#قضية_عشق
للكاتبة ميار الشمري
الجزء الخامس
هنادي،،، جانت دائما تناديني ست سلطانة اساعدها بملابسها او اي شي هي تحتاجة
وكانت تطلب من ام غزوان انه اني الي ارتبلها غرفتها حسيتها وثقت بية وجانت دائما دكلي انتي حبابة وخوش بنية
سلطانة،،،اباوع لرجل هنادي الي طالعة من ثوبها وهمست هنادي فتحي الكنتور اكو ملابس على جهة اخذيها لبسيها مااريدها ونزعي ملابس ام غزوان لان عقدتني وضحكت
هنادي،،،فتحت الكنتور وطلعتها جانت كومة وشغلات راقية وغالية فرحت بيها كلش
ونزلت بسرعة البسها طبيت وقفلت الباب
ونزعت ملابسي جنت رابطة مسدس على فخذي طلعتة ولفيتة بقطعة قماش وخليتة جوة الجرباية بالزاوية لان اعرف محد يكدر يوصلة هناك وحسيت مو هسة اطلعة بالوقت المناسب
كمت انزع والبس وفرحت بالملابس كلش
اندك الباب وفتحتة جانت ام غزوان سألتني ليش قافلة الباب اشرتلها على الثوب الي جنت لابستة
كالت يخبل عليج بس هاي ملابس ست سلطانة
هنادي ،،،اشترلها هي نطتني اياها
ام غزوان،،،بالف عافية عليج تستاهليها وحلوات مو كتلج ست سلطانة طيبة برغم عصبيتها
هنادي،،،فجأة دخل علينا غزوان بحجة ديحجي مع امه ظل يباوعلي بنظرات جريئة خفت من عندة من بعد ماشفتة مع سلطانة بذيج الليلة كرهتة
بقى شوي وطلع بلغ امة الشيخ جاي بالطريق ووياه كومة ناس راح يبقون على العشة
اختبصت ام غزوان وراحت مستعجلة للمطبخ غزوان حاول يكلمني لكن تركتة ولحكت ام غزوان كمنة نشتغل بسرعة حتى نلحك على العشة
طب غزوان ويانة بحجة ديساعدنا وكلي اني اقطع الدجاج جان جامد وميتكطع
فارس طبيت للمطبخ وشفت غزوان كاعد يم هنادي ويكطعون دجاج وعيونة دتاكلها اكل صحت غزوان !!!!
غزوان ،،،فزيت على حيلي هلا شيخ
فارس،،،شوف الناس برة شمحتاجة وعزبهم وبعد لتدخل بسواليف الحريم
غزوان،،،ان شاء الله شيخ وطلعت
هنادي،،،جان مزعوج الشيخ من طلع غزوان هو هم طلع
ظليت اقطع وحدي لان ام غزوان مشتغلة فجأة وتنجرح ايدي صحت اآاااااه باوعتلي ام غزوان مصدومة حاولت اداري على الموقف واشرت على اصبعي
كمت اغسلة غسلتة ومجان ينقطع الدم
كالتلي روحي للغرفة ارتاحي اني اكمل وحدي هسة يأذيج اصبعج
هنادي لفيت اصبعي ورحت للغرفة كعدت على سريري واني اعصر على ايدي
فارس ،،،حسيت اريد ارجع اشوفها النوب
دخلت للمطبخ شفت ام غزوان وحدها كتلها وينها هنادي
كالت تعورت بأصبعها وطلعت للغرفة ترتاح
هنادي،،،اني ومددة على سريري اندك الباب فجأة دخل الشيخ
اني جفلت وكمت وكفت
فارس ،،،تقربت منها وكتلها كعدي
هنادي ،،،كعدت واني مرتبكة
فارس،،،كالتلي ام غزوان انجرحتي ؟؟
هنادي،،،رفعت ايدي وشوفتة اصبعي لزمها لأيدي وفتح ديشوفها
همسلي بسيطة ان شاء الله متخوف
صارت عيني بعينة بس هالمرة ماخفت ماحسيتها ذيج العيون الي جنت اخاف منها واحس كل قساوة الكون بيها
فارس،،،شنو سر هالعيون وليش هاللمعة الغريبة بيها
هنادي،،،جريت ايدي وفز جان صافن بعيني تلبك وكال بلا دلع يابنية وطلعي مع ام غزوان ساعديها يلا
هنادي،،،هزيت براسي وطلعت بسرعة جنت بس اريد اخلص
فارس،،،طلعت مع الرياجيل بس بالي مو يمهم احس بالي وتفكيري مع هالبنت
وكل مااريد اشيلها من بالي مكدر شنو هالسر الي بعيونها
من طلعوا الناس بقيت كاعد بالحديقة وحدي نزلت سلطانة وكعدت يمي
سلطانة،،،فارس كمت بالصدف اشوفك هاي مو حالة ترى
فارس،،،يولوا جينا على البهض
سلطانة،،،،غمضت وسكتت
فارس،،،يول سلطانة ايمتة تجوزين مني ماتعبتي طول هالخمس سنين ماجزعتي
سلطانة،،،فارس اني كمت احس وكأنه معمولك عمل ضدي حتى لهدرجة مطيق تشوفني
فارس،،،ضحكت يول انتي مخبلة وتريدين تخبليني وياج ايمتة راح تفهمين انتي حسبة نجاة ولميعة واعتبرج وحدة من خواتي
دحجي يابنت الناس اني اكثر من مرة كتلج خلي اطلكج وروحي بحال سبيلج وعيشي حياتج لكن انتي رافضة هالشي
سلطانة،،،اي لان ماقاطعة الامل منك واحس بيوم من الايام راح تكون زوجي فعليا
فارس،،،جانت كدامي تمشي هنادي جايبة الجاي النة عيني عليها واحس بعد حتى كلام سلطانة بعد ما اسمعة
هنادي،،،تركت الجاي ورجعت بس هالمرة روكي بقى هادي ومانبح مثل كل مرة
فارس،،،جان روكي يمي استغربت شعجب مانبح هالمرة على هنادي
سلطانة،،،اباوع لنظرات فارس الي راح تاكل هنادي همست
فارس شنو هالبنت راح تبقى ويانة بالقصر واحنا منعرف عنها شي ولا نعرف اصلها وفصلها
فارس،،،كمت اشرب بالجاي واسمعلها بلا مااتكلم
سلطانة،،،وبعدين وضعها غلط وانت تعرف القصر كلة شباب وحرس وغزوان دائما يكعد وياها وعينة عليها
فارس،،،دحجت عليها سلطانة من الاخر هالدعثرة بالسوالف لوين تريدين توصلين
سلطانة،،،نزوجها للحارس اثنينهم خرسان ويفهمون على بعض
فارس،،،،رجعت اشرب جاي وكلت اذا اريد ازوجها ازوجها لقصي ياسلطانة مو للحارس الاخرس وضحكت
سلطانة،،،،دفعت الكرسي وكمت وتركتة ودخلت جوة عصبية صعدت لغرفتي بلا مااشوف احد
فارس،،،دفرت كلشي كدامي وكلبت الصينية بالي بيها
هنادي،،،جنت افتر بالغرفة ومشغول بالي بالي ديفكر بي الشيخ وبنظراتة
صارت عيني عليه من شباك الغرفة الي يطل على الحديقة شفتة يدفر الميز والصينية
خفت ورجعت كعدت على سريري
دخلت ام غزوان ،،،وكالت شعجب مانمتي هنادي لحد هسة
ومددت حاولت انام مكدرت باوعت لأم غزوان جانت غاطة بالنومة وبدت تشخر
فارس ،،،صرت نار وماشفت نفسي الا متوجه لغرفة ام غزوان جنت اريد اجرها من شعرها لهل بنت واخليها تحجيلي كل قضيتها
وصلت وفتحت الباب شفتهم نايمات اثنينهم غمضت وطلعت
هنادي ،،،من دخل غمضت بس احس عصرني كلبي وكأنه نهايتي قربت بس استغربت طلع بسرعة
حاولت انام ورة نص ساعة مكدرت كمت على رؤوس اصابيعي اباوعلة من الشباك شفت بأيدة سلاح كاتم ويضرب عشوائي على الشجر وعلى الحيطان وكأنه ديفرغ قهرة بيها
وللقصة بقية ،،،،،
