စောမင်းခန့် တစ်ခု လုပ်လိုက်ရင် နှစ်ခု အမှားဖြစ်တတ်တာမို့ ဆလိုင်းနှင့်နေယံက စောမင်းခန့်ကို ကြောက်နေပြီ။ အဝတ်အစားအဖြူ၊ စောင်အဖြူတွေကို အရောင်တွေပါသည့် အဝတ်အစားတွေနဲ့ အဝတ်လျှော်စက်ထဲ ရောထည့်လိုက်သည်မို့ အဝတ်အစားတွေအကုန် စွန်းကုန်သည်။ တစ်ထည်၊နှစ်ထည်မဟုတ်ဘဲ အထည်နှစ်ဆယ်လောက်နှင့် စောင် ရှစ်ထည်လောက် အကုန် အစွန်းတွေ စွဲကုန်သည်။
ဆလိုင်းက ကန်ထဲမှ အင်္ကျီတစ်ထည်ကို ဆွဲထုတ်လိုက်ပြီး ဘေးမှာ ထိုင်နေတဲ့ နေယံ့ကို ပြောသည်။
" ဆပ်ပြာမှုန့် အရင်ထည့်။ လက်နဲ့သေချာလျှော်ပြီးမှ အစွန်းချွတ်ဆေးကို စွန်းတဲ့နေရာ ပုံလိုက်။ "
" တစ်ထည်လုံး ချွတ်ပစ်ရမှာ မဟုတ်ဘူးလား။ "
" အဝတ်တွေပါ စားပြီးပါးသွားမှာပေါ့ ငတုံးရ။ "
ရေချိုးခန်းက ကျယ်ပေမယ့် လျှော်ရမည့် အဝတ်အစားတွေနှင့်စောင်တွေက များတာမို့ ခြံထဲမှာပဲ ထုတ်လျှော်ဖြစ်သည်။ စောမင်းခန့်က ဘေးမှာ ဆပ်ပြာမှုန့်ဘူးကို ကိုင်ပြီး မတ်တပ်လေး ရပ်နေသည်။
" ငါ ဘာကူလုပ်ပေးရဦးမလဲ။ "
စောမင်းခန့်က မေးလိုက်တော့ ဆလိုင်းနှင့်နေယံက ချက်ချင်းပင် ပြိုင်တူဖြေသည်။
" မလုပ်နဲ့ "
စောမင်းခန့် နှစ်ယောက်လုံးကို မကျေမနပ်ကြည့်ပြမှ နှစ်ယောက်ကြားမှာ စောမင်းခန့်အတွက် နေရာ ဖယ်ပေးကြသည်။
" ကိုကို ကူလုပ်ချင်လည်း လုပ်ပါ။ "
" ငါ ဘရက် ခြစ်ပေးမယ်။ မင်းတို့ ဆပ်ပြာတိုက်။ "
" ဟုတ်ကဲ့ "
လျှော်ထားပြီးသား အဝတ်တွေမို့ ဆပ်ပြာအရမ်း တိုက်စရာမလိုပေ။ဆလိုင်းနှင့် နေယံက ဆပ်ပြာ ခပ်ဖွဖွ တိုက်ပြီး စောမင်းခန့်ဆီပေးသည်။ စောမင်းခန့်က အစွန်းပြောင်အောင် ခြစ်ပေးသည်။ ပြီးနောက် နေယံက ရေသေချာ ပြောင်အောင် ဆေးပေးသည်။
