع كتفه
ملاك : لا نبي نعرف
أيمن تلفتلها وبنفاذ صبر قاللها : شن تبي تعرفي ملاك !!!
ملاك : انت حبيتها هلبا صح 💔؟
أيمن بغيض قاللها : مصرة تنكدي علي روحك انتِ ؟ لا اني محبيتهاش ! اني قاعد لتوا نحبها ! ولا نقولك اني منحبهاش ! اني نعشقها باهي 💔! مش قادر ننساها ولا نطلعها من عقلي ، مقدرتيش تاخدي مكانها ! كمية الفرق بينكم متعبة ، زاهق من روحي من غيرها ، فاد مال مخنوق مضايق بلاها ! نبيها ! بس انتِ الي خليتيني نسيبها ! عذبتينا احني التلاتة ! اني وهي ، وانتِ ! فرقتينا وبهدلتينا وحرمتينا من بعض ، ورب العزة يا ملاك مافي واحد فسد حياتي غيرك ! وفوق هذا كله قاعد نساير فيك وواخد بخاطرك بس انتِِ تنكدي وتنقي وتبي كل شي ! خلاص عاد ارحميني
ملاك بدت تبكي وقعمز ع السرير بتعب ، حطت ايدها ع بطنها وشافتله : واني شن ذنبي ! هي خداتك مني اني الأولى الي حبيتك وتعلقت بيك ! عشمتني وخليتني نكتبلك قلبي بأسمك ! انت من حقي اني !
أيمن : معاش عندي طاقة نحكي معاك في هالموضوع !
وطلع من الدار وخلاها ، ويافرحة ما تمت
رقدت ملاك بحزنها وناضت تاني يوم تبي تنتقم !
بدلت ولبست وتكمت وأنقت وطلعت للشركة ، دخلت واتجهت لمكتب رانيا
طقطقت وخشت
شافتلها رانيا ببرود ورجعت نزلت عيونها في لاب توبها بعدم مبالاة ، ازعج الموضوع ملاك الي جاية باش تقهرها ب بطنها المكورة قدامها
جت ملاك وقعمز في الصالون قدام مكتب رانيا
ملاك وهي حاطة ايديها ع بطنها : شجو !
رانيا شافت لملاك : مليح بكل !
ملاك : الحرب كانت متعبة صح ؟
رانيا بكل برود : متعبة ، بس ممتعة !
ملاك : حلو لما الخاسر يتقبل خسارته بروح رياضية
رانيا وهي اتكتك ع لاب توبها وجوها جميل : هذا دليل ع القوة 💪
ملاك نحت شعرها من ع رقبتها باش تبين سلسال حرف A !
ملاك : نبيش نعطل عليك ! بس نبي نقولك معاش تلعبي معاي خيرلك لأني الي يتحداني يخسر
رانيا : انحس فيك مسمية روحك في الفيس ، (احلاهم واتحداهم) صح ؟
ملاك بإنزعاج من صدان رانيا ليها : لأ مسمية روحي ملاك مصطفى التركي !
رانيا : شن متزوجة خوك ولا شني ؟ هو ايمن مصطفى التركي وانتِ ملاك مصطفى التركي شن هالقرف هذا. 😷!
ملاك عصبت ع الاخر : انتِ مقهورة ع خاطر خديته لا اكتر ولا اقل !
رانيا حطت راسها ع ايدها المزينة بالدبلة وقالت :ع اساس واقفة عليه يعني !
ع خشت مودة الي استغربت من وجود ملاك وقعدت تشبح ثواني للمغروره
مودة : اهلين انسة ملاك
ملاك بغرور شافت لمودة وماردتش
مودة استفزها تكبر ملاك وشافت لرانيا وقالت : رانيا يبيك الأستاذ ايمن الفوق في المكتب 😌!
رانيا شافت لردة فعل ملاك الغاضبة
رانيا : اففففف شن يبي ! هي شوية وراكبة
مودة : يبيك توا قالي ناديلي عليها ضروري 😌
رانيا شافت لملاك : تقدري تنصرفي حبيبتي راه !
ملاك ناضت وخدت شنطتها القوتشي الضخمة وطلعت بغيض وسكرت الباب وانفجروا رانيا ومودة بالضحك 😂
مودة : ههههههههههههههههههههههههههههههههه وووه موقف
رانيا : ههههههههههه تهبلي انتِ مودة مافيش منك اثنين ❤️😂
مودة : ههههههههه باش تعرفي القدر 😎💪
رانيا : هههههه مدايرة روحها بتقهرني جت ع راسها تستاهل 😂
طلعت ملاك وهي مخنوقة ومضايقه ، ركبت سيارتها وروحت بعصبية ، اماً رانيا ركبت لـ المكتب الي كان هاجراته لشهور ، مكتب ايمن 💔
وقفت قدام المكتب وهي تسمع فيه يتكلم في الهاتف بعصبية ، يناقش بالقوه كعادته ، تنفست وهي حاسة بضيق بدورها ، كانت تمثل القوة قدام ملاك ، بس هي اضعف من الضعف نفسه في داخلها
غمضت عيونها تنفست بعمق ، هذه المرة الاولى الي بتكلمه فيها وجهه لوجهه بروحهم بعد فراقهم !
طقطقت بعد ما عرفت ان كمل مكالمته ، واذنلها بالدخول
خشت رانيا وهي مكملة تمثيليتها ، لكن بنظراته المشتاقة صعب عليها الموضوع ، حاولت تتفادا التقاء عيونها بعيونها وكلماته برسمية
رانيا : بعتلي مع مودة ؟ انشالله خير استاذ !
أيمن وهو يشبحلها وكأنه يعوض في الشهور الي ماتمعنش فيهم فيها : قعمزي باه !
رانيا : وراي خدمة !
أيمن : مش ح تكون اكثر من الخدمة يلي عليا ، ارتاحي
رانيا قعمزت بتردد : نعم ؟
أيمن : كيف حالك ؟
رانيا : الحمدالله في خيار الخير !
أيمن هز راسه : انشالله دوم
رانيا : امييين ، المهم علاش ناديت عليا
أيمن خدي الظرف ومدهولها : نبيك بس تطلعي ع هاذم!
رانيا بإستغراب خدتهم : كنت تقدر تبعتهم مع مودة !
أيمن : عارف
رانيا : هذا هو ؟
أيمن : اي
رانيا : اوك نستأذنك اني اماله
وطلعت رانيا ، وسكر الباب وغصة في قلبها 💔
اما هو اتكا ع كرسيه بتعب وطلع طرف دخان وولعه باش يطفي نار قلبه
تم الدوام ورجعت رانيا وكلام ملاك قاعد صداه يتردد في راسها ، وكذلك ايمن رجع وجوه متعكر ، مشتاق ، نادم ، قاتله الحنين ليها ولي كلامها وضحكتها
روح بكل ملل تغدا ورقد وماهي الا ساعتين وناض ع صوت صرخة ملاك الي قريب هزت الرواشن
فتح أيمن عيونه وسمع الصوت يتكرر
ملاك : ايييييييييييمممممممممممممممننننننننننننننن
ناض واتجهه لمصدر الصوت الي كان حمام جناح النوم !
ملاك : ايييييمممممممنننن لاااااااا 😭
ايمن طقطق ع الباب بخوف : خيرك ملاك افتحي شن فيه !!!؟
وبعد ساعة ، كانت ملاك منهمرة بالبكاء ع السرير الطبي وهي والممرضة تربطلها في خيوط زي العملية الازرق ، شافت ملاك بعيونها الحمر لأيمن الي كيف خش وقفت ومشتله تجري وكأنها طفلة بتشكي همها لبوها !
شافتله بترجي وهي تبكي وحطت يديها ع صدره : ايمن كلمهم بياخدو مني ولدنا 💔
أيمن وهو يواسي فيها : ملاك انتِ انسانة مؤمنة بالقضاء والقدر ! خلاص الجنين مات مش هما يبو يقتلوه !
ملاك وهي تبكي بألم : لالا ماماتش اني قاعدة نحس فيه يتحرك ، هي خلي نطلعو 😭💔
أيمن وهو يمسح علي يديها بحنية : ملاك وسعي بالك خلاص الولد مات اما حركة تحسي بيها ؟
ملاك وهي تحاول تقنعه : لا مرات تشخيصهم غلط ! خلي نمشو لمستشفى تانية بالله عليك ايمن بالله عليك
أيمن : تلاته دكاترة جو ووقفو ع حالتك وأكدوا ان خسرناه ، ياسرك اهدي
ملاك وهي تمسح في دموعها وتهز في راسها نافية : لالا يكدبو ، هي طلعني بالله عليك طلعني
ع خشت الدكتورة ، شافتلها بشفقة وقفت وشدتلها ايدها وهي تحاول تباعدها عن ايمن باش ترقدها ع سريرها
الدكتورة : هي ملاك حبيبتي تعالي ارتاحي خلي نضربولك التغذية ونجهزوك للعملية
ملاك شافت لأيمن وهي تستنجد فيه : أيمن حبيبي كلمها بالله عليك عملية شنو اني نبي نطلع من هني 💔
أيمن وهو يحاول ينزللها يديها من عليه : انتِ بس ارتاحي ع السرير وبعدين ساهل
ملاك شدت في كمه بترجي : لالا خلي نطلعو نمشو لأي مكان تاني نتأكدو اني نبيش نفرط فيه ولدي هذا كبدي راه
أيمن شاف لعيونها المكسورة وقاللها : ملاك ولدي حتى ني هذا ! واكيد مش حنرضا ان يضروه ، بس هوا مات خلاص اقتنعي
ملاك بضعف قالتله : خايفة نخسرك انت ! 💔
أيمن تفاجأة من كلمتها وباش يهديها قرب منها وقاللها في ودنها : متخافيش مزال صغيره ونلحقو نجيبو عشرة !
وشاف لردك فعلها الي باين فيها أثرت فيها كلمته وارتخت شوية
طلع أيمن وسيبهم يعلقولها في اليبرة ويجهزو فيها
اتصل بأهلها وقعد معاهم لن تمو من العملية ، وبعد مافاقت ملاك طلبت ان يجيبولها الجنين بس رفضو خوفاً من ردة فعلها وانهيارها
بعكس أيمن الي سمحوله واصطحبوه ليه ، دخل ع الغرفة وشافه ممدود ، اقشعر بدنه من كومة اللحم الشبه مزرقة ، ملامح ملائكية ، جسد هزيل !
مقدرش أيمن يمسه او حتى يقرب منه هلبا !
شافه من بعيد وطلع وهو مضايق !
سلموله الطفل وكفنوه ودفنوه ! والحوش هديكا الأيام يملا ويفرغ وكأنه وفاة شاب في زهور عمره مش مجرد جنين !
وقف إيمن مع ملاك ومسابهاش ولا لحظة ! كان يواسي فيها ويضحكلها ويغيرلها في جوها ومساعدها زي ما تبي !
لهداكا اليوم الي كانت فيه مودة مقعمزه وتهدرز في أيمن
مودة : حاسة ان مش ح اطول معاه !
أيمن بجدية : هي حكتلك ولا غر انتِ تتحسسي ؟
مودة : تبي الحق هي حكتلي ان مضايقة منه ومن اسلوبه ، وماقالتش انها بتفسخ !
أيمن : ياريت تفسخ
مودة شافتله : قاعد تبيها؟
أيمن : نبيها وبشدة ، ومش قادر نطلعها من راسي لحظة وحدة !
مودة : مابعدك 💔
أيمن : انقولك حاجة اني نستاهل كل الي صاير معاي ، درتها ب يديا ! غلطت في حقها لكن ورب العزه ما قصدي
مودة : مع ان مش فاهمة علاش سيبتو لكن ياحليلي والله ياريتكم ترجعو لبعض 😭 سخفتوني
أيمن تنهد : كلمة ياريت تعمر بـيت 💔 !
مودة : يارب تصير معجزة وتكونو من نصيب بعض 🙏
ايمن : امييييين يارب
وتم الدوام ورجع أيمن للحوش بدل حوايجه وقعمز ع طاولة الغدي الي داراته ملاك بتعب بعد مرور اسبوعين من عمليتها
ملاك : ايمن حبيبي ؟
أيمن وهو ياكل بشهية : ها ؟
ملاك : عندي مشاوير العشية
أيمن شافلها بإستغراب : ع خير ياطير ؟
ملاك : بنزور صديقتي كوثر وبعدها بنخطم ع حوش عمي ، شاديين فيا يبوني نتعشا عندهم
أيمن : بوي ؟
ملاك : اي
أيمن : عازمينك انتِ وولدك فايتينه ؟
ملاك ابتسمت : ههههه قالتلي امك باش نقولك تجي حتى انت
أيمن : ترقعي فيها ولا بجديات ؟
ملاك : والله
أيمن ببرود : نظمي امورك تو نخطم عليهم في المغرب شوية وخلاص
ملاك : ماشي حبيبي براحتك
اما عند رانيا الي كان جهاد يراضي فيها
جهاد : والله العظيم يا حبي حتى نقولك هكي لكن نحبك ، انتِ تزعلي فيسع وتنفعلي وماتعطيش فيا فرصه اناقشك
رانيا : يمكن
جهاد : لا كلامي اكيد مش يمكن !
رانيا : ها تفرض في شخصيتك عليا بالسيف ! وتقولي انتِ عنايدية وراسك مسكر !
جهاد : شن تبيني زي ابو بدر ؟
رانيا : لا مش هكي طبعاً اكيد نبيك راجل وسيد التريس 💪❤️ ، بس مش بالطريقة هادي جهاد ! طريقتك فيها ذل واستهانه بيا راه
جهاد : اني هكي نظامي الله غالب تحمليني
رانيا في خاطرها تبي تقول " مش مجبورة نتحملك ، مش مجبورة نقضي عمري معاك في الاهانة والذل ، مش متعودة علي حد ينقصلي من قدري ! " بس زمطت كلامها كله وقالت : انشالله 💔
جهاد : اي المهم استاحشتك احكيلي شن درتي في غيابي
ومر الوقت اما في حوش اهل أيمن الي كانو مقعمزين في الصالة امه وخواته ويضحكو ويهدرزو وبينهم ملاك
ملاك مدت طاستها للخدامة وفتحت شنطتها وخدت تزدان المكياج وناضت : نخش الحمام نساوي مكياجي
اسراء اخت ايمن : ساوي يا ماما حتى هو ايمن علي خشة 😂
ملاك غمزتلها : اكيد ❤️🔥
خشت ملاك وووقفت قدام المرايا وبدت تعدل في الميك اب متعها ، لن سمعت صوت عزوزتها تعيط وتقول " لا اله الا الا الله ! "
طلعت ملاك مفزوعة وجت عينها ع شنطتها المفتوحة الطايحة ، وعزوزتها الي شادة الظرف امتعها في ايد وصورة ايمن في إيد
عزوزتها : شن هذا تبي تسحري ولدي يا قليلة الأصل !!! 😡
يتبع ...
