ပြန်လည်မွေးဖွားလာသောဧကရာဇ် (book 3)

Arc 3🗡177🗡ဝူအဆင့်၁၀ (ပထမပိုင်း)

Chapter (177) Arc 3
ဝူအဆင့်၁၀ (ပထမပိုင်း)

"ရောက်တော့မှာလား?"

ကျီးကန်း စိတ်ရှုပ်ထွေးစွာဖြင့် ရှေ့ကို မျှော်ကြည့်လိုက်သည်။

"မင်းဘယ်ကိုပဲ သွားသွား မင်းငါ့ကို မသတ်သရွေ့ အရေးမကြီးဘူး! ငါထွက်လာဖို့ လွယ်ခဲ့တာ မဟုတ်ဘူး....  ငါဒီမှာမသေချင်ဘူး!!"

ကျီးကန်းက အော်လေသည်။

"စိတ်ချပါ!"

လုရွှမ်က ပေါ့ပေါ့ပါးပါး ပြုံးပြီး ဆက်မပြောတော့ဘဲ ဖီးနစ်ရဲ့ အတောင်ပံတွေ တဖျပ်ဖျပ်ခတ်ပြီး ရှေ့ကို ဆက်လက် ပျံသန်းသွားတော့သည်။

"ကောင်းပြီ ငါတို့ ရောက်ပြီ!"

တစ်နေကုန် ပျံသန်းပြီးနောက် လုရွှမ် ရပ်တန့်သွားသည်။

"ဒါက ဘယ်​နေရာ​လဲ?"

သူတို့ ရှေ့မှာ ကြီးမားတဲ့ သဲကန္တာရကြီး တစ်ခု ရှိနေသည်။ သူတို့ရပ်နေတဲ့ နေရာကတော့ ခုနစ် မီတာ ရှစ်မီတာသာ ကျယ်ပြီး သဲကန္တာရထဲက ကျဉ်းမြောင်းတဲ့ သဲသောင်လေး တစ်ခုပေါ်မှာ ဖြစ်သည်။

လုရွှမ်က ဘာဖြစ်လို့ ဒီနေရာကို ရှာရတာလဲ? ဒီနေရာမှာ ရတနာတစ်ခုခုများ ရှိနေလို့လား?

ဒါကိုတွေးပြီး ကျီးကန်းက လှည့်ကြည့်တော့ ပိုလို့တောင် စိတ်ရှုပ်သွားတော့သည်။

လုရွှမ်သည် ရတနာများအပေါ် အာရုံခံနိုင်စွမ်းသည် သူ့ထက်မကျော်သည်မှာ သေချာပါသည်။ ဤနေရာသည် ဗလာနတ္တိဖြစ်ပြီး ရတနာတစ်ခုပင် မရှိပေ။ အဖိုးတန်သော အရာတစ်ခုပင် မရှိရာ ဒီမှာ ဘာလုပ်မလို့များလဲ။

"ဒါက သဲကန္တာရရဲ့ အလယ်ဗဟိုပဲ.... ဒီလူတွေ ငါတို့ကို လိုက်နေခဲ့တာ ကြာပြီ.... ဒါကြောင့် ဖြေရှင်းချိန် ရောက်ပြီ!"

"ဖြေရှင်းမယ်?? ဘယ်လိုဖြေရှင်းမှာလဲ?"

ကျီးကန်းခမျာ ထိတ်လန့်သွား၏။

နောက်က လိုက်လာသူတွေထဲမှာ သေမျိုးအသွင်ပြောင်းခြင်း နယ်ပယ် အဆင့်၈ကို ရောက်သွားတဲ့ သူ ဒါဇင်ပေါင်းများစွာ ရှိပြီး အဆင့်၇နှင့် အဆင့်၆များမှာလည်း မရေမတွက်နိုင်အောင် များပြားလှသည်။