*#حُـبـهُ خَـطِـيـئـة•*
*الــحــلـقة « 26 »*
« *حَـقـيـقـة* »
يوسف شاف لي ماريا بس ماريا مسحت دموعها بسرعه و دارتله حركة 🤌🏼 و رفعت حاجبها بس عيونها يلمعوا بدموع و مؤيد طلع بسيارة لي حوشهم و يوسف كذلك بس كل الوقت و حركات ماريا بين عيونه.
وصلوا مؤيد و فاطمه و ماريا للحوش نزلوا من السياره و فاطمه و ماريا اتجهن عشان يغيرن ملابسهن.
ماريا ركبت لي دارها غيرت و لبست توتة سروال و كت لونها بودري هادي ولفت شعرها فوق و غسلت وجهها و نزلت.
فاطمه: غيرت ونزلت بسرعه تجهز خشت عليها ماريا.
فاطمه: قتلك تعالي جهزي معايا مرات معَش نلحقوا .
ماريا قعدت تجهز معاها و سارحه.
فاطمه تعبي في المحشي : ويره عيب تلبسي هكِ قدام باتك و خوتك.
ماريا: شن خطرها المحاضرة؟.
فاطمه: كنك تتكلمي هكِ؟.
ماريا : ماما انا طول عمري نلبس هكِ شن خطرها عليكِ توا.
فاطمه: ماترفعيش صوتك انا امك.
ماريا دمعتها على سبله قعدت تبكي.
فاطمه: عارفتك جوك تعكر من اول ما مؤيد تكلم على يوسف و الموضوع هذكِ ، لكن انتِ لا تفهمي لا تستوعبي شن انديرلك.
ماريا تبكي وتجهز في السلاطات.
فاطمه: كان تعبانه امشي تريحي توا ندير انا.
ماريا : لالا كويسة.
فاطمه: تمام.
وقعدن يجهزن لعند وصل مصطفى خش عليهن جايب معاه حلويات و مشروبات غازيه.
فاطمه: في عندنا عليش تجيب.
مصطفى : منحسابش في، و الراجل اول مره يجي عيب يكون في شي ناقص.
فاطمه: مش اتصلت بيك ويره ليش ما قلتها لها كان هكِ راهو من بدري مروحه و مجهزه كل شي.
مصطفى : انا سكرت من ويره في المكالمه الثانيه و محمد اتصل بيا على طول و لهيت مع ناصف في السوق نسيت بكل.
فاطمه: تمام صار خير خشوا الرجاله؟.
مصطفى: اها خشوا قاعد معاهم مؤيد ، شن درتي العشاء؟.
فاطمه: درت رز ابيض و محشي و شربة و بدري قلت لي مؤيد يخطم يجيبلي مبطن و ويره قاعده ادير في السلاطات.
مصطفى : مشاءالله لحقتي اديري هذا كله.
فاطمه: معايا ويره يدها بأيدي.
مصطفى : تمام مشاءالله المهم انا تأخرت على الجماعه ديرن قهوة بسرعه.
فاطمه: حاضر.
YOU ARE READING
حبهُ خَطيئه
Romantikusرواية منقولة وليست من كتابتي و انشالله تستمتعوا بيها كيف ماحبيتها انا❤❤. قراءة ممتعه❤. للكاتبه: Wede Alshaary❤❤