في الساعه السابعه مساءً وبالتحديد في غرفة الجلوس في بيت ابو هزاع...يرن الهاتف وتسرع شما بإتجاهه....
شما: الو مرحبا..
خليفه: هلا والله مرحبيتن...
شما: منو وياي ..
خليفه : لو سمحتي الشيخه وين خليفه...
شما: والله راقد تبيني اوعيه ..ولا بتتريا لين عقب الاذان بينش...
خليفه: لا والله خلاص الشيخه عقب يوم ينش قولي له خليفه يبيك ضروري لا تنسين..سمحولنا ع الازعاج بس هو ما يرد على تلفونه...
شما:لا بالحل... ان شاء الله اول ما ينش بقوله ..
خليفه: في وداعة الرحمن...
شما: الله وياك..
تجلس شما على الاريكه بجانب الهاتف....وتحدث نفسها" هيه هذا خليفه للمره الثانيه يدق علينا وانا بعدني ما عرفت ولد منو هذا...ولا جد رمس عنه خالد.."
نوره: حووو وين تفكرين وين سرحتي....
شما : ها ه لا ما شي ...
نوره: تقولج امي قومي وياها المطبخ في ناس بيون باجر...
شما: وانا ش علي ..؟؟؟ يوون ما ييون مب مسويه شي ..لا والله اول مره اعرف ان الويكند لشغل المطبخ...
نوره: يعني اوصل هالرمسه لامايه...
شما: لاء خلاص بقوم خيبه من الفتنه...زين وين حصه وحمده..ومنو بيي اصلاً...؟؟
نوره : والله ما ادري سيري تخبري امي ..شوفيهم جالبين المطبخ فوق تحت...
......................................................
وفي صباح يوم الخميس....
وفي فناء البيت أي بالخارج وقريبا من الزراعه المتفرقه هنا وهناك...يقترب ابو هزاع من احدى الشجيرات ..
ويدخل خالد من البوابه بسيارته ويوقف....
خالد: صباح الخير ابويه...
ابو هزاع: صباح النور هاه من وين ياي ما شاء الله...
خالد : لا والله ما شي بس حصه مطرشتني اييب شوي حلويات من المخبز...
ابو هزاع: زين زين ما شاء الله حد من البنات يعرف شي...
خالد: لا والله ولا وحده تعرف شي حتى حمدووه...
ابو هزاع: زين الحمد لله...
ويدخلان معاً للبيت.............
وفي البيت الاستعدادات على اوجها....وفي غرفة حمده....
شما...تدخل مسرعه....
شما: حمده حمده لحقي لحقي اشوف خالد يايب كراتين الحلويات وما ادري شو هذيل شعندهم ما يبونا نعرف...ليكون بس اللي ببالي...
