Unicode
" ရှက်နေတုန်းလား သာဒင်က ရှက်ရမယ့်သူ မဟုတ်ပါဘူးကွာ "
သာဒင် ပြန်သွားထဲက အိပ်ခန်းထဲတွင် တကိုယ်လုံး စောင်ဖြင့်အလုံထုပ်ထားသော အသေးလေးသည် ဘယ်လိုလိုပြောပြာ ဆံပင်တစ်ချောင်းတောင် မပေါ်အောင် အလုံထုပ်ထားသည်။
"အသက်ရှူကြပ်မယ်လေ စောင်ဖယ်လိုက်တော့ လိမ္မာတယ်မလား"
အသေးဘက်ကိုမျက်နှာမူပြီး လက်ထောက်လျက်ကြည့်နေသည်မှာ အချိန်အတော်ကြာပြီဖြစ်သည်။
"မလိမ္မာဘူး "
အမေးနှင့် အဖြေကြားတွင် အချိန်ကွာဟမှုသည် အတော်ကြာသည်။
စောင်အလုံထုပ်မှ တိုးတိုးညက်ညက်အသံလေးကြောင့် သူပြုံးလိုက်မိသည်။ သေချာပေါက် နှုတ်ခမ်းဆူဆူလေးဖြစ်နေမှာပင်။
အတူနေသည့်အချိန် လာသည်မျှ တစ်ယောက်အကြောင်း တစ်ယောက် နားလည်နေကျပြီဖြစ်သည်။ မကျေနပ်လျှင် နှုတ်ခမ်းလေးဆူကာ တိုးတိုးညက်ညက် ပြောတတ်သည်မှာ အသေးလေးပုံစံပင်ဖြစ်သည်။
" လိမ္မာပါတယ်ကွာ မျက်နှာလည်းပြပါဦး ပြန်ရောက်ထဲက သေချာမကြည့်ရသေးဘူး "
" အဲတာ အကို့ကြောင့်လေ အိမ်ရှေ့ကြီးမှာ "
ရုတ်တရက် စောင်ဆွဲချလိုက်ပြီး မကျေနပ်ဟန် ပြောလာသည့် ကောင်လေးသည် အရှက်အကြောက်ကြီးသည့် သူဖြစ်သည်။
" အိမ်ရှေ့ကြီးမှာ ဘာဖြစ်လဲ ဆက်ပြောလေ ဟင်"
" အတင်းဖက်ထားတာလေ "
ပြောပြီးစောင်ခြုံထဲ ပြန်ဝင်သွားသော အသေးလေးကြောင့် အသံထွက်သည်အထိရီမိသည်။
" ဟားးးဟားး"
" သူများကိုဆို အသံအကျယ်ကြီးနဲ့ လှောင်ရယ်ချင်နေတာ "
" မဟုတ်ရပါဘူးဗျာ "
ပြောပြီး ဆတ်ခနဲ စောင်ကိုဆွဲလှန်ချသည့် အကို့ကြောင့်သုတလန့်သွားရသည်။ အကိုဆိုသည်မှာ မပြောမဆိုနှင့် လုပ်လိုက်ရင် အရမ်းဘဲ။ ချစ်တဲ့သူ ဖြစ်သည့်အတွက် အပြစ်တော့မမြင်ရက်ပါ။
" လာပါဦးကွာ "
ရင်ခွင်ထဲ တင်းတင်းကြပ်ကြပ် ဖက်ခံထားရသော်လည်း သုတကြိုက်သည့် ကိုယ်သင်းရနံကြောင့် အကို့ကျောပြင်ကြီးကိုပြန်ဖက်ထားလိုက်သည်။
