كلامي صدمني من جواي قبل منهم بس م كان ف ايدي حاجه لما لقوني م جاوبت تاني غيرو الموضوع بس انا م طلع من بالي ابدا لما رجعت البيت وجا ف بالي الولد بتاع ال #القلب_الازرق 💙 مدري ليه مشيت دخلت صفحتو وبتفرج علي صورو لاحظت ل انو اغلب البوستات بتاعتو عن events في حياتو اغلبها عن فرقه وكلام دكاتره ف شلت اسمو واخترقت الحساب بتاعو والميل عرفت كل حاجه عاوزه اعرفها عنو :
اسمو عبدالله عندو 36 سنه دكتور . شغال تابع ل طاقم طبي ممتاز متخصص غير انو كثار دي بعرفااا من صورو .. علاقاتو مع البنات م كتيره ع السوشيال ميديا عدا عن البنات اللي ف حياتو قرايبو وصحباتو واخواتو 😒.والدكتورات المعاو وخصوصا وحده اسمها غفران م فضل لي الا اشيل عنوان بيتم وامشي ليهو😒 .. قفلت البحث وفتحت المسنجر لقيت رساله من عبدالله معلق لي علي بوستات كتيره انا منزلاهاا انبسطت م ادري ليه بس ك نوه من انواع الغبااء الوجداني والغرور الحاصل لي قفلتوو ورقدت نمت ..
الاجازه زي م هي قضيتها نووم من السرير للكنبه بليل ع الهاكرز وبنهار بنووم يوم عيوني اتورمت واتهيجت وبقت حمراا شديد جيت طالعه من غرفتي ع المطبخ اشيل تلج لقيت حبوبه ف وشي ي بت مالا عيونك كده حمراا ووارمه كنتي بتبكي قلت ليها لا واجعاني م انتظرتني اكمل قالت لي البسي عبايتك وارح الدكتور قلت ليها انا زاتي دكتوره مامحتاجه ل احد عاينت لي مسافه المهم احرجتني طوالي سكتت .. عملت اتصال وجاتني قالت لي مش مادايره تمشي الدكتور زاتو بجيبو ليك هنا جات بعد ساعه كده دكتوره ف التلتينات اسمها عفراء دكتوره عيون بعد عاينت لي وكده قالت لي الضووء تخففيهو الفتره دي ابعدي عن الجوال والكمبيوتر والنظاره محتاجه تتغير كتبت لي علي مرهم وحبوب ومس شكرتها وفاتت طوالي .. 😔
-بعد العصر حبوبه كانت جمبي شايفاها كل شويه تعاين لي قامت قالت لي امك قبيل اتصلت بتسال عنك قلت ليها صحي حلو طيب كيف هي قالت لي كويسه . م وريتك خالك ايوب بكره جاي ب اولادو عشان تكوني عارفه قلت ليها ي حبوبه اسمعيني انا ابدا مابيهموني لا خالي ولا جدي زاتو اذا كان اهلي انا م فارقه معاهم ومشغولين عني ب مشاغلم الباقين يفيدوني ب شنو؟! م بفرق معاي زول غيرك انتي ولو عاوزه تقنعيني ب العكس بخلي ليك البيت واشوف لي داخليه .. بس قبضتني من ايدي قالت لي الاسلوب ده عدليو نسيتي الجلده قلت ليها عادي دقيني تاني وح ارجع اقول نفس الكلام بقت محتاره معاي .. رجعت غرفتي لبست لي عبايه وطلعت .. الحساب بتاعي م فيهو ولا قرش قمت اتصلت ع ابوي اول م ردا لي قلت ليهو حسابي ليه م فيهو فلوس؟! قال لي لاني ععوز اعرفك بتتصرفي من وين وحبوبتك م بتدي ليك ؟! الوقت ده كلو .. قلت ليهو عمرك م حتعرف . عمري م ح احتاج ل قروشك وفتحت الكاميرا وقطعت البطاقات الائتمانيه قدامو وقفلت .. مشيت ل حبوبه قلت ليها عاوزه قروش ادتني بدون نقاش طلعت طوالي مشيت عملت كشف نظر قالو لي النظاره تجهز بعد ساعه مشيت الصيدليه اشتري المرهم والحاجات الكتبتم لي الدكتوره .. لسه م ادوني ليهم جا داخل راجل وبقا يكورك عارفه اني لو فضلت ح انفعل ودي م حاجه تخصني شلت حاجاتي بسرعه وطلعت .. ع المستشفي شلت النظاره وماشه شفت بنوته عندها زي اربعه سنوات واقفه براها وبتبكي بكا هستيري .. نزلت وبقيت واقفه متابعاها م عارفه ليه بس كده بكاها ده م بكا ساي .. اكتر من ربع ساعه والبت بتبكي مشيت ليها قلت ليها ليه بتبكي قالت لي بصوت مليان بكي م لقيت حبوبه مشت وخلتني قلت ليها طيب ماتبكي انا ح اقعد جمبك لحد م حبوبه تجي بقت ماسكه ف ايدي واحنا قاعدين قريب تلاته ساعات والدنيا ضلمت ولسه م جا زول والبت ابتدت تبكي تاني قمت قلت ليها انتي بيتكم وين قالت لي جمب الجامع قلت ليها اسمو جامع شنو قالت لي فيهو شيخ النعيم كنت مستغربه ان كيف طفله زي دي اهلهاا يسيبوها للوقت ده وم بفتشو عنها سقتها ومشيت اول جامع لاقاني كانت صلاه العشا . سالت راجل قال لي شيخ النعيم في الجامع القدام مشيت تاني سالت قالو لي اي موجود بس بيصلي المشكله انو البت نامت .. طفله ياخ بجد كسرت خاطري اتمليت ملي قلت الواحد كان يسوقها ويمشش ويخلي اهلها يولعو بت زي البسبوسه لو لقاها احد وساقها ح تعمل شنو؟!
ملاحظه اي عارفاها متكرره: بس ياريت اي ام تنتبه لاطفالا م يتكلمو مع شخص غريب في الشارع .. م ياخدو حاجه من زول غريب ولو حتي حلاوايه الا وانتو موجودين الذمن بقا كعب والنفوس م نضييفه .. الكلام ده علي عاتق الامهات ب الذات .. "
بقيت واقفه م عارفه اقبل يمين ولا شمال قلت اكيد اهلها بيفتشو عليها اقرب بيت جمبو ناس مشيت عليو ب العربيه نذلت وخليتها جوا نايمه الطفله اسمها نون .. لقيت وحده بتبكي قلت ليها خير ي اخت مالكم قالت لي انتي منو قلت ليها جارتكم هنا . قالت لي اختي دي بتها م لاقينهااا شافعه مرقت مع حبوبتها وحبوبتها عندها زهايمر وشوفه عينك نفتش ومحل دخلت م اتلقت وووووواي ي اختي الله يصبرررك .. قلت ليها ايوااه عاينت لام نون كانت بتبكي وقاعده متكرفسه يقولو ليها ارح خشي جوا بتتلقي حلفت م تتحرك . قالت ليهم انتو م بتحسو انا بتي ضايعه م بتعرف شي ف الدنيا تقولو لي بتتلقي ماف زول يسالني الداير يخش يخش وخلوني ف حالي وقعدت تبكي وخاته ايديها ف وشهاا كسرت خاطري والله لمن دمعتاا😭. قمت مشيت ليها .قلت ليها ممكن تجي معاي قالت لي ب استغراب وين قلت ليها تعالي وحتعرفي مشت معاي جمب العربيه قلت ليها لقيتها جمب سوبر ماركت بتبكي قالت لي بيتنا جمب جامع شيخ النعيم م صدقتني فتحت ليها الباب لقتها نايمه طوالي سجدت وبقت تقول الحمدلله الحمد ليك ياااارب وقامت علي ضمتني 😢😢😢😭وهي بتبكي
يتبع
