العنيد - لشيماء محمد

الفصل العاشر - الجزءالثاني

الكل ساكت وبيبصولهم وادهم كمان سكت ولاحظ ان ابنه واقف بعيد بيبصله جامد ودموع في عنيه
ادهم: سوري يا مصطفي عارف ان مش وقته بس بجد انتو استفزيتوني....  مبروك عليكي يا عروسه بعد اذنكم
سابلهم المكان ومشي وخروجه كان مهيب كالعاده زي دخوله
ليلي انسحبت من قدام الكل تعيط بعيد لوحدها بس لقت ابنها وراها بيعيط معاها
يوسف: ماما لو انتي مش عايزاني احبه فمش هحبه ابدا
ليلي ضمت ابنها جامد قوي
ليلي: لا يا حبيبي انا عيزاك تحبه
يوسف: بس هو بيزعلك؟؟
ليلي: علشان انا زعلته جامد....  انا اللي خليته يسافر ويمشي ويسيبنا....  انا عملت حاجات كتيره زعلته مني وانا اللي لازم اكفر عن اخطائي دي بس مش عارفه ازاي يا يوسف
يوسف: بابا مش بيحب اللي بيعيط يبقي تبطلي عياط علشان يحبك
ليلي مسحت دموعها وابتسمت لابنها الجميل البسيط
رجعت تاني لاخوها ووقفت معاه لحد ما ليلته خلصت او هما خلصوها بسرعه

ادهم السمسار كلمه وطلب يقابله يوريه فيلا
وراحله وعجبته الفيلا جدا وعجبه حمام السباحه بتاعها
كانت بسيطه ودورين وفيها جنينه مش كبيره بس كويسه وفيها حمام السباحه رائع
ادهم خلص فيها وجاب مهندس يفرشهاله بسرعه
ادهم قاله علي الخطوط الرئيسيه اللي هو عايزها والمعندس بيخلص فيها وخلال اسبوع سلمهاله
ادهم عجبته الفيلا جدا وحس بالانتماء ليها
راح زي ما قال لمراته الخميس ياخد ابنه وقابل ليلي في المدرسه
ادهم: هو انا مش بلغتك اني هاخده الخميس؟
ليلي: انت ما اكدتش عليا امبارح
ادهم: وانا من امتي بغير كلامي؟ 
ليلي: ما بتغيرش يا ادهم بس ظروف شغلك ساعات بتغير هيا
ادهم: كنت هتصل بيكي واعتذر....  المهم انا هاخده اتفضلي انتي
ليلي: وهدومه؟؟؟  ولا مش هتخليه يغير التلات ايام دول؟؟؟؟
ادهم: طيب اتفضلي اسبقينا علي البيت وجهزيله شنطه صغيره وانا هجيبه وهحصلك
ليلي سابته ومشيت بعربيتها ويوسف خرج لقي ابوه جري عليه فرحان ونط في حضنه
ادهم اتعلق قوي بابنه
ادهم: عندي مفاجأة ليك
يوسف: ايه هيا؟ 
ادهم: لو قولتلك متبقاش مفاجأة اصبر وهتشوف
يوسف: ماشي طيب ممكن اطلب منك طلب؟؟؟
ادهم: قول
يوسف: هتوافق؟
ادهم: لو اقدر هوافق
يوسف: وعد؟ 
ادهم: وعد ايه بالظبط؟؟؟
يوسف: انك لو تقدر توافق؟
ادهم: اه وعد لو اقدر هوافق
يوسف: ماما تيجي معايا تشوف مفاجئتي علشان تفرح هيا علي طول زعلانه ورجعت مش حلوه تاني؟  ينفع ماما تيجي معانا؟؟؟ 
ادهم اتنهد: اه ينفع يا ابن امك
يوسف: علي فكره انا ايوه ابن ماما وعايز حتي لما اكبر وابقي راجل زيك ابقي ابن ماما برضه وافضل احبها
ادهم اخد فرامل ووقف وبص لابنه
ادهم: وانا امتي قولتلك بطل تحبها؟؟؟ 
يوسف: انت عايزني ابعد عنها مع انها علي طول توريني صورك علشان مش انساك وعلي طول توريني حاجات انتو بتعملوها مع بعض وعلي طول تقولي حب بابا وانت لأ قولتلي ابعد عن ماما وما تتعلقش بيها

ادهم: انا ما قولتش كده او انت فهمتني  غلط
انا قولتلك ما ينفعش تعتمد علي ماما مش ابعد عنها
يعني مثلا الحمام تدخله لوحدك مش ماما...  الاكل لوحدك...  تتعلم رياضه مثلا....  تعتمد علي نفسك شويه لكن ماما طبعا تحبها وتحطها جوه عنيك ولو زعلتها انا اللي هزعل منك....  وانت تبقي مكاني علي طول وتخلي ديما بالك منها فاهم ولا لأ؟  اوعي تفهمني غلط تاني؟؟؟ و لو فهمتني غلط او معجبكش كلامي تقولي افهمك اقصد ايه واشرحلك مفهوم؟ 
يوسف: مفهوم يا بابا
ادهم وصل تحت البيت واتصل بليلي
ادهم: هاتي شنطه يوسف وانزلي
ليلي: طيب ابعت عم لطفي ياخدها
ادهم: انا بقولك هاتيها وانزلي يبقي اكيد عايزك انتي
ليلي: عايز ايه يا ادهم؟ 
ادهم: هاتيها وانزلي يا ليلي انجزي
ليلي نزلت وادهم نزلها وفتح باب عربيته
ليلي بصتله مش فاهمه
ادهم: اركبي وهتفهمي
ليلي: افهم الاول
ادهم: عامل مفاجأة لابنك وحب انك تشاركيه فيها اتفضلي بقي
ليلي: لا انت عامله مفاجأة فلزمتي انا ايه؟ 
ادهم: هو عايزك معاه وانا مش فارق معايا فاركبي وانجزي