يسرح خالد في سقف الحجره..ويتقلب في فراشه ..." اففف والله مليت ابي ارقد..." ...ينهض متجهاً نحو المسجل..ويدخل احد الاشرطه....ثم يصدح الرويشد بإحدى روائعه..." كثر ما قلت انا احبك كثر ما قلت انا اهواك...."....يعود ليرمي نفسه فوق فراشه ويشعل النور....يمسك مجلة فواصل الموضوعه بجانبه....ويتصفح..." الحين كلهم رقوود وانا لروحي يالس هني....اففف عنبو وين طار النوم...توني كنت بالصاله...وميت نعاس...."......" اصلا النوم ما طار ...عيونج يا ميثا هن اللي طيرنه من عيني..."
وفي غرفة هزاع ...الصمت يكسر ارجاء الغرفه...هدوء رهيب ...حصه تصلي قيام الليل...وهزاع...يقرا احدى المجلات...وفي الحقيقه هو لا يدري ماذا يقرا ...لكنه يشغل نفسه قبل ان تنتهي حصه من صلاتها....سلمت حصه ثم قامت ...وجلست بجانبه...
حصه بهدوء وابتسامه: شو يالس تقرا..؟؟
هزاع ...يبتسم بتردد....ويتمتم في نفسه" شكلها هاديه الله يستر بس ...هاي يوم تسكت انا ازيغ...في شي يطلع مب حلو عقب.."
حصه: شفيك ما ترد...
هزاع: هاه...لا لا ما شي فديتج بس مجله اقرا شعر وايد روعه هني...
حصه: ...........
هزاع: حصه .....انت زعلانه مني..!!!!؟؟؟
حصه: ليش ازعل...زعلي لا بيجدم ولا بيأخر..
هزاع: افا يا حصه هالرمسه مب من بينا.....انت الغلا كله تعرفين انج اغلى شي بحياتي بس لازم تفهميني وتقدرين ظروف شغلي....
حصه: ادري وانا ما قلت شي الله يوفقك يا هزاع...بس ليش ما قلت لي من قبل...انت وعدتني ان نحن كلنا بنسافر...وقلت بنسير بلجيكا..والحين غيرت رايك 180 درجه وتبي تسير امريكا شاللي ياك..؟؟؟!!!...
هزاع: والله لو اقولج شو في خاطريه الحين هب مصدقتني....ادري والله...
حصه: لا قول عادي والله اصدقك...
هزاع: والله اني كنت ياي بقولج اليوم...بس ابويه الله يسامحه استعيل....
حصه: مصدقتنك والله...
يمسك هزاع يديها ويقبل حصه على رأسها....
هزاع: يعلني فداج يا حصه....والله عمري ما الاقي حرمه تقدرني وتصبر علي شراتج...وانا اللي تحريت هالليله ما بتعدي على خير...
حصه تبتسم...وتمتلئ عيناها بالدموع.....
حصه: والله بفتقدك وايد.....
هزاع: افا والله دموع...لا ما يصير...وفي أحلى عيون....يالله عاد بس ولا تراني بهون من السفر....
حصه: يكون احسن....
هزاع: ههههههههههه تموتون انتوا الحريم في التمثيل...
حصه بعصبيه: ليش يعني امثل مشاعري الحين عليك...
هزاع: يالله انا ليش اييب البلى حق عمري....أقول بويه مب انتي اقصد عمري رقدي ..رقدي الحين...ورانا شغل باجر....
