သည်အချိန် သည်အခိုက်အတန့် ဆေးရုံထဲတွင်။
"မင်းက လက်ဝှေ့ကစားရုံလက်မှတ်ကို ဘာလုပ်ဖို့ပေးတာလဲ"
လောင်ရွှီက လိမ္မော်သီးတစ်စိတ်ကိုနွှာ ၊ ပါးစပ်ထဲထည့်ပြီး စကားဆိုလိုက်ခြင်း။
လူနာကုတင်ရှေ့တွင်ထိုင်နေသည့် ဖုယွိချင်မှာ ပြောရခက်နေသည့်ဟန်ဖြင့် ခေါင်းကုတ်လိုက်ပြီး ;
"တခြားဘာအဓိပ္ပါယ်မှမဟုတ်ဘူး ၊ သူ့ဆီမှာလည်း ငါ့ကို ပြောစရာစကားရှိလောက်မယ့်ပုံမပေါ်တော့ နှစ်ချက်လောက်ထိုးခွင့်ပေးလိုက်ရင် စိတ်ပြေလိုပြေသွားငြားပေါ့"
ရွှီကွမ်းကျိက စုတ်တစ်ချက်သပ်လိုက်၏။
"အဲ့ကောင်လေးကို မင်း လျော့မတွက်နဲ့နော် ၊ တော်တော်လေး အားရှိတယ် ၊ ရွှီကျစ်ပြောတာတော့ နေ့တိုင်း ဘတ်စကတ်ဘောကစားတယ်တဲ့ ၊ ခန္ဓာကိုယ်အချိုးအစားက မဆိုးဘူး"
ထိုအခါ ဖုယွိချင်က သက်ပြင်းထပ်ချလိုက်၍ ;
"အဲ့ဒါကြောင့်မလို့ ငါ လက်မှတ်နှစ်စောင်ပေးလိုက်တာလေ ၊ ရွှီကျစ် လိုက်လာမယ်ဆိုရင်တော့ အနည်းအများ ထိန်းထိန်းသိမ်းသိမ်းဖြစ်လောက်မှာပါ ၊ ငါက အသက်ကြီးနေပြီကွ ၊ သုံးလေးချက်ထိုးတာတောင် တောင့်ခံနိုင်တော့မဟုတ်ဘူး"
ရွှီကွမ်းကျိသည် လိမ္မော်သီးနောက်ထပ်တစ်စိတ်အား ပါးစပ်ထဲထည့်ပြီးမှ အေးအေးလူလူစကားဆိုပစ်လိုက်သည်။
"အဲ့ကောင်လေး မင်းကို အရေးလုပ်နေမှာတောင်မဟုတ်ဘူးလို့ ငါ လောင်းတယ်ကွာ"
ဖုယွိချင်ကလည်း တိကျသေချာနေသည့်အသံဖြင့် ခွန်းတုံ့ပြန်လာခဲ့သည်။
"မဟုတ်ဘူး ၊ သူ သေချာပေါက် ရွှီကျစ်ကိုခေါ်ပြီးအတူလာမှာ"
---
သို့သော် နှစ်ယောက်လုံး၏ထင်မြင်ချက်နှင့်တလွဲ ၊ ချန်လုကျိုးတစ်ကိုယ်တည်း ရောက်လာခဲ့သည်။
သည်အခိုက်တွင် ဖုယွိချင်တစ်ယောက် စီးကရက်သောက်နေခြင်းဖြစ်ရာ မြင်လိုက်ရသည့်မြင်ကွင်းကြောင့် ရုတ်တရက်တုန်ယင်သွားမိသည့်အပြင် ချန်လုကျိုး၏အနောက်ဘက်ဆီသို့လည်း မယုံကြည်နိုင်စွာ လှမ်းကြည့်လိုက်သည်။ ရွှီကျစ်ကို မဆိုထားနှင့် ၊ သရဲတစ်ကောင်တစ်လေ၏အရိပ်အယောင်ကိုမျှပင်မမြင်။ လျှပ်တပြက်ရှိုက်သွင်းမိလိုက်သည့် စီးကရက်အငွေ့များကြောင့် ချောင်းတစ်ချက်နှစ်ချက်ဟန့်ပြီးမှ စကားဆိုလိုက်သည်။
![](https://img.wattpad.com/cover/354028605-288-k94035.jpg)
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~