الجزء 3
نار الهوى
بقلم هوس ريجا
فاتت شهر وشهرين نفس الروتين لا جديد في حياتنا ماكاين غير البرود بيناتنا يجي يدي حقو كي نرقد يروح عندها هي وهذا الامر عندي عادي جدا بالعكس نحب يروح عندها مانطيقوش ڨاع ونتقزز منو
في يوم درت العشا وهي مكانش طلعت الفوق وقعدت حتى سمعتو يعيط عليا خرجت عندو رواحي حطيلي نتعشا هبطت عرفتها هي مكانش سربيتلو وبرك وجيت خارجة وين اقعدي تاكلي ،كليت العشية سكت وانا طلعت الفوق حكمت بلاصتي صليت صلاتي برك ورقدت علبالي اليوم دالتها ضك يروح يجيبها هو مايقبلش نباتو برا الدار كي انا كي هي ماعرفتش انا لاه مايقبلش نبات رحت شحال من مرة في هذ الشهرين لدارنا يديني الصباح العشية يرجع يديني مايقبلش نبات هي على الاقل يحبها ومايقدرش بلا بيها وانا علاه حكمني الجوع هبطت التحت سمعت صوتو من الصالو يهدر عمري خلي نجي نديك تعرفيني مانقدرش نرقد بلا بيك ..معليش كون ماشي يماك مريضة والله ما نخليك تباتي عرفتها راح تبات هو ماحبش فت الكوزينة كليت وطلعت الفوق رقدت فطنت على حاجة ثقيلة راقدة فوقي لقيتو هو بقيت جامدة حتى خلص موالف ديما يهبط هذه المرة بقا راقد ورايا دورت وجهي تقززت منو ساعات يوسوسني الشيطان نوض نخنقو فجاة تفركت الدوا ياخاه كيفاه نسيتها بقيت نستنا ضك يهبط ضك يهبط فاتو قريب ساعتين درت ورايا لقيتو راقد بالنوم اول مرة يرقد عندي وليت نضت رحت الكوافاز هزيت البلاكة وخرجت لدوش كليت حبة وخبيت لبلاكة وخرجت لقيتو يهدر معاها فالتليفون وي عمري ..ايه راني راقد ..نجي نديك ضك ..اخر مرة فريدة_صحا باي كوبا تليفون وناض قعد لقاني واقفة على الباب وين كنتي انتي ،كنت فالتوالات برك ورحت حكمت بلاصتي هو ناض خرج وانا رجعت رقدت لغدوا الصباح مافطنتش بكري حتى ل10 هبطت مكان حتى واحد درت الغدا خليتو وطلعت الفوق اذن الظهر صليت سمعت الحس التحت هبطت لقيتهم جاو دخلت الكوزينة وجدت الطابلة وقعدت نستنا فيهم حتى دخلو لاحو عليا السلام رجعتلهم تغدينا هما خرجو وانا غسلت وطلعت ماهبطتش للعصر لقيتها فالكوزينة دير فالحليب قعدت ثم دارت عندي رحيل مزال مابان عليك والو ،واشنو مافهمتش _راني نهدر على الحمل ،لا ما بان والو _غدوا ندوك لطبيبة تشوفك نورمالمو تهزي ماطوليش ،وانت واش دخلك مافهمتش _حابة نشوف ولاد يحيى في اقرب وقت _حابة تشوفي ولادو جيبيهملو انتي ماعندو مادخلك فيا كي قتلها هكا عينيها تغرغرو لدرجة خرجت ديراكت من الكوزينة حتى انا طلعت الفوق ماعرفتش لاه هدرت معاها هكذا انبني ضميري وليت هبطت رحت لشمبرتها طبطبت الباب ودخلت لقيتها قاعدة على السرير وتبكي بقيت نشوف معاها ماعرفتش واش ندير رحت قعدت معاها سمحيلي والله ماقصدي نجرحك ماعلباليش واش بيا هذ اليامات مانيش مليحة وفرغت غشي فيك بقات ساكتة نضت وقفت بستها على راسها سمحيلي ماتزعفيش مني ديريني ختك صغيرة وغلطت معاك دارتلي براسها وسكتت غير خرجت لقيتو واقف على الباب ويشوف معايا هبطت راسي وفت عليه طلعت الفوق لشمبرتي قعدت على السرير لقيتو دخل عليا وقف فوق راسي ماتزيديش تغلطي مع فريدة وتجرحيها وتكسري بخاطرها شفت معاه وانا شكون يخمم عليا وعلى خاطري _انتي وهي ماشي كيفكيف ضحكت باستهزاء عندك الحق واش جاب لجاب _رحيل فريدة انسانة حساسة بزاف كلمة وحدة تكسريها انتبهي لتصرفاتك معاها كلمة وحدة منك تحطميها وفريدة معدنها ذهب صافي _ماتخافش عليها نعرف مليح كسر الخواطر والحمد الله ضميري حي ومستعدة ندير كلش باه نصلح خاطرها بصح ماشي انت لي تجي تهدرلي على كسر الخواطر اخر واحد يهدر على هذا الشي هو انت وهذا الموضوع ماتزيديش تنبهني عليه لانو انا اكثر وحدة كسرو خاطرها بقا يشوف معايا وراح خرج وليت نبكي يخمم غير فيها وانا واشنو انا ماعنديش خاطر كل يوم يزيد حقدي عليه
جيت فالمشبرة وقاعدة ماهبطتش ڨاع لوقت العشا طبطب الباب ادخل لقيتها فريدة هيا رواحي تتعشاي ،لا شبعانة _كاش ماهدر معاك يحيى وزعفتي ،لا ماهدر معايا والو_دارتلي براسها جات خارجة فريدة دارت عندي مزلتي زعفانة مني دارتلي براسها لالا ،سمحيلي ماشي غير انتي لي مكسور خاطرك انا من نهار قررتو تخطبوني وانا مكسور خاطري _ماكنتيش قابلة درتلها براسي ايه _جبروك يعني ،كشغول _ولاه رضيتي ملا ،علاه عندي كلام بعد بابا _انا ماعندي ما نقولك عسى ان تكرهو شيء وهو خير لكم ماتدري لعل هذا الزواج خير ليا وليك حتى انا صعيب عليا نزوج راجلي ونجيبلو مراة بصح الله غالب الظروف فرضت عليا هذا الشي لكن عندي امل هذا زواج راح يكون خير لينا ،ماشكيتش مراحش نتنهناو لا انا لا انتي في اخر المطاف حنا ضراير _احسني الظن بالله وامشي بالنية تربحي بقيت نشوف معاها راحت خرجت ساعات نتعجب منها لحد الان ما شفت منها حتى حاجة ماشي مليحة اخلاق واداب مافهمتش واش حكايتها كشغول مانيش ضرتها .
لغدوا نهار كامل وانا في شمرتي حكمني اكتئاب جيت فالفراش وراقدة واحد ما طلع عندي لا هو لا هي اليوم راح يجي عندي نضت رحت لدوش جبت الدوا كليتو ورجعتو فالقجر وجيت حكمت بلاصتي حتى جا بدون اي مقدمات دا حقو وناض خرج حتى سمعتو يعيط رحيييل نضت قعدت لقيتو دخل عليا ويديه وراه جا فوق راسي علاه مزال ماهزتيش بالحمل انصدمت كي جبدلي هذا الموضوع شفت معاه وانا علاه في يد ربي _في يد ربي ولا تاكلي فالدوا شفت معاه بصدمة مالقيت مانقول_جاوبي لاه سكتي قلت خلي ننكر بلاك راه يستدرج فيا باه نعترف لا مانيش ناكل انا اصلا حابة نزرب نهز باه ماتزيديش توشيني رما البلاكة في وجهي واشنو هذه ملا هزيتها بقيت نشوف معاها وساكتة _علاه ماكيش طايقتني شفت معاه من تعاملك معايا _علاه كيفاه راني نعامل فيك ،راك تعاملني كالحيوانة _رحيل اخطينا من هذ الافلام راكي تاذي في نفسك علبالك هذا الدوا يدير عقم كي تاكليه قبل ما تضناي _وانا مانيش حابة نضني ونجيب ولاد منك _ااا والله ،ايه نكذب عليك مانيش حابة نجيب ولاد منك _ومدام ماكيش حابة تجيبي ولاد مني لاه قبلتي عليا نهار لول ،ماقبلتش وماشي برضايتي ولحد الان مانيش راضية بقا يشوف معايا مصدوم جبروك عليا دورت وجهي _اك ملا نوضي لمي قشك مانيش انا لي نجبر مراة تعيش معايا وهي ماهيش طايقتني وانا كي تزوجتك حاب ندير دار ووليدات ماشي باه نتفرج فيك حابة تعيشي حياتك وتقعدي براسك روحي لدار باباك ماشي هنا عندي ،ايه راني رايحة وكون تطلقني تكون درت فيا خير كبير شاف معايا بصدمة هذا ڨاع في قلبك عليا ،وكثر ماتقدرش تتخيل شحال نكرهك لدرجة مانطيقش نسمع صوتك واسمك ونضت لبست لميت حوايجي هزيت صاكي هو يشوف معايا مصدوم هيا راح تديني ولا تبقى تتفرج فيا _ماتهدريش معايا بهذا الاسلوب ماتخلنيش نعاملك بغير معاملة ،علاه كاينة معاملة اسوء من هذه شاف معايا متعجب وخرج هزيت حوايجي وهبطت لقيت فريدة الخير برك واش كاين وين رايحين ماهدرتش معاها وهو فات ديراكت حل الباب خرج وخرجت وراه ركبت ملور وصلنا لدار هبطنا طلعنا الفوق طبطب الباب حل علينا بابا شاف معانا الخير برك جيتو في هذا الوقت عمي انا نهار لول كي جيت قصدتك في بنتك ماشي باه نديرها كادر ونتفرج فيها قصدتك باه ندير معاها دار ووليدات بصح الظاهرة بنتك ماعينهاش دير دار ووليدات مزلت حابة تعيش براسها _لاه واش كاين ادخلو خلينا نتفاهمو _ماعندنا ما نتفاهمو هاهي بنتك قدامك هي تفهمك السلام عليكم وراح هبط .
دخلت لدار سقساني بابا واش كاين بقيت ساكتة ناض وقف قال لماما اهدري مع بنتك ورواحي احكيلي راح خرج _اهدري واش كاين واش درتي حتى جابك في هذا الوقت حكيتلها كلش من ليلة لولى ورواح بصح كالعادة اصبري واحملي واكسبيه ليك ومنا ومنا دخل بابا هيا احكيلي واش درتي شفت معاه بابا انا هذا الراجل مانزيدش نرجع عندو _علاه ،مايعاملنيش مليح _كيفاه مايعاملكيش مليح سكت حشمت نقولو يجي يدي حقو ويهبط عند مرتو _اهدري كيفاه مايعاملكش مليح يضربك درتلو براسي لالا _داك الجوع عندو درتلو براسي لالا _بخيل معاك طلبتي حاجة منو وماحبش يجيبهالك درتلو براسي لالا _مرضتي وماداوكش درتلو براسي لالا _حرمك علينا زدت درتلو براسي لالا _مرتو ما تعاملكش مليح غلطت معاك ،لا خاطيتني_هاه وكيفاه مايعاملكش مليح سكت _هو لي جابك وحدو ،ايه هو قالي لمي قشك وروحي لدار باباك _شوفي انا كون وحدة من بناتي يحاوزها راجلها من الدار والله ماتزيد تفوت عتبة دارو حتى يجي يحاولني ويطلب سماح ونظن تعرفي هذا الشي ياما صراو مشاكل مع خياتك وجاو رجالتهم ڨاع حاولوني وطلبو السماح باه قبلت نرجعهم بصح اذا عادو ماغلطوش وانتي اذا ماغلطتيش معاه والله مانخليك ترجعي عندو حتى يجي يطلب سماح وتقبلي تسمحيلو باه نخليك ترجعي بصح اذا عدتي انتي الغالطة انا لي نرجعك عندو ضك قولي واش درتي حتى جابك عندي واهدري الصح خاطر حتى هو راح نسقسيه ونلقاك انتي الغالطة انا نرجعك عندو براسي بقيت ساكتة _اهدري شكون الغالط هو ولا انتي ،ماعلباليش _كيفاه ماعلبالكش وشكون علبالو _بابا راني نقولك هو مايعاملنيش مليح كاين امور مانقدرش نهدرهم قدامك وهو داني غير باه نجيبلو لولاد ليه ولمرتو انا مراهش معبرني نهائيا ولا شايفني ويني وانا كي شفتو يدير هكذا كليت دوا مانيش حابة نجيب لولاد معاه _وانتي كي ماتجبيش لولاد ودير وليدات واش راح ديري ملا لاه تزوجتي ملا ،بابا انت مراكش فاهمني علواه نهدر _رحيل هدرة وحدة تقعدي تباتي هنا غدوا العشية نديك لدارك ماعنديش بنات يصدو ولا يطلقو انا مازوجتكش باه ترجعي عندي حتى انتي كيف ڨاع ناس راح تعاني وتتميزي وتفوتي مشاكل وتنجي في زواجك راح خرج وليت نبكي مانيش حابة نرجع عندو كرهاتو كره العمى كون نصيب نطلقو على الصباح بصح واش ندير ماعنديش كلمة بعد كلمة بابا .
لغدوا العصر داني بابا وصلنا لدار لقيت طوموبيلتو مقارية برا هبطنا طبطب الباب حل علينا سلم على بابا ولاح عليا السلام مرجعتلوش دخلنا لصالو قعدنا دورت وجهي الدمعة في عيني حسيت روحي مذلولة كرجعني بابا كشغول رجعت وحدي بقا بابا يهدر معاه هاهي مرتك جبتهالك بيدي بنتي غلطت معاك وقبل ماتطلب السماح انا نطلبو بنتي غلطت في حقك ماحقهاش دير هذاك الشي بلا علمك وضك تنوض تسلملك على راسك و تطلب منك سماح وماصرا والو نشالله دار عندي نوضي شفت معاه بابا تخنزر فيا قالو خليها برك _لا مكانش هذه خليها هي غلطت وهي تطلب السماح دارلي براسو هيا شفت معاه سمحلي قلتهالو بالتزنقير عيط عليا رحييييل سڨمي روحك واحترمي لي قاعد معاك بقيت نشوف _نوضي سلمي على راسو واطلبي سلام منو كالناس نضت وقفت سلمتلو على راسو سمحلي جيت نروح اقعدي ثم حتى يرضى عليك شاف معايا معليش ماصرا والو جيت ماشية حبسني بابا دار عندو انا عندي 4نساب وانت الخامس نسابي عندي اعز من ولادي خاطر هما حاميين عرضي وانا بناتي كي يغلطو انا اول من يطلب السماح خاطر انا المسؤول اللول عليهم وانا مانيش من هذوك الاباء لي بناتهم يغلطو وهما يغطو عليهم ويحلولهم فالعين بنتي غلطت مع راجلها نجيبها تبوس راسو وتطلب منو سماح بصح في نفس الوقت مانقبلش لي يغلط معاهم انا مانيش عارف واش صرا معاكم بالتفصيل ومانقدرش ندخل نظن امور خصوصية بيناتكم عيب مني ندخل فيها بصح مكانش حاجة بلا سبب هي غلطت غلطة كبيرة بصح متاكد ماقعدتش وغلطت من راسها نشالله تكون فاهمني بنتي تغلط معاك عيطلي انا نريڨهالك ونجيبهالك براسي ونطلب السماح في بلاصتها بصح في نفس الوقت لي يغلط معاها نخليه يحلم يشوف شعرة منها المهم هاهي مرتك وسمحلنا مرة اخرى ناض وقف بقا يحاول فيه باه يبقا يتعشا ماحبش خرجنا للباب دار عندي همسلي وانتي ردي بالك تغلطي خاطر مراحش نرحمك خليهم هما يغلطو معاك وشوفي اذا ماجبتلكش حقك دوبل درتلو براسي ايه باسني على راسي حل الباب وخرج غلقو دار عندي شاف معايا رحت طلعت خليتو غير نحيت الحجاب دخلت فريدة بصحك انتي تاكلي لابيلول قبل ماتضناي ،ايه بصحي _علبالك يدير العقم ،شوفي ملخر مانكذبش ڨاع عليك انا مانيش حابة نضني مع راجلك ،_علاه بصح _هكذا مانيش حابة وبكل صراحة راجلك نكرهو ومانطيقوش وكون تحرميه عليا وماتخليهش يطلع عندي تكوني درت فيا خير كبير ونصيحة غير روحي عاودي زوجيه خاطر انا لولاد والله ماتشوفوهم من عندي راح نبقا هكذا حتى يكره ويطلقني بقات تشوف معايا الله يهديك والله دخل هو دارلها براسي اخرجي راحت خرجت جا عندي مزلتي برك ،ايه مزالت تحوسني نكذب عليك سبحان الله مانحبكش نكرهك ومانطيقكش _وعلاه رجعتي ملا ،مارجعتش هما رجعوني بالسيف وانا كون جيت في يدي نطلقك على الصباح بصح الله غالب انا امرأة لا حول ولا قوة لي مانقدر ندير والو ماشي كيما انت راجل كون طلقني واحد مايقدر يحاسبك ولا يهدر معاك _شوفي يابنت الناس حتى انا مانيش ميت عليك ولي جاني فالطريق هو باباك والله مايستاهل نطلق بنتو ماعندهاش 3اشهر زواج خافي على سمعة باباك شوية _ملا لهذاك الوقت كي يفوت وقت طويل ماتوصلنيش اعتبرني كشغول مكانش فالدار بقا يشوف معايا _وجهك صحيح انتي ،صحيح مع الصحيح _ماتهدريش معايا بهذا الاسلوب والله ،واش راح دير راح تضربني اذا تحسبني نخاف من الضرب تكون غالط _لا مانهزش يدي على مراة بصح اذا عدتي تستاهلي نضربك نورمال ،حتى انا مراحش نستغرب منك هذا الشي وحاب تضرب اضرب مانيش خايفة بقا يشوف معايا وخرج جيت فالشمبرة وقاعدة شي ساعتين لقيتو دخل عليا نوضي ديري لعشا نضت خرجت دخلت الكوزينة عرفتها هي مكانش راحت درت العشا حطيتو وخرجت طلعت الفوق سمعتو يعيط عليا سم لهذا الصوت هبطت انعم ،ارواحي حطيلي نتعشا حتى نصلي قريب قتلو صلاتك باطلة دخلت حطيتلو وجيت خارجة لقيتو دخل وين رايحة اقعدي ،راح نصلي مزال ماصليت وطلعت خليتو جيت فالشمبرة وقاعدة حتى لقيتو دخل عليا جا نحا حوايجو وحكم بلاصتو وتكسل على سرير نضت وييين ،راح نغسل وخرجت هذا واش جابو عندي هبطت غسلت وطلعت لقيتو يستنا فيا هيا رواحي ،واشنو _واش لي واشنو هيا رواحي خليني ،واش كاين _رحيل استري على روحك وخلي الليلة تفوت على خير سكت _هيا رواحي ،دقيقة نبدل ونجي رحت لخزانة جبدت روبة طويلة وهزيت صاكي خاطر فيه بلاكة تاع دوا كيما رماها في وجهي لحتها فالصاك لقيتو لاتي مع تليفون هزيتهم وخرجت لدوش بدلت جبدت البلاكة تحل باب زربت لحتها في صدري ودرت عندو بقا يشوف معايا واش مخبية في صدرك ،واشنو _اجبدي واش خييتي في صدرك ،واش راح نخبي والو _علبالي مخبية دوا هاتيه هنا ،واش من دوا _رحيل مكلاه تعييني هاتيه هنا ،ماعنديش _تجبديه وحدك ولا نجبدو انا ،قتلك ماعنديش راك تتخايل _راني نتخايل قلتيلي حكمني من ذراعي لاح يدو في صدري جبدو وهذا واشنو ،ماتسالنيش راح ناكل ضربو في وجهي حط يدو على رقبتي ومشاني ضربت فالحيط وشنو انتي وشنو واش صحانية الوجه هذه لي عندك بصح شوفي هنا مانيش انا لي تصحي وجهك معاه خاطر راني نفلعصهولك بيدي ريڨلي روحك واستري على روحك وعلى باباك خير ما تعياي نادمة ماعولت يجبد يدو على رقتبي تخنقت طبعتو بعددددد عليااااا ماشي يالسيف مانيش حابة نجيب منك ولاد تسالني مانيش جارية عندك باه تجي تفرغ شهوتك فيا ونجيبلك طفل باه تفرح بيه مرتك مانيش انا فهمت ودير كرامة لنفسك مانيش طيقاتك _شوفي تاع صح كرهت منك روحي عيطي لداركم يجو يدوك عليا نوض الصباح مانلقاكش هنا عندي ضرب الباب وخرج رحت لشمبرة هزيت التليفون عيطت لماما خبرتها _انتي حابة تقتلي باباك احكمي دارك وهني روحك ،وين نحكم داري وهو يحاوزني _شدي لسانك والله ويسمع باباك واش قاعدة ديري غير يهبط عندك ينحيك ريڨلي روحك واشدي دارك واستري على روحك راكي انتي لي ماكيش حابة تستري على روحك تبقاي هكذا تخربي دارك كوبيت عليها كالعادة نفس الهدرة تتعاود كيفاه ندير ضك قالي الصباح مانلقاكش هنا يروح يلعب والله مانعيطلو مراهش حاب يشوفني في دارو يديني هو غطيت راسي ورقدت
نحس في واحد يحرك فيا بيدو فطنت درت على ظهري لقيتو واقف ويديه فالجيب واش راني نشوف فيك مزلتي هنا ،ايه هنا علاه _ماشي قلت نوض الصباح مانلقاكش هنا _ايه قلت ،ولاه مزلتي هنا _كنت نستنا فالصباح يطلع باه نروح _ايه راهو طلع واش تستناي نضت قعدت شفت الساعة راهي 8 _ازربي مانيش طايق شوفتك وراح خرج بقيت نشوف واش ندير ضك اذا بقيت هنا كرامتي تنهان كثر ماهي مُهانة وبابا مانقدرش نعيطلو علبالي يجي هنا ويهيني قدامو احسن شي نروح وحدي لدار علبالي بابا يقتلني على هذ الجاست بصح معليش يهيني بابا وفي دارنا وحدنا خير مايجي هنا ويهيني قدامو سورتو كعدت انا الغالطة نضت غسلت وجهي لبست حجابي درت خماري وهزيت صاكي حتى النقاب والله مانديرو هو فرضو عليا وانا مانيش قابلة هبطت التحت غير جيت فايتة للباب شفتو قاعد فالصالو جيت نحل الباب لقيتو حاكمني من ذراعي رجعني لور وين رايحة ،لدارنا وين _وباباك وينو ،رايحة وحدي حل عينيه فيا رايحة وحدك هكذا بكل بساطة وخارجة بلا نقاب ،وانت واشبيك مافهمتش ماشي قلتي مانيش حابة نشوفك فالدار هاني رايحة والنقاب انت فرضتو عليا وانا مانيش حاباتو ونظن من اليوم مايهمكش فيا نمشي حتى عريانة ياك راح نطلقو طلع راسو الفوق طرطق رقبتو استغفر ربي دار يديه وراه وشاف معايا عندك دقيقة في يدك وماطيريش منا قدامي ونلقاك فالكوزينة ديريلي الفطور يا قسما برب محمد ماتخرجي مني غير فلومبيلونص شفت معاه دخل فيا هيااااااا هربت من قدامو للكوزينة حطيت الصاك وقعدت نشوف واشبيا هربت اواه نهني روحي بابا حذرني البارح كون نزيد نغلط مايرحمني وليت درتلو الفطور حطيتو على طابلة لقيتو دخل جيت خارجة سبقلي شفت معاه _رحيل اخر مرة نحذرك استري على روحك وعلى باباك انا راني نساعف فيك وماعنديش اسهل من الطلاق والله ماتظهريلي ڨاع لي جاني فالطريق هو باباك خمي فيه شوية ناس واش تقول عليه كي يسمعو بنتو طلقت في 3 اشهر باباك سمعتو نظيفة وطيبة وطول عمرو يمشي وراسو مرفوع ماجيش انتي تهبطيهولو ماكيش صغيرة وماتعرفيش صلاحك حتى نورولك عينيك تتمردي كون تمردتي نهار لول كي جيت خطبك ماشي ضك ملا حطي عقلك في راسك وبركاي من عقلية الذراري لي قدك راهم بزوج ولاد وثلاثة نورمالمو راكي جامعية ومخلصة قرايتك يعني ماكيش صغيرة ومراهقة باه تغيب عليك هذ الامور كلامو كان كيف الما البارد لي تكب عليا وفيقني من سباتي بصح افعالو معايا خلاتني نتصرف بهذه الطريقة خرجت ديراكت خليتو جيت فالشمبرة وقعدت حتى راح خرج ومارجعش نهار كامل لا هو لا فريدة
درت العشا حطيتو وطلعت الفوق حتى سمعتو يعيط عليا من تحت هبطت لقيتو قاعد فالكوزينة دخلت لحت سلام وقعدت نسربيلو صونا تليفونو كانت مرتو حطيتلو وخرجت سمعتو كي قالها نجي نديك طلعت الفوق علبالي مراحش يجي اليوم فت لدوش درت دوش وخرجت غير دخلت لشمبرة لقيتو منحيي حوايجو ومتكسل على سرير حتى شهقت_واشبيك ،والو تفجأت برك كي شفتك هنا _وعلاه حتى تتفاجئي ،ماحسبتكش راح جي هنا سكت بقا يشوف معايا كنت لابسة روبة طويلة ديميمونش شعري كان مبلول ومبلل روبة نحيت الفوطة ورحت لكوفاز قعدت نشف فيه هزيت سشوار شيحتو غير لحت عيني لقيتو يراقب فيا نضت طفيت الضو غلقت الباب وحكمت بلاصتي رقدت على ظهري هو بقا كيما راه بقيت نشوف مع التيلي حتى لقيتو جبد علينا الغطا وقدم عندي ناض تكا على ذراعو قريب ولا فوقي غمضت عينيا نكره هذا المنظر ونتقزز كي يكون هكذا معايا وويفرغ في شهوتو نحس روحي حيوان حتى الحيوان افضل مني هما على الاقل يهيؤو نفسهم لهذه العملية اما انا بدون مقدمات يفرغ شهوتو وينوض ماحسيت غير بشفتو على شفايفي تخطفت وحليت عينيا بصح ماتحركش بقيت كيما راني كان اول واحد يبوسني وكانت اول بوسة بيناتنا بوستو كان هادئة كنت متوقعة نكرهو بصح حبيت هذا الشعور ممكن لانو اول مرة نعيشو وجامي توقعتها منو كان ديما يعاملني كالحيوان يفرغ شهوتو وصاي بقيت جامدة وهو يتفنن في بوستو بهدوء ورزانة هبط لرقبتي... حتى كمل معايا
جاتني هذه المرة غير المرات لي فاتو بقا راقد معايا وانا نضت لبست وخرجت لدوش حشمت من استسلامي ليه جامي استسلمتلو تقززي منو دييما كان واضح على وجهي و بلي كنت مانحبش هذا الشي مي اليوم لالا اكيد عرف بلي استسلمتلو رجعت لشمبرة لقيتو راقد حكمت بلاصتي غطيت روحي تفكرت بوستو شعور هايل ماقدرتش نوصفو درت ورايا لقيتو راقد بالنوم كانت اول مرة يرقد عندي لصباح
فطنت ثاني يوم لقيتو راح هبطت التحت لقيت فريدة فالكوزينة صبحت عليها وقعدت نفطر ماعرف علاه عييت نشوف فيه وجها كي تفكرت البارح كيشغول خنتها ماعلباليش لاه جاتني مقلقة ماعمرتش راسي درت الغدا وطلعت صليت الظهر وهبطت لقيتو فتح الباب لاح عليا السلام رجعتلو وهربت للكوزينة حشمت منهم في زوج تالمو من نهار لول عاملني بذيك المعاملة حسيت روحي دخيلة عليهم ماحسيتش ڨاع روحي بلي انا مرتو كيفي كيفها واش تسال هي نسال انا قعدت شوية جا هو قعد بصح فريدة مكانش ويبان مقلق كلا شوية وناض خرج قعدت ناكل دخلت فريدة يحيى تغدا هنا ولا خرج ،ايه تغدا وخرج درتلي براسها جات ماشية رواحي تتغداي _لا شبعانة وحابة نرقد البارح بت سهرانة مع يما ،واشبيها يماك _مريضة ،الله يشافيها _امين وراحت انا غسلت وطلعت الفوق ماهبطتش للعشية راح ندير لعشا سمعت صوتهم من الشمبرة وهي تهدر بصوت فيه شوية حدية _خلاص يحي خلاص روح برك ...ماقدرتش نحمل راني انانيية_مانيش نقولك انانية بصح فهميني انا تعبت قتلك ملول مانيش حاب لولاد بقيتي تحتمي عليا حتى دخلتيني في حاجة ماقدرتلهاش_ علاه حسبتها ساهلة عليا نزوجك ونجيبلك مراة بصح على جالك ضحيت _علاه تضحي شكون قالك ضحي مليون مرة قتلك مانيش حاب ولاد اذا ماعطاهمليش ربي منك ماعندي ماندير بيهم عجباتك ضك الحالة هكذا انتي راكي تبكي في جهة وهذيك في جهة واحد فينا مراهو مرتاح ظلمتك وظلمتها وظلمت نفسي انتي لي وصلتيني هنا انتي بقيتي مورايا اتزوج اتزوج هاه شوفي رايك _هذا حق تضحيتي _فريدة ماقتلكش ضحي اك واشفاي هذه المراة راح تخليني نخسرك _ااا والله سما شكي في بلاصتو _ماشي هكذا بصح ملي جبتها وانا حاسك بعيدة عليا وليتي ماشي فريدة القديمة _انا هي ماتبدلتش ڨاع _لا تبدلتي عليا بزاف ابسط حاجة وليتي مشكاكة _حاجة طبيعية هذه من غيرتي عليك واش تحوسني ندير وراجلي يرقد مع مراة غيري اي مراة يصرا معاها نفس الشي _علاه وصلتينا هنا علاه قتلك مانيش حاب لولاد مانيش حاب ضك هذه معيشة هذه حصلتيني وخليتيني _يحيى علاه تلوم فيا والله وجات فيا غير نجازف ونجيبلك طفل انت نحمد عليك ربي ليل ونهار وتحوسني نحرمك من حقك حتى انت من حقك جيب ولاد راح تبقى هكذا صح راني نتوجع ضك بصح ماشي كيما من قبل ضك على الاقل درتي لي عليا وما يأنبنيش ضميري ومانتحاسبش على هذا الشي بصح نتمنى حاجة وحدة ماتكرهنيش انا وتحبها هي _كيفاه نكرهك وانتي روحي من هذ الدنيا جامي شفت وحدة تحب راجلها كيما هذه لدرجة قررت تزوجو حتى هو يموت عليها ساعات نحس روحي دخيلة عليهم انا واش دخلني على هذو علاه انا مانيش كيفهم ندي واحد يحبني ونحبو رماني بابا فالنار وخلاني نتحرق وحدي فيها .درت ديراكت طلعت ماعرفتش كيفاه يكون شعوري ماعلباليش شحال فات الوقت دخل عليا بدون كلام ولا مقدمات نحا التريكو وطلع عندي طلعلي الروبة طبعتو بعد عليا مانيش حيوانة عندك باه تدي حقك بهذا الطريقة ،البارح كي قلتي مانيش حيوانة ضغطت على نفسي بصح مانقدرش نمثل عليك زواجنا انا وياك على جال لولاد وبس ومانقدرش نحبك يابنت ناس انا نحب مرتي وبس مكلاه تطمعي في يوم من الايام بلي نحبك وتكوني في بلاصة مرتي وانا ماعندي مادخلني اذا جبروك عليا هذه مشكلتك بينك وبين داركم مالقيت غير دموعي حتى كمل وخرج حسيت روحي حيوانة وليت نبكي بصوتي ونضرب في وجهي تاذيت نفسيا مانيش حابة نعيش معيشة الحيوان كرهتو وكرهت روحي وكرهت كلش مالقيت كيفاه نفرغ قهري غير بالتكسار حتى عييت وقعدت في لرض مالقيت ماندير بابا مايقبلش نطلق ومانقدرش نعيش هذ المعيشة طبطب الباب دخلت هي بقات تشوف معايا ومع الشمبرة واش صرا هكذا نضت عندها نصيحة مني ليكم في زوج خليو الصلاة وماتزيدوش تركعوها خاطر ربي مايحبش لي مايخافش منو بقات تشوف معايا _اصلا انا الخاسرة الكبيرة في هذا الزواج ، انا انااااااا الخاسرة فيكم بصح حسبي الله ونعم الوكيل فيكم في زوج انتي حتمتيه يتزوج وهو ماحبش وهو شاف روحو مايقدرش يعدل وتزوجني بصح معليش كيما قهرتوني تنقهرو واذا انا بكيت الدمع بسباكم انتما تبكو الدم بسبابي _الدم بكيتو نهار نحاولي الرحم تاعي ،وانا واش ذنبي وااااش ذنبييييي في هذا الشي ياختي شفتي راجلك يموت عليك ومايقبل وحدة غيرك لاه تحتمي عليه جبتيلو بنت ناس وحطمتيها راكي مرتاحة انتي وياه وانا كل ليلة دموعي جراية كيفاه راح تتهناو وانا ملي جيت هنا وانا نبكي بسبابكم بصح والله ما نسمحلكم في دمعة من دمعاتي واذا تخافي ربي غير شوية وعندك ضمير قنعي راجلك يطلقني ويخليني نروح انا مانقدرش نطلب طلاق بابا ماعندوش مراة تتطلق بصح اذا طلقني هو مايقدرش يهدر _مانقدرش نخربلك دارك ،ياووو انتما حياتي كومبلي خربتوها جات غير في داري _حابة تطلقي روحي تفاهمي معاه هو انا خاطيني ربي يسهل عليك بصح ماتوكليش عليا ربي والله لي فيا يكفيني وقبل كلش هكذا مكتبة عند ربي حنا رانا غير سبة سكت وهي راحت خرجت بقيت قاعدة ونبكي حتى لقيتو ضرب الباب ودخل اعصار نضت وقفت انتي على من راكي توكلي في ربي كشغول جبرتك على هذا الشي انا واش دخلني اذا باباك كره منك ورماك عليا اه واش دخلني روحي حاسبي باباك ماتجيش تكسريلي راسي ونزيد نسمع توكلي في ربي على فريدة وتبكيها نمحيك شفت معاه بانكسار كلامو كسرني لدرجة ماقدرتش نوقف على رجليا طلقت روحي قعدت على سرير وهبطت راسي ماعلباليش شحال فات الوقت وانا على نفس الحال ماحسيتش حتى كيفاه خرج نحس في عروق قلبي يتمزقو لداخل ورعفت جيت نوض ماقدرتش نشليت حاولت حاولت ماقدرتش اول شخص جا في بالي هو بابا كان تليفون على السرير هزيتو عيطتلو غير ريبوندا عليا وليت نبكي بابا اجري عندي راني نشليت وماقدرتش نتحرك وقلبي راح يحبس هو مافهم والو كعاد نهدر ونبكي وعينيا تضببو فجاة راحلي البصر ورجع كلش ظلمة وليت نعيط على بابا بصوتي تهسترت هو يقولي اهداي اتكلماي راني جاي كوبا عليا بقيت غير نشوف من من وليت نعيط على فريدة عيطت عيطت مكان حتى رد نضت وقفت حسيت برجليا ثقال رحت نمشي حتى خرجت لدروج حكمت في الحديد تاع دروح حتى وصلت التحت الباب تاع برا مقابلني عيطت على فريدة بصح مكانش لا هو لا هي عرفتهم خرجو قعدت فالدروج مرة نبكي مرة نسكت وكلش ظلمة حتى سمعت الباب طبطب نضت وقفت طلعت يدي ورحت نمشي ديراكت للباب حليتو سمعت صوت بابا طحت قدام رجلو ونبكي بصوتي هو يقولي واشبيك واش هذا الدم لي على وجهك شوفي عندي وانا نعيط مانيش نشوف الظلمة _كيفاه ماكيش تشوفي شوفي عندي هنا حكملي وجهي ،مانيش نشوف مانيش نشووووف خلاني على الباب وفات يجري لدخل ورجع حطلي الخمار على راسي ونوضني خرجني ركبني لطوموبيل وديراكسيو لسبيطار دخلني وانا نعدد دخلوني لصالة نسمع غير في هدرتهم كي شافوني ندير هكذا دارولي برا حتى تكالميت نسمع فالطبيبة كي بقات تهدر معاه الشيخ بنتك طلعتها لوطونسيو وقريب صرالها جلطة دماغية راح تبقى هنا عندنا 24 ساعة حتى نتاكدو من حالتها ونخرجوها فطنت شحال من مرة ونعاود نرجع نرقد مارجعليش البصر ل 1 تاع الليل لقيت شحال من وحدة معايا فالصالة دايرين سيروم ووالاكسجين وراقدين كانت وحدة مساميتني نايضة قعدت نڨصر معاها حتى غفيت ورقد
سمعت صوت الطبيبة تهدر فطنت جات عندي الحمدالله على سلامتك ،الله يسلمك _واش صبحتي لباس ،لباس _الحمد حالتك لباس بصح لازم تكملي 24 سا وتخرجي ،معليش غير خرجت دخل عليا هو وبابا وماما نضت قعدت شفت معاه هنا قدام بابا طلقني وخليني نروح عيط عليا بابا رحييييل _واشنو رحيل علبالك البارح بقا يعاير فيا قالي بلي باباك كره منك ورماك عليا انا واش دخلني في داركم _اسكتي الهدرة ماشي هنا كي نروحو لدار ونهدرو سكت بقاو نص ساعة وخرجتهم طبيبة ممنوع زيارة كاين مرضى هنا راقدين راحو خرجو حتى جا وقت مخروجي دخلت عندي فريدة حمدتلي بالسلامة وجابتلي معاها العباية والنقاب درتهم وخرجت لقيتو هو وبابا كي شفت لوجهو وجه بابا عرفتها كاش ما صرا بيناتهم شافني بابا جا ديراكت عندي حط يدو على كتافي جا هو عمي مرتي راح ترجع لدارها _معليش خليها عندي خير وغير ترتاح يرحمها ربي وصلنا لدار توقعت بابا يسقسيني واش كاين بصح ماهدرش معايا نهائيا حتى الغدوة العشية جا هو ويعيطلي دخلت عندو _قبل ما نسمع من بنتي حابة نسمع منك انت الكبير والواعي خاطر بنتي ونعرفها تكبر الامور وتضخمها وتعقدها احكيلي واش صرا _مانقدرش نحكيلك امور خصوصية بصح بنتك راهي محسستني بلي راهي دايرة فيا مزية كلمة زوج طلقني ونكرهك ومانحبكش وراني مجبورة عليك وحتموني عليك وانا على وجهك راني ساكت راجل غيري والله مايقبل مرتو تهدر معاه بالطريقة هذه شاف معايا نوضي طلبي سماح منو شفت معاه بابا _نووووضي _خليها ماني حاب لا تطلب مني لا سماح لا والو _تطلب ورجلها فوق رقبتها نوضي تسلمي على راسو وتطلبي منو السماح نضت سلمتلو على راسو وقتلو سامحني ورحت خرجت قلبي راح يطرطق تلاقيت بماما اذا راجلي ذلني ومادارليش قيمة راه من بابا هو لي ذلني ليه بصح هذه اخر مرة نرضى بهذا الشي كون مانهجش من داري وماتلقاوليش طريق ملا راني حذرتكم ووصليها لبابا انا مانيش كيما خواتاتي انا رحيل _باباك يحوس على صلاحك انتي حابة تخربي دارك وتقعدي عليها وتشفي فينا العديان ،الدار لي نتعامل فيها كالحيوان ماعندي ماندير بيها هي والكوري كيفكيف لبست حوايجي وخرجت ديراكت ركبت فالطوموبيل حتى خرج وجا ركب شاف معايا وشعل طوموبيل مشا راح نفرفر مرات يوسوسني الشيطان نحل الباب ونرمي روحي وصلنا لدار هبطت جا حل الباب طلعت لداري وغلقت الباب ماني حاب نشوف حتى واحد طبطب الباب شحال من مرة بصح ماعلباليش شكون بقيت ندور فالدار وضاق خاطري من الشي لي صرا معايا هذه ثاني مرة نطلب السماح على والو فات وقت طوييييييل حليت الباب وطلعت لسطح حليت الباب سمعت صوتو وين درت عندو راح نخرج تخنقت _علاه حتى تخنقتي هو قالي هكذا وانا طاحت عليا هيستريا تاع ضحك بقا يشوف معايا وانا نضحك بلا سبب حتى نزلو دموعي _واشبيك هبلتي مرة تضحكي مرة تبكي ،تعرف وجع الروح انا روحي موجوعة _رحيل بركاي من هذا الافلام ،رووووووحيييي موجووووووعة حااااابة نخرج راني مخنووووووقة _خلاص روحي بصح ماطوليش حليت الباب وخرجت قعدت في لرض لميت رجليا حطيت راسي على رجليا نبكي نبكي نبكي حتى خلاصو دموعي حسيت بيه واقف فوق راسي رحيل نوضي راح الحال والجو بارد طلعت راسي عندو انت كيفاه تقدر ترقد وانت كسرت خاطر الناس حكملي يدي نوضني خلاص نوضي علاه هذ البكا ڨاع ،بعدددد عليا حابة نبكي واش دخلك فيا _لي بك ڨاع لسانك نقصي منو باه ماتسمعيش ما لا يرضيك داني معاه لشمبرة هيا ارقدي تريحي والخطرة الجاية كي تكون بك حاجة عيطيلي ليا ماشي لباباك ،علاه شكون انت حتى نعيطلك _راجلك ،جامي حسبتك راجلي و راح تبقى ديما راجل غريب عليا _للاسف ليس كل ما يتمناه المرء يدركه ،كاينة والدليل جامي تمنيتك راجلي _علاه شكون كنتي متمنية للحظة جا في بالي نهين رجولتو ونقولو ساعد ماعرف كيفاه جاني شاهد العقل وحكمت لساني عقد حواجبو وجا عندي دخل فيا قولي شكون هذا لي كنتي متمنياتو يكون راجلك ،حتى واحد ورحت حكمت بلاصتي غطيت راسي جا عندي نحا الغطا على راسي قولي شكون هذا لي كنتي متمنياتو ،قتلك حتى واحد سبحان الله كملت فعايلك معايا وضك جيت تشك فيا دارلي بصبعو كشغول تحلف فيا وراح خبط الباب وخرج
لغدوا جبت نهاري ڨاع فالشمبرة كارهة كلش طبطب الباب شحال من مرة ومافتحتش ليل ڨاع سمعت صوت المتفتاح يدور فالباب بقيت متكسلة في بلاصتي مانيش قادرة مورالي زيرو دخل عليا جا عندي نوضي تعشاي ،شبعانة _نوضي رحيل ،ياسيدي ناكل الرهج يرهجني خليني في حالي بقا يشوف معايا واشبيك ماكيش عاجبتني ،كرهت حياتي وقتاش يخلص هذا الشي تعبت ماقدرتش نتحمل هذه المعيشة مانيش حابة نعيش كالحيوانة كررررهت بقا يشوف معايا ولا جا قعد على سرير وتكا على ذراعو دار وجهو في وجهي هذا ڨاع على جال البوسة يهدر بهدوء مستفز يعني اذا بستك مراحش تحسي روحك حيوانة حط صبعو على شفتي وهبط يبوسني بعدت وجهي خلاص خلااااص _ياووو انتما لي خلاص كرهتووووني يلعن النهار لي قررت نتزوج زوج مافهمتش وين كان عقلي كي قررت نعاود الزواج واش درهالي انتي تبكي في جهة وهذيك في جهة تعبتوووني ،ماتهمني لا انت لا بوستك وكي نقولك تعاملني كالحيوانة ماشي على جال البوسة انت حتى وجهي ماتشوفش فيه خلاااااص كرهت _ومين مانهمكش علاه يهمك نشوف في وجهك ماعرفتش واش نجاوبه اصلا عييت مانيش قادرة حتى نهدر نضت وقفت جيت خارجة من شمبرة لقيتو حاكمني من يدي دورني عندو وزير عليها راني نهدر معاك شكون سمحلك تخرحي ،هذا هو لي نقصدو راك تعاملني كالجارية عندك _لسانك رحيل لسااانك راني نقصهولك ماكيش تشوفي روحك كيفاه تهدري وترجعي الكلام اسلوبك مستفزجبدت يدي خليني نروح لدوش ونجي ادي حقك كيما تحب _ماشي راكي تاكلي في دوا سكت رحيل قسما بربي يا هذه المرة ونحكمو عليك غير نخرجو من عينيك حبة حبة ،علاه ماكش حاب تفهمني مانيش حابة لولاد _وانا حاب ،ماشي انت لي حاب واذا حبيت تجيب لولاد غير على خاطر مرتك حاب تفرحها بصح مدام ناويين تفرحو على حساب تعاستي والله ما تشوفوهم _شفتي لسانك وكي نسمعك ملا يرضيك يطلعلك لاطونسيو وتصرالك جلطة دماغية راكي انتي لي تخلي ناس تضرك ،علاه كذبت دموع لي بكيتهم راح يروحو بلا حِساب بقا يشوف معايا مالقا مايقول ،انت علبالك مليح بلي ظالمني بصح بقيت حايرة انا اذا جبروني على الزواج الله غالب مراة لاحول ولا قوة لي ماعندي حتى كلمة بصح انت راجل واش جبرك على هذا الشي شفت روحك ماكش قادر تعدل ماتتزوجش لاه تظلموني معاكم وتكسروني بهذه الطريقة جا يهدر دخلت فريدة بقات تشوف معانا بشك تقلقتي كي تشوف معايا بشك ،وانتي مدام تحبي راجلك وتغيري عليه ڨاع هكذا واش داك تزوجيه نهار قررتي تجيبيلو مراة علبالك بلي راح تكون كيفك كيفها اكيد مراحش يقعد يتفرج فيها _مافهمتش واش قصدك ،فهمتيني مليح اخر مرة تبقاي تشوفي معايا بشك وتحسسني بلي سرقت راجلك منك وخطفتو اخرة مرة المهانة والذل لي راني فيه بركات عليا واذا ماكمش طايقيني في هذا الدار طلقوني كيما دخلتوني لحياتكم تقدرو تخرجوني منها انا الله غالب عليا مالقيتش كيفاه نخرج منها بقاو يشوفو معايا في زوج خرجت طلعت لسطح خليتهم بركات عليااا شوفاتهم ليا تحسسني بلي انا لي دخلت حياتهم وفسدتها .
