ငါတို့ပြိုင်ဘက်လုပ်မယ်ဆိုတဲ့ သဘောတူညီချက်က ဘယ်မလဲ?(ဘာသာပြန်)

အခန်း-၁၂၀ ဘယ်တော့မှ မခွဲတော့ဘူး။

စုယန်၏မွေးနေ့အကြိုတွင် စုဟွိုက်ကျူးနှင့် ကုရော့ဟိုင်တို့သည် ကျောက်စိမ်းအိမ်တော်သို့ အတူတကွရောက်ရှိခဲ့ကြသည်။ သူတို့သည် စုယန်၏ သရဖူဆောင်းသည့် အခမ်းအနားကို တက်ရောက်ရန် လာရောက်ခဲ့ခြင်း ဖြစ်လေ၏။ ဖူလင်းယွင်နှင့် ဖန်ရှီတို့လည်း သူတို့နှင့်အတူ လိုက်ပါလာခဲ့သည်။

ကျောက်စိမ်းအိမ်တော်မှ နှစ်နှစ်ဆယ်ကြာ ဝေးကွာခဲ့သော လူကြီးအများအပြားသည် ယခုအခါ အလည်အပတ်အဖြစ် ပြန်လာခဲ့ကြသည်။ သူတို့သည် ချီအဘိုးအိုးနှင့်တွေ့ဆုံခဲ့ပြီး ထိုစဉ်က သူတို့နှင့် မျိုးဆက်တူခဲ့သော ဝမ်ခဲ့ကိုလည်း နှုတ်ဆက်ခဲ့သည်။ တိလင်းနှင့် မော့ယွင်ကဲ့သို့သော မျိုးဆက်သစ်လူငယ်အချို့သည် လူကြီးများအား အရိုအသေပြုခဲ့ကြပြီး တိလင်းသည် ဧည့်ခန်းသို့ လမ်းပြခဲ့လေ၏။

ဖူလင်းယွင်နှင့် ဖန်ရှီတို့သည် စုယန်နှင့် ကုဖေးတိတို့နှင့်လက်ဖက်ရည်အတူသောက်ရန် စီစဉ်ခဲ့သည်။ သူတို့သည် သိုင်းပညာအသိုင်းအဝိုင်းအတွင်း လက်ရှိအခြေအနေများအကြောင်း သတင်းများကို ယူဆောင်လာခဲ့ကြသည်။

"သိုင်းပညာအထွေထွေ စည်းဝေးပွဲက သိပ်မလိုတော့ဘူး။ အခုအချိန်မှာ ဂိုဏ်းခွဲအားလုံးက စည်းဝေးပွဲမှာ အကျိုးအမြတ်များများရဖို့ ပြင်ဆင်နေကြပြီ" ဖူလင်းယွင်က ဆို၏။

"ရှစ်ဖူက မဟာမိတ်ခေါင်းဆောင်ရာထူးကို စွန့်လွှတ်ပြီး ဦးလေးရွှီကို လွှဲပြောင်းပေးဖို့ ဆုံးဖြတ်ခဲ့တယ်။ ပြီးတော့ ထန်းယွင်စံအိမ်ရဲ့တပ်ဖွဲ့တွေကို စုစည်းပြီး ချန်ဖုန်းရွာကို အားဖြည့်ပေးလိမ့်မယ်။ ရှစ်ဖူက ဌာနခွဲတွေမှာ အသီးသီး တာဝန်ပေးအပ်ထားတဲ့ ရှစ်ရှုန်းတွေ အားလုံးကိုလည်း ပြန်ခေါ်ဖို့ ရည်ရွယ်ထားပါတယ်"

"ရှစ်ရှုန်းတွေကို ပြန်ခေါ်မှာလား?" ကုဖေးတိက ပြောသည်။

"အဖေက စံအိမ်သခင်အသစ်ကို ခန့်အပ်ချင်နေတာ ဖြစ်နိုင်တယ်"

ဖူလင်းယွင်က သက်ပြင်းတစ်ချက်ချလိုက်သည်။

"နင်က စုယန်နဲ့ လိုက်ပြေးသွားပြီ။ ရှစ်ဖူက ဘာတတ်နိုင်မှာလဲ? ဒါ့အပြင်၊ နင့်ကို မိစ္ဆာဂိုဏ်းရဲ့သခင်ငယ်က ဖြားယောင်းသွေးဆောင်ခဲ့တယ်ဆိုတဲ့ ကောလဟာလကလည်း မှေးမှိန်သွားပါပြီ။ မင်းပြန်လာပြီး ထန်းယွင်စံအိမ်ကို တာဝန်ယူချင်ရင်တောင် ရှစ်ဖူက ထောက်ခံပေးမှာမဟုတ်ဘူး"