ငါ့ရဲ့နူးညံ့တဲ့ဇနီးလေးဘယ်ရောက်သွားလဲ

Chapter 22
October 31, 2023
Chapter 22

သွမ့်ချန်ချင်းက အသီးလှီးဓားတပ် ဝါးချွန်ကို ကိုင်ကာ မြစ်ကမ်းဘေးမှ ထွက်လာလိုက်သည်။

ယုန်လေးဘာလေးများ ဖမ်းမိလောက်မလားပဲ ...

ဤကမ္ဘာမှာ ကျင့်ကြံရေး‌ကမ္ဘာနှင့် များစွာ ဆင်တူလှပြီး တိရိစ္ဆာန်များကိုလည်း ရိုးရိုးတိရိစ္ဆာန်၊ မိစ္ဆာသားရဲနှင့် စိတ်ဝိဉာဉ်သားရဲဟူ၍ ပိုင်းခြားထားသည်။

သို့သော် ဤကမ္ဘာတွင်မူ မိစ္ဆာများကို အဖော်သားရဲ၊ စိတ်ဝိဉာဉ်သားရဲကို အံ့ဖွယ်သားရဲဟူ၍ ခေါ်ဝေါ်ကြသည်။

ထို့အပြင် ဤကမ္ဘာတွင် နေထိုင်သူများမှာ ကျင့်ကြံခြင်း မရှိသည့်တိုင် မည်သည်က အဖော်သားရဲ၊ မည်သည်က သာမန်သားကောင်ဟူသည်ကို တစ်ချက်တည်း ကြည့်ရုံဖြင့်ပင် ပိုင်းခြားနိုင်ကြသည်။

ဤကုန်းမြေတိုက်တွင် ကျယ်ပြောလှသည့် တောအုပ်များနှင့် မြက်ခင်းပြင်များစွာ ရှိသော်လည်း အားလုံးကို အံ့ဖွယ်သားရဲများက အပိုင်စီးထားကာ လူသားများက ထိုနေရာများသို့ ခြေတစ်ဖဝါးပင် မချရဲပေ။

နည်းပညာမြင့် လက်နက်များကို အသုံးပြုရန်အတွက်မူ ...

သွမ့်ချန်ချင်းက သိပ္ပံနှင့်နည်းပညာ ဖွံ့ဖြိုးတိုးတက်မှု အလွန်နှေးကွေးကာ လက်နက်ထုပ်လုပ်ရေးမှာလည်း ကြီးကြီးမားမား တိုးတက်ပြောင်းလဲမှု မရှိရခြင်း၏ အဓိကအကြောင်းအရင်းမှာ တိုက်ခိုက်ရေးသမား၏ ပင်ကိုယ်စွမ်းရည်ကို များစွာ လေးစားနေကြသောကြောင့်ဖြစ်ကြောင်းကိုလည်း သိရှိခဲ့သည်။

ဒါကလည်း ပြောရရင်တော့ ပုံမှန်ပါပဲ ...

ဤကမ္ဘာမှာ စိတ်စွမ်းအင်များဖြင့် ပြည့်နှက်နေသည့် ကမ္ဘာဖြစ်ကာ သူ့ပတ်ဝန်းကျင်တွင် သန်မာသည့်သူ မရှိသည့်တိုင် ပြင်ပလောက၌ သန်မာသူ အများအပြား ရှိနေပေသည်။

ပြီးခဲ့သည့် ရက်ပိုင်းက သူ တွေ့ခဲ့သည့် အမြီးကိုးချောင်းမြေခွေးမှာ ချီသန့်စင်ခြင်းအမြင့်ဆုံးအဆင့်သို့ ရောက်နှင့်နေပြီးဖြစ်ကြောင်းကိုမူ ထုတ်ပြောနေရန်ပင် မလိုချေ။ ၎င်းသာ စိတ်ရိုင်းဖောက်လာပါလျှင် တစ်မြို့လုံးကိုပင် ဖျက်ဆီးနိုင်ကာ မည်သူမှ အသက်ရှင်လျက် လွတ်မြောက်မည် မဟုတ်ပေ။