#قضية_عشق
للكاتبة ميار الشمري
الجزء الثالث
هنادي،،،جانت تعلمني ام غزوان على شغلهم ونظام القصر وشلون العيشة بي
ومن بعد 5 ايام بالليل ومن خلصنا شغل المطبخ
ام غزوان همستلي وكالت يمة خلي نروح نام لان باجر ورانة كعدة من الصبح
هنادي،،،اشرت بأيدي ليش ؟؟
ام غزوان،،،ست سلطانة كالت باجر يجي الشيخ من الصبح
ولازم نكعد ننظف غرفتة ونرتبها
هنادي ،،،استغربت كلام ام غزوان ليش احنة مو كل يوم نرتب ونظف غرفتة هو وست سلطانة !!!
رجعت ام غزوان علية وفزيت كالت صدك ماعرفت شنو اسمج قربتلي دفتر وقلم جانت تكتب بي دائما مسواك البيت وتنطيها لغزوان وكالت تعرفين تكتبين؟
هنادي ،،،هزيت براسي اي
ام غزوان،،، كتبيلي اسمج لعد
كتبت هنادي اسمي
ام غزوان ،،،عاشت الاسامي هنودة يمة لتظلين تصفنين امشي نام يلا
هنادي ،،،مددت بفراشي وبلشت افكر مثل كل يوم شنو راح اسوي وشلون راح اتصرف صار سنين انتظر هاللحظة
دمعت عييني ومسحت دمعتي وحاولت انام
كعدت على صوت ام غزوان دتفتح باب الحديقة
سمعت صوت العصافير وصياح الديج وجانت توي الشمس تريد تطلع كمت غسلت ورحت للمطبخ
ام غزوان ،،،هلا هنودة تعاي اتريكي وياي
كعدت كدامها صبتلي شاي وكعدت اكل كعك ابو السمسم وكيمر
ام غزوان ،،،هنودة تريدين تروحين تنظفين غرفة الشيخ لو تحضرين معاي الريوك للي راح يجون
هنادي ،،،اشرتلها اريد انظف
كالتلي تعاي وياي لعد
هنادي كمت وراها وصعدنا فوك استغربت رحنا لغرفة غير غرفة ست سلطانة طلعت مفتاح من جيبها وفتحتها
دخلنا وجانت جبيرة ومتربة كالت هاي غرفة الشيخ تنفضيها وتمسحين اغراضها وتمسحين الارضية بلا متلعبين بأي شي فهمتي هنادي ؟؟
هنادي ،،،هزيت براسي اي
نزلت اخذت السطل وقطع قماش وبلشت انظف بيها ومستغربة ليش هو ومرتة كل واحد بغرفة نفضت الفراش ورجعت رتبتة ومسحت اغراضها ورجعتها بمكانها
رشيت معطر وكمت امسح الارضية
فارس ،،،طلعنا من العصر من عمان والى ثاني يوم الصبح يلا طبينا من طبينا جان طالع الصبح دخلت استقبلتني كالعادة ام غزوان وابنها والحارس بدؤا الشباب ينزلون البضاعة بالمخازن واني دخلت البيت
ام غزوان ،،،الف الحمد لله على سلامتك شيخ
الله يسلمج ام غزون
ام غزوان،،،،الريوك صاير شيخ
فارس،،،اشرت بأيدي ريكي الشباب ام غزوان تعبان ونعسان مااريد اي شي
ام غزوان،،،صخام بوجهي هاي بعدها فوك تنظف والشيخ جاي تعبان يبو علية وعلى حظي واطكطك بأصابيعي
فارس،،،صعدت شفت باب غرفتي مفتوح بطأت خطواتي واني عاقد حاجبي فتحت الباب بهدوء واشوف بنية مدنكة تمسح جانت رافعة ثوبها ورجلها طالعة الى الركبة ماشفت بحياتي هيج رجل حلوة
هنادي،،، امسح ومندمجة وارجع ليورة وفجأة حسيت شي وراي طخني رفعت راسي واني ايدي على كلبي والايد الثانية على حلكي متت موت من الخوف ونزلت دشداشتي بسرعة جان الشيخ واكف ويباوعلي ولابس بنطرون عسكري وتيشيرت نص ردن اسود وبوت طويل اسود مدخل بي البنطرون وكالعادة الحزام الي مخلي بي السلاح لابسة على كتفة
فارس،،،رجعت ليورة نزعت بوتي وكتلها كملي شغلج
واخذت المنشفة وطبيت للحمام
هنادي ،،،ماارتاحيت الا طب الحمام كملت مسح بسرعة ونزلت ماكو قطرة دم بوجهي صارت بوجهي ست سلطانة وكالت شنو جنت تسوين مجان نظفتوها من الصبح
وعافتني ودخلت الغرفة
فارس ،،،طلعت من الحمام والمنشفة على راسي وشفت سلطانة كاعدة على الجرباية درت وجهي عنها وكلت اهلا وسهلا
سلطانة ،،،الحمدلله على السلامة فارس وتقربت منة وبستة من خدة
فارس ،،،بعدت عنها الله يسلمج
سلطانة،،،هالمرة طولت سفرتك
فارس،،،اها لازم فرق وياج وجودي او عدمة
سلطانة،،،تقربت منة فارس انت تعرف حيل زين وجودك شنو بحياتي
ايمتة تحن عليه اني تعبت منك ومن هالحياة ومحتاجة اصيرلك زوجة
فارس قاطعتها وشمرت المنشفة لخاطر الله سلطانة هم رجعنا لهل السواليف نظل نعيد ونزيد بيها اني مااشوفج الا اخت الي وبعمري متخيلتج زوجتي وتقاسميني فراشي
سلطانة،،،تقربت منة وخليت ايدي على كتفة فارس صح تربينة سوة بس هذا شي وبعد الزواج شي ثاني لكل واحد بينة احتياجات و.....
فارس ،،،اهووو هم رجعنا لدتعثر بالسوالف اني جاي تعبان سلطانة وراسي راح ينفجر مو وقت هالسواليف هالحزة
سلطانة،،،كمت وطلعت واني راح انفجر من قهري وغيضي وطبيت لغرفتي وبجيت وكالعادة توعدت انتقم على طريقتي هينة يافارس
فارس،،،ظليت ادكلب شكد نعسان بس طيرت النوم من عيني سوالف سلطانة الي متخلص
نزلت جوة وطبيت المطبخ صارت بوجهي نفس البنت وجانت كل مشوفني تشهك وتخاف جانت مسوية ظفيرة ولابسة دشداشة اتذكر شايفها قبل على ام غزوان بس عليها غير جانت اطول وتارستها اباوع لرجلها شنو من بياض وكعب رجلها احمر ويضوي وعبالك قدم طفلة
كعدت على الميز ودخلت ام غزوان وكالت شيخ حارة المطبخ اسويلك شي
فارس ،،،اباوع للبنية وهمست كيمر
ام غزوان،،،😮 ريوك يعني شيخ
فارس ،،،اي سوولي ريوك بس مشتهي االكيمر
ام غزوان،،،نصعدها لغرفتك شيخ
فارس،،،لا هنا ام غزوان هنا واباوع للبنية وكل متتحرك توكع عيني على شي بيها
سمعت ام غزوان تناديها هنودة
همست شلون عرفتي اسمها كالت كتبتة الي شيخ
فارس،،،، اهاااا
هنادي،،،طلعت من المطبخ وكعدت بالغرفة واحس نظراتة تخوف وتموتني من الرعب
فارس،،،همست ام غزوان شلونها
ام غزوان،،،تقربت منة البنية ذهب شيخ وفقيرة كلش والي فهمتة مكطوعة من شجرة ومو من هالديار
فارس ،،،وشلون وصلتنا مافهمتي منها
ام غزوان،،،لا والله مافهمت
بس شيخ اتوقع مو خرسة لان بالليل هية ونايمة تسولف واكثر من مرة سمعتها وبكلمات واضحة ومرات تكعد تبجي مختنكة
فارس ،،،اهااا والله من البداية كلبي لعب منها والنوب متعرف بلغة الاشارة
ام غزوان،،،اتوقع خافت منك ومكدرت تحجي كلت خلي تتعود علية وتأمن الية وافهم منها
فارس،،،عفية عليج والله كفو ام غزوان خليها تحت عينج شربت الجاي وكمت
هنادي،،،انتظرت الى ان خلص ريوك وصعد وطلعت وكفت مع ام غزوان بالمطبخ
