ငါ့ရဲ့နူးညံ့တဲ့ဇနီးလေးဘယ်ရောက်သွားလဲ

Chapter 30
October 31, 2023
Chapter 30

သူ ယူလာသည့် အံ့ဖွယ်သားရဲ၏အသားများကို ပြန်နွှေးပြီးနောက် တစ္ဆေဘုရင်သည် တစ်ဝက်ခန့်ကို သူတစ်ယောက်တည်း စားလိုက်သည်။

ကျန်တစ်ဝက်ကို ရှဲ့ယွင်နန်နှင့် သွမ့်ချန်ချင်းတို့အား ခွဲပေးလိုက်၏။ ရှဲ့ယွင်နန်က တစ်ဝက်ကျော်ကျော်ခန့် စားလိုက်ကာ သွမ့်ချန်ချင်းကမူ ဝေစုထဲမှ အနည်းငယ်ကိုသာ စားလိုက်သည်။

သွမ့်ချန်ချင်းက ထိုထက်ပို၍ စားနိုင်သေးသော်ငြား ကျန်နှစ်ယောက်က သူ့ကို အားနည်းလွန်း၍ များများ မစားနိုင်ဟု ထင်နေကြသည်။

စားသောက်ပြီးနောက် ရှဲ့ယွင်နန်က အနည်းငယ် ငိုက်မျဉ်းစ ပြုလာ၏။ တစ္ဆေဘုရင်က ပြောလိုက်သည်။

"အံ့ဖွယ်သားရဲရဲ့ အသားကို စားပြီးရင် စုပ်ယူနိုင်ဖို့အတွက် အိပ်ရမယ်... ကောင်းကောင်း အနားယူလိုက် ငါလည်း ပြန်တော့မယ် မနက်ဖြန်မှ ပြန်လာခဲ့မယ်..."

"ဆရာ့ကို နှုတ်ဆက်ပါတယ် ..."

ရှဲ့ယွင်နန်က ပြောလိုက်သည်။

တစ္ဆေဘုရင်က ပြုံးပြကာ ခပ်သွက်သွက် ပြန်သွားလိုက်၏။

သူ ပြန်သွားပြီးနောက် ရှဲ့ယွင်နန်မှာ အိပ်ချင်စိတ်ကို မထိန်းချုပ်နိုင်၊ ဟန်မဆောင်နိုင်အောင်ပင် ငိုက်မျဉ်းလာတော့သည်။

"ချန်ချင်းရေ ကိုယ်တော့ မရတော့ဘူး သွားအိပ်တော့မယ် ... မင်းလည်း တစ်ရေးလောက် အိပ်သင့်တယ်နော် ..."

ထို့နောက် အိပ်ယာပေါ် လှဲချကာ ချက်ခြင်း အိပ်ပျော်သွားတော့သည်။

သွမ့်ချန်ချင်းက သူ့လက်ကို ကိုင်၍ ခန္ဓာကိုယ်ထဲရှိ စိတ်စွမ်းအင်များကို ကူညီကာ စုပ်ယူပေးလိုက်သည်။ ထိုသို့ ကူညီရင်း ဒဏ်ရာဟောင်းများကိုပါ တစ်ပါတည်း ကုသပေးလိုက်၏။

ထိုမြေခွေးသာ အံ့ဖွယ်သားရဲတို့၏ အသားကို ဆက်တိုက် ထောက်ပံ့ပေးနေမည်ဆိုလျှင် ရှဲ့ယွင်နန်၏ ခန္ဓာကိုယ်မှာ တစ်လပင် မကြာဘဲ ပြန်လည်ကာ သက်သာလာနိုင်မည်ဖြစ်သည်။