Application For Divorce [ 离婚申请 ]

Extra 3

"အဖေ..ညစာ စားပြီးပြီလား"

ချန်းကျန်းကဆို၏။

"အေး။ ငါစားပြီးပြီ..မင်းအတွက်လည်း ချန်ထားတယ်။ သွားစားလိုက်ဦး"

ဤသို့ အဖြေပြုပြီးသည်နှင့် ချန်းကျန်းသည် ယခင်ကအတိုင်း အိမ်နီးနားချင်းများနှင့် စကားစမြည် ပြန်လည်ပြောဆိုလေတော့သည်။ ချန်းရွှီသည်လည်း ၎င်းတို့ပြောဆိုနေသည့်အကြောင်းကို တစ်ခဏမျှ ငြိမ်ကာနားထောင်ခဲ့မိသေး၏။ သူ၏ဖခင်ဖြစ်သူသည်ကား စီးပွားရေးနယ်ပယ်ထဲတွင် ကျင်လည်ခဲ့စဉ်က အတိတ်အကြောင်းများကို ပြောဆိုနေခြင်း ဖြစ်ပေသည်။

ချန်းကျန်းသည် အပြောအဆိုကောင်းသူတစ်ယောက် ဖြစ်သဖြင့် အကြောင်းအရာတစ်ခုခုကို သူပြောဆိုဆွေးနွေးပြီဆိုလျှင် လူတိုင်းထံမှ စိတ်ဝင်စားမှုကို ခံရစမြဲပင်။ ထို့ကြောင့် နားဆင်သူပရိသတ်၏လက်ခုပ်ဩဘာများကိုလည်း အချိန်ပြည့် ရတတ်သည်။ မည်သို့ပင်ဆိုစေကာမူ ထိုကဲ့သို့ ချီးကျူးမှုများနှင့် ထိုက်တန်သည်အထိ သူ၏မျက်ဝန်းများကလည်း ပျော်ရွှင်မှုများနှင့် အပြည့်ဖြစ်နေတတ်လေသည်။

ချန်းရွှီသည် တံခါးကို ငြင်သာစွာပိတ်လိုက်ကာ မီးဖိုချောင်ထဲသို့ ဝင်လာခဲ့၏။ အိမ်အတွင်း၌ အပူပေးစနစ် တပ်ဆင်ထားပြီး ဖြစ်သည့်တိုင် ၎င်းက အရမ်းတော့ မနွေးလှပါချေ။ အမြဲတမ်းနီးပါး ၁၀ ဒီဂရီခန့်တွင်သာ ရှိနေတတ်သည်။ သို့သော် နှင်းနှင့်ရေခဲများ ဖုံးလွှမ်းနေတတ်သော အပြင်ပတ်ဝန်းကျင်နှင့် ယှဉ်လျှင်မူ တော်ပါသေးသည်။

အမှန်အတိုင်းဆိုရလျှင် ချန်းကျန်းသည်လည်း ချန်းရွှီနည်းတူ မချက်ပြုတ်တတ်ပါပေ။ ထို့ကြောင့် အိုးအဖုံးကို ဖွင့်ဖွင့်ချင်း တွေ့လိုက်ရသည့်အရာသည်ကား ကျိန်းသေပေါက် အာလူးအရသာရှိသော ဖြည့်စွက်စာစွပ်ပြုတ်သာ ဖြစ်နေခဲ့လေသည်။ ထို့အပြင် ၎င်းကို နွှေးထားသည်က အချိန်အနည်းငယ် ကြာမြင့်ခဲ့ပြီးပုံ ပေါ်သောကြောင့် စွပ်ပြုတ်၏ပုံစံမှာ ပုံမှန်ထက် ကြည့်ရဆိုးနေခဲ့သေး၏။ ချန်းရွှီအနေဖြင့် မည်မျှပင် ဆာလောင်နေပါစေ ဤကဲ့သို့သော အစားအစာမျိုးကို မြင်လိုက်ရသည့်အခါတွင်မူ စားချင်စိတ်လည်း ပျောက်ဆုံးသွားရတော့သည်။