خانة الذكريات

لازم تزوج عمرك جبير

السلام عليكم سيداتي آنساتي ..
 اليوم قصتنه تحجي عن موضوع اثر بهواية ناس من مجتمعنه و بالذات بالوقت الحالي بسبب قلت الوعي و قربنه من الدين امام الخلق فقط ... و ابتعدانه عنه امام الخالق ..
ذهب ضحيتهه عوائل بأكملها ..
لكم حرية التصديق او عدمه ..
راح انقل اساس القصة كما رويت لي ..
قصة واقعية عن لسان الولد و البنت ...

#خانة_الذكريات
الفصل الاول
#بقلمي_اسراءالجميلي

هلا هلا بابني العود ..
و احسن اولادي ..
الله يخليك ياب و يحفظك النه ..
شلونك حبيبي بالمعمل اليوم ؟
و الله ياب الحمدلله ..
المدير كلش حابني يحسسني المحاسب الوحيد بالدنيا ..
ههههه طبعاً عيني وين اكو منك و بأمانتك و اخلاقك ..
الله يخليك ياب ذاك الشبل من هذا الاسد ..
خليت ايدي على ايد الوالد و جريتها و بستها ..

استغفرلله ابني شوكت اجوز من هاي العادة ؟
لا يابه ما اجوز منها للموت ..
انت و امي تاج على راسي و شما اسوي ما اوفيكم حقكم ..
اسم الله عليك ..
ربي يبارك بيك وليدي و يرزقك من نعيمه ..
امين ياب ..

شوف سرمد اريد احاجيك بموضوع ..
اي ياب تفضل !!!
حبيبي انت ابنه الجبير بعد اختك اسيل ربي يحفظها ..
اني و امك كبرنه و اريد انشوف احفادنه منك يا وليدي ..
ياب انتوا مو عدكم حبايبنه سارة و جود و كلنا انحبهم ..
ابني سارة و جود وين شايفيهم من ٢٠٠٢ ماكو ..
شافو الوضع مو زين امهم و ابوهم و راحوا للاردن ..
و هاي صار سنتين بعاد ..
و انت كبرت يا ابني يعني عمرك هسة ٢٨ شنو قليل ..
عصام الاصغر منك صار سنة من تزوج ..
انت شوكت ؟
هههه هاي شنو ياب حاسب للكل انت ؟

يا ابني فدوة اروحلك اسمعني اني و امك ..
صار الها كم سنة تحجي وياك و انت راسك ناشف شوكت تلينه ؟
هسة لو عندك مكسرات و علاقات جان اكول ملتهي بيهم و متريد الزواج ...
ابني الزواج استقرار و راحة بال و خاصة من يكون الزوجين متفاهمين يا وليدي ..
صح ياب ..
خليني الكه بنت الحلال و اكلكم عليها و يصير خير ..

لا عيني لا هاي قديمة الجملة و كايلها الامك كومة ..
هههههه هاي شنو طلعت امي ناقله كلشي بالحرف ..
لك لعد شلون غير مرتي و تحجيلي عنكم اولادنه انتوا و فرحتنه بالدنيا ..
اي صح ياب ربي يخليها الك و النه ..

زين شنو رئيك احنه نلكالك مو احسن ؟
خوش يابه اذا انتوا لاكيلي وحدة ليش متكلي مو احسن من اللف و الدوران و تعبت نفسك ..
جان يضربني بالسبحة على جتفي ..
ايا ملعون الوالدين ...
هههههه حشاكم ياب ..

شنو رئيك ب لارا ..؟؟؟
لارا منو ؟؟
شنو هذا الاسم مال المسلسلات المدبلجة ..
ههههه لك لا صدك احجي ..
عاد دخلت امي الحنينه للصالة ..
ربي يحفظه النه ..

طبعاً جنه كاعدين بالهول الي هو مفتوح على الصالة بيناتهم قاطع سلايد لونه جوزي ..
باب الهول الداخلي صايرة على ايدي اليسار ..
اني گاعد على القنفة الجبيرة بطرف الي يم الباب و ابوية بالطرف اللاخ ..
وكفت يم الباب ..
ايييه زين حضرتينه ام سرمد ..
خيركم عيوني انتو ؟
زين دخلي اصب الغده ال سرمد جوعان اكيد سودة عليه ..
لا يمه خلي انشوف العروس و بعدين ..

يا يمه قنعت بيها كللللييييشششش ..
ههههه لحظة لحظة اشو زوجتوني و بعدني حتى ما اعرفها ..
كعدت عالقنفة المقابيلنه ..
لا يمه شلون متعرفه ؟
لارا بت اخت مرة عمك ابو احمد هاي الحلوة الي شفناها بعرس احمد قبل اسبوعين ..
ذكريني يوووم و الله ناسي ..
يمه هاي الابنية الشكره و عيونها زرك ..
الجانت لابسة بدلة مخصرة جويتي ..
هاااااا اي اتذكرتها ..
الي كل الولد جانوا يباعون عليها ..
ابوية : ايييه يعني منتبه عليها كلش زين خير ان شاء الله ..
لا ياب يا خير ..؟
اني ما احب هيج نوعية ؟

ليش يمه شبيه الابنية اشو مال و جمال و شهادة هندسة ؟
و عائلة راقية و كلشي و كلاشي !!!
يمه هاي المواصفات تغري اي شاب غيري اني ما تغريني ..
اني اريد وحدة ملتزمة مؤدبة مرتبه اذا عدها شهادة خير و بركة ..
كون من تمشي بالشارع الناس تباع عليها و تكول ( صلوات شنو هالاخلاق ربي يستر عليها ) ..
مو يكولون ( صلوات شنو هالخلقه و الجسم ) و يذبولها رقم ..
اريد ابنية من اعوفها ابيتي اطمئن عليها و على جهالي ..
ما تظل تفرفر النهار كله و الليل تون عليه ..

يمه لارا الحفلة كلها جسمها ما شاف الكرسي ..
جان يضحكون اثنينهم ..
امي : ابني احنه همين سئلنه عليهم و همه خوش ناس ..
باجر عكبة تحتاج شئ شياتين اهلها اكيد ميقصرون وي بتهم ..

صح امي ما كلت شئ اني ..
بس اني ما اريد اتزوج دفتر ..
اريد مره تكون و نس و سند و راحة بال اليه ..
ابوية : و الله ابني كبرت بعيني اكثر و اكثر ..
الله يستر عليك و مدام عرفنه المواصفات راح نبدي اندورلك الي تريدها ..
امي : و ليش اندورله موجودة و اميرة بيتها ..

ههههه هاي شنو يوووم خالتهن جوة اباطج ؟
امي : اي يمه حتى ما تصيرلك حجه ..
ابوية : زين منو هاي الي تريديها تشرف بيتنه ؟
امي : بنت ام امجد جيرانه ..
بس همه ما عدهم غير بس شمس الصغيرة ؟
امي : لا يمه عدهم قمر و صدك قمر ..
يمه ما اريد قمر بالشكل ..
اريد قمر بالاخلاق ..

فالقصة احساس غريب بالفرح