#معشوقتي 10
رانيا : ااه ، بصراحة فكرت
أيمن : اي ..؟!
رانيا : مش عارفة انت محكيتليش علي حياتك العاطفية قبل ، يعني هل كنت مرتبط ؟ هل حبيت ؟ وهكي يعني
أيمن : اي صح محكيتلكش لأن منشوفش فيه حاجة مهمة تستدعي ان نحكيلك عليها ! لكن لو تبي تعرفي من حقك ، ارتباط اي ارتبط زيني زي باقي الشباب ومشي كله بالجو ومافيش ولا حاجة رسمية ! وليا مدة عليهم المواضيع هادي
رانيا : هكي تمام نقدر نأكد ع قراري
أيمن ابتسم : والي هو ؟،
رانيا : انشالله تطلع قد الفرصة
أيمن بسعادة : الحمدالله ❤️
رانيا : مع اني الحق ماعنديش خلوق للعلاقات خايفة نبهدلك معاي
أيمن : احلا تبهديل ورب العزة
رانيا ضحكت بخجل ، اما هو قعد يشبحلها ومبتسم وهو يحاول يشفي غليله بجمـالها ❤️
أيمن : بس نطلب منك طلب ؟!
رانيا : شنو
أيمن : ياريت الموضوع هدا يقعد بينا رانيا ، مانبيش الموظفين يسمعو ويبو الي يبي حاجة يتوسطلي عن طريقك ويستغلو الوتر الحساس
رانيا بإستغراب : انشالله
أيمن : ويوم الخطوبة بإذن الله حتسمع الشركة كلها ، انك ليـا واني ليـك 💕
رانيا احمر وجهها وقالتله : انشالله ، نستإذنك توا عندي خدمة
أيمن : بالرغم ان ماينشبعش منك ومن كلامك ، بس اذنك معاك
ضحكت رانيا وناضت وطلعت من مكتبه وشعور من السعادة غامرها ، اول مرة في حياتها تحس انها مصدر فرح لـحد وهي اللي لسانها اطول منـها ، اول مرة تحسانها شاغله تفكير حد ❤️ حلو الشعور حلو جداً
بس افسد مزاجها الرايق اتصال اختها الي امرتها ان تجي وتاخدها من الحوش ، وبحرارة قلبها قبل مايتم الدوام طلعت واتجهت لشقه اختها ، ركبت وشرينت وفتحلها يوسف
يوسف : اهلاً اهلاً
رانيا : وين دانية ؟!
يوسف : غر كيف حالك قبل
رانيا غمضت عيونها وقالت بعصبية: وين دانية ؟!
يوسف : دانية راقدة ، شن تبيها
رانيا شافتله بعدم تصديق ودفاته وخشت : ووووويييين اااخخخخخختتتتي ؟؟؟!
يوسف : نقصي صوتك راقدة قتلك
وفجأءة سمعت تخبيط باب دار النوم
رانيا شافتله بغضب : راقدة صاار هاا. !
واتجهت ناحية دار النوم وحاولت تفتحها لكن لا جدوى
رانيا شافتله بعدم محاولاتها الفاشله بغضب : حااابس اااخخختي في الدار ؟! شن عصفور عند بوك هيااا ؟؟! افتحلي الباب
يوسف ببرود قعمز ع الصالون : مش فاتحلها ، وطاعة الزوج واجب !
رانيا : طاعة الزوج ! مش طاعة الكلب !
يوسف اتكا ببروده المستفز : غلطاتك هلبا انتِ يا بنت ! وهدا كله حيولي ع اختك
رانيا : انت شنو متخافش ربيي ؟؟! تحشم ع وجهك وافتحلي الباب لا نطلع نعيط ونلم عليك الناس كلهم توااا
يوسف : لا
رانيا : تمام !!
ووجت بتطلع وهي تهدد فيه : والله لما نلم الناس عليك ونفضحك
ونط يوسف بخوف واتجه بسرعه ناحية دار النوم وهوا بفتح الباب بخوف : ح تشوفي شن حندير فيكم تعالي جاي اهو فتحتلها
رانيا سكتت وشافتله وهوا يفتح ، فتح الباب وطلعت مياروهي تبكي ودانية الخايفة بسرعه وخدت رانيا الشنطة من اختها وطلعو ،
ركبو السيارة وطلعو صاروخ
دانية انهالت بالبكاء هي وبنتها
رانيا : خلاص خلاص مصار شي اهو طلعتو
ووصلو للحوش ، نزلو وخشو ، وفات عليهم اليوم عصيب جداً وكان الشي الوحيد الي يمكن يخفف علي رانيا عصبية يومها هو اتصال أيمن بيها مع الساعة 11
شافت رانيا لهاتفها الي انار الدار المطفية بسبب نوم ميار ودانية المتعبين ، قاماته بتردد وطلعت للبلاكونة كان الجو حلو مع نسمات دافئة ، وردت
رانيا : ألـو
أيمن كان راقد جي مقعمز : الو رانيا
رانيا : اهلين استاذ ايمن
أيمن : أيمن رانيا ، ايمن
رانيا : صعب شوي تو نتعود
أيمن : انشالله ، كيف حالك شن مدايره
رانيا : الحمدالله ، اهو كيف اتكيت بنرقد وانت ؟
أيمن : مكسد ، ترقدي بكري ؟
رانيا : اي ، شن عندي ندير في هالليل
أيمن : الباين ان حنلخبطلك روتينك شوية 😅
رانيا : علاش ؟!
أيمن : يعني مكالمات واتصالات وسهر
رانيا : علآش هدا كله ؟!
أيمن : كيف عاد مش بنهدرزو !
رانيا : اهو نتلاقو الصبح ونهدرزو ، ساد !
أيمن : هههههههههههههههههه اول مرة اديري علاقة ؟
رانيا بخجل : قصدك واضح ؟
أيمن : هلبااا ، لكن حلو حبيته هالموضوع فيك ، ارتباكك ، وعفويتك ، يعني نادراً واحد يلقا زيك في هالوقت
رانيا : شن بنقولك الحق منعرفش نرد علي الكلام الحلو ، شكراً 😂
أيمن : تو تتعلمي 😂
رانيا : اي انشالله
أيمن : خيره جوك ؟! نحس فيه مش زي قبل ؟
رانيا : شي عادي جوي
أيمن : وورب العزة في حاجة ..؟
رانيا : عندي شوية ظروف صعبة في الحوش ، بس
أيمن : يعني اتصلت بيك في وقت غلط ؟!
رانيا : يمكن ، لكن عادي
أيمن : جاملي قولي والله مصارت عادي حتى بالكدب 😑
رانيا : قتلك بنبهدلك معاي 🤦🏻♀️
أيمن : عادي عادي
وقطع عليهم خشان ملاك علي مكالمة ايمن وهو يهدرز
أيمن : رانيا خليك لحظة بوي يتصل انشالله خير
رانيا : اوك
وخشت رانيا لدار دانية سابقاً وركبت سماعات واتكت في سرير اختها
اما أيمن كان حاصل في ملاك
ملاك : في منو كنت تكلم ؟!
أيمن : بووي ؟؟ خيرك. شن فيه
ملاك : نبي نهدرز عليك ، استاحشتك ❤️
أيمن : ملاك تعبان بنرقد ، نهدرزو يوم تاني
ملاك : أيمن حبيبي ليك اسبوعين ولا اكتر محكيتش معاي ساعه علي بعضها ، والله مستاحشاتك موووت راه
أيمن : ملاك تعبااان ، تفهمي شن معناها تعباان !! نبي نتمرقد
ملاك : باهي واني ؟
ايمن : ارقدي حتى انتِ
ملاك بإنكسار : باه براحتك ، تصبح ع خـ...
وسكر عليها الخط ، وعاود لـ رانيا بشوق
وردت عليه بصوتها النعسان في اخر رنة
رانيا : ألــو 😴
أيمن : رقدتي ؟
رانيا : قريـب
أيمن : سامحيني غر بوي اتصل يسأل علي اوراق
رانيا بعدم مبالاة : لالا عادي خود راحتك
أيمن : حسيتك نعستي ؟
رانيا بتعب : ههلباا
أيمن : باهي واني خاطري نهدرز معاك
رانيا : هدرز أيمن نسمع فيك
أيمن : تصدقي ، اول مرة نعرف ان اسمي مليح هكي 😍❤️
رانيا بإستغراب : كيف عرفت ؟
أيمن : لما قلتيه انتِ بصوتك ، من غير استاذ
رانيا : هههههههههه ، انشالله بطول العمر
أيمن : اني وياك يارب
رانيا : حقا بنسألك ؟
أيمن : نعم ؟
رانيا : شن صار في سفيان ؟! قصدي مختفي اختفاءة تخوف
أيمن : علاش شاغله بالك بيه توا ؟
رانيا : لا بس مستغربه كيف مختفي هكي
أيمن : سفيان حبسته في كتيبه امنية ، مش مليشيات ولا حاجة هي تبع جهاز امني ، ورفعت عليه قضية ، وقاعدين ياخدو فيه اجراءات ، يمكن لو مشي موضوعه ، ينحبس اقل شي سنتين
رانيا : يعني خوفني صمتهم الحق ، لا سألو عليه ولا دوروه
ايمن : يمكن لأن عارفين ولدهم غالط !
رانيا: وهي بلاد يعرفو الغالط والمغلوط عليه ؟ ماهو يشوفو فيهم زي بعضهم والبقاء للأقوى
ايمن : توا انتِ علاش تجبدي في سيرته وتنكدي علينا ؟! معاش دخلك فيه انسيه موضوعه
رانيا : لا بس خايفة الحق
ايمن : من شنو ؟
رانيا بـ ببراءة وعفوية : ان يدورك ويديرلك حاجة !
أيمن : هههههه للدرجه هادي هامك اني ؟
رانيا : اي اكيد ، في النهاية لو صارتلك حاجة لقدر الله بتكون بسببي اني 💔
أيمن : متخافيش ! الموضوع شبه تم بإذن الله
رانيا اثاوبت وقالت : نتمنى !
أيمن : الباين ان خلاص
رانيا غمضت عيونها بنعاس : والله معاد فيها 😴
أيمن بــ حنية : خلاص ارقدي ارتاحي ، نبيش نسهرك اكتر من هكي 💕
ولما مردتش عليه ، عرفها رقدت
أيمن ابتسم : تصبحي ع خير يا وجهه الخير ❤️
وسكر الخط براحة ، حط هاتفه وهوا حاسس نفسه مع البنت الصح ، لكن في الوقت الغلـط 💔
ورقد بسعادة بعد تفكير دام لدقائق
اما تاني يوم في الشركة ، وبعد مرور ساعه علي بداية الدوام ، كان ايمن غارق في الشغل والمكالمات لن خشت عليه ملآك
أيمن قام عيونه من ع الاوراق وحط البيرو
أيمن بعصبية : انتِ شن جايبك هني ؟
ملاك سكرت الباب وجت قعمزت وقالتله : الحُب ❤️
أيمن : بلآ حُب بلآ حطب ! شن تقولي انتِ !! هدا مكان خدمة مش مطعم ولا مقهى ! نوضي روحي
ملاك بإنكسار : ايمن شن صايرلك فهمني حبيبي ! كانك ع الخطبة بطلنا موضوع اعلانها ! شن مضايقك مني تاني ؟
أيمن : مش وقت ولا مكان نقاش هني ! خلاص لمي قشيشك وانتلفي
ملاك والدموع في عيونها : بس اني نحـ..
وقطع عليها ايمن لما كشخ : خلااااص قلنا ! وين تسحابي روحك في مسلسل تركي ولا هندي ؟ نوضي روحي بلا عار
ملاك : اني اسفه لو زعلتك مني
ايمن بنفاذ صبر : انتِ تفهمي ؟؟ قتلك نوضي روحي بالعرب!!!
ملاك وقفت : تمام ، اني وراه موضوع تغيرك المفاجأ هدا وراسك لما نزبطه
أيمن : باهي سلام هي سكري وراك الباب
وطلعت وجبدت الباب بإيدها وأيمن علي اعصابه ان تكون رانيا شافتله او سمعت بجيانها
وبعد دقائق خشت مودة
مودة : تفضل استاذ مستندات اليوم
أيمن خدي منها : مودة ، كلمي رانيا اسأليها علي معاملات اخر صفقة !
مودة : رانيا مجتش لتوا استاذ
أيمن عقد حواجبه بإستغراب : علاش الساعه كم هي توا ؟
وشاف لساعته : غريبة ! الدوام ليه ساعه ونص بادي ! صح تتأخر لكن معمرهاش فاتت الربع ساعه
مودة : توقعتها خدت اذن منك !
أيمن : لا والله ، اتصلي بيها شوفيها
مودة : انشالله ، اي خدمة تانية استاذ ؟
ايمن : شكراً
وطلعت مودة وشكها بدي يحول لـ يقين ، حتى قالو مافيش علاقة ، هو يحبها ❤️
مقدرش ايمن يقاوم فضوله وشد هاتفه واتصل بيها ، وردت عليه اختها في المكالمه الثانية
دانية : ألو
وبسبب التشابه الكبير في صوتهم أيمن يسحابها رانيا : صباح الخير
دانية بإستغراب : صباح النور ؟!
أيمن : وينك لتوا ؟ خوفتيني عليك راه
دانية استغربت اكتر : معليشي مني معاي ؟
أيمن انصدم : رانيا ؟! شن جاك ؟! اني أيمن ! مش مخزنة رقمي ولا شنو ؟
دانية : وخي اني اختها دانية ، ورانيا راقدة
أيمن تحشم : اااه سامحيني اختي ، اني مديرها واستغربت انها قاعدة مجتش لتوا !
دانية : مريضة بردة ، ومش قادرة تنوض من فراشها ، هدا علاش يمكن مخدتش اذن لانها ناضت الصبح لقت روحها حاالة
أيمن : لاباس عليها ؟ امس كانت كويسه ! مقوية في المكيف ولاشاربه حاجة مصقعه هلبا ؟
دانية : اي بردة من المكيف ، اي خشيت لقيت الدار فريز
أيمن : باهي سلميلي عليها ، وانشالله لاباس عليها وتاخد حتى اجازة تلاته ايام ترتاح فيهم مش مشكلة
دانية : شكراً بارك الله فيك
أيمن : وفيك بارك الله
دانية : سلآم
وسكر الخط في ضجر
اما عند ملاك الي كانت تكلم في صديقه روحها وبنت عمها سناء
ملاك وهي تسوق بعصبيه : لزززني تخيلي لزززززني من مكتبه
سناء : انتِ غبية ! مرات هو يحب وحدة في الشركة هدا علاش تعصب لما مشيتيله غادي ، يقولك تو تفضحني
ملاك : نبي نعرف اني في ششن مقصره معاه باش يعاملني هكي ،نحبه يا سناء نحبه موووت
سناء : راك تموتي بس ، اسمعي تعاليلي في الحوش ونهدرزو علي مهناش في تونس ومنه الواحد يدير راي في قضية اللُكربي متاعك
ملاك : تمام
سناء : نراجي فيك ، باي
ملاك : باي حبيبتي
اما عند رانيا الي كانت مدايرة كمادات ووتتألم من بطنها ، شرين باب حوشهم
نزلت دانية فتحت وانصدمت لما شافت الطبيبة واقفة قدام الباب
دانية : تفضلي اختي ؟
الدكتورة : السلام عليكم ، منزل رانيا ؟
دانية : اي ، تفضلي ؟
الدكتورة خشت بكل جرئة : جاية لغرض معاينتها
دانية بارتباك : طبعاً مرحبتين بيك تفضلي تفضلي
وخشت الدكتورة علي رانيا الي استغربت بدورها ، عاينت حالتها واعطتها علاج كان معاها من ضمن حقيتبها المليانة بالأدوية ، وهبت للإنصراف لكن رانيا استقوفتها بعد ما قعمزت بتعب وقالتله
رانيا : دكتورة ، من باعتك ؟ العيلة مطلبوش طبيبة !
الدكتورة عقدت حواجبها بإستغراب : كيف ؟ نبي خطيبك باعتني ؟
رانيا : خطيبي ؟!
الدكتورة : كيف مش مخطوبة انتِ ؟
رانيا فهمت : اي استغربت لأن متعاركين بس
الدكتورة : لالا اتصلي بيه واشكريه ، الباين انه ولد حلال ويحبك ، ولا كنهادا مايبعتنيش ويتكفل بحق الدواء والمعاينة ، وقتنا هدا حتى الراجل مايديرش هكي لمرته
رانيا ابتسمت : انشالله دكتورة ، شكراً
الدكتورة : العفو حبيبتي
وطلعت روحت
خشت دانية بإستغراب وقعمزت جنب اختها
دانية : الحمدالله طمنتنا الدكتورة وقالت انها بردك بسيطة ، يومين وتصحي انشالله
رانيا : انشالله
دانيا : رنو ، خيرك مقتيليش انك ارتبطي ؟
رانيا استغربت : من قالك ؟
دانية : رديت ع هاتفك بكري ، اتصل بيك ايمن المدير والي هو حبيبك
رانيا : شن قال
دانية : وينك لتوا خفت عليك 😌 ، واني طبعاً عرفت باقي النعته !
رانيا تحاول تتهرب : لأ عادي هو هكي اسلوبه
دانية : مشيها علي ميار يا حلوة ، بعدين هو هكي اسلوبه وباعتلك دكتورة للحوش ؟ شن ضمان صحي ولا شني بالزبط
رانيا : عادي
دانية : بس تصحي ، بتحكيلي كل شي بالتفصيل الممل !
رانيا بتعب : انشالله
يتبع ..
شن تتوقعو يصير الحلقة الي بعدها. ؟❤️
