العنيد - لشيماء محمد

الفصل العاشر - الجزءالثاني

الحلقه العاشره

ادهم بارك لمصطفي وبص لميرا يسلم عليها
مد ايده وهيا مدت ايدها واتقابلت عنيهم في نظره طويله....  نظره زلزلت ادهم من جواه....  احساس محسوش غير لما شاف ليلي لاول مره..... 
ادهم: اهلا
ادهم بتلقائيه باس ايدها ومصطفي استغرب لان مش من عوايد ادهم يسلم علي واحده ويبوس ايديها
لمحه غيره ظهرت جواه
وشد ايد خطيبته من ايد ادهم
مصطفي: ميرا ده جوز اختي وابو يوسف
مصطفي شدد علي كلمه جوز اخته
ادهم: جوز اختك؟؟؟  بجد يعني؟؟؟ متصدقيهوش ده بس بيتمني طليقتي مش مراتي...،
ميرا: خساره ليه؟  ليلي دي طيوبه جدا وعسل قوي وجو ده عسله وكيوت
ادهم: عارف والله بس it just my luck
ميرا: علي العموم معلش انا سعيده جدا اني اتعرفت عليك....  شفتك كتير في الصور وسمعت عنك كتير واتمنيت اشوفك
ادهم بص لمصطفي: ما بتحرمش وما بتتعلمش صح؟ 
مصطفي: تقصد ايه؟ 
ادهم بهمس في ودن مصطفي
ادهم : اختك حبتني ازاي؟  وقعت في غرامي اول ما شفتني؟؟؟
مصطفي: قصدك ايه برضه مش فاهم؟ 
ادهم: قصدي انها كونت صوره في خيالها من رغي اخوها الكتير عن البطل اللي بيواجه الموت وفضلت ترغي وترغي لحد ما شافتني واكتشفت انها بتحبني بس البذره انت زرعتها وبتزرعها تاني بس المره دي في حبيبتك....  خلي بالك منها بقي....  لانها زي ما يوسف بيقول صارووووخ  هههههههه
سابه ومشي بيضحك وراح بيسلم علي الكل وبعدها وقف مع ابنه اللي اخد باله انه بيقلده في كل حركاته
يوسف: بابا
ادهم: نعم
يوسف: هو انت ليه سبت ماما ومشيت؟؟؟؟
ادهم: اوعدك اني هجاوبك علي سؤالك ده بس مش دلوقتي اوكي؟؟
يوسف: اوكي
ادهم: انت مالكش اصحاب في الفرح ده ما تنطلق
يوسف: انا مستني اياد
ادهم: ومين اياد
ليلي جت وراهم: اياد ايمن
ادهم: نورتيني
ليلي: اه سوري ايمن اخو ميرا المفروض انهم هنا بس مش عارفه اختفوا فين؟؟  تقريبا كده بنته الصغننه مجنناه فتلاقيهم مختفين علشانها
يوسف: ايوه دي بنت رخمه قوي ما بتبطلش عياط نهائي ابدا زن زن زن
ادهم: عيب كده وبعدين دي صغننه محدش بيبقي فاهم عايزه ايه؟ 
يوسف: تقوم تعيط وخلاص؟؟؟
ادهم: علي فكره وانت صغنن كنت كده
يوسف ضحك: لا مكنتش
ادهم: لا انت كنت ومازلت.... شوف انت قولت عليها رخمه ازاي علشان بتعيط وتزن واهي نونو امال لما تبقي شحط قدك كده وتعيط وتزن وتقول عايز ماما
ادهم كان بيقلده وضحكوا كلهم
يوسف: انا معملتش كده
ادهم: انت عملت اكتر من كده
يوسف: خلاص انا مش هزن تاني
ادهم: اما نشوف....
يوسف:  ههيييه اياد اهوه
جري يوسف علي ولد في سنه وادهم بص وراه لاياد ولابوه وامه وليلي تولت مهمه انها تعرفهم علي بعض
ساره: ما تقوليش اكيد ابو يوسف....  يعني انت صورك في كل شبر في البيت
ادهم ابتسم: اهلا بحضرتك
ساره: لا بلاش حضرتك دي نهائي بص ساره وده ايمن جوزي ارفع الالقاب تماما اوك يا ادهم ولا هتضربنا بالنار ناخد ساتر ولا ايه؟ 
ادهم ابتسم: لا لا عادي ادهم عادي...  ايمن اهلا بحضرتك
مد ايده وسلم عليه وايمن كمان
ايمن: اهلا بحضرتك وحمدالله علي سلامتك...  هتستقر ولا تسافر تاني؟ 
ادهم: لا اعتقد هستقر كفايه سفر بقي
ايمن: اعتقد ان حضرتك بتسافر كتير بحكم شغلك؟؟؟
ادهم: ايوه فعلا بسافر كتير جدا بس حاليا ناوي استقر شويه علشان خاطر يوسف
ايمن: يوسف ده كائن جميل جدا بس محتاج شويه حزم عدم وجود الاب بيأثر جدا
ادهم بص لمراته
ادهم: امه عمرها ما كانت شخصيه ضعيفه فتخيلت انها هتقدر تقوم بالدور كامل بس طلعت غلطان
ايمن: طبعا غلطان مهما كانت الام شخصيتها قويه الي انها حنيتها بتغلب ومع عدم وجود الاب فبتحس ديما ان في حاجه ناقصه بتحاول تعوضها بجرعه حنيه اوفر وده بيخلي العيال تتنطط قوي
ادهم: فعلا عندك حق...  المهم انت شغال في ايه؟ 
ادهم فضل هو وايمن يتكلموا واهملوا الحريم تماما لحد ما جت ساره شدت جوزها
ساره: لا بقولك ايه انت مش جاي هنا علشان تقعد ترغي في الشغل... 
ايمن: انتي عايزه ايه دلوقتي؟ 
ساره: عايزه ارقص....  قوم ارقص معايا انا ما صدقت ندي نايمه مع الداده قوم قبل ما تصحي
ادهم ابتسم: قوم الحق بسرعه انا لو مكانك مش هرقص بس
ايمن: انت شايف كده؟  اطلع علي الفندق ولا ايه؟  طيب اياد؟؟
ادهم: اياد مع يوسف ما تعملوش حجه  انا هخليهم معايا
ايمن: تيجي يالا
ساره: يالا بس ميرا  مش هتزعل انت بس اللي هنا معاها وهتسيبها وتمشي؟؟؟
ادهم: انا سمعت ان باباكم ومامتكم موجودين امال هما فين؟ 
ايمن: بابا بيصفي اعماله بره فبالتالي انا سبقته بحيث اجهز للشغل هنا وهو هناك بيخلص كل حاجه....  احنا نازلين زي ما سبق وقولتلك بلا رجعه....  وطبعا ماما فضلت معاه هيا واخونا الصغير ادم
ادهم: انت عندك اخ صغير؟؟؟  صغير قد ايه؟ 
ايمن:  داخل العشرين كده بس مقولكش حاجه متخلفه كده الواحد حاسس انه مكنش عيل ابدا
ادهم :؛ههههه الجيل ده غريب
ساره: قضوها رغي قضوها رغي....  ما بلاش الحقد الدفين ده....  انت بتضيع عليه الوقت علشان ما يرقصش معايا؟ 
ادهم: انا؟؟؟  لا ان كان كده انا هقاطعه خالص،...  اتكل يا عم مع مراتك 
ساره: ما تقوم ترقص مع مراتك انت كمان
ادهم:  طليقتي مش مراتي
ساره: دي مسميات في الاول وفي الاخر ام ابنك....  وبعدين هيا النهارده حاجه كده تحفه....  انا مكنتش متخيلاها جميله قوي كده!!!
ادهم: لا هيا من جهه جميله فهي جميله الجميلات مشكلتها هنا
شاور علي دماغه