#قضية_عشق
للكاتبة ميار الشمري
الجزء السادس
هنادي،،،ثاني يوم كعدت الصبح وجان المطبخ مابي احد كلت خلي اتريك بسرعة واروح اكمل شغلي
جانت اكو كتاكيت صغار مرات تدخل من الحديقة ملونة واحب العب وياها جان شكلها يخبل فدوة
واني اتريك دخلت واني اباوعلها نزلت حتى اشيلها حسيت واحد كدامي واكف رفعت راسي جان فارس كدامي و شالها قبلي
اني يبست ضحكتي واحس رجعت عيونة تجدح نار رفع الكتكوت كدامي وملص راسة قريب على وجهي وعيونة تنكط شر صار الدم على وجهي شهكت ونزلت دموعي وجنت بعد شوي راح اصرخ
فارس،،،شمرتة كدامها وطلعت حتى اغير ملابسي الي صار بيها دم كلت اني ليش اريد ازرع بكلبها الخوف مني وافهمها انها متكدر بيوم تغدر بية واني اعرف كلش زين انها اضعف من انه تأذي نملة
دك تلفوني ،،،الو هلا والله قصي لا انت متروح هالمرة اني وحدي اطلع جهزت كلشي اوك موعدنا مع اذان الفجر ان شاء الله بلغ الشباب
سديتة واتجيت على الكرسي وايدي على راسي
فارس،،،غمضت يولي اطلعي من راسي والله دمرتيني ودمرتي حالي وحق الله لعبتي بحالي لعب شنو الي جاي يصير وياك يافارس
بيومها كمت كل ماانزل واصادفها جانت تتهرب مني وتخاف حتى دحجلي
هنادي،،،جنت خايفة بيومها كلش وحسيت راح تحين ساعة الصفر ولازم اكون مأمنة على نفسي حسيت بيومها فارس ماراح يتركني بحالي والي صار الصبح تهديد
قفلت باب الغرفة ورجعت ربطت المسدس بفخذي وجنت متوقعة بأي لحظة ممكن يطبلي الغرفة ومن صار الليل امنت شوي عرفت من ام غزوان انه الشيخ راح يسافر الفجر ومشغول ديجهز بنفسة
اطمأنيت شوي طلعت للمطبخ وجنت دأشرب مي فجأة جرني واحد من ورة وايدة على حلكي بقيت ارافس ولوما ايدة جنت راح اصارخ منو الي يعرف اني مو خرسة حتى حط ايدة على حلكي!!!
دخلني نفس المخزن الي جنت بي اول مااجيت شغل الضوة واذا بفارس
طبعا جان روكي لاحكنا ومابطل نباح يمكن لان جان السلاح وياي وهو طلع مدرب على هذا الشي
جان فارس لابس بنطلون عسكري وتيشيرت اسود ولاف راسة بشماغ والسلاح بأيدي هنا اني ماظل عقل براسي جان يتقرب مني واني ارجع ليورة الى ان صرت بالزاوية
فارس،،،تقربت منها وجريتها من شعرها وانفتح بأيدي جان مظفور همست رجعتي تسلحتي يابزونة؟؟
هنادي،،،،فتحت عيني مصدومة
فارس،،،من اول يوم روكي دلنا عليج عرفت انتي مسلحة ووراج قصة جبيرة بس حبيت العبها وياج احب العب مع البزازين خاصة الي تخرمش وضحكت
هنادي،،،نزلت دمعتي وحسيت انتهت لعبتي وياه وخسرت كلشي
فارس،،،بس شفت اللعبة طولت وياج واني خلكي ضيك احجيلي من الاخر
هنادي،،،هد شعري وحصرني وايدة اثنينها على الحايط بجهتين اليمنى واليسرى
فارس،،،هنادي احجي ورب العزة مااريد اذيج يابنت الناس وانتي متعرفين فارس اذا تخبل
هنادي،،،جان روكي ينبح بطريقة هيستيرية وجان يجر بملابسي واني احاول اخلص نفسي منة وكل مديمر الوقت فارس يتقرب اكثر
فارس،،،غمضت احجي هنادي اني اعرف انتي مو خرسة
هنادي ،،،اختنكت بالبجي وفجأة روكي خنس وصار هدوء المكان باوعت شفت فارس ضاربة طلقة براسة بالكاتم هنا حسيت الدنيا تفر بية ووكعت
فارس،،،وكعت هنادي وهنا حسيت كل غضبي وقهري تحول لخوف سندتها على ايدي ورجلي وحاولت اوعيها ماوعت
مسحت دمعها الي على خدها وكلت عجل ليش هيج سويت بيها اذا خايف عليها وحق رب العزة طينتي عيشتي وبهذلتي حالي ياهل بنية جنت احاول اشيلها وصار صدرها عليه وشميتها بلا قصد استغفر الله يولوا مو بشر
شلتها ودخلتها للقصر صارت بوجهي سلطانة وشهكت هاي شصاير فارس مارديت
دخلتها وخليتها على سريرها وطلعت وقفلت الباب وشلت المفتاح
صحت بصوت ام غزواااااااااان وينج تعاي
اجتي تركض هلا شيخ
فارس دحجولي اثنينجن واسمعوني زين هاي الغرفة متنفتح ابد الى ان ارجع وراح اوصي الشباب همة الي يدخلولها الاكل والشرب
سلطانة،،،شنو الي صار فارس
فارس،،،اشرت بأيدي بعدين سلطانة وخليت سلاحي بحزام كتفي وطلعت مستعجل حتى الحك ربعي الي تأخرت عليهم
هنادي،،،من وعيت جان الصبح طالع ماتوقعت راح ابقى عايشة لصبح تلمست سلاحي جان بعدة بمكانة استغربت شنو الي صار
كمت بسرعة حتى افتح الباب جان لازم انهزم بأي طريقة من هالمكان
جان الباب مقفول توقعت راح يحبسني من بعد ماعرف كلشي اتجيت على الباب وكمت ابجي ياربي شلون راح اتصرف وشنو راح اسوي
سلطانة،،،،حاولت اجرجر ام غزوان بالسوالف ومجانت تعرف شنو الصاير حالها من حالي
كلت هاي المسودنة شمسوية شو خرسة وتخاف حتى من خيالها
وللقصة بقية،،،،،،
