-
مرت الايام بطيئه.. عمر ابوه طلبه يقعد اسبوع زياده فالكويت و ما عنده سبب مقنع يرفض فوافق بما ان لندن كلها اجازه للكريسمس و عطلة راس السنه
"اسبوع زياده؟" يسأل بدر باحباط، يلوي عمر شفايفه، منسدح على فراشه و التليفون على اذنه
"اي طلب مني و ما قدر ارفض" يرد، بدر تنهد و هز راسه
"انت تبي هالشي؟" يسأله
"اكيد اهلي بقعد معاهم" يرد عمر
"تمام دامك يعني.. اذا تبي هالشي براحتك لاحق على شوفتك" يقول له من ورا قلبه، رغم انه ميت على شوفة عمر لكن ماراح يقول له
"تمام..-" يسمع احد يطق باب غرفته "ادخل" يعلي صوته و يدخل معاذ
"منو تكلم؟" يسأله بفضول مقرب له
"بدر" يرد عمر
"و احنا كل ما جيناك لقيناك تكلم بدر؟" يسأله
"شاللي مضايقك؟" يرد عمر بعصبيه
"مو مضايقني قول حبيبتك و بنصدقك" يرفع كتفه و عمر يحطه سبيكر "بدر" يناديه
"عيونه" يبتسم و يشيل عمر السبيكر، حاس بحراره بخده على رد بدر جدام اخوه
"صدقت؟؟ كبرك اجذب عليك" يتكلم بنفسيه شايل السبيكر و يركب سماعاته
"زين يا حبيب بدر انت تبي نطلع باجر نتريق؟ بكلمك بموضوع" يقول له و عمر جعد حاجبه
"شنو موضوعك؟ قوله الحين" يرد عمر و يتنهد معاذ
"لا تستعبط خلاص قلت باجر ليش مو الحين مالك دخل" يحرك يده قدامه و يتنهد عمر
"خلاص تمام قعدني ماراح احط منبه" يقول له و يقلب معاذ عيونه
"زين خرا فيك ارضع مع بدر" يقول له يقصد يسهر وياه لليل و هذه كلمه تنقال للحبيب اللي يسهر مع حبيبته بالتليفون للفجر
"اكل زق و سكر الباب وراك و الليت" ينسدح مغطي نفسه، يسوي اللي قاله و يطلع
"هذا اخوك؟" يسال بدر
"لا حبيبي" يرد عمر و يضحك بدر
"صاير تسلك كثير! شخصيتك تتغير بالكويت يعني؟" يسأله و هو كالعاده بمكانه لما يكلم عمر بالبلكونه
"اي شخصيتي على حسب مكاني" يرد مستعبط عليه
"طيب دام السالفه كذا ضروري تكون فحظني نشوف كيف بتكون شخصيتك" يرد بدر و هو يلعب بالفاتوره بيده
ابتسم عمر و ما عرف بشنو يرد "القطه اكلت له لسانه؟" يسأل و يضحك عمر
"شلون كان يومك؟" يسأله مضيع السالفه، يسولف له بدر و يتبادلون المواقف اللي صارت لهم بيومهم، لحد ما كالعاده عمر نام عالخط، بدر ما سكر التليفون و هو يسمع انفاسه المنتظمه و مبتسم، خصلات شعره القصيره تتطاير من نسمات الهوا البارده، القمر بالمدى البعيد يضوي المدينه بانوارها بمدى البصر، تسبقها خضار الحديقه و اشجارها، هدوء الليل و عتمته، مع سماع صوت انفاس اكثر شخص مشتاق له تنهد منزل راسه
أنت تقرأ
غُربه موحشه
General Fictionسفره ، دراسته ، عيشه بعيد عن اهله ، لوحده.. كان له عواقب يتحمل نتائجها بسبب قرار لحظي اتخذه بتردد غير حياته بشكل مخيف مو مخليه ينام الليل، ولا يمارس يومه عادي فالنهار، دخل قلبه اللي قلب عالمه و حاله و خلاه يكره العالم اللي هو فيه مجتمع مو متعود علي...
