#معشوقتي 21
ملاك وخرت خطوة من عليه وبدت تعلي في صوتها تدريجياً : نسيت العشرة والأيام ؟! نسيت يا أيمن حب سنين ؟ نسيت يا ولد الدكتور مصطفى التركي الوعود والعهود الي قطعتها ؟ خديت مني شن تبي ولوحتني ؟ راني بنت عمك حرام عليك
ولما بدو الناس يشبحولها بإستغراب شدها من ايدها بالقوه وطلعها تفادياً لمزيد من الاحراج
فتح سيارته من بعد عن طريق المفتاح وفتح الباب ودفها في الكرسي ودار وركب كرسيه وشافلها بعصبيه
أيمن : شن تبي يا حمارة !؟ كرهتيني في عيشتي مللتيني شن مزال تبي مني راني خطبت ! افهميها ! وخطيبتي عاشقها وميت فيها !
ملاك بدت تبكي : أستر عليا الله يستر عليك انشالله ، ماتبينيش باهي براحتك ، تزوجني خلي نجيب هالعيل وطلقني بعدها بالله عليك
أيمن : تي شن تخرطي انتِ ؟ نقولك خاطب كيف تبيني نفسخ باش نستر علي وحدة فاسدة زيك ؟
ملاك بتوسل ودموعها يقطرو : اي فاسدة وماننفعش ! لكن ماتنساش ان الفاسدة هادي بنت عمك ! عمك الي عييت وانت توعد فيه بالصون لبنته ! كيف ليك قلب تخليها هكي ؟ يكون في علمك بس اني متقدميلي ناس ، ومانقدرش نوافق بسبب غلطتك الي في بطني
أيمن بإنفعال : مش غلطتي ، غلطتك انتِ ، انتِ الي جيتي وانتِ الي بديتي وانتِ الي تبي وانتِ الي مخططة لكل شي ! اني مش غبي باش تلبسيني تهمة ! مستعد نعطيك قد ماتبي تسافري اديري اجراءك وتروحي
ملاك بإستعطاف : لهالدرجة انت قاسي ؟ كيف يهون عليك تفكر تقتل ولدك ؟
أيمن : ولد انتِ امه مانبيشي ! وبعدين علاش مسميتيه ولد وجو وهوا حتى عروقه ما تكونوش ! قاعد نطفه وقاعد قدامك وقت تصلحي حياتك لأني اني مش نصلحهالك !
ملاك : حياتي وحياتك هادي !
أيمن : اسمعيني يابنت الناس ، زواج مانيش متزوجك ! والفلوس نبعتهملك وبري نزلي ، ونظمي حياتك
ملاك بعد ما مسحت دموعها وتنفست بعمق وشافتله بـ قوة وبطريقة تهديد قالتله : خطيبتك تعرف ان أني حامل منـك ؟
أيمن بدوره قاللها بحزم : خطيبتي لو عرفت وسيبتني ح نقضّي عمري كله نحاول نرجعها ولو كلفني الموضوع طلقـة في راسك !
ملاك انصدمت من الرد وقعدت مذهولة تشبحله
أيمن : هي أنزلي !
تلفتت للباب بذهول من اصراره وعناده وفتحت الباب ونزلت واتجهت لسيارتها وركبت ، يأست واقتنعت ان هادي نهايتها ، او ربما نهاية أشرف ليها انها تموت !
وصلت حوشهم وهي مش عارفه كيف وصلت ، نزلت من السيارة وخشت لحوشهم وبدلت حوايجها ومجرد ما اتكت ع سريرها بطنها لعبت وناضت تجري اتجاه الحمام ، فرغت شن كلت من بداية يومها كالعادة وطلعت وهي تبكي وشادة بطنها ومتسندة بإيدها ع الحيد وشافتها اختها وجتها بإستغراب
منيرة ( اخت ملاك الكبيرة ذات الشخصية القوية ، الأكبر منها ب سنتين ) : ملاك خيرك ؟
شافتلها ملاك بتعب : شي ، مريضة
واتجهت ملاك بخطوات متعبة لغرفتها
منيرة وهي تلحق في اختها : ليك مدة طويلة ع نفس الحال ! بري عايني
ملاك
ملاك خشت لدارها : عاينت !
منيرة : امتى ؟ او السؤال الاهم شن قالولك !؟
ملاك قعمزت بإرهاق ع سريرها : تبي تعرفي شن قالولي ؟
منيرة قعمزت بجنب اختها : اي ؟
ملاك بدت تبكي وبصعوبة قالت : قالولي حامل
منيرة : هههههههههههههههههههههههههههههههههههههه ، مبردك حتى وانتِ مريضة تتسهوكي ! غر هيا شن قالولك ؟
ملاك بتعب : والله حامل
منيرة : انشالله زي هالوقت السنة الجاية ، هي شن قالو
ملاك فقدت اعصابها وهو يتقول لإختها بعصبيه ودموعها يقطرو : حامل يا بهيمة حامل وحق ربي اني حامل !!
وقفت منيرة بصدمة وصلفقت اختها كف رياحي وقالت بعصبية وصدمة : شن تخفي شن تقولي ؟؟!!!
ملاك حطت ايدها ع خدها وزاد بكاءها
منيرة اتجهت للباب وسكراته بالقفل ورجعت لإختها بعصبية : مني ؟؟! تكلمي مني توا !!!؟
ملاك : أ أيمن !
منيرة انصدمت : ايمن ولد عمي ؟!
ملاك : من غيره
منيرة : كيف ووين وامتى ؟!
ملاك وهي تبكي : مشيت يومها بنردله البوكس امتع الهدايا ، طحت في حوشه وكتفي تزرق ، دخلني للدار باش يعطيني الكريمة ، وغرّه الشيطان وصار يلي صـار ، وتوا ناكر كل شي
منيرة : مستحيل ! كيف قصدك مش ح يجي يخطبك ؟
ملاك : لا
منيرة بعصبيه : اني نوريه
واتجهت لباب وطلعت بخطوات مسرعه ، خشت لدارها بدلت حوايجها ونزلت ، طلعت من حوشهم ولعت السيارة واتجهت لحوشه ،وصلتله ولقاته كيف درّس قدام حوشه
نزلت منيرة ووقفت قدام سيارتها تراجي فيه ينزل
نزل أيمن وشافها وتجاهلها وفتح باب الحوش وخش ولحقاته هي
منيرة بصرامة : أيمن !
أيمن خش للجنان وتلفتلها وهو عارف مبتغاها : منيرة الموضوع تسكر
منيرة جت ووقفت قدامه بقوة شخصيتها : مش بكيفك تفتحه وتسكره !
أيمن بنفس طريقتها : بكيف اختك تفتحه وبكيفي اني نسكره !
منيرة : شن تسحاب روحك ؟! تلعب ع بنات الناس زي ما تبي وتلوحهم هكي تسحابها ساهله ؟
أيمن : شن ذنبي لو بنـات الناس يجوني للحوش زيك هكي !
منيرة فتحت عيونها بصدمة : يا سخيف
أيمن : مش سخيف ، هدا الحق ! هي جت للحوش وموضوع خاص زي هدا مليكش علاقه ببه
منيرة : خاص ؟ بابا هدا موضوع يخص شرف العيلة كلها راه ويخصنا كلنا
أيمن : اختك مانيش واخذها ! انهي
منيرة تنهدت بصبر : أيمن ، شن رايك نوصلو لحل وسط ؟
أيمن بحزم حاد : مانبيش حلول معاكم ! خلاص افهمو
منيرة بإسلوب مُقنع : لالا غر اسمع خلينا نتفترضو انكم الزوز غلطو ! اعتقد انك راجل وطول وعضلات مشالله مش ح تعجز في دفان بنت من عليك وتطليعها البرا ! بس انت عجبك الجو ف لذلك تعتبر غالط معاها وزي ما يقولو الحق علي زايد العقل ، المهم انتو الزوز درتو الغلط ، وباش تكفرو علي غلطتكم ، انت تتزوجها ! وهي اطيح البيبي ! وبعدها اطلقها وتمت وترجع تكمل حياتك زي ماتبي
أيمن : لا ، مجبورة اتنزل بدون اي شروط
منيرة : هادم تنازلات منك ومنها باش تسترو العار والفضيحة الي درتوها
أيمن : دهشتوني النهارات ، اني اختك مانبيهاش
منيرة : تبيش تحلها ع الساكت يعني انت ؟
أيمن : نبيش نحلها نهائي
منيرة : تمام ، متلومنيش يوم توصل للتريس !
أيمن : نضمي امورك
منيرة : خلاص مية مية
وطلعت منيرة في غضب من محاولتها الفاشلة
ركبت سيارتها وقربعت الباب وهي تكلم في روحها : مكسح راسه ، لكن مش اني الي يفوت كلامه عليا !
وانطلقت للحوش
وفات اليوم عادي جداً عليهم وفات اسبوع علي هالحال واما في احدى ليالي الحُـب الي كانت جامعه حديث أيمن ورانيا :
أيمن : عندي حل احسن ! اني نسمي الاولاد وانتِ تسمي البنات 💖
رانيا : حسستني بنجيبو قبيلة 😂
أيمن : عجبتني الفكرة علاش لا ؟
رانيا : اي عندك الحق ، وانت شن واصلك !
أيمن : لا بجديات نحكي قلبي نبي هلبا صغار ، قصدي الحوش كبير ونبو دوشة فيه
رانيا : تلاته ساد
أيمن : في السنتين الاولات
رانيا : حبيبي ، اني نفكر ان السنة الأولى منجيبوش بكل
أيمن : شن ناوية بتقطعي النسل ولا شنو ؟
رانيا : قلت السنة الأولى بس
أيمن : علاش !؟
رانيا : يعني ، الصغار مسؤولية وصعب عليا كله من اول سنة
أيمن : تبيش تجيبي صغار ع خاطر المسؤولية ولا ع خاطر الخصوصية ؟ 😌
رانيا تحشمت ووجها احمر : نعرفش
أيمن : الزوز ؟
رانيا : يمكن
أيمن : ايه معاك لازم ناخدو فترة طويلة بـروحنا ، لأني مش طايقني صبر لليوم يلي بنكون فيه اني وياك في حوش واحد❤️ ! لكن في نفس الوقت نبي صغار تكوني انتِ امهم
رانيا : بجد حتي ني نفكر هكي ، قصدي نبي نقضي وقتي كله معاك ❤️ لا بيبي شاغلني ولا مراجعه حمل وراي ، ياسر هم الشركة والخدمة الي واخدة نص وقتنا
أيمن : تو احني نهدرزو في حاجات في علم الغيب ، انشالله ربي يكتبلنا الوقت الطيّب ويرزقنا الذرية الصالحة
رانيا تنهدت براحة : أميـن يارب ❤️
وبينما كانو يخططو لحياتهم المستقبليه كان فيه حد تاني يخطط لتدمير حياتهم :
ملاك وهي مقعمزه ع سريرها بإرهاق
منيره:خلاص بنقول لماما والي بيصير خلي يصير
ملاك نطت وشافتلها بخوف : مجنونة انتِ لو سمعو بوك احتمال يدفني !
منيرة شافت لإختها بغضب : وعلاش ما يتقتلش ولد خوه ؟
ملاك : لأنه راجل
منيرة : هاك قلتيها هو راجل وانتِ البنت ، يعني احني مش حنقولو ان انتو الزوز درتوها ! حنقولو هو اعتدي عليك
ملاك : شن تخرفي ؟
منيرة : اسمعي انتِ انسانه غبيه وضعيفة وبتاكليها لو قعدتي هكي ، خليني اني نتصرف
ملاك : تخيلي يمشي يقتله ؟
منيرة : مايقتلاش ! بوك يحب أيمن وحتى بعد الفسخ قاعد يعزّه ومتكل عليه في هلبا حاجات ، وبعدين تعرفيش بوك متفهم ومتفتح ، ح يضغط عليه لن يجي يخطبك بس
ملاك حطت ايدها ع بطنها : هدا الي نبيه ، أيمن والبيبي وبس ❤️
منيرة وهي تعزر في اختها : أيمن والبيبي وبس 😑
ملاك : زعما بنية ولا وليد ؟ 🤰🏻🤔
منيرة : انشالله حتى قرد المهم نحلو المشكلة الي حني فيها توا ! 😒
ملاك : خزي عليك 😑
منيرة : اسمعي بنقولو لأمك اليوم ، باش تقول لبوك وهو يحل القصة !
ملاك خافت : لا فكينا تجيها الجلطة
منيرة : سكري فمك خليني نتصرف
وطلعت من جنب اختها وفات اليوم اما تاني يوم الصبح وفي المشفى الي تخدم فيه دانية كـ ممُرضة :
دانية : بالشوية بالشوية متخافيش
المريضة : نخااف من اليبر 😭
دانية بصبر : ساهلة غر تلفي الجهه التانية ومتشبحيش
المريضة تلفتت وهي اتمتم : يارب يارب يارب يارب
دانية ابتسمت : ها خلاص كملنا ☺️
المريضة شافتلها بسعادة : حي والله ماحسيت حاجة ، صحيتي
دانية : سلمك حبيبتي ، انشالله لاباس عليك
المريضة ناضت وانصرفت ، وقعمزت دانية وتنهدت
علي خشة الدكتور محمد
وقفت دانية بإحترام للدكتور محمد المشرف
د. محمد : دانية
دانية : كملتلها دكتور
د.محمد ضحك : لا منحكيش ع البيشنت ، نبي نكلمك في موضوع
دانية : انشالله خير دكتور ؟
د.محمد : غر قعمزي ارتاحي
دانية قعمزت بفضول : انشالله خير
د.محمد بدوره قعمز ع المكتب امتع الغرفة
د.محمد : تعرفي ليا ايّام واني نفكر في هالموضوع ، وشاغلي بالي هلبا ، وقررت ان نكلمك فيه اليوم
دانية : والله خوفتني يا دكتور ! شن فيه ؟
د.محمد : بصراحة مش عارف منين نبدا
دانية عقدت حواجبها وهني كمل هوا كلامه
د.محمد : دانية زي ما تعرفي ان مرتي متوفية من سنتين ! واني ليا مدة طويلة ندور ع بنت الحلال الي تعبي مكانها ، اكيد مش ح نقعد طول حياتي اعزب ! ومن لما جيتي وبديتي تخدمي هني لفتيلي نضري بأخلاقك وحشمتك واسلوبك ، وحاس انك مناسبة ليا ولوضعي ، ف ياريت تعطيني مجال نتعرف عليك اكتر ونتقدملك
دانية تحشمت واحمرو خدودها : اه دكتور اني عندي صغار
د.محمد : وشن المشكلة ؟ عادي الحوش واسع ويجو معاك
دانية : بس يا دكتور اني كبرت ع العلاقات
د.محمد ابتسم : ومن قالك بنديرو علاقة ! بنجي نخطب طول
دانية : مش عارفه
د.محمد : وبعدين انتِ مش كبيرة قاعدة في العشرينات من عمرك
دانية : اواخر العشرينات
د.محمد : انتِ بس فكري في الموضوع ، وردي عليا
دانية : انشالله خير
وناضت دانية بعد ما حست ان الحياة يمكن تكمل في احضان رجل يستحقها ، الدكتور محمد ! الراجل الي كل بنت تتمناه ، شخص محترم وخلوق غير انه طبيب وحالته المادية ممتازة ! الموضوع يستحق التفكير !
طلعت من الغرفه وهي مش طايقها صبر لن تروح وتاخد راي اختها في الموضوع
اما عند رانيا الي بدورها كانت مقعمزه في مكتب ايمن ومعاهم مودة
ايمن : ابعتي فريق المراجعه غادي اليوم واني بعد غدوا ح نكون فاضي وبنمشيلهم
مودة : تمام
رانيا بعفوية : أيمن مفروض تمشي معاهم اليوم
مودة ضحكت : ههههههههههه جت فيا اني الحمدالله مش برانية
رانيا : خيرك ؟
أيمن : أستاذ أيمن هني يا أبلة ، وفي الحوش ناديني حنى مينو عادي !
رانيا ابتسمت : عادي مودة من العيلة
مودة : محلاكم ❤️
رانيا : ومحلاك هيا نكملو شغلنا باش نروحو
أيمن شافلها بإستغراب : خيرك مستعجله ع المرواح ؟ صايره حاجة ؟
رانيا : لالا عادي ، بس تعبانه بنرقد
مودة : ايييييي مش منك ! تراهو ساهرين امس ومهدرزين لن قايلين ياسر 😂
رانيا : هههههه يا باردة
وكملو خدمتهم وروحو ، ومع جو العشيات في حوش اهل رانيا :
كانت رانيا ودانية ومرت بوهم سامية مقعمزين ويشربو في شاهيهم وجوهم مليح
سامية مدت لرانيا صحن الكيك : زيدي طرف تاني
رانيا : لا الحمدالله شبعت
سامية : تي خودي باش تسمني ، عاد توا بتتزوجي لازم تزيدي كيلوات ع الاقل يلقا البيبي وين ينبت
رانيا : هههههه مش في الدهون ينبت راه
دانية : حتى كان مش ع خاطر البيبي ع خاطر بو البيبي 😌
رانيا : أيمن عاجبه جسمي هكي 😎
دانية : اي غر يشوف فيه بالحوايج يسحابه فيه ، لكن ح ينصدم
رانيا : لالا شن مش شايفني بالسواري الخفاف واضحة ، وبعدين اني ضعفي مش المشين عادي ، انتِ كولي رحتي شوينة
دانية : صدقتي حتى ني لازم نسمن ع الاقل يطلع عليا الفيلو حلو
سامية : غر فيلو شني مزال خاطرها تتزوج هادي ؟! 😂🤦🏻♀️
دانية : اي عادي ، اصلاً جايني موضوع
رانيا : بجديات ؟
دانية : والله
ساميه : تكلمي
دانية : الدكتور محمد مشرف القسم ، جي وكلمني اليوم ! وطبعاً هو مرته متوفية وهو عقيم مسكين ، يعني يبي صغار يربيهم ويربح فيهم الأجر
رانيا ساوت تقعميزتها بحماس وتلفتت لأختها : قصدك عبرلك ع حبه ليك وهكي وجو ؟
دانية : عينك ، دوبه قالي ان لفتله نظره بأخلاقي واسلوبي وانه يشوف فيا مناسبه لوضعه بس
وقطع عليهم صوت تشرين الباب
رانيا شافت لسامية : بابا طالع ؟
سامية : لالا في داره يتفرج
رانيا وقفت بإستغراب : خلي نمشي نشوف من جاينا
واتجهت للباب وطلعت وفتحت باب الجنان كعادتها من غير ما تسأل منو ، وهني كانت الصدمة
رانيا : اه هدا انت !!! 😳
