العنيد - لشيماء محمد

الفصل العاشر

الحلقة العاشره

ناديه يدوب هتقول لجوزها اللي بيحصل الباب اتفتح وليلي دخلت
ناديه: كويس انك جيتي ده ابوكي كان هيكلمك تعالي قيسيله الضغط
ليلي ساكته قاست لابوها الضغط وكان عالي شويه وعطته العلاج بتاعه وسابتهم ودخلت تنام
امها وراها عايزه تعرف ليه جت بدري ومالها
ناديه: ايه اللي حصل؟  ومالك ضاربه بوز ليه؟ 
ليلي مجاوبتش امها بس فضلت تعيط في حضنها
ليلي: ما بيحبنيش يا ماما
وفضلت تعيط كتير وابوها كان هيدخل يطمن بس سمعها بتعيط فسابهم لوحدهم مع بعض
بعد ما ناديه خرجت جوزها كان مستنيها
عم محمد :بنتك مالها وايه اللي قلب كيانها كده؟  طول عمرها رافعه راسها فوق  وبتبص للناس من فوق ايه اللي جرالها؟؟
مراته ساكته ومش عارفه تقوله ايه؟ 
عم محمد: بتحبه صح؟  ده اللي كنت خايف منه؟ 
ناديه: لا ما تخافش هو مش عايز حبها ده ولا عايزها اصلا
عم محمد: طيب الحمدلله انها جت منه لانه لو اخر راجل عمري ما هوافق عليه ابدا
ناديه: ليه ماله؟  عيبه ايه؟ 
عم محمد: انتي شايفه ايه فيه اصلا؟  انتي ولا هيا؟؟  امور حبتين؟  ايه اللي عدل فيه؟  عايزه تجوزي بنتك لواحد كل يوم بينام مع واحده؟؟؟  ترضيها دي لبنتك؟؟  لراجل بيسكر لحد ما يوقع من طوله؟؟؟  تأمني علي بنتك معاه ازاي؟؟
ناديه: هو بيعمل كده من وحدته لو عنده عيله
قاطعها: هيعمل ايه؟  هيبطل ستات وشرب؟؟؟  تضمني منين؟  ومين يضمنهولك؟؟؟  مستعدي تخاطري بحياه بنتك؟؟؟  في مره سكران ضربها ولا قتلها تعملي ايه؟  تجيبي حقك منين؟  واديكي شوفتي اهوه قتل الراجل وخنقه وكل رجالته قالو دفاع عن النفس ومحدش قاله كلمه وفي الاخر اعتذروله عارفه ليه؟  لانه قاتل....  كل ما يحتاجوا يقتلو حد يبعتوه... بيقتل بدم بارد... والنوعيه دي قليله قوي فمتمسكين بيه ويوم ما يحب يسيب شغله يقتلوه هو.... 
ناديه: انت مين قالك كل ده؟ 
عم محمد: ابنك وفي المحكمه قالوله مش هتسيبنا علي رجليك ابدا لانك خطير...  يعني حتي لو كويس وحتي لو هيبطل كل حاجه وحشه يغور بشغله ده...  ده انا نفسي ابعد مصطفي تقومي تدخلي ليلي معاه
اعقلي وعقلي بنتك
ناديه: ريح بالك هو طردها اصلا
عم محمد: طردها منين؟  قولي انطقي
ناديه اتوترت : من حالته...  مش هيا كانت الدكتورة بتاعته؟؟  طردها وقالها مش عايزك وسابلها المستشفي كلها علشان ما يشوفهاش
عم محمد: وعلشان كده كانت ما بتفارقش المستشفي واول ما مشي رجعت البيت...  يارب انت بايدك كل الخير ابعد عنها الشر وارزقها ديما بالخير
ادهم بيحاول كل شويه يقنع نفسه انه احسن وهيا بعيد وانها مش وحشاه ابدا ابدا
بس كل كلمه نطقتها...  كل حركه عملتها...  شكلها يوم الفرح مش فارقه...  وشها..  ابتسامتها...  شعرها... 
عايز يفكر في ماضيه علشان يتدخل ويبعدها من ذكرياته بس للاسف هيا بتطرد ذكريات ماضيه

اكرم رجع من شهر العسل وعرفوا اللي حصل لادهم وراحوله بسرعه
لوم وعتاب كتير بين الاصحاب وفي الاخر اتصالحوا وكلهم متجمعين مع بعض
اكرم ومني اتغيروا كتير...  اكرم بقي اوسم واشيك وبيضحك كتير ومني بقت جميله جدا وانوثتها طاغيه وطول الوقت هيا واكرم بيتكلموا او بيتهامسوا او بيضحكوا
للدرجه دي الحب بيغير؟؟؟
كل شويه ادهم يتخيل لو ليلي موجوده معاه ويحط نفسه مكان اكرم وهيا مكان مني
علاء ملاحظه وساكت وفاهم لحد ما بقوا لوحدهم وكل واحد اخد مراته اكرم ومحمد
علاء: وفضيت علينا الدار والغربه زي النار
ادهم: صوتك وحش ما تغنيش وبعدين هيا مش ناقصه غم اصلا
علاء: انت ما شفتهاش من ساعت ما طردتها؟؟؟
ادهم: انا ما طردتهاش
علاء: نعم؟  ده انت كان ناقص لو فيك صحه تفتح الباب وترميها...  قال ما طردتهاش؟؟... 
ادهم: علاء انا مش ناقصك
علاء: انا عايز اعرف هو مش انت اللي قولت لاكرم ومني لو فاضل في عمري ساعه هقضيها في حضن حبيبتي؟؟؟  ولا هو ننصح غيرنا لكن نفسنا الكلام كخه؟؟ فين نصايحك لاكرم ومني؟؟؟  ما تطبقها علي نفسك؟؟  ما تروح لحبيبتك وترمي نفسك في حضنها وعيش بقي؟؟  ما زهقتش من الوحده؟؟  ما ملتش؟؟
هيا بتحبك وانت بتحبها فين المشكله؟ ؟ 
ادهم: ما تعديش كلامي مع اكرم ومني هما وضعهم مختلف عني
علاء: نفس الوضع غباء في غباء هيا بتحبك وده واضح قوي وانت بتحبها وده برضه واضح
ادهم.: لا مبحبهاش
علاء: صح وعلشان كده كل ما كنت تفوق تنادي عليها وكل ما تخرف وانت سخن تخرف باسمها وكل ما تفتح عنيك تقولها خليكي جنبي ولما طردتها كنت عايز تروح وراها ودلوقتي عينك ما نزلتش من علي اكرم ومني ومحمد ورقيه وطول الوقت سرحان وتتخيل نفسك معاها صح ولا انا غلطان؟  ولو سمحت ما تكدبش علي نفسك؟؟  هقولك كلمه انت قولتها لمني..  الحياه ما بتديش كتير بس بتدي فخد اللي بتديهولك قبل ما تاخده تاني منك...  خدها يا ادهم قبل ما تطير وتندم
بكره الصبح روح غير علي الجرح  هاجي اوديك المستشفي وانت قرر الليله دي هتعمل ايه؟ 
سابه في حرب جواه استمرت الليل كله ومش قادر ياخد قرار بس عنيها وحشاه جدا
الصبح طلع وعلاء جاله كان لابس فابتسم اول ما شافه وصله المستشفي
علاء: هستناك هنا؟  اوك لو في جديد كلمني؟؟
ادهم دخل المستشفي وعند الريسبشن
ادهم: انا كنت عامل عمليه هنا وحاليا عايز اغير علي الجرح فعايز دكتور جراحه
البنت: دكتور مين عملك العمليه؟؟
ادهم: دكتور امين
البنت: هو متاح حاليا اتفضل الدور التالت
ادهم: لو سمحتي دكتوره ليلي موجوده؟؟  لو ينفع هدخلها هيا لان هيا اللي كانت متابعه حالتي؟؟
البنت: بس دي لسه تحت التدريب ودكتور امين موجود
ادهم: هو انتي علي طول بتعارضي وبس؟؟  دكتوره ليلي موجوده ولا لأ؟  سؤال بسيط
البنت: موجوده الدور التالت اوضه  كشف 4 في عيادات الجراحه
ادهم: بس شكرا
سابها وطلع لحد ما وصل قدام عيادتها واتردد يدخل ولا يمشي
اخيرا خبط وقرر يدخل واللي يحصل يحصل
ليلي: ادخل
ادهم دخل وهيا باصه في الكمبيوتر قدامها وشاورتله يقعد
ليلي: لحظه وهفضالك اتفضل
ادهم فضل واقف مكانه لحد ما هيا اخدت بالها ان محدش قعد قدامها
ليلي: اتف
مكملتش الكلمه اول ما شافته
ادهم: عايز اغير علي الجرح ينفع ولا امشي؟؟؟
ليلي عايزه تقوله يمشي بس مش قادره تنطقها
ليلي: اتفضل علي السرير
ادهم: علي السرير علي طول كده؟ 
ادهم كان بيهزر بس هيا حاليا عايزه تضربه مش تهزر
ليلي: اتفضل واقلع
ادهم: اقلع كمان؟  من غير مقدمات؟؟
ليلي استنت دقيقتين وراحتله وهيا بتحاول تتماسك قدامه وقدام جسمه العريان
ليلي متوتره بتحاول تدور علي جلفز تلبسه مش لاقيه والعلبه فاضيه
ليلي: هتصل باي ممرضه تجيب جلفز
ادهم: مش ضروري يا ليلي
ليلي: ما ينفعش المس مريض بايديا عريانه علشان جرحه ما يتلوثش
ادهم: ليلي!!!  انجزي سيبك من الشكليات دي
ليلي مسكت مقص وقصت الشاش اللي علي صدره وكشفت الجرح وهيا بتكشفه اتألم للحظات وهيا رفعت عنيها لعنيه اللي كانت مشتاقه لعنيها قوي
اتقابلت عنيهم للحظه طوويله شويه وبعدها ركزت علي الجرح..  طهرته...  بصت كمان للجرح اللي في ضهره وطهرته هو كمان
حاله صمت مسيطره عليهم تماما
ليلي: الجرح اللي في ضهرك تقريبا خف
ادهم: عارف
ليلي: واللي في صدرك ملتهب وهيحتاج مضاد اقوي وتغير عليه كل يوم علشان المضاعفات
ادهم: برضه عارف
ليلي: عارف انه ملتهب؟؟
ادهم: ايوه المه مكنش طبيعي
ليلي: واما انت عارف ما عالجتوش ليه وسايبه ليه؟ 
ادهم: ما انا جيتلك اهوه وبين ايديكي؟؟؟ 
وانتي ضاربه بوز ما شاءالله عليه
ليلي: انت عايز ايه دلوقتي؟ 
ادهم: افردي وشك ده
ليلي: وشي وانا حره فيه مالكش فيه
ليلي بتتعامل بعنف شويه معاه
ادهم: علي فكره انتي بتوجعيني؟؟
ليلي: بوجعك صرخ
ادهم: يعني انتي عايزاني اتوجع؟؟؟
ليلي بصتله وما ردتش عليه
ادهم: انا اسف يا ليلي
ليلي: علي ايه؟ 
ادهم: اللي حصل اخر مره كنتي عندي في البيت مكنتش اقصد...  كنت تعبان ومخنوق ومكنتش عارف بقول ايه فاعذريني
ليلي: لا يا سياده المقدم ما تعتذرش ولو في حد المفروض يعتذر فهيبقي انا...  انا جيتلك البيت ودقيت بابك انا وابويا وقرفناك في عشتك ومن ساعتها تخلص من واحد يطلعلك واحد ده حتي امي ما رحمتكش فاحنا اللي اسفين مش انت
ادهم اتضايق: يووه يا ليلي بقي خلاص بقي
ليلي: خلاص ايه يا سياده المقدم...  انا قربت اخلص اهو
ادهم: ليلي بطلي برود وبطلي سياده المقدم دي طالعه سم منك
ليلي: هو مش انا المتطفله الغلسه؟  عايز ايه بقي؟  مستغرب ليه؟  مش انت حاكي لاصحابك عني؟  واسمي عندهم المتطفله الغلسه؟  خلاص انا لا هتطفل ولا هغلس..  جرحك بقي نظيف...  بكره في نفس المعاد تغير عليه وهكتبلك مضاد تمشي عليه
سابته وماشيه وهو شدها من دراعها جامد
ادهم: انا ما بتكلمش عنك مع اصحابي وما اعرفش انتي جبتي اللقب ده منين؟  ممكن اكون قولتلهم في الاول خالص علي البنت اللي دقت بابي لكن غير كده لأ فاتعدلي بقي
ليلي: اتعدل اعمل ايه؟  انت عايز مني ايه؟  انا مش فاهمه انت عايز ايه اصلا؟ 
ادهم شد قميصه ولبسه بنرفزه: مش عايز حاجه انا غلطان اني جيتلك اصلا
سابها ومشي وبعد ما رزع الباب هيا عيطت وهو نزل لصاحبه ودخل العربيه وقعد
علاء: يا ساتر استر مش هسأل
علاء يدوب هيدور العربيه بس لقي حاجه خبطته في وشه
ادهم: متطفله غلسه؟؟؟  انا قلت انها متطفله غلسه؟؟  والله ما في اغلس منك في الدنيا دي كلها اطلع يا بارد
علاء سكت ومش عارف يقوله ايه؟ 
علاء: طلعت غصب عني مكنتش اعرف انك بتحبها
ادهم: انا ما بتنيلش احبها انا بس كنت بعتذر علي قله ذوقي مش اكتر
ادهم فضل اليوم كله يأنب نفسه ويلومها ويشجعها ومشاعره عماله تتقلب من الاعذار للي اللوم.... شويه يلومها وشويه يعذرها
ليلي كمان نفس الحاله بس الندم مسيطر عليها تماما
تاني يوم في نفس المعاد ادهم لقي نفسه قدام باب عيادتها بحجه انه سمع كلامها وهيغير علي جرحه
خبط ودخلها وما اتكلمش
هيا احساس جواها طول يوم امبارح بتأنيب الضمير انها مشته من عندها زعلان وفي نفس الوقت مش عايزه تتقبل اسفه لانها عارفه انه بعد شويه هيرجع لعجرفته تاني...  فرحه جوي قلبها انه رجع تاني
ادهم: بتبصيلي كده ليه؟  مش قولتي  اجي اغير علي الجرح ولا انا كان بيتهيألي؟؟؟
ليلي: لا قولت فعلا بس مستغربه لانك مش من النوعيه اللي بتسمع اي كلام وخصوصا كلام الدكاتره
ادهم: الوجع وحش بعيد عنك
ليلي وقفت: انت تعبان؟  الجرح واجعك طيب تعال اقعد
لهفه وخوف بانوا في صوتها وهو لاحظهم وقرر يلعب بالنقطه دي
ادهم: صدري وجعني مش الجرح بره..
ليلي: الجرح ما بيوجعكش خلاص؟؟
ادهم: لا طبعا بيوجعني بس مش ده اللي جابني...  صدري مخنوق وما تقوليش الكلام الفاضي بتاع نوبه الخوف والتخاويف دي
ليلي ضحكت وادهم لاحظ انه بيعشق ضحكتها واتمني لو الضحكه دي تفضل علي طول
ليلي: طيب اطلع علي السرير واقلع
ادهم ابتسم
ليلي: انت بتضحك ليه؟  ماهو انت لازم تطلع علي السرير ولازم تقلع القميص علشان اقدر اشوف الجرح
ادهم: عارف عارف بس انك تقولي لراجل اطلع السرير واقلع مش حلوه....  مليانه ايحاءات.. 
ليلي: المفروض اقول ايه؟ 
ادهم: معرفش بس مش متخيل ان كل راجل يجيلك هنا تقوليله اطلع واقلع؟؟
ليلي: مش كل راجل طبعا...  انت عامل عمليه في صدرك وضهرك وهغير علي الجرح فلازم تقلع غيرك بيبقي مثلا جرح بسيط او مش محتاج يقلع يعني بتختلف من حاله للتانيه
ادهم: ولو حد زيي؟؟؟ بيطلع ويقلع؟؟؟
ليلي: عاده بتكون في ممرضه وبتغطيه وبتكشف بس مكان جرحه
ادهم: وهيا فين الممرضه دي؟  دي تاني مره اجي وتبقي لوحدك؟
ليلي: حظك...  لكن عاده ما بكشفش غير وهيا موجوده
لحظه وهناديلها
عدت من قدامه علشان تناديلها وهو مسك ايديها
ادهم: ما تناديش لحد
ليلي: ليه؟  مش انت خايف لاحسن اتطفل عليك؟؟
ليلي كانت عطياله ظهرها
فهو لفها ليه ورفع راسها علشان تبصله
ادهم: انا مقولتش انك اتطفلتي عليا دي ابدا... 
ليلي: انت قلت خدها من هنا ومشيها ده معناه ايه؟ 
ادهم: الف معني ليه افترضتي اني مش طايقك وعايز اخلص منك؟؟
ليلي: وهيا ليها معني تاني؟؟؟ فارضه نفسي عليك وبتقول لصاحبك يخلصك مني؟؟!
ادهم: او خايف من وجودك معايا وخايف اضعف وخايف قلبي يحن ويدق وانا مش عايزو يدق...  بهرب منك ومن قلبك...  خايف من الضعف يا ليلي
ليلي: انت ما بتضعفش ولا بتحن ولا عندك قلب من اساسه...
ادهم:ما هيا دي المشكله ان الكل ديما بيفترض ان معنديش قلب
ليلي: انت بتوصل اللي قدامك للافتراضات دي بقسوتك وجبروتك
ادهم: قسوتي وجبروتي؟؟  فين قسوتي دي يا ليلي؟  انا ضعفت قدام شويه حنيه من مامتك؟؟؟  وحسيت اني عيل صغير عايز يعيط في حضنها؟؟  وضعفت قدام حبه اهتمام منك؟  اهتمام من دكتوره عيله لسه حتي ما اخدتش شهادتها ممكن تكون بتهتم بحاله مريض مش اكتر؟؟؟  انا ضعفت قدامك واكتر من مره وفي الاخر جايه تقولي قسوتي؟؟؟
ليلي: فين الضعف ده يا ادهم؟؟؟  بدليل ايه؟  كل شويه تطردني وكأني بتهجم عليك؟ 
ادهم: عايزه دليل يا ليلي؟؟  هروبي من المستشفي اكبر دليل علي ضعفي....  نوبه الخوف زي ما انتي مسمياها....  طردي ليكي اول ما فقت  ولقيتك قدامي معرفتش اعمل ايه او اقول ايه فكان اسلم حل اني اقولك انتي تمشي
ليلي: انت لازم ما تكونش في وعيك علشان تحن او تنطق كلمه كويسه... 
ادهم: ما اتعودتش...  و لا اتعودت علي الاهتمام ولا الحنيه من حد
ليلي: انت جاي ليه دلوقتي يا ادهم؟؟؟
ادهم: ما قولتلك صدري وجعني
ادهم بيقربها ليه وهيا بتقرب معاه لحد ما لزقت فيه وعنيهم متعلقه ببعض وبيقرب اكتر
ادهم اول مره في حياته قلبه يدق بالطريقه دي..  عايز يخرج من مكانه...  اول مره يتمني يلمس شفايف واحده قدامه...  اول مره يحلم بقرب واحده منه
ليلي عقلها بيوريها كل لحظه ادهم قسي عليها فيها...  وتخيلت نفسها هيقرب منها وبعدها يزقها ويرميها ويقولها بترمي نفسك في حضني ليه؟ 
ليلي لقت نفسها بتحط ايدها علي شفايفه اللي قربت قوي منها
ادهم رفع عينه ليها واتقابلت عنيهم وللحظه ليلي عايزه تدفن نفسها في حضنه بس هيا متأكده انه هيرميها بعد كده
ليلي: انا زي ما قلت دكتوره تحت التدريب...  هنادي دكتور امين يطمن علي صدرك بعد اذنك
ليلي سابته ومشيت وهو فضل واقف مكانه شويه مش عارف يعمل ايه؟  افتكر كلمه علاء وهو بيقوله اتصرف قبل ما تبص ما تلاقيهاش وتضيع منك؟؟؟  واهو فعلا شكله ضيعها منه؟؟؟
ليلي راحت لدكتور امين تجيبه ورجعت اوضه كشفها بس لقتها فاضيه ولقت الممرضه موجوده
ليلي: فين اللي كان هنا؟ 
الممرضه: مقدم ادهم؟ 
ليلي: ايوه
الممرضه: مشي قالي اعتذرلك و مشي
دكتور امين: هو قالك ايه بالظبط؟ 
ليلي: مقالش غير ان صدره بيوجعه