'ချင့်ယီ'မြို့ နွေဦးရာသီအစပိုင်း ၊ ပထမဆုံး မိုးသည်းသည်းထန်ထန်ရွာသွန်းသည့်နေ့တွင် ဖုယွိချင် နှင့် လျန်ဟွေ့တို့ ဆုံတွေ့ဖြစ်ခဲ့ကြသည်။ ရုတ်တရက်ရွာချလာသည့်မိုးပြင်းဟာ အရိပ်အယောင်တစ်စုံတစ်ရာလေးပင် ကြိုတင်မပြပါသောကြောင့် လမ်းသွားလမ်းလာများအားလုံး မိုးလွတ်ရာအသီးသီးဆီသို့ တကွဲတပြားပြေးကြကုန်ရသည်။
လျန်ဟွေ့သည် ကုမ္ပဏီထဲမှထွက်လာလျှင်လာချင်း ရုတ်တရက်ကြုံလိုက်ရသည့်မိုးပြင်းတစ်ဝေ့ကြောင့် အထဲပြန်ဝင်၍ ထီးယူမည်အပြုတွင် ဘေးဘက်ဆီမှတဆင့် မီးခြစ်ခြစ်သံတစ်ချက်ကြားလိုက်ရ၏။ အသံကြားရာဆီသို့ အလိုလိုလှမ်းကြည့်လိုက်ရာ ကုမ္ပဏီတံခါးပေါက်ကြီး၏ဘေးတွင် အနက်ရောင်ထီးတစ်လက်ကိုင်ကာ အနက်ရောင်အနောက်တိုင်းဝတ်စုံပြည့်နှင့်မတ်တပ်ရပ်နေသော ဖုယွိချင်အား တွေ့လိုက်ရတော့၏။
ငယ်ရွယ်စဥ်ကတည်းက ဖုယွိချင်၏ပုံစံဟာ လူကြီးလူကောင်းဆန်သည့်ဟန်မျိုးရှိပြီး အမျိုးသမီးများနှင့်ပတ်သတ်၍ အနည်းငယ်ပရောပရည်ပြုမူပြောဆိုတတ်သည်ကလွဲလျှင် အတော်လေးစဥ်းစားပေးတတ်သည့်သူမျိုးပေ။ အပြင်ထွက်သည့်အခါတိုင်း ကားပေါ်တွင် ထီးတစ်လက်သယ်သွားတတ်သည်မှာလည်း ဟိုးယခင်ကတည်းက အကျင့်တစ်ခု။ သူတို့နှစ်ဦးသား ပထမဆုံး ဆုံတွေ့သည့်နေ့ကလည်း ယခုလို မိုးသည်းသည်းထန်ထန်ရွာသွန်းခဲ့၏။ ထိုအချိန်တုန်းက လျန်ဟွေ့ဟာ စာကြည့်တိုက်တွင် စာအုပ်ပြန်အပ်ပြီးအပြန်၌ မိုးမိ၍တစ်ကိုယ်လုံးရွှဲစိုနေသည့်အချိန်တွင် လမ်းဘေးတစ်နေရာ၌ ကားထိုးရပ်ထားသည့် ဖုယွိချင်၏ကားနှင့်မတော်တဆဆုံလေပြီး အပေါင်းအပါများနှင့်အချိန်းအချက်လုပ်ထားပုံရသည့်လူဟာ ကားပေါ်မှဆင်း၍ သူမ၏လက်ထဲသို့ ထီးတစ်လက်ထည့်ပေးသွားခဲ့သည်။
ထိုအချိန်တုန်းက ထီးပြန်ပေးရန်အတွက် ဆက်သွယ်နိုင်မည့်လိပ်စာ၊နံပါတ်လည်းမတောင်းမိခဲ့သလို နောက်ထပ်ဆုံကြရဦးမည်ဟုလည်း မထင်မိခဲ့၏။ သို့နှင့် ဆရာတစ်ယောက်၏မိတ်ဆက်ပေးမှုဖြင့် အသံသွင်းစတူဒီယိုသို့ရောက်သွားခဲ့သည့်အခါတွင်မှ ဖုယွိချင်နှင့် နောက်ထပ်တစ်ကြိမ်ဆုံလိုက်ရခြင်းဖြစ်ပြီး ဖုယွိချင်က အနှီစတူဒီယို၏ နာမည်ရဒါရိုက်တာတစ်ယောက်ပင်ဖြစ်နေမှန်းသိလိုက်ရသည်။ ထို့နောက်တွင်တော့ ဖုယွိချင်က သူမအား ညစာအတူစားရန်ဖိတ်ခေါ်လာခဲ့၏။ အမှန်တိုင်းဆိုရလျှင် ဖုယွိချင်ဟာ အသံသွင်းစတူဒီယိုဌာနထဲမှ မိန်းကလေးတော်တော်များများနှင့်ပရောပရည်လုပ်ဖူးမှန်း ၊ မိန်းကလေးတော်တော်များများကိုလည်း လိုက်ပိုးပန်းဖူးမှန်း ထိုအချိန်ကတည်းက သူမ ကြားသိထားခဲ့ပြီးသားပင်။ သူဟာ လူကောင်းသူကောင်းတစ်ယောက်မဟုတ်မှန်းသိပါလျက်နှင့်ပင် သူမ စိတ်ယိုင်မိခဲ့သည်။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~