#نار_الهوى
بقلم هوس ريجا
الجزء 01
انا فالكوزينة ندير فالعشا نسمع في ماما تهدر مع بابا شكون هذو _الشيخ فلان لوليدو يحيى _وهذاك ماشي متزوج _ايه وامبعد _كيفاه وامبعد راح تزوجها على ضرة _وامبعد علاه غير هي لي راح تتزوج على ضرة هاكي انتي على زوج ضراير خواتاتها في 4 تزوجو على ضرة خاوتها في 7 ڨاع متزوجين بزوج نسا وثلاثة وراه المشكل واش ولات هي حتى ماتروحش على ضرة _ويحيى علاه يعاود الزوج على مرتو _وانا واش دخلني فيه هو قاصد الحلال وانا قبلت الراجل وليد فامليتنا ومعروف يصلي يخاف ربي وخدام مكانش خير منو لبنتي دخلت عليا يما شفت معاها على من راكو تهدرو _عليك انتي ،وانا مانيش قابلة قتلك الف مرة مانتزوج بحتى واحد بغير ساعد _اشششش باباك يسمعك يذبحك ،واش دخلني يسمع ولا يقعد علاه ماقبلش بساعد وقبل بيحيى غير روحي اهدري معاه قوليلو مانيش قابلة _أطفلة انتي حابة تنذبحي على جال ساعد هذا مليون مرة قتلك انسايه باباك ماقبلش بيه ومراحش يقبل ،علاه واش خصو ساعد حتى ماكمش قابلين بيه ولا كعاد زوالي حڨرتوه _يا الجايحة ماشي كعاد زوالي واش ديري براجل لا دار لا خدمة لا طوموبيل الحب مايولكش خبز ،منين راح يجبلك دار وطومومييل يروح يسرق _ماشي يسرق يروح يخدم ڨاع زواولة وكعادو رجال وفحل دارو تاويل لعمرهم ،مكاش خدمة _علاه مكانش الخدمة كاين الف خدمة الرجال تبكر من 4 تاع صباح وهما يدمرو لا يجيبو دورو وهو يجبها رقاد ل12 ويقول مكاش خدمة هذا راجل وتعولي عليه وتطمعي ديري معاه دار ووليدات ،انا نحبو وهو يحبني وجا قصدني شحال من مرة بصح انتما ماتحبوش _ياوو الحب مايوكلش الخبز افهميها هذه انت حاسبة الزواج غير فراش ورومانيسة ياو هذو ڨاع يفوتو فالشهر لول وماتنصدمي غير بالواقع نهار جوعي وماتلقاي واش تاكلي روحي للحب يوكلك ونهار تسخفي على حاجة روحي للحب يوكلك ،مايهمنيش انا قابلة بيه كيف مايكون يكون _قابلة بيه؟ ملا روحي عند باباك وقوليلو هذه الهدرة بصح قبل ماتروحي شهدي على روحك ،ايه نروح _روحي راه فالصالو ،ايه نروح خرجت دخلت عندو لقيتو قاعد يقرا فالمصحف شافتي غلق المصحف ارواحي بابا ارواحي انا اكثر وحدة مدللة عند بابا من خوتي ڨاع خاطر انا الصغيرة تاعو عندي 7خاوتي ذكورة و4 بنات بابا متزوج من ثلاثة نسا وامي هي الزوجة الثالثة وعندها غير انا وخاوتي لخرين ولاد الزوجة اللولى والثانية وقاع ساكنين مع بعض وكل وحدة ايطاج تاعها اللولى ساكنة التحت والثانية فلي طاج الثاني وماما فلي ليطاج الثالث وخاوتي كاين لي ساكنين معانا كاين لي خارجين بديارهم وماما هي اكثر وحدة يحبها بابا من نساه كعاد هي الصغيرة وحنينة وعاقلة وتتعرف تتعامل معاه ورغم هذا الشي عادل معاهم مستحيل يفضل وحدة على وحدة كل واحدة يعطيها حقها ولانو عادل بيناتهم قدر يتحكم فيهم ويسيطر عليهم وانعدام المشاكل بيناتهم ومتفاهمين وكل وحدة لاتية بدارها وولادها وحتى هما نعيطلهم ماما يحبوني ونحبهم رحت قعدت معاه _قاتلك يماك بلي جايين يخطبوك درتلو براسي ايه ،واش رايك ،مانيش قابلة _علاه بابا ،راه متزوج كيفاه _وامبعد ماشي عيب ولا حرام هاني انا متزوج بثلاثة وعايشين لباس علينا ،بصح انا مانيش حابة نروح على ضرة _شوفي رحيل انتي اعز وحدة من اولادي ڨاع وانا ماراحش نرميك لهلاك كون ماشفتش بلاصة مليحة وراجل صالح ومكتوب مليح مراحش نقبل والحمد الله ماظلمت حتى وحدة من خواتتك كانو ڨاع رافضين وضك الحمدالله عايشين لباس عليهم وانتي ماحقكش ترفضي بلا سبب ،راني قتلك مانحبش الضرة واصلا مرتو مراحش تقبل _ماتخاقيش مرتو قابلة وهي لي حابة تزوجو وهي لي راح تجي تخطبك واذا كتب ربي انتي راح تسكني الفوق وهي التحت بصح كوزينة وحدة سكت _رحيل واحد مايعرف مصلحتك قدي يجي نهار وتدعيلي على هذا الزواج ومدام الزواج حلال ماعندك حتى سبة لرفض وانا عطيت كلمة لرجال غير غدوا يجو يديرولك الخاتم نقراو المعروف ورا رمضان تدخلي نشالله سكت اصلا ماعندي مانقول مدام بابا عطا كلمة نموت قدامو ومايرجعش في كلامو بابا سلافي ومتعصب ومتشدد كي يقول حاجة ممنوع واحد يناقشو فيها اصلا مانقدروش ناقشوه لانو عصبي هو عند عقلية خاصة يمشي بيها سيرتو على المراة عندو عقلية المراة ماعندها غير دار راجلها خواتاتي ڨاع زوجهم بنات 16 سنة غير انا لي خلاني نكمل قرايتي ودخلت مدرسة عليا اول مرة يكسر هذ القاعدة ماعرف كي ولينا في وقت الطفلة تقرا عادي ولاني مدللة نهار ديت الباك بمعدل مليح دارلي عشا وهو لي سجلني وكان ديما يديني صباح وعشية يرجعني وشرالي تليفون بصح ممنوع نزل هذوك التطبيقات حتى اللباس خواتاتي ووماما ونسا بابا ڨاع ملبسهم الجلباب والنقاب انا الوحيدة لي مدرتوش المهم نلبس المستور والعريض ومانلبسش الالوان غير كملت قرايتي ماقبلش الخدمة وحكمت دار وجاوني بزاف خطابة ومنهم ساعد هذا جارنا حبي الاول حبيتو ملي كان يقرا معايا فليسي كنا نحبو بعضانا عن بعد ومرات نحكو فالتليفون خطبني مرات عديدة وبابا رفض رفض قاطع ماعجبوش نهائيا ومايطيقوش هذيك الليلة بعثتلو مساج بلي جايين بخطبوني وبابا قبل عاود اهدر معاه وصح لغدوا جاب باباه وجا قالهم الطفلة صاي مديتها شوفو جيهة اخرى بقا باباه يحاول فيه لكن رفض كان عندي امل يقبل بصح كي راحو خرجو تاكدت بلي صاي رحت لماما نبكي روحي اهدري معاه علاه يدير فيا هكذا راحت هدرت معاه _بصحك انتي هذه انتي لي تقولي هكذا نخلي الراجل لي ينوض يصلي الفجر فالجامع ونمدها لهذا المستهتر محفف تحفيفة ليهود والسروال الطايح والرقاد للعصر هذا راجل هذا ويدير دار ووليدات ونأمن عليه بنتي هذا الشي ڨاع علبالي بيه بصح تعميت بحبو كنت حابة غير نديه كاي وحدة تحلم تكون مع حبيبها مكان عندي حل غير نروح نهدر مع خويا الكبير مالغري كنت متاكدة رايو من راي بابا اصلا بابا وخاوتي وعمومي وولادهم قاع عجينة وحدة عندهم تعدد الزواج حاجة اساسية مكانش واحد فيهم ماتزوجش على مرتو ڨاع راهم بزوج وثلاثة نسا اخر همهم المراة يبدلو فالنسا كيما يحبو مهم يوفرولها طلاباتها وواش تحتاج وممنوع ترفض راجلها يتزوج عليها لي راح جي عروس لفامليتنا لازم تكون متاكدة بلي يجي نهار ويتزوج عليها راجلها ولي عجبها الحال تقعد لي ماعجبهاش الحال تروح اخر همهم رجال فامليتنا ڨاع تاع نسا ومايشبعوش نسا وكعاد يدهم مليانة النسا يبدلو فيهم كالتقشار صح المرأة عندنا تلقى الرفاهية بصح باه يكون راجلها ليها وحدها تنحيها من راسها كاين لي قبلت ورضات بهذا الشي وكاين لي ماقبلتش و طلقت .
جا نهار الخطبة لبست قفطان سامبل وسرحت شعري مكيجت سامبل بقيت نشوف مع روحي انا موصفاتي سمرة ورقيقة طولي متوسط شعري قصير يوصل لكتافي عينيا عسلي وهما اجمل حاجة فيا عندي عيون الريم لي يشوفهم يبقا يسبح سمعت صوتهم بلي جاو طليت على تاقة شفت زوج طوموبيلات كحل هبطو 3 نسا عرفت العجوز وختو ووحدة دايرة نقاب والباقي رجال شفتو هو لابس قميص بيض ديميمونش وهاز سبحة في يدو في حياتي ڨاع واقيلا شفتو شي 5 مرات ولا 6 غير من بعيد في كاش مناسبات لانو حنا نمشو عندهم غير فالمناسبات صح فاميلتنا بصح من بعيد اول مرة شفتو نهار عرسو من شي 7سنين حضرت عرسهم اما هو بلاك مايعرفنيش ڨاع قالو عليه حتى هو سلافي بصح ماشكيتش ولا كعاد مايلبسش كيف هذوك السلافية لي يلبسو قميص قصير وتحتو سروال ومربي لحية طويلة هو لالا يلبس عادي كيما ڨاع الشباب نص ساعة جات مرت بابا هيا رواحي حابين يشوفوك خرجت انا وياها مخنوقة وخايفة ومانيش فرحانة ڨاع دخلت شفت يماه كبرت على اخر مرة شفتها فيها مسمياتو ختو زهرة ومسمياتو وحدة لابسة جلباب ودايرة نقاب منحياتو على وجها ودايرة ليڨوات ودايرة نواظر تاع شوفة عرفتها فريدة مرتو بصح سبحان ربي لي خلقها وصورها البيوضة ثلج والعينين كحل وكبار والفم خاتم واشبيه هذا تزوج عليها واش مالقاش في هذه حتى يعاود عليها الزواج زين ودين باينة انسانة متدينة من لباسها شفيت عليها نهار حضرت عرسها دارت الخمار ماعراتش على شعرها سلمت على يماه وزهرة وصلت عندها ناضت عندي سلمت عليا واشراكي لباس قتلها لباس جيت نرجع لبلاصتي حكمتني العجوز رواحي اقعدي هنا معايا قعدت معاها بقيت مهبطة راسي وهي تصلي على النبي الله يبارك وقتاش كبرتي هكذا عندو الحق باباك يحجبك علينا ويحرمك ماجيش لينا كنت نشفى عليك كنتي صغيرة شابة وضك زدتي كبرتي وحليتي بزاف نطقت زهرة قتلك بلي شابة شفتها العام لي فات في جنازة عمها بقاو يهدرو وانا عيني على مرتو غير ساكتة ومرات تضحك مافهمتش هذه علاه تزوج عليها انا مراة وكي شفتها حرت في جمالها بصح كي قالت يماه مزال مارزقوش ربي بلولاد فهمت عاود تزوج عليها جال لولاد فاتت الوقت دارولي الخاتم قراو المعروف وتفاهمنا بعد العيد بسمانة العرس
