ﺟـبـࢪوته‍ـ۾ وڪسࢪتـﻲ

الحلقه ١١

صباح الخير والعافيه على ورداتي الحلوات 💐

رجعت وياكم بلحلقه ١١ من جبࢪوتهم وكسرتي

اتمنى تنال اعجابكم لو تشوفون شون شلعت گلبي بس اريد ارفعها ومجاي تنرفع صارلها مده حتى مسحت البرنامج ورجعت فعلته وهم ما فاد تالي نسختها ومسحتها ورجعتها وهسه بلكي تنرفع 😟

نبدي بأسم الله
🌺🌺🌺🌺🌺
"" "" "" "" "" "" ""

گدام المرايه واگفه واعدل بعباتي على راسي ابتسمت من اجت بعيني صورته بذاك اليوم شلت جنطتي وطلعت مبتسمه من الغرفه گدامي ذهب تمشي وانه وراها سلمت على امي وكوثر واگفه باب الديوانيه شافتني حرگت حلگها يمنه ويسره
: ااااااه بعد وبعد نشوف

درت وجهي عليها : خير عمه محتاجه شي!!

عيونها تفترسني وسنونها صكتهن وگالت بحقد : عمه العماج وموت الخذاج منين صرت عمتج يمه...

باوعت الها متخبله مني من يوم لبست عباة الراس وهيه متسودنه مدري شبيها

طلعنا للباب ننتظر السياره واسمع امي گالت الها

: كافيج كوثر من بناتي لا كل ما شفتي وحده منهن تذبين عليهن حجي

كوثر : خاب شوف فطيم ام نص لسان طالع لسانها... الصمي بس انتي وبناتج...

فاطمه : بس اريد اعرف شمسوياتلج البنات وانتي هيج تسووين وياهن شو لا يمج لا بگرباج اعتقيهن رحمه لاهلج

كوثر : شوفي اذا هاي ام عبايه ما جابتلج مصيبه ما اطلع بت ابوي

فاطمه : بناتي تربيتي وتربيه ابوهن وعندي ثقه بيهن انتي بس خليج بروحج والتهي بولدج الي صارو اطول منج وهمه ما يحترمون واحد

اسمع دهرتهن وواصل صوتهن للشارع صفت سياره الخط الي خلاها النا ابوي بطلب من متيم طبعا
سلمت على الطالبات الي بيها وگعدنا انا وذهب وصلت للمدرسه ونفس الروتين اليومي بس الاختلاف صار من طالبه رابع اعدادي صرت خامس تعب وسهر ودراسه وحجي من البيئه العايشين بيها وقهر وكل هذا يهون من اشوف بعيون امي وابوي الفرحه من انجح واحقق حلم امي وادخل هندسه حلمها الي دفنوه الها من جانت شابه

طلعت من المدرسه وواگفه يم صديقاتنا الي ويانه بلخط متانين ابو الخط يجي

وشفته من الركن يمشي لابس اسود باسود وشعره المبعثر من بعيد يبين... وخطواته تتسارع كل ما لمحني

تقرب ووكف شويه عنه وصاح لذهب راحت فرحانه وانه امشي بخطواتي الثگيله ثگلهن الشوگ اله والرجفه الي سرت بكل جسمي

باوعلي وابتسم : هله بهل الوجوه الحلوه

ذهب : هلو بيك شنو صارلك هواي ما مار علينه؟؟؟ وين جنت؟؟؟

عيونه تخترق نظري وتدخل لگلبي تشوفه مسوي حفله رد ببتسامته الحلوه
: جا مو ما تردونه نجي ومليتونه؟؟؟