Application For Divorce [ 离婚申请 ]

Extra 3

သို့သော် မစားချင်လည်း စားရပေမည်။ မဟုတ်လျှင် အခြေခံအာဟာရဓာတ် ပြတ်လပ်ကာ ဘာမျှမလုပ်နိုင်ဘဲ ဖြစ်သွားလိမ့်မည် မဟုတ်ပါလား။

သို့နှင့် ချန်းရွှီသည် စွပ်ပြုတ်ပန်းကန်ကို သူ့အခန်းအတွင်းသို့ တစ်ပါတည်း ယူလာခဲ့ပြီးနောက် စားပွဲခုံရှေ့တွင် ထိုင်လျက် အင်တာနက်လိုင်းချိတ်ဆက်မည့် အချိန်ကို စောင့်ရင်း စွပ်ပြုတ်သောက်နေလိုက်၏။ ကျွန်ပျူတာကို လျင်လျင်မြန်မြန် ဖွင့်ပြီးဖြစ်သည့်တိုင် ဆက်သွယ်ရေးလိုင်းကမူ ဆန့်ကျင်ဘက်ဖြစ်စွာ နှေးကွေးလို့နေခဲ့သည်။ စွပ်ပြုတ်တစ်ဝက်မျှ လျော့သွားပြီးချိန်မှ အင်တာနက်လိုင်းကို အောင်မြင်စွာ ချိတ်ဆက်လို့ ပြီးသွားလေ၏။ ချန်းရွှီသည် ကီးဘုတ်ပေါ်သို့ သူ၏လက်ချောင်းများကို ကျွမ်းကျင်စွာတင်လိုက်၍ သူ၏အကောင့်များထဲမှာ တစ်ခုကိုဝင်ကာ မိတ်ဆွေတစ်ဦးထံသို့ မက်ဆေ့တစ်စောင်ပို့လိုက်လေသည်။

သူ့အနေဖြင့် လူပေါင်းများစွာနှင့် တွေ့ဆုံခဲ့ဖူးကာ အများစုမှာလည်း ၎င်းတို့၏သက်ဆိုင်ရာ လုပ်ငန်းအသီးသီးတွင် ထူးချွန်ကြသူများ ဖြစ်ကြလေသည်။ ထိုမိတ်ဆွေများထဲမှ တစ်ယောက်ဖြစ်သူ ဗိသုကာပညာရှင် ထန်ကောသည် ယခုလက်ရှိတွင် ဤနယ်ပယ်၌ အတော်ဆုံးမဟုတ်သေး၍ နာမည်လည်းမကြီးသေးသည့်တိုင် နောက်တစ်ချိန်တွင်မူ ထိုသူသည် ကမ္ဘာတစ်ဝှမ်း ကျော်ကြားလာလိမ့်မည် ဖြစ်ကြောင်း ချန်းရွှီကောင်းစွာသိလေသည်။ ယခု ထင်သလောက် မအောင်မြင်ရခြင်းမှာ ထန်ကော၏အသက်အရွယ်နှင့် ၎င်းကစကားပြောသော အတွေ့အကြုံတို့ နည်းသေးသောကြောင့်သာ ဖြစ်လေတော့၏။

တစ်ဖက်လူသည်ကား ချန်းရွှီ၏ ရုတ်တရက် ဆက်သွယ်လာမှုကြောင့် ရာနှုန့်ပြည့် အံ့ဩသွားခဲ့ရ၏။ ၎င်းနောက် ချန်းရွှီ အသက်ရှင်နေသေးကြောင်း သေချာအတည်ပြုပြီးနောက်တွင် ထန်ကောသည် အံ့ဩရုံမက ပျော်ရွှင်သွားရလေသည်။ အချင်းချင်း အပြန်အလှန် နှုတ်ဆက်ပြီးနောက်တွင် ချန်းရွှီသည် သူ၏ရည်ရွယ်ချက်ကို ရှင်းပြ၍ လိုရင်းကို တိုက်ရိုက်အမေးဆိုလာခဲ့ပေ၏။

"ငါ အခု မင်းရဲ့ အကူအညီကို လိုအပ်နေတယ် .. မင်း ငါ့ကို ကူညီပေးနိုင်မလား"