بقلم هوس ريجا
.غير فاتت ساعة ملي خرجت من السبيطار جا لدارنا استقبلو بابا نضت نخرج نسمع واش يهدرو نسمع في بابا يهدر شوف انا كي عطيتك بنتي ماشي خاطر كرهت منها ورميتها عليك خاطر شفتك راجل وليد فامليا وتخاف ربي ومكانش احسن منك لبنتي وما تنساش انت لي جيت طلبتني فيها ماجيتش قتلك رواح نمدلك بنتي _علاه الهدرة هذه بصح _خاطر انت راك حاسبها هكا بلي كرهت من بنتي ورميتها عليك _حاشا والله _لا حاشا لا والو _افعالك معاها راهي تقول هكذا بنتي ونعرفها لسانها طويل وراسها يابس وتعقد الامور وتكبرها وجاية دلولة بزاف بصح الحاجة الاكيدة انها ماتظلمش وكون واحد مايوصلهاش جامي توصلو بنتي غلطت معاك علبالي بصح متاكد كون ماغلطتش معاها ماتغلطش معاك ونحط يدي على المصحف بلي انت لي خليتها تغلط معاك وانا قتلك مانيش من هذوك الاباء لي يحلو العين لي بناتهم وكلمة زوج نجري لطلاق نحاول ديما نحافظ على دارها وجابلي ربي علبالك بهذا الشي غلطت معاك المرة لولى وجبتها عندك براسي وطلبت السماح منك انا لول وخليتها تبوس راسك وتطلب السماح منك المرة الثانية نفس الشي خليتها تبوس راسك وتطلب السماح وترجع معاك مالغري كنت شاهد واش صرا فيها ومتاكد انت لي وصلتها لهذيك الحالة وتغاضيت على الامر بصح باه توصل بك تهز يدك عليها المرة لولى فالشمبرة والمرة الثانية فالكوزينة تحكمها من رقبتها كالنعجة هذه واحد والثانية تخطط انت ومرتك تنحولها ولدها وهو مزال ديجا ما شافش الضو هنا سمحلي راك طغيت بزاف _اول حاجة انا ضربتها خاطر هربت مني كي ديتها لطبيبة وبقات ترجعلي فالكلام وقابلتني بكل صحانية وجه وقاتلي ماكش راجل وهذه مانقدرش نسكت عليها الحاجة الثانية واحد ماراح ينحيلها وليدها هدرة نسا هذه قتلها الهدرة ديها مني انا _بصح هي سمعاتك تقولها بلي راح تهدر معاها _كنت نسكت فيها برك _المهم غلطاتك مع بنتي كثرو بزاف وانا والله مانقدر نسكت هذه المرة كيما كل مرة لذلك بنتي راح تبقى هنا عندي حتى يرحمها ربي حتي هي ماهيش حابة ترجع راح تقعد هنا عندي حتى ترتاح وانا مانقدرش نسيف عليها كيما كل مرة ومانكذبش عليك راهي تقول حابة نطلق _كيفاه تطلق _ ماهيش حابة ترجع راهي تقولي طلقني منو واذا بقات هكذا راح نطلقها درت عند ماما كانت واقفة ورايا واش راه يهدر بابا صح راح يطلقني _مكلاه تصدقي راهي يوصلو بلي بنتي عزيزة عندي وراح تبقى عزيزة عندي وراح تبقى دار باباها ديما مفتوحة جامي تخمم تذلها من هذك النهار تقريبا يوميا يجي ويطلب يشوفني يقولو بابا ماحبتش تشوفك مانقدرش نحتمها عليك جات عجوزتي وفريدة يرجعوني قالي بابا بالاكي تقبلي ترجعي اصلا انا مانيش حابة نرجع هدرو معايا ويعياو فيا ماحبيتش دخلت السابع وهو ما كَل ما مَل حرت اول مرة بابا يعامل واحد من نسابو هكذا صراحة انا ديما استثناء سمعت ماما تهدر معاه خلي الطفلة ترجع لدارها _ماترجعش حتى يجيب جماعة ويحاولني نرجعهالو باه نخليها ترجع صينو والله ما يشوفها نوريلو هذه انا كرهت من بنتي ورميتها عليه خليه يتوحش خيالها باه يعود يديرلها الف حساب وصح جاب جماعة بصح تفاجأت كي رفض بابا وقالهم بنتي ماحبتش ترجع عندو عياو مايهدرو معاه وكفاه واهدر معاها وماشي هكذا وخليها تلعن الشيطان وزيد اهدر معاها خرج جا هدر معايا ترجعي معاه ،لا مانيش حابة _كيما تحبي قاتلو واشبيك انت خلي الطفلة ترجع لدارها _اخرتها راح ترجع بصح والله وماندموش على هذيك الكلمة تاع رميت بنتي عليه ملا جرجرو تجريرة كحلة حتى هو مافهمتش لاه بقا رايح جاي عليا بابا محصلها فيا ومخليه يقولو خليني نهدر معاه يقولو ماحبتش تشوفك خرجها من عينيه تاع الصح.....
