_ عرفتني عليه ملاذ صحبتي
_ حنييين احكي لي بالتفصيل
_ يا ستي لمن خلصتا تامن بشهرين مدرستنا كانت عاملة حفلة وداع للطلبة و الحفلة دي بتتعمل كل سنة و بجو فيها كل الطلبة القرو في مدرستنا منهم ناس في الثانوي و ناس في الجامعات و في ناس خلصو و شغالين حتى . اليوم داك عمري ما بنساه عادتي القديمة اني كنتا ما بحب اكشخ زيادة عن اللازم ما بحب اكون ملفتة للانظار و لا بحب اهتم بنفسي شديد كنت متعودة اكون اكتر من عادية . بس في سنة تامن شكلي كان اتغير طولت و هيئة جسمي اتغيرت و احلويت فجأة غير ملامح الطفولة و كده فبقى كتير من اولاد مدرستي بحاولو يتكلمو معاي بس انا ما كنتا بعرفهم بس اغلبهم اصحاب ملاذ صحبتي بس ما كنت مدياهم وش . و لا عندي احتكاك مع اولاد مدرستنا ياهو ناس تامن اكبر ناس في المدرسة و في نظري برضو شفع و ما عندهم موضوع . فقبل الحلفة بكم يوم في اجازة تامن بعد خلصنا و طلعت النتايج صحباتي كلهم مشو يشترو فساتين للحفلة بس انا ما كنتا حابة لكن ماما و ملاذ اصرو اني كمان امشي اشتري فستان فمشينا انا و ملاذ و ريهام صحبتي و ام ملاذ و ماما . ملاذ و ريهام اختارو فساتين انثوية و انا كان اخترت فستان رمادي عادي ما فيه شي بس ملاذ اختارت لي فستان لونه بنفسج داكن و مشغول من فوق شغل بسيط و طوله تحت الركبه بشويه كان انثوي و جميل غير استايل لبسي و اصرت اجربه لمن جربته كان طالع خرافي و مبين جسمي غير فماما عجبها شديد و رغم اني كنتا رافضة البسه اشترته لي و يوم الحفلة مشينا انا و صحباتي عملنا شعرنا و لبسوني الفستان غصب لاول مرة البس كده و افك شعري و ملاذ بعد تحنيس عملت لي كحل و روج خفيف برضو لاول مره لاني رفضتا اعمل ميك اب لانه بضيع ملامحي و براءتي شكلي كان غير تماما . مشينا الحفلة انا و ملاذ و ريهام كنا واقفين مع بعض و معانا 2 صحباتنا جا احمد حبيب ملاذ كانو اصحاب في الوقت داك و سلمتا عليه ديك كانت اول مره اشوفه من بعد 4 سنين و شوية اخر مره شوفته كنت انا في صف رابع و هو كان ممتحن تامن كان معاي في نفس الترحيل . وقف احمد معانا كانو هو و ملاذ بتونسو و انا كنتا مرتبكة لانه دي تقريبا كانت اول مره اقيف مع ولد فقبلتا على ريهام و بقينا بنتونس انا و هي بعديها بشويه جا واحد سلم على احمد و احمد سلم عليه بالاحضان و قال ليه : شنو يعني لازم نشوفك بالمناسبات الرسمية . قال ليه : عارف الجامعة و جوطتها . و سلم على ملاذ و ملاذ عرفته علينا قالت ليه حنين صحبتي مد ايده و سلم علي و بعديها سلم على ريهام و قعدو هو و احمد يتونسو ريهام لكزتني و قالت لي بصوت واطي : وااااي يا حنين شوفتيه فظيع كيف ياخي حلاااااته و العجب القميص الاسود و الساعه يحردوهم ليه . هو فعلا كان وجيه لدرجة و استايل لبسه انيق و حلو امكن ما لاقاني ولد جزاب بالطريقة دي بس ما ركزتا كتير . لكزتها و قلت ليها : قلة ادبك دي اصلك ما بتخليها . قالت لي : ما لكن الولد سمح سمح و ظريف بعد ده سلامه حلو و زوق . مياده قاطعت : الجا ده هو الكان حبيبك صح ؟
_ ايوا
_ اسمه منو ؟
حنين اترددت بس قالت ليها : حسام
_ سبحان الله حسام من حسام يفرق ما زي ابو الهول حقنا ده بياخة و تقالة دم
حنين في نفسها قالت كيف يفرق و هو نفسه و لا الظرافة ديك كانت مع البنات ؟ . اصلا عادي متوقع منه . مياده قاطعت تفكيرها و قالت ليها : اها كملي
_ كنا واقفين بنتونس مع البنات و انا ما كنتا منتبهة انه بعاين لي بس ريهام نبهتني قالت لي : حنين الولد ما شال عينه من عليكي طار مني خلاص بس عليكي الله ما طيريه منك . قلتا ليها بعصبية : هو انا بعرفه ؟ و عارفاني جني و جن الكلامات دي . فقالت لي و هي مغيوظه : بلا جنك معاك هندي كبرتي و حلاتك ناقصك شنو ؟ . فقلتا ليها ببرود : ما بصدق قصص الحب و الفراغات دي . قالت لي بنفس البرود : سمح بكرا حايجي اليوم التصدقيها غصب عنك .سمعنا احمد بقول ليه يا حسام . فريهام اتفاجئت قالت لي : اتخيلي ده حسام كان معاي في ترحيلي لمن كان صغير كان حلاته بس حسي بقى خرااافي . قلتا ليها بتعرفيه ؟ قالت لي : لا بس ملاذ بتعرفه و سمعتا عنه ياخي بنات مدرستنا كلهم كانو بتكلمو عنه خاصتا بنات الدفع القدامنا هو ظريف بس قالو عينه زايغة . قلتا ليها : اصلا كلهم كده . بعد الحفله خلصت جا محمد ساقنا انا و ماما و رجعنا البيت و انا قاعدة في غرفتي جاتني ماما و قفلت الباب فجات قالت لي : قبيل شايفاكم كنتو واقفين مع اولاد ما حكيتي لي انك بتعرفيهم
_ لاني اصلا ما بعرفهم
_ كيف ؟
_ الاتنين اصحاب ملاذ و بتعرفهم هي
_ ههههههههه قدريتا دي شديدة ما زيك
_ يعني امشي اعرف اولاد ؟
_ لو محترمين و اولاد ناس ليه لا
_ ماما !!
_ انتي ما بقيتي لسه شافعة و كلها 33 سنين و ان شاء الله تدخلي الجامعة . لازم يكون عندك زملاء و اصحاب و تعرفي الكويس من الكعب البنات الما بعرفو شي زيك هم البتحصل ليهم البلاوي لمن يدخلو الجامعة ربنا يحميكي و يحفظك
_ بس الاولاد كلهم فارغين و ما عندهم موضوع و كل واحد خاتي فهم في راسه
_ انتي بتي و انا عارفة ربيتك كيف يعني بتقدري توقفي اي زول عند حدوده و بعدين مش انا و انتي صحبات ؟ يعني حاتحكي لي اول باول و انا بوريكي الكويس من الكعب
_ وهمانين ساي ما عندهم موضوع و بعدين اها يعني شنو عرفت لي واحد و بعد شوية عمل فيها بحبني و بعد كم شهر يسيبني
_ حسي منو القال ليكي حبي ؟ انا قلت ليكي اصحاب صداقة
_ ديل ما عندهم صداقة في الاخر كلهم فهمهم واحد
_ مشكلتك بتعايني للجانب الكعب بس عارفة انا لمن دخلت الجامعة صداقتي كانت مع اولاد اكتر لانه البنات غدارات بس الصاحب صاحب بالجد ما بغدر . و بالنسبه للحب انتي لسه صغيرة و لمن تكبري براكي بتعرفي لو اخترتي الانسان الكويس و البحبك جد انها ما كلها فاشلة انا ابوكي كان بحبني من نحنا شفع قبل ما ادخل الثانوي و زي ما عارفة انه كان جار ناس خالتي و كنتا بمشي لناس خالتي كتير و لمن دخلتا الثانوي خطبني لانه في زمنا ما كان في شي اسمه صحوبية و كده بس حبينا بعض و استناني لمن دخلتا الجامعة و خلصتا و اتزوجنا و عمرنا ما غلطنا على بعض و كل يوم كنا بنحب بعض اكتر من اليوم القبليه .
_ زمنكم غير و الناس زمان غير حسي
_ زمان زي ما كان في الكويس كان في الكعب و حسي نفس الشي . المهم ما تشغلي بالك حسي بكرا بتكبري و بتعرفي .
كلام ماما دار في راسي بس برضو ما اقتنعتا تماما و في اليوم التاني اثناء ما كنتا داخله الفيسبوك لقيت طلب صداقة منه بس ما اشتغلت بالموضوع كتير زيه زي الطلبات المن اولاد غيره كانت ملاذ جاياني متغدية معاي فكنتا فاتحة اللاب توب و هي قاعدة جمبي فلمن شافت طلب الصداقة قالت لي : حسام !!
_ اي
_ اقبلي الطلب
_ من متين قاعده اقبل اولاد ؟
_ حنين بطلي تخلف حسام ده ولد محترم و ظريف شديد ياخي
_ ما بعرف
_ عايني اقبليه و اتعرفي عليه اذا ما عجبك الوضع امسحيه و لا بلكيه ما خسرانة شي
_ طيب
فقبلتا الطلب و اتعرفنا على بعض و اتكلمنا كذا مرة كلامنا كان في حدود و بعد فترة كنتا عيانه فغبتا عن الفيسبوك فترة و عرف من ملاذ اني عيانة فشال رقمي و اتصل علي و كفر لي . هزأتا ملاذ على انها ادته رقمي بس هي قالت لي لو ما عارفاه محترم ما كان اديته الرقم و هو فعلا غير قال لي كيفك و سلامتك و كيف بقيتي ما قال شي و بعد خفيت شوية رجعتا ادخل الفيسبوك بقى بطمن علي على طول . و مرة دخلنا في نقاش عن الجامعات و الثانوي و كده و الونسة جرت كانت اطول ونسة لينا في الفترة ديك و تاني ونستنا كترت لمن بقى عادة بالنسبة لي و بعد شهرين تقريبا قال لي انه بحبني و عاوزني انا اتجننتا و اتغظتا شديد و قلتا في نفسي فعلا عينه زايغة و متين اصلا عرفني عشان يحبني فعملتا ليه بلوك و تاني ما سمعتا منه لا حس لا خبر . و نزلتا اولى ثانوي اول ايامات كنتا بفتقده و بتزكره فقلتا عادي كان اول صاحب لي و اول ولد اتكلم معاه ايام و بتعود بس مرا شهر و انا كل يوم بلقى نفسي فتحتا رسايلنا و قريتهم او مرات لمن الاقي ملاذ دون ما تنتبه بشيل تلفونها و بفتح صفحته و اقرا بوستاته لمن بقيت بستغرب في نفسي و بعد فترة بقيت بتكلم مع احمد في الفيسبوك الهو و ملاذ ارتبطو و اتعرفتا على اولاد من دفتعي و كم واحد من الدفع القدامي بس علاقتي بيهم كانت في حدود و مرا زي 4 شهور و انا كل يوم بتزكر حسام لدرجة مرات كنتا ببكي و بهرب من مجرد فكرة اني ممكن اكون حبيته و في الفتره دي حاولو يتقربو مني كتيرين بس انا كنت مجرد السيرة بتجنني و بتزكره لمن يوم ملاذ و ريهام اتكلمو معاي و قالو لي حنين انتي حبتي حسام . لحظتها انفعلتا و قلتا ليهم : كيف احب واحد لاقيته مرة وحدة بس و كلامي معاه كله كان في الفيسبوك الا مكالمة وحدة و انا اصلا ما عاوزة احب و يوم ما احب احب بالطريقة دي ؟ّ! بس في نفسي عرفتا اني غصب عني فعلا حبيته . لمن في يوم جاتني مكالمة من رقم غريب رديت لقيت الصوت ما غريب علي قلت ليه : منو معاي
_ لو وريتك عليكي الله اوعديني ما تقفلي الخط
لحظتها شكيت انه هو و ضربات قلبي بدت تتسارع : طيب
_ انا حسام
اتصقعتا لمن قال اسمه : جبتا رقمي من وين
_ انا عانيت عشان القاه
_ طيب خير ؟
_ حنين عاوزك تسمعيني بس
_ اها
_ انا اسف جد ما كنتا عارف انه كلامي ممكن يخليني اخسرك و الله طول الفتره الفاتت دايما في بالي
_ و انت حسي بتقول كل الكلام ده ليه و عاوز تصل لشنو انا الخزعبلات دي ما بصدقها
_ انا ما عاوز اصل لشي و كل طلبي تسامحيني رغم انه ما عارف غلطا في شنو و الغلط وين في اني اعبر عن اعجابي بوحدة لانه ما كان قصدي شي كعب
_ ما اي وحدة تعجبك معناها بتحبها ؟ هو الحب كده قالو ؟
_ طيب لو فهمتيها كده انا اسف و ما حاتكلم كتير في الحتة دي . ممكن نرجع اصحاب و تنسي الفات ؟
_ صعبة
_ فكري فيها
_ ان شاء الله
و قفلتا و بقيت بفكر في الموضوع و انا عارفة انه نفسي نرجع نتكلم مع بعض و فعلا رجعنا نتكلم مع بعض اول ايام كنتا بتعامل معاه ببرود بس بعديها بقيت بتعامل معاه عادي و قربنا من بعض شديد و بقينا تلفونات على طول . و حكى لي كل شي عن حياته و انا كمان حكيت ليه عني و كان اول واحد افتح ليه قلبي و حكيت ليه عن بابا و انه انا من وفاته بقيت انطوائية و معزولة عن الناس الا صحباتي 2 بس ملاذ و ريهام و كلامي قليل مع الناس بس شوية شوية حسام قدر يطلعني من حالتي دي بقيت بضحك و بتونس و هو كان دايما بهتما بي و بكل شي بخصني قرايتي صحتي علاقاتي مع الناس كل شي . بعد بابا هو القدر يرجع لي ضحكتي من تاني و مرة طلعنا كلنا انا و هو و احمد و ريهام و ملاذ و هالة صحبتنا صاحبتها في الثانوي . في اليوم داك بعد رجعنا اتصل علي و قال لي انه جد بحبني و هو لمن في الاول قال لي انه بحبني قالها لي لانه معجب بي و ختاها زي زي اي بت بتعجبه و بطرح ليها و بعد بلكته حاول يخت الموضوع عادي بس برضو هو ما بطل يفكر فيني و كان بطمن علي من بعيد لبعيد قال لي : حنين انا عارف اني عرفتا بنات كتير بس و الله انتي بالنسبه لي غير و ممكن اعمل اي شي عشانك و عشان تصدقي صدق مشاعري اتجهاكك
_ حسام ..
_ ما تقولي شي حسي بس عليكي الله فكري اخدي وقتك في اليومين الجايين ديل و فكري
يومين ما اتكلمتا معاه كنتا محتارة اتأكدت اني حبيت حسام تماما بس كنت خايفة و ما قادرة اثق فيه . بس حبي ليه منعني احكم عقلي و مشيت ورا قلبي و وافقتا و ما اكذب هو فعلا اثبت لي انه حباني كان بعمل اي شي علشان يخليني مبسوطة تعامله مع البنات بقى في حدود و قطع علاقته مع اغلب صحباته الا وحدة كانت صحبته شديد بس عرفني عليها و هي كمان بقت صحبتي و كان بحكي لي بكل شي اول باول و انا كمان و ما بنخبي على بعض شي عشنا قصة حب خرافية عارفه نوع الاتنين البكونو بتكلمو طول اليوم لو قفلو من بعض بكملوها مسجات كنت بتنفس حسام ما بتذكر اكل و اشرب حتى و كل ما نتلاقى كانت كأنها اول مره نفس الارتباك نفس الخجل و كل شي بحسه كل مرة كان كأنه اول مرة و عمرنا ما زهجنا من بعض حصلت كذا مشكلة بينا كنا بنتخاصم كم يوم و ما حصل واحد فينا غلط على التاني او سمعه كلمة فارغة و بس بنتصالح و ما بنطول خصام و كل مشكلة بتثبت لينا انه نحنا بنحب بعض اكتر تمينا قريب سنتين مع بعض
_ بعد الحب ده كله سبتو بعض ليه ؟
قبل ما حنين تجاوب سمعو صوت الجرس فقالت ليها مياده : دقيقه اشوف الباب
كان حسام رجع من الجامعة بدري فتحت ليه مياده و قالت ليه : مبدر الليلة
_ كان عندي محاضرة وحدة . ناس امي رجعو ؟
_ لا لا و قالت لي البرجع فيكم اول يمشي يجيبهم
_ طيب اغير هدومي و بمشي ليهم . قاعةه براكي و لا شنو مها وين ؟
_ مها في الترزي بس جاتني حنين
حسام كان بتكلم مع مياده و ماشي على السلم و لمن سمع اسمها اتلفت على الجلسة لقاها قاعدة و هي كانت مدياهم ضهرها و ما فكرت تتلفت . فكمل مشيه بس مياده وقفته و قالت ليه خلي عندك زوق تعال سلم عليها مشى عليها و قال ليها سلام عليكم . هي اتلفتت و وقفت و قالت ليه اهلين . و قبل ما يرد عاينت لمياده و قالت ليها : يلا انا بعد ده لازم امشي
مياده : ياخي بطلي بياخة ما اتفقنا تقعدي معاي لمن ناس ماما و خالتو منى يرجعو
حنين : لا لا و الله اتزكرتا حاجات لازم اعملها في البيت
مياده : خلاص على اتفاقنا بكرا تمشي معاي عشان اشوف فستان العرس
حنين : ان شاء الله
و طلعت على الباب و ما قالت لحسام كلمه و هو استفزته حركتها بس ما اداها اهتمام و طلع غرفته
في اليوم التاني مياده و حنين مشو مع مها السوق مع بعض و مياده اشترت فستان اختارته ليها حنين و بعد خلصو مها عزمتهم على الغدا و قضو وقت ظريف مع بعض و مها حبت حنين شديد و حتى حنين كان نفسها يكون عندها اخت كبيرة و حست كأنه مها بقت بالنسبة ليها كده بس كل ما تتزكر انه ديل اخوات حسام قلبها كان بوجعها . بعد رجعت البيت دخلت غرفتها و صلت العصر و رقدت في سريرها و بقت تفكر : يا ربي ليه بحصل معاي ده كله . انا ما قادرة اتخطى الحكاية دي و اتخطاها كيف و كل شي حوليني بقى مربوط بيه و امكن بقيت بشوفه يوميا بس حتى لمن بعدتا وضعي ما كان احسن و هو بعاملني كأنه ما بعرفني و لا كأنه كان في بينا شي و لا كأنه جرحني و ازاني معقولة ده الانسان الانا حبيته كل الحب ده ؟ معقوله هو للدرجه دي ؟ طيب كيف في ناس بتقدر تخدع بالصوره دي ؟ ااااه يا رب هون علي . و قطع عليها تفكيرها خبط الباب و محمد بقول ليها ممكن ادخل قالت ليه اتفضل
_ نونة بعد المغرب اجهزي بدري عشان امشي معاكي النادي و اسجلك
هي كانت ناسيه الموضوع : اوكي
اتصلت على ملاذ عشان تستعجلها تجي بدري
_ الو
_ لوزتي ازيو
_ الحمد لله تمام انتي كيفك ؟
_ الحمد لله ماشي الحال . اسمعيني بعدين ما تتأخري انا بعد المغرب محمد حايجيبني
_ خلاص تمام
_ و كلمي ريهام ما تتأخر
_ ديك بتجي اول زول انتي ناسية مازن هناك
_ هههههههههه اي صح . يلا باي لبعدين
حنين لمن ملاذ جابت ليها سيرة مازن شالت هم انها ممكن تلاقي حسام بس قالت ما فارقة كده كده بتشوفه . و بعد المغرب صلت المغرب و اخدت دوش و جهزت لبست بنطلون اسكيني اسود و تشيرت بيجي داكن طويل من ورا شوية و بقدام مع الكمر و طرحة مشجرة عملتها شكل سكارف و عملت شعرها ضنب حصان لفوق كانت طالعة روعة و لمن عملت شويه كحل و مرطب شفايف طلعت احلى . مشو هي و محمد على النادي و عمل ليها اجراءات التسجيل و بطاقة الاشتراك و دخل معاها لمن لاقت صحباتها و سلم عليهم و قال ليها : 9 و نص حاجي اخدك . قعدت هي و ريهام و ملاذ على تربيزة و بعد شوية جا ماذن و سلم على حنين بطريقة عادية و هي كمان سلمت عليه عادي و مشا هو و ريهام و قعدو براهم و بدو يتكلمو عن حنين و حسام و ريهام كانت خايفه انه لو جا حسام تحصل مشكلة فسألت ماذن : حسام جاي ؟
_ و الله ضربتا ليه قبيل و قال احتمال يجي . عارفاه ما قاعد يجي النادي كتير الا بالمزاجات
_ ربنا يستر
_ ما تخافي ما اظن حايسألها
_ هو اتلاقو كم مره بس ما حصل اتكلم معاها بس سلام و عليكم السلام . لكن امكن عشان ما لقى فرصة
_ و الله يا ريهام انا ما فاهم شي ما قادر افهم بكرهها و لا لسه عندو ليها شي رغم اني اقرب زول ليه بس اول مره ما افهمه
_ يكرها ليه هي المشت حبت عليه ؟
_ ريهام ما عشان صحبي حسام اي كان بعرف بنات كتار بس في حياتو ما عمل الحركة دي و هو اتغير عشانها يعني يعمل كده في اكتر وحدة حباها ؟ انا عارف اخلاقياته كويس ياخي انتي ما تتصوري حسام ده كان مجنون بحنين كيف
_ ما عشان كده يا ماذن انا دايما بقول انه حاسة في شي غلط لكن هو قالها براه
_ هو ايام المشكلة ما كان بقول غير طلعت مخدوع فيها و تستاهل اكتر من كده
_ زي ما واثق في صحبك و اخلاقه انا واثقة في صحبتي اكتر من اي شي و لو حسام كان مجنون بحنين هو كان اغلى شي في حياتها ياخي هي ما حبت قبليه و اول ولد تدخله حياتها
_ و الله يا ريهام محيريني عديل كده و المشكلة كل واحد اعند من تاني و مصرين ما يتكلمو في القصة . بس لو في شي غلط مصيرها الايام تكشفه
_ ان شاء الله
و فجأه حسام اتصل على ماذن و قال ليه انت وين انا ماشي على النادي و زهجان ما طايق نفسي امكن اروق قال ليه انا هناك ريهام شالت هم بس قالت امكن لمن يتواجهو في مكان ما فيه اهلهم يقعدو و يتكلمو . حنين و ملاذ كانو قاعدين يتونسو و معاهم وحده صحبتهم و احمد ما جا لانه من حصلت المشكلة البين حسام و حنين و هو قطع علاقته بحسام لانه مره اتشاكل معاه . حنين بالنسبه لاحمد اكتر من اخته و الما برضاه لاخواته ما برضاه ليها . فبقى احمد ما بجي النادي كتيرعشان ما يصتدم بحسام الا ما نادرا بجي . و جا وائل سلم على ناس حنين و قعد معاهم . وائل اصلا ود خال حسام بس هو و حنين بقو اصحاب شديد من بعد المشكلة الحصلت بين حنين و حسام وائل كان واقف جمبها و اثبت ليها انه اخو ممكن تعتمد عليه حتى انه قال لحنين انه قطع علاقته بحسام و بقى ما بينهم غير السلام بعد عمايل حسام . قعدو وائل و حنين و ملاذ و صحبتهم و وائل بطبعه ظريف و قضوها ونسه و ضحك . بس الجو اتعكر جدا لمن جا حسام مشى على ريهام و ماذن و سلم عليهم و قف معاهم شوية . ملاذ اتغاظت من ريهام انه لمن جا حسام كان يفترض تمشي و تخليهم . حسام كان واقف جمب ماذن و بعد ماذن ريهام حسام لمن جا داخل انتبه على حنين و وائل كان مديه ضهره فافتكر انه ده احمد بس لمن جا سلم على ناس ماذن . وائل اتلفت و عاين لحسام . حسام بعد سلم على ناس ماذن ضحك ضحكة حرقة و قال لماذن يا سبحان الله بالله لسه هي معاه ؟! و سكت لانه ريهام الما فهمت شي من كلام حسام كانت واقفة . بعداك وائل اقترح على ناس حنين يخشو يلعبو بولينق و فعلا قامو و خشو جوه . حسام استاء من الوضع لانه حس كأنه حنين بتحاول تغيظه بس حاول ما يدي الموضوع اهمية عشان ما يحقق ليها الفي مرادها و ساب ماذن و ريهام و مشى سلم على شباب اصحابه بس غلبته القعدة كان شايف اكتر انسانة حباها جمبها واحد غيره و هو ما في يده شي غير يتفرج زي الغريب رغم كل شي ما بقدر يتحمل ده كله فقام و قال انه ماشي البيت لانه بكرا عنده محاضرة بدري و لمن طلع و ركب عربيته حنين كانت طلعت عشان محمد جاها و مشت ركبت العربية محمد لمن شاف عربية حسام نزل سلم عليه شوية و اتونس معاه شوية كده و كل واحد ركب عربيته . حنين كانت كأنه في نار جواها من برود حسام . اول ما وصلت امها قالت ليها اها كيف النادي و البرنامج ردت عليها بالغصب : ظريف . و قالت ليها تعبانه ماشة انوم . منى حست بانه في شي بس قالت بتتكلم معاها بكرا بعد محمد يطلع الشغل . طلعت غرفتها و قفلت الباب و اترمت في السرير و ما قدرت تمسك دموعها طلعت دفتر مزكراتها الاخر كلام كتبته كان فيه لمن كانت في دبي : ااه من وجعي المابي يفارقني لمتين بعدت و جيت لقيتك قدامي و انت و لا كأني كنتا في حياتك لو تعرف شوفتك بتعمل فيني شنو كان حنيت علي و رحمتني منها بس انت بتستمتع بعذابي تعبتا و انا بحاول انساك بعدتا عن اي شي بتعلق بيك غرفتي حاجاتي بيتنا حتى البلد هجيت منها بس عمرك ما بعدتا من جواي و حسي و انت قدامي حانساك كيف و اعتبرك ما كنتا ؟ سبتا كل حاجه ليها ذكرى معاك بس كل الذكريات دي انا لسه عالقة فيها . انساها كيف انسى احلى ايام في حياتي كيف ؟ انسى الانسان الطلعني من اوجاعي كيف ؟ من ما عرفتني و انت كنتا كل يوم بتثبت انك مختلف و دخلتا في حياتي و عرفتا كل شي فيها و رجعتا كل حاجة حلوة خليتني اشوف فيك ابوي الاتحرمتا منه و انا صغيرة عوضتني عن حنانه لسه بتزكر يوم طلعنا كلنا انا و انت و صحباتي قبل ما نرتبط . كلهم قالو عاوزين ايسكريم الا انا . و رجعت حنين لزكريات اليوم داك و بدت تكتبها : يومها حسام سألني قال لي ليه ما عاوزة ؟ قلتا ليه ما بحبه . قال لي باستغراب في زول بكره الايسكريم ؟! . قلتا ليه : ايوا انا . لاحظ لدموعي الكانت شوية و حاتنزل . و قلتا ليهم اني ماة و جاية و طلعتا حديقة المطعم و جا وراي لقاني ببكي و لمن جا حاولتا امسح دموعي بسرعة مسكني من ايدي و قعدني في كرسي و اداني منديل . و قعد في الكرسي الجمبي و ما قال و لا كلمة غير : ما تكتمي دموع جواكي ابكي . و سكت و انا بكيت لمن شهقتا بعده ارتحتا و مستحتا دموعي بالمنديل و هو ما حب يضايقني و يسألني عن السبب البكاني و انا بديت احكي براي قلتا ليه انه : بابا لمن مات كنا ماشين ناخد ايسكريم لي لاني بحب الايسكريم اكتر من اي شي و مرات كنا بنمشي نجيبه من ورا ماما لانها ما بتسمح لي اكله طوالي و رغم انه المكان كان زحمه انا اصريت ما كنتا عارفة انه اصراري ده كان حايبعدني عنه للابد و من مات بقيت بكره الايسكريم . مسك ايديني الاتنين و عاين لي في عيوني و قال لي : كل شي مقدر و مكتوب و اليوم واحد مع اختلاف الاسباب و ابوكي ربنا يرحمه يومه تما اليوم داك و لو كان راقد في بيته كان لابد من انه يفارقك لانه يومه تما و انتي ما تعاقبي نفسك على حاجة انتي ما ليكي ذنب فيها متفهم تعلقك بابوكي بس هو بحس بيكي و اكيد ما عاجبه حالك . و من يومها بقيت بحكي ليك كل شي بخصني و بديت تطلعني من ازمتي شوية شوية و زاد تعلقي و حبي ليك عمرك ما حوجتني لحد طول ما انت جمبي . لمن اكون عيانة كل ساعة بتتصل تطمن علي عوضتني عن بابا شوفتا فيك حنيته . بس بعد اديتني ده كله كسرتني في لحظة يا ريتك خليتني في اوجاعي يا ريت لو سبتني انطوائية و بعيدة عن الناس زي ما كنتا يا ريت لو سبتني في حزني على ابوي ليه اديتني كل شي و احلى ايام حياتي بقت زكريات بتقتلني و بقيت بتكلم مع الورق على انت ؟ . ليه سبتني مع زكريات كل يوم بتموتني ؟ يا ريتني انساها و اعتبراها ما كانت و حتى لو اتزكرتها ما تأثر فيني .
قفلت دفتر مزكراتها و هي بتبكي بحرقة و بعد مسافة نامت و هي بتبكي زي الطفل الببكي على حاجة و من التعب نام جات منى فتحت باب الغرفة لقتها في السرير و جمبها دفتر مزكراتها مفتوح شالته و قرت الصفحه الاخيره بس ما فهمت كيف انه حسام قدامها افتكرت انه لاقته في النادي صدفة . اتحسرت على حال بتها الحاولت تعمل اي شي عشان تطلعها من الحالة دي بس ما قدرت حتى النادي لمن واقفت انه تشركها فيه عشان يبقى ليها موضوع و تفرق مع صحباتها . شالت الدفتر و قفلته و ختته في الدرج و حنين كانت لسه بهدومها شالت الطرحة الكانت ملفوفة في رقبتها و غطتها و طفت النور و طلعت .
حسام كان مستاء لابعد حد و ما حابي يرجع البيت بحالته دي ما لقى نفسه الا ماشي بعربيته على المكان البتحبه حنين و من اول مرة وداها ليه بقت كل مرة بتطلب منه ياخدها هناك . كان في الكورنيش في كافتريا صغيرة و جمبها في زي مساطب شكل مدرجات كان بشتري ليها الايسكريم و بقعدو في المدرجات على البحر نزل من عربيته و قعد هناك اتزكر اول مره جابها المكان ده كان اتلاقو هو و هي و ساره بت خالتها و علا خطيبها كان علا عازمهم على الغدا اليوم داك حنين كانت لابسة اسكيرت جنز تلاتربع و معاه تشيرت اسود ساده بقدام و من ورا في الضهر فيه قلب احمر و مكتوب فيه بالون الابيض و كانت لابسة طرحة حمرا و تانية شعرها لفوق بمشبك و نازلة خصل من ورا كان شكلها بسيط بس حلو لدرجة . و بعد خلصو غدا قالو عاوزين يمشو مكان تاني فحسام اقترح عليهم انه يوديهم مكان ظريف فطلعو من المطعم ساره و علا مشو على عربية علا فحنين مشت وراهم ساره قالت ليها : امشي اركبي مع حسام ما تخليه براه. قالت ليها لا ما بركب معاه ساره عصبت و قالت ليها : يا بت حسام انتي ما بتعرفيه من الليلة و لا امبارح و قربتو تتمو سنة مرتبطين و لو ما انا عارفة اخلاقه ما كان قلتا ليكي كده . قالت ليها انا اكتر وحدة عارفة اخلاقه و واثقة فيه بس ما بقدر . فحسام كان سامع نقاشهم و ابتسم و انبسط من براءة حنين و خجلها و قال لساره : خليها براحتها . و مشت ركبت معاهم و لمن وصلو مشو قعدو في الكراسي القدام الكافتريا و حسام ساق حنين و مشو شوية كده كان في محل بتاع ايسكريم دخلو المحل قال ليها عاوزة حاجه ؟ قالت ليه : لا . اشترا ايسكريم بنكهة النيسكافي و الكارميل حنين استغربت لانها بتحب النيسكافي و الكراميل و شال كاسة الايسكريم و طلعو مشو قعدو في المدرجات لقته انه شال معلقتين و مدا ليها وحدة قالت ليه عارفني ما بحبه قال ليها نفسي اكله معاكي قالت ليه انها استحاله تقرب على الايسكريم قال ليها ما تحرجه و هو اخد كاسة وحدة عشان ياكلها معاها و اخد نكهتينها المفضلين مخصوص و اداها اول معلقة دمعتها نزلت و اتزكرت ابوها . حسام مسح دمعتها و قال ليها : كل شي اتحرمتي منه بعد ابوكي اتوفى انا حارجعه و ربنا يقدرني و ما احوجك لشي . و اكلو الايسكريم مع بعض و قعدو يتونسو و كانت من احلى الايام المرت عليهم و من يومها بقو كل ما يطلعو لازم ياخد ليها ايسكريم و حنين بتخلي كاستها و بتاكل معاه من نفس الكاسة . حسام ابتسم لمن اتزكر كل الزكريات دي و نزلت دمعته و قال في نفسه لسه بتتزكرها و بتبكي عليها و هي فضلت غيرك عليك و للان معاه و انت و لا كأنه كنتا يوم في حياتها . ليه يا حنين انتي اكتر بت حبيتها و عاهدتا نفسي انك حاتكوني اخر وحده و الله كنتا عاوز اكمل معاكي باقي حياتي و انتي عاقبتيني كده ليه . ليه يا حسام بقيت ضعيف كده تجي دي و تعمل فيك كده دمرت حياتي كلها و هي ما تستاهل . انساها . انساها و ارجع لحياتك هي عايشة حياتها انت بتتعذب على شنو . بس كل كلامه ده ما قدر يوقف دموعه الجارية الكل دمعه بتنزل كانت بتحسسه انه زول ضعيف بس الجواه اقوى منه . قام و دور عربيته و رجع على البيت كانت الساعه 1 . و سامية كانت قاعدة و مقلقة لانه حسام ما من عوايده يتأخر و اول ما فتح الباب كانت سامية و اخوانه كلهم قاعدين مستنينه لمن دخل امه قامت و مشت عليه و بلهفة : حسام كنتا وين ده كله و تلفونك ما بترد عليه يا ولدي بتعمل فيني كده ليه
حسام العيونه كانت حمره زي الدم : مشيت النادي زي ما وريتك
مصطفى : النادي من 11 بقفل و حازم ضرب لماذن قال ليه انك طلعتا من 9 و نص
حسام بعصبية : هو تحقيق و لا شنو ما بتتأخرو اكتر من كده
مصطفى وقف و استفزاه رد اخوه : ما تحقيق لكن قلقنا عليك
حسام : انا ما شافع عشان تقلقو علي
مصطفى انفعل و كان ماشي عليه الا مسكه حازم : لو ما شافع بالجد ما بتعمل عمايل الشفع
سامية اول مرة تشوف اولادها بتشاكلو و حسام كان اكتر واحد حبوب فيهم و جنه و جن المشاكل بقى عصبي و عدائي في اللحظه ديك السكري حقها انخفض و حست بجسمها هبط مسكت الكرسي الوراها و قعدت فيه و مياده شافتها و قالت : امي مالك و جرت عليها
مصطفى و حسام و حازم جرو عليها و مصطفى مسك امه و قال لحسام : من عمايلك و تصرفاتك
و سامية كانت بالعافية بتشيل في نفسها : يا اولادي ما تتشاكلو
حسام مسك راس امه و دنقر باسها : مافي شي يا امي ما قاعدين نتشاكل نحنا . مياده امشي جيبي الحبوب بتاعت امي
طلعت مياده جابت الحبوب و ادتهم ليها و رقدوها في غرفتها حسام طلع الحديقة الخلفية و قعد في جلسة في اخرها مها شافته ببلكونتها بتفتح على الحديقة الخلفية و نزلت و مشت ليه و قعدت جمبه و قالت ليه بحزن : حسام مالك يا اخوي انا اول مره اشوف بت تأثر عليك كده
حسام كان قاعد و خاتي راسه لورا في ضهر الكنبه : مافي بت بتأثر علي . بت شنو ؟
مها : ما تخبي علي طلع الجواك يا حسام امكن ترتاح
حسام : ما فيني شي عشان اطلعه
مها : حسام لكن ما ممكن الانتا فيه انت ليك قريب ال77 شهور على الحال ده . برود و صامت طول الوقت و لو اتكلمتا يا بتتزهج يا بتتعصب . في شنو لده كله ؟ طلعت وحده زباله ما بتستاهل يعني شنو في 100 وحده غيرها و انت في الف مين تتمناك
حسام : بس دي الوحيده الانا كنتا صادق معاها في مشاعري يا مها . و دمعته نزلت
مها قلبها اتعصر على اخوها و مسحت ليه دموعه و قالت ليه : معليش الايام كفيلة بانها تنسيك ليها . بس انت ما تعاقب نفسك راعي لامي دي على الاقل قلبها اتقطع عليك يا حسام عاين لروحك بقيت ضعيف كيف ده غير اسلوبك ارجع حسام اخونا حبيبنا بتاع زمان
حسام : ان شاء الله
و طلع غرفته و حاول ينوم بس ما قدر ينوم لمن الفجر اذن بعداك صلا و رقد شوية كده بعداك نام . مرا اسبوع و مافي جديد حنين بتحاول ما تمشي لمياده بس بتقول ليها هي التجيها . و مرة من المرات الجاتها فيها مياده اثناء ما كانو قاعدين يتونسو
_ حنين في رايك البس يوم الزفاف بني و لا احمر ؟
_ البسي الفستان البني يوم الزفاف و الاحمر البسيه في الحنه او الجرتق لو في يوم براه
_ الجرتق بعد الزفاف طوالي في نفس اليوم
_ خلاص البسي الاحمر في الحنه
_ اها و انتي قررتي حاتلبسي شنو ؟
_ و الله يا مياده انا ما حاقدر اجي العرس
_ نعم نعم نعم ! كيف يعني ما تجي
_ انتي عارفه عرس مصطفى اخوكي يوم الخميس الجاي و نحنا حاننزل تالتة يوم الاحد . بس بجيكي يوم العقد يوم الجمعة بكون معاكي من الصباح
_ حنين هو العرس يوم الخميس و انتي اصلا الخميس بتطلعي و بعدين اول اسبوع ده ما حانكون بدينا قراية جادة و ساعتين ما حايعملو شي
_ مياده لكن المدرسة و عندنا 3 ايام في الاسبوع فيهم حصص فصعبة
_ حنين شوفي انا طوالي بجيكي و ما حصل جيتيني لي انا غير مرة وحدة و مرة جيتي قبل ما نتصاحب 10 دقايق و مشيتي و عادة الحالة بينا وحدة و بقول ما مشكلة بس انتي حسي اقرب صحبة لي و ما تجي عرس اخوي !!
حنين حست انه مياده زعلت جد : خلاص ان شاء الله بجي .
_ اصلا و لا على كيفك
_ ما بقدر على زعلك انا
_ تسلمي لي . بالمناسبة يا حنين
_ ايوا
_ انتي و حسام سبتو بعض ليه ؟
حنين شالت نفس و سرحت في اخر ايام . مياده حست انه الموضوع واجع حنين بالجد فقالت ليها : اسفة لو السيرة زعجتك
_ انا حاحكي ليكي بس اوعديني انه السيرة دي ما تتفتح تاني
_ طيب
