" ငါ့ ... အလုပ်မှာ ... မလိုဘူး ... မင်းကို ... "
စောမင်းခန့်က ငြင်းလိုက်တော့ ဆလိုင်းက အနည်းငယ် စိတ်ဓါတ်ကျသွားသည်။ ဆလိုင်း စိတ်ကူးထားတာ စောမင်းခန့်နဲ့ အလုပ်အတူလုပ်ရင်း စောမင်းခန့်အနား ကပ်နေမည်။စောမင်းခန့် လုပ်နေသည့် အလုပ်တွေကိုလည်း တရားဝင်သည့် အလုပ်တွေဟုသာ ဆလိုင်း ထင်ခဲ့သည်။
" ကျွန်တော်က ... "
စောမင်းခန့်က ဆလိုင်း၏ လက်ကိုဖယ်လိုက်ကာ စိတ်ရှုပ်ထွေးစွာဖြင့် မျက်ခုံးလေးတွေ တွန့်နေပြီး ထွက်သွားသည်။အနားကို အတင်းကပ်နေရင် စောမင်းခန့် စိတ်ရှုပ်နေမည်စိုး၍ ဆလိုင်းက ခြေစုံရပ်ကာ ကျန်ခဲ့ရသည်။
" ကျွန်တော်က သူ့ကို လက်မခံနိုင်ဘူး။ အန်ကယ်ဇေယျာ ကြိုက်တာလုပ်။ "
စောမင်းခန့်၏ အသံက ပုံမှန်ထက် အနည်းငယ် ကျယ်နေသည်။ အမူအယာနဲ့ စိတ်ခံစားချက်ကို ခန့်မှန်းဖို့ မလွယ်တဲ့ စောမင်းခန့် တစ်ယောက် စိတ်တိုနေပြီဆိုတာ အသံကြားရုံဖြင့် သိနိုင်သည်။
ဦးဇေယျာနဲ့ အလုပ်ကိစ္စ စကားပြောဖို့ Hotelက ဦးဇေယျာ အနားယူသည့် ရေကူးကန်ဘက်ကို ဆလိုင်း
လိုက်သွားခဲ့ရင်းမှ စောမင်းခန့် ပြောသည့် ထိုစကားကို ကြားခဲ့သည်။စောမင်းခန့်က လှည့်ထွက်လာတော့ ခပ်လှမ်းလှမ်းမှ ဆလိုင်းကို မြင်သွားသည်။ သို့ပေမယ့် သူ့အကျင့်အတိုင်း အဖက်မတန်သလိုဘဲ အကြည့်လွှဲသွားသည်။
" အစ်ကို "
ဆလိုင်းက ဦးဇေယျာကို 'ခွင့်ပြုပါဦး' ဆိုတဲ့သဘော ခေါင်းငြိမ့်ပြကာ စောမင်းခန့် အနောက်လိုက်သွားသည်။ စောမင်းခန့်က Hotel၏ ကား Parkingကို သွားနေသည်။
" အစ်ကို ... ခဏနေပါဦး။ "
စောမင်းခန့် လမ်းလျှောက်တာ အရမ်းမြန်သည်။ ဆလိုင်း ပြေးလိုက်မှသာ မီသည်။ စောမင်းခန့်က နှစ်အပိုင်းအခြား တစ်ခုအတွင်းမှာ အများကြီး အောင်မြင်လာသည်။ သူ့နောက်လိုက်တဲ့သူတွေ အများကြီးရှိသည်။ကြားနေရတဲ့ သတင်းတွေအရ တော်နေဇော်ပြီးရင် စောမင်းခန့်က ဒုတိယခေါင်းဆောင် ဖြစ်လာနိုင်သည်။
