သူမ လက်ရှိတွင်ဖြစ်နေသောခံစားချက်ကဲ့သို့ မျှော်လင့်ချက်များစွာဖြင့်စိတ်လှုပ်ရှားနေခြင်းမျိုးလား။
သိပ်မကြာခင် သူ့အား တွေ့ရတော့မည့်ခံစားချက်မျိုးရှိလာသည့်အခါ.....
တစ်ဖက်လူဘက်မှ သူမအား မတွေ့ချင်နေမည်ကို စိုးရိမ်ပြီး ကြောက်လာပါတော့သည်။
လေယာဥ်အတွင်းရှိ လေအေးပေးစက်၏အရှိန်မှာ အနိမ့်ဆုံးထားထားသည့်တိုင် ဝိန်းရိဖန် စောင်ကိုထပ်တိုး၍ ခြုံလိုက်မိ၏။ လေယာဥ်တစ်စင်းလုံးတွင် သူမကသာ စိတ်မလုံမခြုံဖြစ်နေပြီး ဘာမှလုပ်စရာမရှိသည့်တိုင် အိပ်ပျော်အောင်အိပ်လိုက်ဖို့ရာလည်း အစီအစဥ်မရှိပါပေ။ ဝိန်းရိဖန် ပြတင်းပေါက်အပြင်ဘက်သို့ ထပ်၍လှမ်းကြည့်လိုက်သည်။
ဖြစ်ကြောင်းကုန်စင် ဇာတ်လမ်းအစအဆုံးပြောပြရန် ဆုံးဖြတ်ထားခဲ့ခြင်းကြောင့်လားမသိ ၊ ဝိန်းရိဖန်၏စိတ်အစဥ်က ဟိုးအရင်ချိန်များထက်ပင် ပို၍တည်ငြိမ်လို့နေခဲ့သည်။
နှုတ်ခမ်းပါးကို ဖွဖွလေးစေ့ထားမိရင်း ဟိုးအရင်ကကိစ္စအလုံးစုံတို့အပြင် ယနေ့ည၏စိတ်ခံစားချက်တို့ကိုပါ ဖြေးဖြေးချင်းဆွဲထုတ်လာခဲ့ကာ စာတစ်ပိုဒ်အဖြစ်ရေးသားပြီး သူမ ဘယ်သောအခါမှ မမှတ်မိချင်တော့သည့်မှတ်ဥာဏ်များအဖြစ် ရှင်းထုတ်ပစ်လိုက်တော့မည်လည်းဖြစ်သည်။
--------
ဝိန်းရိဖန်မှ ဘကြီးတို့မိသားစုနှင့်အတူ ပေယွီသို့ပြောင်းလာခဲ့သည်မှာ အထက်တန်းဒုတိယနှစ်၏ နောက်စာသင်နှစ်ဝက်တွင်ဖြစ်သည်။
အစပိုင်းတွင် အရာအားလုံးဟာ နန်းဝူမြို့တုန်းက အခြေအနေနှင့်အတူတူပင်ဖြစ်ပြံး ရင်းနှီးနေသည့်မြို့တစ်မြို့မှ မရင်းနှီးသေးသည့်မြို့တစ်မြို့သို့ပြောင်းသွားသည်ကလွဲ အခြားဘာမှမခြားနားသွားပါပေ။
ထိုအချိန်တုန်းက ဝိန်းရိဖန်ကိုယ်တိုင်လည်း ဤအခြေအနေအား အရေးတယူပင်မရှိခဲ့။
သူမအနေဖြင့် ကူကယ်ရာမဲ့နေမှန်းခံစားရသည့်တိုင် အခြားလမ်းမျိုးမရှိမှန်းလည်း သိနေခဲ့ပါသည်။ အမှတ်၊အဆင့်များပိုကောင်းလာရန် ကြိုးစားချင်သည့်စိတ် ၊ တက္ကသိုလ်ကောင်းကောင်းသို့ တက်ချင်သည့်စိတ် ၊ အချိန်များမြန်နိုင်သမျှမြန်အောင် ကုန်ဆုံးသွားချင်သည့်စိတ်ကလွဲ အခြားဘာမှမရှိ။
![](https://img.wattpad.com/cover/354800938-288-k108778.jpg)
YOU ARE READING
နှင်းဦးဝေဝေ [ ဘာသာပြန် ]
Romanceဒီလောက်နှစ်တွေအကြာကြီးကြာခဲ့တာတောင် ကိုယ် အခုချိန်ထိ မင်းတစ်ယောက်တည်းကိုပဲ သဘောကျနေခဲ့တာပါ -စန်းရန်-
Chapter 67
Start from the beginning