အချိန်နှင့်အမျှ ဝိန်းရိဖန်၏စိတ်အခြေအနေက စိုးရိမ်သထက် စိုးရိမ်လာရကာ မျက်ရည်များကို လက်ခုံဖြင့်သုတ်ပြီး အသံသွင်းဖောင်တိန်နှင့်စန်းရန်၏လက်ကိုင်ဖုန်းကို အိတ်ထဲထည့်လိုက်ရင်း ခပ်ကျယ်ကျယ်လှမ်းမေးလိုက်၏။
"ဦးလေး ၊ ကားလမ်းက ဘယ်လောက်ကြာကြာပိတ်နေနိုင်သေးလဲ"
"ဒီတစ်လမ်းကျော်ပြီးရင် အဆင်ပြေပြီ"
ဝိန်းရိဖန်က နောက်ထပ်မေးမြန်းမည်အပြုတွင် သူမ၏လက်ကိုင်ဖုန်း ရုတ်တရက်မြည်လာခဲ့၏။ ခေါင်းငုံ့ပြီး အိတ်ကပ်ထဲမှ ဖုန်းကိုထုတ်ယူကြည့်လိုက်သည်။
ခေါ်ဆိုလာသည်မှာ နန်းဝူမြို့ထဲမှ ဖုန်းနံပါတ်စိမ်းတစ်ခု။
ဝိန်းရိဖန် အသက်အောင့်ထားမိရင်း စိတ်ထဲ၌လည်း ခန့်မှန်းချက်တစ်ခုပေါ်လာကာ ချက်ချင်းဖြေဆိုလိုက်သည်။
သူမ ထင်ထားသည့်အတိုင်း။
စန်းရန်၏အသံက အခြားတစ်ဖက်မှပေါ်လာခဲ့၏။
"ဝိန်းရွှမ်းကျန့်"
သူ့အသံကိုကြားလိုက်ရသည်နှင့်တပြိုင်နက် ဝိန်းရိဖန်၏ တင်းမာလွန်းနေခဲ့သည့်ခံစားချက်များမှာ နောက်ဆုံး၌ သက်သာရာရသွားခဲ့တော့၏။ နှုတ်ခမ်းကို တင်းတင်းစေ့ထားပြီး ငိုသံသဲ့သဲ့ဖြင့် အခြေအနေကိုသာ တိုက်ရိုက်မေးမြန်းလိုက်၏။
"နင် အဆင်ပြေရဲ့လား ၊ ဘယ်နားမှာ ဒဏ်ရာရသွားတာလဲ"
အခြေအနေမှာ အတိအကျနီးပါးသိနေပြီဖြစ်သည့်အတွက် စန်းရန်လည်း ဖုံးဖိထားမည့်အကြောင်းပြချက်မျိုးရှာမနေတော့ပေ။
"ဘာမှမဖြစ်ဘူး ၊ လက်မှာ အရေပြားပွန်းသွားရုံပဲ"
ဝိန်းရိဖန်က စန်းရန်၏စကားကိုမယုံသဖြင့် ထပ်၍ ;
"ငါ သွေးတွေအများကြီးတွေ့ခဲ့တယ်"
"အဲ့ဒါက ချယ်ရှင့်ဒယ်ဆီကဟာတွေ ၊ ကိုယ်က ဘာလို့သွေးထွက်ရမှာလဲ"
စန်းရန်မှာ ပျင်းတိပျင်းရွဲအသံဖြင့် စကားဆက်ဆိုလာခဲ့သည်။
YOU ARE READING
နှင်းဦးဝေဝေ [ ဘာသာပြန် ]
Romanceဒီလောက်နှစ်တွေအကြာကြီးကြာခဲ့တာတောင် ကိုယ် အခုချိန်ထိ မင်းတစ်ယောက်တည်းကိုပဲ သဘောကျနေခဲ့တာပါ -စန်းရန်-
Chapter 76
Start from the beginning