وجهة نظر

١٠. ادينى فرصة

مذكرات كريم :

بعد اللى حصل مع ليلى فى الرحلة باسبوع ادهم جالى و كان كلامه غريب :

ادهم : كريم ! ... انا اسف
كريم ( باستغراب ) : ... على ايه ؟!
ادهم : بص انا هحكيلك على كل حاجة ... انا خلاص مش هقدر استحمل انى اءذيك تانى .... و انت حر فى اللى هتعمله معايا انا موافق بأى رد فعل منك

استغربت كلامه و فضلت اسمعه و انا مصدوم ... ازاى اقرب الناس ليا يعملوا فيا كدا ؟ .... ازاى انا كنت عبيط و اهبل لدرجة انى ابقى عروسة فى ايد حد بيلعب بيا و بيحركنى زى ما هو عايز .... ازاى سمحت لنفسى انى اعرض ليلى لظروف زى دى ... دلوقتى انا فهمت ... بس الغلط مش على ادهم و بس الغلط عليا انا كمان ... انا اللى مش عارف استخدم قلبى .... دايما بفكر بعقلى و لاغى قلبى من حياتى و بحسب كل خطوة من غير ما احسها ... عشان كدا انا كنت غبى حتى و لو انا اذكى الناس فى اللى حواليا انا بردو غبى فى مشاعرى و مش عارف حتى اوصلها للبنت اللى بحبها ....

ادهم : بص يا كريم ... انا اعترفتلك دلوقتى بكل حاجة و اللى عايز تعمله اعمله ... بس فيه حاجة اخيرة لازم احذرك منها .... مايا مش هتسيبك انت و ليلى ... طول الفترة اللى فاتت دى هى اللى كانت بتخطط كل حاجة حتى اللى حصل مع ليلى دا كله كانت مخططاه من ورايا و اقسم بالله ما كنت اعرف حاجة من اللى عملتها اخر مرة من اول ما اتنصتت علينا لما كنا عند مازن لحد النهاردة هى اللى عملت كل دا لوحدها و لما عرفت جيت و قولتلك عشان مش عايز اخسرك
كريم ( باستهزاء ) : مش عايز تخسرنى ؟! ... وانت لما تلعب من ورايا العاب حقيرة انت و البتاعة بتاعتك تبقى مش عايز تخسرنى ؟.... لما تعرف ان صاحبك بيحب واحدة و تقول من وراه انك بتحبها و تنصحه غلط عشان الزفتة مايا قالتلك كدا و تمشى وراها زى الكلاب تبقى مش عايز تخسرنى ؟! ... بص يا ادهم انت كنت اقرب الناس ليا و كنت بعتبرك اخويا و يمكن اكتر لكن بعد كل اللى عملته معايا و مع ليلى انا مش هقدر ابص فى وشك اصلا ... انا مش هعمل زى ما انت عملت معايا و اقل باصلى ... انا هحاول انساك و مش هفتكرك تانى .... بس لو شفت خلقتك تانى انا مش عارف هعمل معاك ايه ... فالاحسن ليك انك تحاول تتجنبنى !! .... اما مايا بقا فانا عارف انا هعمل معاها ايه !!
ادهم : كريم ! .... انت معاك حق تضايق و تتعصب بس صدقنى انا ماكنتش فى وعيي انا كمان كنت عروسة فى ايد مايا زيك ... انا كنت بحبها و بنفذ طلباتها من غير ما افكر
كريم : الموضوع خلاص انتهى ... اتفضل اطلع برا و ماتعتبش البيت دا تانى !
ادهم : خاضر يا كريم اللى يريحك

ادهم مشى وانا لسة مصدوم ... مصدوم من اقرب الناس ليا اللى دايما بعتمد عليه ... بس خلاص انا مابقاش فارق معايا حد و هحاول اصلح اللى عملته يمكن ليلى تسامحنى على ربع اللى حصلها بسببى

عدت الايام و انا مقاطع ادهم تماما و فعلا مابشوفهوش فى الكلية ولا فى اى حتة من اللى كنا بنروحها و ابتديت اقلق، حسيت ان ادهم دلوقتى ندمان لكن بردو لازم هثبت على موقفى معاه حتى لو انا مش حابب كدا .... مايا بقا كانت بتحاول الفترة اللى فاتت دى انها تقرب منى اكتر من الاول و دا اكدلى ان كلام ادهم صح فانا قررت انى انتقم من مايا بس بطريقة اشيك شوية من الطرق بتاعتها ...