قضية_عشق

البارت السابع

مااعرف شلون غفيت مااحسيت على نفسي الا وطالع الصبح والشمس بعيني كعدت واني اتمنى متكون طالعة
رحت لغرفة ام غزوان بلا وعي فتحت الباب ومشفت احد بيها والاسرة مرتبة توجهت للمطبخ مثل المضيعلة شي
طبيت وشفتها كدامي دتصب مع ام غزوان الريوك اووووخ ارتاحيت
هنادي،،،صارت عيني بعينة وحسيتة فرح وابتسم
اني تلبكت وبعد مااعرف شنو اسوي
فارس،،،طلعت فرحان من المطبخ ورحت لغرفتي ليش هيج فرحت من شفتها موجودة؟؟
زين شعجب ظلت واني نطيتها كامل الحرية وجان بأمكانها تطلع
نزعت دشداشتي ودخلت الحمام سبحت وطلعت بملابسي الداخلية شفت سلطانة كاعدة على جربايتي يولوا جينا على البهض
كعدت على طرفها كبالها وكلت ها سلطانة خاتون خيرج
سلطانة،،،يعني صارلك 3 ايام ممتواجد بالبيت ومن رجعت البارحة بقيت لنص الليل بالمضيف مدكول عندي زوجة بالجذب سلم علية على الاقل ابقى بنت عمك و زوجتك وان كان حبر على ورق
فارس،،،صباح الخير سلطانة الناس تصبح
سلطانة،،،شلون خالتي والبنات مشتاقتلهم السفرة الجاية اروح وياك اشتاقيت لأهلك واهلي اختنكت هنا بين اربع حياطين عايشة ومو عايشة
فارس ،،،بلا ماادحجلها كلت ان شاء الله
هنادي،،،ردت اودي الريوك لست سلطانة مالكتها بالغرفة وصاحت ام غزوان وكالت ست سلطانة تتريك مع زوجها الشيخ ودي لغرفة الشيخ فارس
رحت دكيت الباب وفتحتة انصدمت جانوا كاعدين على جرباية الشيخ متقابلين كل واحد بيهم كاعد بطرف وجنت اول مرة اشوف الشيخ بملابسة الداخلية
هو خجل مني وحسيتة وكف حتى يلبس
ست سلطانة استغربت وجودي
سلطانة،،،ها لازم تم الافراج عنج هنادي
وتباوع لفارس
هنادي ،،،دنكت وحاولت اطلع
سلطانة،،،شكد عاشرتك يافارس مكدرت افهملك طبع هسة ليش حبستها وليش رجعت طلعتها
فارس،،،لبست وكعدت لتدخلين بشغلي سلطانة احذرج
سلطانة،،،اخاف شفت عليها شي اكيد مع احد الحرس هي هم حلوةوبعدها صغيرة ومو كاعدة راحة
فارس،،،يولوا رجعت تدعثر بسوالفها
سلطانة سوالفج مثل السم شيلي الاكل وطلعي من غرفتي لا اندمج
سلطانة،،،فارس راح اسكت والله خلي نتريك والله اتمنى فد يوم نكعد سوة وناكل مع بعضنا
فارس،،،صحت صوت بيها طلعي برة يامعثورة راح اندمج والله وكمت اعض بشفتي وتعرف سلطانة بهل حركة الي ماقبل الانفجار
بسرعة طلعت وعافتني
الله يعكر حياتج مثل ماعكرتي صباحي
هالحزة هنادي،،،نزلت مغثوثة من المنظر الي شفتهم بي اني شعلية ليش هيج انزعجت من شفتهم مع بعض وهو بالملابس الداخلية وشنو يعني هذا شي طبيعي مو متزوجين
رجعت للمطبخ واحس انكلب يومي وانخنكت
فارس،،،نزلت واني كاشخ و3 مرات وكفت على المراية اعدل بغترتي ومن طبيت للمطبخ عيني على هنادي وكلت لأم غزوان وين ريوكج اليوم شنو راح تطلعيني بلا ريوك
ام غزوان،،،اباوع لهنادي واكول شلون شيخ صعدنالكم الريوك الك ولست سلطانة من زمان
فارس،،،ام غزوان من ايمتة وجاي اني اتريك مع سلطانة تعرفين كلش زين اني مااحب اتريك الا وحدي
ام غزوان،،،صار شيخ هسة اصبلك
هنادي،،،ابتسمت ليش فرحت بداخلي
فارس،،،كلت لا ام غزوان تأخرت هسة وطالع
هنادي ،،،عبر من يمي وعينة بعيني وعطرة ترس المكان استنشقتة واخذت نفس
كالتلي ام غزوان روحي جيبي الريوك هسة خلصت ست سلطانة
صعدت ودكيت باب غرفتها ماردتلي دكيت مرة ثانية ودخلت شفت ست سلطانة منهارة بالبجي وكفت مااعرف شنو اسويلها او شلون اواسيها تقدمت وخليت ايدي على كتفها
سلطانة،،،رفعت راسي وشفت هنادي فوك راسي
اتجيت على الجرباية وكلت كعدي هنادي ماالكة احسن منج اشكيلة همي احس اريد افضفض والفضفضة للأخرس يمكن من اجمل النعم بالحياة
هنادي،،،كعدتني كدامها واني اباوعلها مستغربة اول مرة اشوف ست سلطانة بهل حالة ومنهارة
سلطانة،،،همست بصوت مكسور بكل مرة اخونة بيها اكره روحي واستحقر نفسي واكول بعد مااكررها ويرجع يدوس علية وعلى انوثتي
وكل ميدوس على انوثتي ادوس على كرامتة و رجولتة واخونة وبفراشة ومع ناس ادنى منة ولاشي كدامة وتختنك بالبجي
هنادي،،،جانت تبجي وتضحك بنفس الوقت انصدمت بكلامها وخفت منها وعليها
سلطانة،،،،تدرين هنادي شنو اتمنى
وغمضت عيونها هية وتحجي
اتمنى فارس مكتف و اخونة كدام عينة وميكدر يسويلي شي واخونة مع احقر الناس حتى احرك قلبة بس المشكلة كلهم جبناء ويخافون منة وميجرؤن كدامة كلهم حشرات كدامة يخافون من خزرة عينة
هنادي ،،،زاد الخوف بكلبي من كلامها وطريقة تفكيرها يعني هاي مو مجرد فكرة وطرأت على بالها لا هاي عارضتها على رعاياه وامبين مموافقيها 
حسيتها تريد تنتقم منة بأي طريقة
جانت سلطانة مو هينة وهذا واضح عليها
من هدت شوي مسحت دموعها وكالت
كومي هنادي من وجهي واذا مخلوق عرف بالي حجيتة الج احرك وجهج بمية نار وصدكيني هذا الشي مو صعب علية
هنادي،،،كمت بسرعة وشلت الصينية وانعثرت مرتين من الخوف بس ردت اطلع من غرفتها
يمة صخام الصخمني هاي مخبلة وتسويها

وللقصة بقية ،