မပြည့်စုံသော သူဌေးမလေး

အခန်း ၄ ။

 

ကျန်းမန်လင်း : “ ….. ”

‘ ကျားရုပ်လေး နေရာချဖို့ကို သေချာ ဂရုစိုက်ပြီး ဆုံးဖြတ်မှရတော့မယ် ‘

 

ကျန်း မန်လင်း က ကျားရုပ်အကြောင်း စိတ်ပူနေပေမဲ့ တု ယုံးဝေ ကတော့ ဆရာ ချန်း အကြောင်း တွေးနေမိ၏ ။

 

‌’ကံကြမ္မာ ဖတ်ပေးတယ် လို့ ပြောတဲ့ ဗေဒင်ဆရာ တော်တော်များများက ကိုယ်နဲ့ စကားပြောနေတုန်းမှာ  ကိုယ် ပြောလိုက်တဲ့စကားလုံး အပြုအမူ တွေကို ကြည့်ပြီး ခန့်မှန်းကြသည် ' ဟု တုယုံးဝေ ကြားဖူးသည်။ ' ဒါပေမဲ့လည်း သူမ ပြန်မွေးဖွားလာတယ် ဆိုသည့် ကိစ္စ က သာမန်လူတွေ အတွက် ခန့်မှန်းဖို့ မလွယ်နိုင်ဘူးလေ …ဟုတ်တယ်မလား ? ‘

 

ဒီ ဆရာ ချန်းက ဘယ်လောက်တောင် သိထားလဲ ဆိုတာ သူမ မသိပေမဲ့ ကံကောင်းစွာနဲ့ပဲ သူ့ကြည့်ရတာ သူမ အပေါ် မကောင်းတဲ့စိတ် ရှိပုံမရ ။

 

“‌ ကောင်မလေးရေ … ဆရာချန်းရဲ့ နေရာကနေ ထွက်လာကတည်းက ဘယ်လိုတောင် စိတ်လွတ်နေရတာလဲ “ တုယုံးဝေ ထပ်ပြီး အတွေးများ နေတာကို မြင်လိုက်ရသောအခါ ကျန်း မန်လင်း က တု ယုံးဝေ ကိုထပ်မေး လိုက်ပြန်၏ ။

 

တု ယုံးဝေသည် သူမ အတွေးတွေကို ရပ်လိုက်ပြီး ပြုံးပြလိုက်သည် : “ မဟုတ်ပါဘူး ၊ သမီးက ဒီတိုင်း တွေးနေတာပါ ဆရာက ကောင်းတာလေးတွေ လုပ်ဖို့ မှာလိုက်တယ်မလား? အဲ့ဒါ ဘယ်‌နေရာသွားပြီး ဘယ်လို ကောင်းမှု‌တွေ ပြုရမလဲ ‌စဥ်းစား‌နေတာ “

 

“ မပူနဲ့ အမေရှိတယ် ” ကျန်း မန်လင်းက မျက်လှည့်ပြလိုက်သလိုမျိုး အိတ်ထဲမှ ဖိတ်စာတစ်စောင်ကို ဆွဲထုတ်လိုက်၏ ။  “ မနက်ဖြန်ည ကျရင်  ချို့တဲ့ တဲ့သူတွေ အတွက် အလှူခံမဲ့ လေလံပွဲတစ်ခု ရှိတယ် အစက အမေ သွားမလို့ စီစဉ်ထားတာ အခု သမီးပဲ သွားလိုက်တော့ “

 

တု ယုံးဝေ : “..…”

 

တု ယုံးဝေ က ဒီလေလံပွဲကို ပုံမှန် လေလံပွဲတစ်ခု ကဲ့သို့  လေလံတင်သည့် ပစ္စည်းတစ်ခုချင်း စီတိုင်းမှ ရရှိသည့် လှူဒါန်းငွေများကို ‌တကယ် လိုအပ်နေသည့် နေရာများတွင် သွားရောက် ပေးအပ်မည့် ‌ရန်ပုံငွေ လေလံပွဲတစ်ခု ဟုသာ နားလည်ထားသည် ။ ဒီလှူဒါန်း‌ ငွေများသည် ဆင်းရဲနွမ်းပါးသည့် နေရာများမှ ကလေးများကို သင်ကြားပေးသော မူလတန်းကျောင်းများဆီသို့ ထည့်သွင်းပေးနေပြီး အဆောက်အဦး ၊ လမ်း ၊ အိမ်များ ဆောက်လုပ်လျက် ကလေးများကို အစားအသောက် ၊ အဝတ်အထည် ၊ ကျောင်းသုံး ပစ္စည်းများ ထောက်ပံ့နေခြင်း ဖြစ်၏ ။ ကျန်းမန်လင်း က မကြာခဏ အဆိုပါ ရန်ပုံငွေ လှုပ်ရှားမှုပွဲများတွင် ပါဝင်လေ့ရှိသည်ကို တုယုံးဝေ ယခင်က သိပင်မသိခဲ့ ။