نزلت لقتها مياده اخت حسام اتاجئت و استغربت و ارتبكت شوية من جيتها بس ما حبت تحسسها و مشت عليها و سلمت عليها
_ يا اهلين شنو المفاجأة الحلوة دي
_ مها عملت كيكة شوكلاتة قلتا اجيب ليكي منها و تعملي لينا كبايتين نيسكافي و نتونس مع بعض
_ يا سلام عليكي تسلمي . لحظة بس اجيب النيسكافي
_ اساعدك ؟
_ لا لا ما يحتاج
جابت كبايتين مق بتوعين نيسكافي و قعدو في الصالة . حنين كانت خايفة تتعامل مع مياده بطريقة بايخة و تحسسها انها ما عاوزة تحتك بالعائلة دي عشان تبعد عن شوفة حسام . بس مياده ما ادتها فرصة دخلت فيها ونسة طوالي و حنين حبتها و حبت ونستها و ما قدرت تتبايخ معاها و لا تتعامل معاها ببرود . و حنين كانت مستمتعة بالونسة مع مياده و الونسه جرت ساعة و حاجة و اصرت على مياده يفطرو مع بعض لانها قاعدة براها و مشو جهزو ليهم فطور و فطورو و تاني قعدو كملو ونستهم
_ حنين يلا احكي لي قصتك
_ قصتي كيف ؟
_ اي واحد عندو قصة حصلت معاه و مؤثره عليه او اثرت عليه لفترة مثلا انا . انا قبل سنة و شوية كان عملت عملية قبل العملية دي كنت عرجة حصل لي حادث و انا عمري 7 سنين و من الوقت داك بقيت عرجة و كان مفقود الامل من اني ارجع امشي طبيعي بس الحمد لله خطيب مها دكتور في لندن و لقى لي اخصائي هناك و عملتا العملية و نجحت الحمد لله . بس عارفة يا حنين انا قريب ال 9 سنين كنت بعاني بعد الحادث اي زول كان بعاين لي على اني ناقصة او بعاينو لي بشفقة نظرة الشفقة دي كانت بتقتلني و صحباتي كانو بعاينو لي بنظرة الشفقة دي و ما شايفني زيهم و اقرب وحدة لي و صديقة الطفولة لمن كبرنا و دخلنا الثانوي بقت تخجل من انها مصاحباني و الحاجة دي هزتني بطريقة ما طبيعية . مياده اثناء كلامها دموعها نزلت و كان واضح انه الموضوع ده كان هازي مياده بالجد حنين جات قعدت جمبها في الكنبة و حضنتها . و مياده كملت كلامها : حتى بعد ما بقيت كويسة ثقتي بقت مهزوزة في الصحبات و تعاملي محدود مع زميلاتي بس لمن شوفتك و اتونستا معاكي الدقايق الفي بيتنا ديك ربنا يعلم ارتحت ليكي كيف
_ و الله حتى انا و دخلتي قلبي و يا ريت تعتبريني صحبتك و اختك من اللحظة دي و عمري ما اخذلك
_ اتفقنا بس ان شاء الله تتحملي وجع الوش الحاعملو ليكي
_ هههههههه هو انا لاقية . شايفاني بت وحيدة و اغلب وقتي براي
_ تاني ما حاتلقي وقت تقعدي براكي انا سغيلة
_ تسلم لي السغيلة
_ خلينا في الاهم . حصل حبيتي قبل كده ؟
حنين حاولت تكون طبيعية و ببرود : لا
_ معقولة ؟؟!!
_ ههههههه ليه الغريب شنو ؟
_ انتي حلاتك و طيوبة و ظريفة و اي واحد يشوفك تلقائيا حاينجزب ليكي
_ اهو بس حظ . سكتت و قلبها وجعها على قصتها الكان اسعد اوقاتها لمن تحكي عنها حسي بقت تعتبرها ما كانت . حاولت تمسك نفسها و كملت كلامها : و انتي ؟
_ انا مرتبطة
_ حلوو . طيب احكي لي قصتكم مع بعض
_ يا ستي اسمو رماح بحبني من سنتين بس مشاكلي الحكيت ليكي عنها كانت مخلياني بعيدة و خاتا انه مشاعرو اتجاهي مجرد شفقة منو ما اكتر و انا ما كان عندي اي ثقة في نفسي بس هو اثبت لي الحاجة دي رغم رفضي ليه ما تعب من المحاولة و لا فكر ينساني و انا كنتا بديت احس حاجات اتجاهو بس مخاوفي كانت مانعاني و كنتا بتهرب . بس اهو بعد عملت العملية بقى مافي شي يمنعني و حسي نحنا لينا سنة مع بعض
_ حلوو ان شاء الله دايما يا رب . صعب حسي تلاقي حد يحبك كده و ما يتخلى عنك مهما حصل
_ و ان شاء الله انتي كمان تلقي زول يحبك و يخليكي تحبيه كده
ما كانت حابه ترد بامين و ردت ليها بابتسامة رغم كل شي حنين ما عاوزة تفكر في فكرة انه ممكن تحب زول غير حسام و لا تديه اي شي من المشاعر الكانت لحسام . و غيرت الموضوع : تالتة على الابواب مخططاتك ؟
_ و الله يا حنين مفكره اخش مجموعة كيميا و عاوزة اشوف وحدة ادخل معاها مع استاذ فيزيا
_ طبعا انا برضو ديل المادتين العاوزه اثبتهم من اول السنة عشان اخر السنة اكون مرتاحة
_ خلاص رايك شنو نشوف لينا استاذ فيزيا ؟
_ ما عندي مشكلة
_ اتفقنا
_ اها و الكيميا عندك ليها مجموعة كويسة ؟
_ و الله يا حنين للان لا بس عاوزة اسأل
_ عندنا استاذ اسمو عبد الله منصور شاطر لدرجة و بعمل مجموعات كيميا لناس تالتة
_ سمعت عنو . بعملها وين ؟
_ في مدرستنا بعد الدوام
_طيب حلوو خلاص يا نونه انتي اول ما تنزلي سجلي لي و سجلي ليكي معاه طوالي عشان ما يتملي
_ اوكي . ميادة عاينت لساعتها و قالت لحنين : ايييييك الونسة سرقتنا لازم امشي بعد ده
_ ليه كده اقعدي معاي نتغدا مع بعض
_ ويين يا ريت ماشة مع مها السوق عقد مصطفى يوم الجمعة
_ اي شايفة ماما قالت لي بكرا ماشين هي و خالتو سامية مشوار بس ما ركزت في باقي الكلام
_ اي . المهم خليكي عارفة عشان انتي حاتكوني معاي في الطالعة و النازلة
_ هههههههه يا ريت بس ..
_ ما في بس وريتك اني لصقه ما صدقتي مشكلتك . ما بقبل اي اعذار
_ ان شاء الله
مشت مياده على بيتهم و قدمتها حنين لين باب الشارع و استنتها لين دخلت بيتهم . قفلت الباب و دخلت جوه . كانت مبسوطة بالصحبة و الجارة الجديدة الحبتها شديد كأنها وحدة من صحباتها القدام بس في نفس الوقت كانت خايفة من القرب ده الممكن يخليها تحتك بحسام كتير .
منى رجعت من البكا و محمد جا من شغله و قعدو اتغدو مع بعض و حنين قررت تفتح موضوع النادي لمحمد الوعدت ملاذ انها تتكلم مع محمد بخصوصه
حنين : حمودي عاوزه اتكلم معاك في موضوع
محمد : احكي
حنين : في نادي في نهاية شارعنا و فيه صالة مناسبات لو انتبهتا عليه
محمد : اي عاوزه تعملي عرسك فيه ؟
حنين : محمد ياخ انا جاده
محمد : طيب اها مالو
حنين : يلا فيه مناشط و مسابقات و برامج ظريفة و صحباتي اغلبهم مشتركين فيه و طالما هو قريب عاوزة اسجل فيه
محمد : بسأل منه اذا نادي محترم ما عندي مشكلة
حنين : لا لا هو محترم جد و الا اهل ملاذ ما كان خلوها تسجل فيه
محمد : و تالتة ؟ انتي ناسية انك نازلة بعد كم يوم ؟
منى : خليها تسجل على الاقل يبقى ليها موضوع يوم الخميس ترجع من المدرسة ترتاح حبه و تقرا مادة خفيفة و بعد تخلصها تمشي لصحباتها ساعة ساعة و نص و تجي لازم يكون في يوم تغيير
محمد : منو من صحباتك مشترك هناك ؟
حنين : من صحباتي في ملاذ و ريهام و في بنات من مدرستي تانين ما بتعرفهم
محمد : خلاص خير . بكرا الخميس بمشي معاكي اسجلك و اشوفو
حنين : يسلم لي حمودي انا
حنين فكرت في نفسها انه النادي فكرة حلوة لمن تبدا تالتة طول الاسبوع تكون مشغولة مع المدرسة و الحصص و يوم الخميس زي ما قالت امها تقرا ماده خفيف و بعدها امها قالت ليها انه لازم يكون في وقت فراغ عشان ما تزهج في نص السنة . فاكيد في وقت الفراغ ده افكارها كلها حاتمشي للتفكير في حسام و زكرياتها فاحسن تملاه بموضوع و لمن تجي الامتحانات التجريبية توقف مشي النادي لين ما تخلص من تالتة . اتصلت على ملاذ و كلمتها بموافقة اخوها و حبت انه هالة تسجل معاهم بس اهل هالة صعبين و اكيد ما حايوافقو فما حبت تحرجها . و اتفقو يتلاقو تاني يوم في النادي الساعه 7 .
قعدت مع اهلها شوية و لمن اذن المغرب طلعت غرفتها و اتوضت و صلت . فتحت فيلم و حاولت تركز معاه بس كل كلمة حلوة بتتقال فيه كانت بتزكرها بحسام طلعت بلكونتها و لقت عربية حسام مافي فقعدت في الكنبة و ادت ضهرها لبيت ناس حسام و ركبت سماعاتها و قعدت تسمع اغاني . حسام طلع الصباح مشى الجامعه كان عنده محاضرة بدري و بعد خلصو محاضراته مشى هو و مازن كان عندهم صاحبهم عازمهم غدا لانه مسافر في اليوم البعده . و قعدو معاه لحدي بعد المغرب و رجع و وقف عربيته جمب بيتهم لمن نزل عاين على بلكونة حنين بقت عادة ليه كل ما يطلع او يرجع يعاين ليها امكن يشوفها . شافها قاعدة و شعرها مغطي اغلب ضهرها و وشها وقف في مكانه . حنين كانت قاعدة و الوجع الفي قلبها البقى معاها زي ضلها معذبها و هي بتحاول تتجاهله و تكابر كانت بتقول كلها ايام و تبدا المدرسة و انشغل بالقراية ما حالقى وقت افكر في شي بس من جواها كانت عارفة انه مافي شي بشغلها عن انها تتزكره لانه هي ما محتاجه سبب تتزكره بيه لمن كانت بعيدة اميال عنه كان معاها مع كل نفس بتتنفسه كيف حسي لمن بقا قدامها . سمعت صوت اذان العشاء قامت تصلي لمن وقفت اتلفتت و عاينت تحت لقته في وشها و هو كان واقف سرحان في بلكونتها و اتفزع لمن شافها و هي دخلت على طول غرفتها قفلت باب البلكونة و وقفت في مكانها اخدت نفس و حاولت تمسك دموعها و مشت صلت . حسام اتغاظ من وقفته و لعن نفسه الف مره انه ما دخل طوالي و قفل عربيته و دخل بيتهم . حنين مشت على غرفت امها حست انها محتاجة حضن امها بس وقفت عند الباب قبل ما تدخل فكرت في انها لو دخلت اول ما تحضن امها حاتبكي و امها حاتعرف انه اوجاعها لسه زي ما هي و سفرها ما غير شي و الحاجة دي حاتزيد قلق امها عليها ففتحت الباب و قالت لامها انها تعبانة و عاوزه تنوم بدري و مشت على غرفتها و طفت الانوار رقدت و جرت اللحاف بس التفكير ما رحمها بعد ساعه نامت . صحت الصباح على صوت تلفونها كانت مياده المتصلة
_ الوو
_ لسه نايمة يا مفترية
_ حرام عليكي الساعة كم ؟
_ الساعة 10
_ مصحياني مالك طيب
_ ماما و امك طلعو السوق و مصطفى على شغله و مها مشت الترزي و حازم و حسام في جامعاتهم و انا براي عاوزاكي تجي تفطري معاي
حنين لمن سمعت اسم حسام قلبها دق شديد و ما ركزت مع باقي الكلام
_ حنيييييين الووووو
_ ايوا معاكي
_ اها قلتي شنو
_ في شنو
_ وووووب اصحي . تجي تفطري معاي
_ قاعدة براكي ؟
_ قلنا اي
_ طيب اخد دوش و اغير ملابسي و بجيكي
_ اوكي مستنياكي
قفلت من مياده و دخلت اخدت دوش و لبست ليها بنطلون اسكني جنز و قميص مشجر و عملت شعرها كعكه لفوق و عملت مرطب شفايف خفيف و ختت طرحتها و اتصلت على امها و كلمتها و سمحت ليها تمشي . و مشت على مياده . قعدو مع بعض و اتونسو و فطرو مع بعض بعد الفطور قعدو في الصالة يتونسو
_ بالمناسبة امس ما حكيتي لي
_ ما حكيت ليكي شنو ؟
_ قصتك يا حنين
_ حاضر بس هي مأساوية شوية
_ عاوزة اسمعها
_ يا ستي زي ما عارفه انا اصغر وحدة و ياهو انا و محمد بس . انا اتولدت في قطر و كنا عايشين هناك و بابا كان بحبني بطريقة ما طبيعية و انا كنت متعلقة بيه شديد كنت ببكي لمن يجي ماشي الشغل و بفضل زعلانة لمن هو يجي و كنت ما بنوم الا و هو شايلني في حضنو كان ابوي بالنسبة لي كل شي بدون مبالغة بابا كان كل حياتي . اقرب لي من ماما و هو تعلقه بي كان ظاهر محمد كان بغير رغم انه بابا كان بحاول ما يحسسه بس اتعود . مرات كنتا بمشي مع بابا المكتب و كل الفي الشركة بعرفوني و حافظني و لمن اقنعوني انه يدخلوني روضه كان عمري 4 سنين عجبتني الفكرة عشان اصحا الصباح و اطلع مع بابا يوصلني و بعداك يمشي شغله . كان هو درجة اولى عندي في كل شي و ماما و محمد بعده
_ اتوفى كيفى ؟
_ كان عمري 55 سنين كنتا بطبوطة و لساني معوج و كلامي لسه كان مكعوج . لسه بتزكر اليوم داك بتفاصيلو كان جا ساقني من الروضة و ساقني معاه الشركة كان عندو اجتماع كنت مستنياه مع السكرتيرة و بعد خلص الاجتماع كنا ماشين على البيت. ركبنا العربية كنتا راكبة قدام مع بابا
_ نونه اكلتي السنادويتش الادتك ليه خالتو ميهاد السكيرتيرة ؟
_ايوا كلو انا عاوزه ابقا اكبر من محمد .
قعد يضحك و قال لي : شاطرة حياة بابا و انا حسي عشان انتي بتسمعي الكلام حانغشى ناكل ايسكريم .
و انا فرحت و قلتا ليه : يااااي حبيبي بابا .
_ بس ما تنسي ده شنو ؟
ختيت اصبعي على خشمي و نطتت عيوني و قلت ليه باستهبال : هوووش ده سر نونه و بابا ماما ما تعرف انهم بياكلو ايسكريم . قعد يضحك و مسك راسي بايده و التانية سايق بيها و قرب راسي عليه و باسني و قال لي ( حياة بابا انتي ) .
وصلنا محل الايسكريم المفضل عندي و نزلنا اخدنا الايسكريم اكلنا و انا كان لسه ما خلصتا و بابا قال لي اخلصو في العربية علشان ما نتأخر و كنا مبركنين على الجهة التانيه من المحل لانه جمب المحل كان مزحوم و نحنا قاطعين الشارع في عربية جات بسرعة شديدة من اخر الشارع لمن كانت عاملة صوت ملا الشارع كلو و في لحظة بقت قريبة مننا بابا لزاني برا الشارع و وقعت على الارض اتجرحت في ركبتي و ايدي . كانو واجعني شديد قومت بصعوبة لمن عاينت على الجهه الكان فيها بابا لقيت في ناس ماشين عليها و مشيت و انا بعرج من وجع ركبتي ما قدرت اشوف بابا دخلت من بين رجول الناس الاتلمو حولينو . بابا كان في الارض و كلو دم جريت عليه و صرخت و رقدت في حضنو و بقيت بهو و بقول ليه : بابا قوم و هو ما كان برد و انا لسه ببكي و بقول ليه : بابا قوم يا بابا انا خايفة قوم . و انا بصرخ و هو ما برد علي . جات عربية الاسعاف و ركبوني جمبو لمن وصلنا المستشفى ساقو بابا و انا ساقتني ممرضة كانت لبنانية او سورية من لهجتها . كل شي في تفاصيل اليوم داك لسه متزكراه . كنت ببكي و بصرخ و بقول ليهم عاوزة امشي معا بابا شالتني و انا بصرخ و بضرب فيها و هددتني و قالت لي بحنان : بابا بخير
_ لا لا بابا كان جمبو دم كتير . و قعدت ابكي
مسحت على شعري و قالت لي : الدكتور اخدو يوقف ليه الدم و حايصير بخير و حاليا لازم يوقف الدم من عندك كمان .
طهرت لي الجرحة و كنت بتوجع لمن ختت لي المطهر و بعد شوية الوجع راح و قالت لي كمان ابوكي حايصير بخير . ابتسمت و اطمنت طلعت ممرضة من غرفة العمليات كانت شايلة ساعة بابا و تلفونو و مفتاح العربية . مسكت تلفون بابا و اتصلت و بعد قفلت جريت عليها و شلتهم منها حاولت تقنعني انها حاتختهم لمن يجي زول كبير يشيلهم بس انا اصريت اخليهم معاي و قعدت في كرسي و مسكتهم في حضني . شوفتا ماما و محمد و عمو ياسر صاحب بابا في نهاية الممر جات ماما جارية علي و لمن شافتني اتسمرت في مكانها كنتا قاعدة في الكرسي و رجولي الصغيرة ما واصلة الارض و ماسكة حاجات بابا و بلوزتي البيضا مليانه دم و كنت ببكي . حضنتني و قعدت تبكي بحرقة و انا كنت مستغربة من بكا ماما . طلع الدكتور و جرت عليه هي و عمو ياسر و قال ليهم انه العملية نجحت بس بابا دخل في غيبوبة انا ما فهمتا كلمة غيبوبة بس سمعت انو العملية نجحت فرحتا . جات خالتو سعاد مرت عمو ياسر و قعدت زي ساعة و ماما قالت ليها تسوقني البيت و محمد اصر انه يقعد مع ماما و انا صرختا فيهم و قلتا ليهم ما حامشي ماما جات و نزلت لي في الارض و مسكتني من كتفي و قالت لي : نونة بابا لو عرف انك ما سمعتي كلامي حايزعل و اتزكرت في اللحظة ديك جملتو البقولها لي قبل ما يمشي الشغل( اسمعي كلام ماما يا نونة و ما تعزبيها ). قعدتا ابكي و كملت كلامها و قالت لي انتي عاوزه تزعلي بابا ؟ مسحت دموعي و هزيت راسي و قلت ليها لا . و مسكتني ايد خالتو سعاد و مشينا بيت ناس عمو ياسر خالتو سعاد حمتني و غيرت لي هدومي الكانت مليانة دم ما قدرت انوم لانو ما في حضن بابا و قعدت ابكي و خالتو سعاد كانت ماسكاني و كنتا بقول ليها بابا كان جمبو دم كتير و قميصو كان مليان اكتر من بلوزتي و هي كانت بتحاول تمسك دموعها قدامي . من كتر البكا نومت . صحيت الصباح لقيت خالتو سعاد مافي و عمو ياسر مافي كانت في رغدة بتها اكبر مني بسنتين و الشغاله و بقيت بصرخ و بقول ليهم عاوزة امشي لبابا اتصلت الشغالة على خالتو سعاد كانت في بيتنا و جمبها امي و قالت ليها جيبيها لي . جا عمو ياسر ساقني . باب بيتنا كان مفتوح و كان في عربات كتيرة جمب الباب و في صوت ناس ببكو ما كنتا فاهمة حاجة . عربية عمو ياسر كانت عالية و جا فتح لي الباب و شالني و نزلني و مسك ايدي و ساقني جوا . كان في نسوان ببكو و رجال واقفين برا . دخلتا غرفة ماما و بابا . ماما كانت قاعدة و لابسه عبايتها السودا الكانت لابساها في المستشفى و جمبها خالتو سعاد و عيونها كانو ورمانين من البكا جريت عليها و حضنتني و مسحتا دموعها من خدها و قلتا ليها : خالتو الممرضة قالت بابا كويس و عمو الدكتور قال العملية نجحت و بابا قال لي اي حاجة بتنجح معناها دي حاجة كويسة يعني بابا كويس يلا نمشي ليه . امي حضنتني بقوة و قعدت تبكي ما كانت عارفة كيف توصل لي معلومة انو بابا مات امس بالليل بعد ما مشيت مع خالتو سعاد بساعة . و قعدت تبكي بحرقة و تصرخ و شالتني منها خالتو سعاد و قلتا ليها : ماما ما عاوزة تصدقني يلا سوقوني لبابا هو وينو . خالتو سعاد قالت لي ما ينفع حسي بقيت بصرخ و نزلتا منها و بقيت لافه البيت كلو و بفتش على بابا و بناديه و بفتح في الغرف غرفة فرغة و بنده عليه . امي قوت نفسها و جات ساقتني غرفتي و قعدتني في رجولها قلتا ليها : ماما بابا وين .
_ حنين انتي عارفه انو في ربنا ؟
هزيت راسي بمعنى ايوا .
_ و عارفة انو اي زول بعد فترة ما معروفة متين بمشي لربنا زي حبوبه رحمه ام بابا .
هزيت راسي بمعنى ايوا .
_ بابا مشى هناك .
_ طيب حايجي متين ؟
نزلت دمعه على خدها و قالت لي : بابا ما حايجي تاني و ما حانقدر نشوفو و يتكلم معانا بس هو لو اتكلمتي معاه حايسمعك .
قلت ليها و انا ببكي : لا ما عاوزه مش قلتي انو بسمعني ؟
_ ايوا . و هي كانت بتبكي بحرقة .
قومتا نزلتا من رجولها و وقفتا في الارض و بقيت ببكي و بصرخ و بقول : يا بابا تعال ارجع من عند ربنا تعال اقعد معاي انا و الله اسمع كلام ماما و تاني ما حاقول عاوزة ايسكريم كل يوم بابا تعال ليه مشيت و خليتني لو ما جيت بزعل منك . يا ربنا رجع بابا من عندك . يا ربنا انا ما بقدر انوم و هو مافي يا ربنا ما تشيلو مني رجعو لي و لا سوقني معاه يا ربنا رجع لي بابا . و مشيت على ماما و جريتها من ايدها و قلت ليها : قومي نصلي بابا كان بقول لي لو دعيت بعد الصلاة ربنا بدينا العاوزنو قومي نقول لربنا يرجع بابا من عندو . امي نزلت في الارض و حضنتني و قالت لي : بابا ما ممكن يرجع ما برجع تاني . زحيت منها و قعدت اصرخ و بقيت بصرخ و بقول لا بابا ما بخليني ما بمشي و قبل ما يمشي اي حته قاعد يكلمني هو ما قال لي ماشي لربنا و بقيت بصرخ و ببكي لمن وقعتا و دوني المستشفى و فقتا هناك و ما وقفتا بكا الا ادوني حقنة مهدئة . و في اليوم التاني جينا السودان عشان ندفنو هنا و ما رجعنا تاني . مرت سنه بعداك و انا بحاول افهم يعني شنو ابوي مات و تاني ما حاشوفو و تاني مافي كلمة بابا في حياتي . مرت سنة و انا بحاول افهم واقع انو اغلى انسان في حياتي مشى مكان ما ممكن انا امشي ليه فيه و لا هو يجيني راجع منو . مرت سنة و انا بحاول استوعب الحياه من غير ابوي . حنين كانت بتحكي و نزلت دموعها بشدة لمن ما قدرت تكمل و غمضت عيونها و اخدت نفس جات مياده الوشها اتملى دموع و قعدت جمبها و حضنتها و قعدت تبكي و قالت ليها بحزن : اسفه يا حنين اني زكرتك بكل ده
_ انا عمري ما نسيت بابا و لا نسيت وجعي عليه عشان تذكريني ما تعتذري .
_ ربنا يرحمو و يغفر ليه و يدخلو فسيح جناتو
_ اللهم اميين يا رب
_ كل ما تتذكريه ادعي ليه بالرحمة و حسي الظهر اذن رايك شنو نقوم نصلي و بعديه نصلي ليه ركعتين و نشيل ليه الفاتحة
_ طيب .حنين مسكت يد مياده و قالت ليها بابتسامة و هي بتمسح في دموعها : شكرا يا مياده
_ على شنو ؟ّ!
_ ما بعرفف ارتحتا لمن اتكلمتا معاكي
_ حبيبة انا في اي وقت مستعدة اسمعك
_ تسلمي لي .
صلو و بعد خلصو صلاه حنين قالت لمياده : انا لازم امشي بعد ده
_ ياخي ماشة حسي لشنو
_ اخوانك شوية و بجو
_ لا حازم الليله عندو 3 محاضرات و حايخلص متأخر
_ اما حسام ابو الهول وجودو زي عدمو يعني لو جا بمشي يتقفل في غرفتو و مصطفى برجع من شغلو 4
حنين في قلبها ما هو ده انا الما عاوزاه شوفتو براها ما عاوزاها : لا احسن امشي
_ بسم الله يا حنين مش نحنا الحاله بينا بقت وحدة ؟ّ! ياخي اقعدي لمن ناس ماما يرجعو حاتستفيدي شنو من انك تمشي تقعدي براكي و انا هنا براي
لمن شافت اصرار مياده : طيب
قعدو يكملو ونستهم و اثناء ونستهم مياده اتصل عليها رماح سلمت عليه و قالت ليه انه حنين صحبتها الجديدة الحكت ليه عنها معاها فقال ليها بتصل عليها بعدين . و لمن مياده خلصت المكالمة شالت تنهيده كده و ابتسمت . قامت حنين ابستمت و قالت ليها : يا سيدي على الحب
_ عارفه يا حنين الحب ده احلى حاجة في الدنيا
حنين بحزن : بس عذابو اكعب حاجة في الدنيا
_ ليه بتعايني للجانب الكعب ؟ عارفة يعني شنو تلقي انسان يهتم بيكي و يحبك و يكون اقرب الناس ليكي الحاجة دي لو عشتيها صدقيني حياتك حاتتغير 180 درجة
حنين بحزن بعد ما شالت تنهيدة : عشتها للاسف و اتغيرت
_ كيف ؟! مش قلتي لي ما حصل حبيتي ؟
حنين انتبهت انها لسانها فلت و هي ما عاوزة مياده تعرف شي خالص عن البينها و بين حسام
_ حنيييييين . سرحتي وين
_ لا ابدا
_ حنين انا فاكرة انو نحنا بقينا اخوات عديل فمافي داعي تخبي عني شي
_ ما عاوزه اخبي بس
_ بس شنو . لو ما واثقة فيني ده شي تاني
_ لا يا ميادة ما تقولي كده و الله انا نادرا ما اتكلم عن موت بابا قدام زول و انتي فتحتا ليكي قلبي
_ طيب . طالما كده المانعك تحكي لي شنو انك حبيتي قبل كده
_ طيب حاحكي ليكي . انا كنتا بحب فعلا بس ما كملنا مع بعض و سبنا بعض قبل 6 شهور و شوية
_ طيب احكي لي بالتفصيل اتعرفتو كيف و حبيتو بعض كيف و سبتو بعض ليه و كيف احكي لي قصتكم يعني
_ طيب
