နှင်းဦး​ဝေ​ဝေ [ ဘာသာပြန် ]

Chapter 34

စုထျန်းက စကားလုံးသုံး​လေးလုံးဖြင့် ဖုကျွမ့်အား ​မောင်းထုတ်​လေ​တော့၏။

"မင်းကို မ​ပြောဘူး....သွား"

ဖုကျွမ့် ထွက်သွားပြီး​နောက်တွင် စုထျန်းက ဝိန်းရိဖန်နားသို့ ပြန်ကပ်လာ၏။

"ငါ ဘာလို့မှန်းမသိဘူး အဲ့​ခွေး​ပေါက်​လေးက ငါတို့ဘက်ကိုလှမ်းလှမ်းကြည့်​နေတယ်လို့ ခံစား​နေမိတယ် ၊ သူ နင့်ကို ကြိုက်ချင်​နေတာလား ဒါမှမဟုတ် ငါ့ကိုလား"

ဤစကားဆိုပြီး​နောက် စုထျန်းက ဝိန်းရိဖန်၏ရုပ်ရည်အား တစ်ချက်ပြန်ကြည့်လိုက်ပြီး စကားပြင်​ပြောလိုက်​တော့၏။

"​တော်ပါပြီ ၊ ငါ့ကိုငါ အရှက်ရ​အောင်မလုပ်တော့ဘူး"

"....."

ဝိန်းရိဖန်လည်း လှမ်းကြည့်လိုက်သည်။

ထိုအချိန်တွင် မုချန်ယွင်က သူ့​နေရာ၌ထိုင်ပြီး တည်တည်တံ့တံ့ဖြင့် ကွန်ပြူတာကိုစိုက်ကြည့်​​နေကာ စက္ကန့်ပိုင်းကြာပြီး​နောက် သူမတို့၏အကြည့်များကို ခံစားရိပ်မိသွားသည့်အလား မျက်လုံးပင့်ကြည့်လာ၏။ သူတို့၏အကြည့်များနှင့် ဆုံသွားခဲ့သည်နှင့်တပြိုက်နက် ရှက်ပြီးပြုံးပြလာ​လေ​တော့သည်။

အ​တော်​လေးချစ်ဖို့​ကောင်းသည့်ပုံစံပင်။

ဝိန်းရိဖန်လည်း ယဥ်​ကျေးသမှုပြန်ပြုံးပြလိုက်ပြီး အကြည့်လွှဲလိုက်၏။ သူမအ​နေဖြင့် မူမမှန်သလိုဘာမှမခံစားရ​သော​ကြောင့် ;

"ဘာ​တွေ​လျှောက်​တွေး​နေတာလဲ ၊ ပထမဆုံးအလုပ်ဝင်တဲ့​နေ့မလို့ လုပ်​ဖော်ကိုင်ဖက်​တွေနဲ့ရင်းနှီး​အောင် လုပ်​နေတာ​နေမှာပါ"

"အတင်းအဖြစ်​ပြောရုံပဲဟာ ၊ ချောတဲ့​ကောင်​လေး​တွေ့​နေတာ​တောင် နင်က ဘာဖြစ်လို့ နည်းနည်း​လေးမှစိတ်ဝင်စားသလိုမဖြစ်ရတာလဲ"

စကား​ပြော​နေရင်း စုထျန်းက အနည်းငယ်သိချင်စိတ်ဖြစ်လာခဲ့သဖြင့် ;

"​အေ့....နင် ဒီလို Type မျိုးကိုသ​ဘောကျလား"

"အာ"

"ငါ့အမြင်မှာ​တော့ နင်က ဒီလိုပုံစံမျိုး​ကို လုံးဝစိတ်မဝင်စားသလိုပဲ ၊ နင် သ​ဘောကျတဲ့ Type မျိုးမရှိဘူးလား ၊ နင် လိုချင်တဲ့ပုံစံမျိုး​တို့ ဘာတို့​​လေ ၊ နွေး​ထွေးတာမျိုး....ပိုင်စိုးပိုင်နင်းဆန်တာမျိုး....တက်တက်ကြွကြွရှိတဲ့ပုံစံမျိုး...."