" ဆလိုင်းခမ်းမနား "
နှုတ်ဆက်လာကြသည့် လူတွေကြားမှာ ထိုနာမည်က ရင်းရင်းနှီးနှီးရှိသည်။တစ်ချို့ကလည်း လေးစားအားကျသည့် အကြည်တွေနှင့်၊ တစ်ချို့တွေကြတော့လည်း မလိုမုန်းထားပြီး ကြောက်ရွံ့သည့် အကြည့်တွေ အပြည့်ပင်။ အသက်နှစ်ဆယ့်လေးနှစ်အရွယ် လူငယ်လေး တစ်ယောက်၏ စွမ်းဆောင်နိုင်မှုနဲ့ လုပ်ရည်ကိုင်ရည်က အံ့မခမ်းပေ။လုပ်ငန်းတစ်ခု၏ ခေါင်းဆောင်နှင့်အားကိုးရဆုံးတစ်ယောက်ပြီးရင် တတိယမြောက် သြဇာ အကြီးဆုံးသူဖြစ်သည်။ ဒီလူငယ်လေးက ဘယ်လိုဖြစ်ပြီးများ လေးနှစ်လောက် အတွင်းမှာ ဒီလောက်ထိ ပြောင်းလဲ သွားရသလဲဆိုည့် ကိစ္စ၏ နောက်ကွယ်မှာ ပြသနာခပ်ကြီးကြီး ရှိသည်။
အနက်ရောင် ကားတွေ တစ်စီးပြီး တစ်စီး ခြံထဲဝင်လာကြပြီး အလယ်တည့်တည့်က သုံးစီးမြောက် ကားထဲမှ ဆလိုင်းက ထွက်လာခဲ့သည်။သတင်းတွေ အများကြီး ကြားထားရသည်မို့ ခါးကျိုးမတတ် အရိုအသေပေးချင်တဲ့သူတွေ၊ တပည့်ခံချင်သူတွေ အပြည့်ပင်။ပြောင်လက်နေတဲ့ အနက်ရောင် ဖိနပ်ကို အရင် မြင်ရပြီး Style Pantအနက်၊ ဆွယ်တာ အဖြူလက်ရှည် ဝတ်ထားပြီး ထိုအပေါ်မှာမှ ပေါင်လယ်လောက်ရှိတဲ့ ကုတ်အင်္ကျီအနက်ကို ထပ်ဝတ်ထားသည်။ ယောကျ်ားလေးတွေမှာတောင် တွေ့ရခဲသည့် 186cm ရှိတဲ့ အရပ်က အတော်ရှည်လွန်းသည်။လက်ချောင်းတွေက ရှည်သွယ်သည်။ မျက်နှာကျ သွယ်ပြီး ဂုတ်ထောက်နေသည့် ဆံပင်ကို ဆီလိမ်းပုံသွင်းပြီး အနောက်ဖက်သို့ လှန်သိမ်းထားသည်။ မျက်ခုံးတွေ တွန့်ချိုးနေသလိုမို့ မျက်နှာထား တင်းမာသည့်ဘက်ကို သွားသည်။ပါးမြိုင်းမွှေးတွေကို သေချာရိတ်သင်ထားသည်မို့ ထိုနေရာတွေက စိမ်းဖန့်နေသေးသည်။ဆေးလိပ်သောက်တဲ့သူမို့ နှုတ်ခမ်းက ရဲမနေပေမယ့် နီညိုဘက်သွားသည်။ မကျဥ်းမကျယ် မျက်ဝန်းတွေရှိပြီး မျက်ဆံနက်နက်၊ နှာတံပေါ်ပေါ်နှင့်မို့ ကြည့်ကောင်းသည်ထက် ကျော်လွန်သည်။ ယောကျ်ားပီပီသသနဲ့ သေသပ်ပြီးချောတာမျိုးပင်။
" ဆလိုင်း "
လူတွေကြားထဲမှ တစ်ယောက်က ရင်းရင်းနှီးနှီးခေါ်ကာ နှုတ်ဆက်လာသည်။ နဂိုတည်တင်းနေသည့် မျက်နှာက ထိုတစ်ယောက်ကို တွေ့တော့ အနည်းငယ်မျှ ပြေလျော့သွားကာ အပြေးလာနေတဲ့သူကို ပခုံးချင်းတိုက်ကာ နှုတ်ဆက်သည်။