လေလေးတစ်ချွန်ချွန်နဲ့ သားသားနားနားဝတ်စားထားတဲ့ မင်ဥက္ကဌကြီးရဲ့တစ်ဦးတည်းသော မြေးအလိမ္မာလေးမင်ယွန်းဂီ။
အလိမ္မာလေးဆိုတာက တစ်ဖက်လှည့်နဲ့ခပ်ဆိုးဆိုးကလေးတွေအတွက် သီးခြားသတ်မှတ်ပေးထားတဲ့ အပေါ်ယံအလိမ်အညာစကားလေးတစ်ခွန်းဆိုလည်းမမှား။
အဆိုးလေးလို့ပြောရအောင်လည်း မင်ယွန်းဂီက ကလေးကလားအရွယ်လည်းမဟုတ် ၊လူပျိုကြီးစာရင်းဝင်ချင်နေပြီဖြစ်တဲ့27နှစ်အရွယ်။အင်း...27ကငယ်သေးတယ်ဆိုပေမဲ့ ဒီခေတ်ကာလအရတော့ လူပျိုကြီးစာရင်းဝင်နေလေရဲ့။
အသက်ကသာကြီးနေတာ ခုထိအဘိုးလုပ်စာထိုင်စားတုန်း။အဘိုးကလည်း တစ်ဦးတည်းသောမြေးလေးကိုသိပ်အလိုလိုက်သည်။မိတဆိုးဖတဆိုးလေးမို့ တစ်ချက်မျက်နှာမငယ်စေရဘူး။လိုချင်ရင်ချက်ချင်း ၊ပါးစပ်လေးဟလိုက်တာနဲ့တင် အော်တိုလက်ထဲရောက်စေတဲ့အဘိုးမျိုး။အဲ့တော့မင်ယွန်းဂီဆိုးနေတာလေးက ဘာပြောကောင်းမလဲ?ဆိုးလို့ရနေတာကိုး။
ဒါပေမဲ့မင်ယွန်းဂီက အားနေအရက်သောက်ဖဲရိုက် ၊မူးရူးကွဲပြဲ ၊မိန်းမတကာမဲ့ပွေရှုပ်နေသလိုဆိုးတာတော့မဟုတ်။အလုပ်မလုပ်ပဲ အဘိုးလုပ်စာလေးထိုင်စားနေရုံသာ။ပြီးတော့ နည်းနည်းလေးပိုက်ဆံကိုမဆိုသလောက်လေး မလိုအပ်တဲ့နေရာတွေမှာသုံးနေရုံပဲ။ဘာတွေသုံးနေလဲဆိုတာတော့ အားလုံးမကြာခင်သိရမှာပေါ့။
အခုလည်းလေလေးတစ်ချွန်ချွန် ပုံမှန်ဝတ်နေကျဂျစ်ပစီဒီဇိုင်းနဲ့ကွဲထွက်နေအောင် ပိုပိုသာသာဝတ်ဆင်ထားကာ all blacksuit ကြီးနဲ့မို့ အဘိုးဖြစ်နေမှာတအံ့တသြ။ကုမ္ပဏီမှာ မြေးလေးကိုရုပ်လုံးလေးပြချင်လို့ အတင်းအကျပ်ခေါ်တာတောင် ဂျလေဘီစတိုလ်နဲ့ပဲလိုက်လိုက်လာလို့ နောက်ဆိုမခေါ်ရဲတော့တာ။ခုတော့ ထူးထူးဆန်းဆန်းsuitကြီးနဲ့မို့ ဘာတွေကြံနေပြန်ပြီလဲ?
"ဖက်ထုပ်လေးဘယ်သွားမလို့လဲ...ပြောပါဦးအဘိုးကို"
အဘိုးဆီကအခုထိ ဖက်ထုပ်လေးလို့ခေါ်သံကြားတာကြောင့် အလိုမကျလို့ကျုံ့သွားတဲ့မျက်ခုံးတန်းလေးက ထင်ရှားစွာပေါ်လာသည်။
