Blind Date With Mr. Arrogant [FINISHED]

Part 9

"Kumusta? Okay ka na ba?" bungad na tanong ni Anna kay Xander at imbis na sumagot ang binata, sinalubong lamang siya nito ng isang mainit na yakap.

"Wait, anong ginagawa mo?" halos nauutal na tanong ni Anna sa binata.

"Pumayag na si Mr. Walsh sa deal. Nakapirma na siya bago siya umalis," masayang balita ni Xander. Humigpit ang yakap niya sa dalaga at tila ayaw na niyang matapos ang sandaling iyon. Tila gumaan na ang loob niya kay Anna at nakukwento rin ni Marty na talagang professional itong katrabaho.

"Okay, pumirma na siya pero kailangan mo pa bang yumakap dyan?" medyo naasiwang tanong ni Anna kahit deep inside, hindi niya maamin na nagdulot din naman ng bahagyang kilig ang pagyakap sa kanya ng binata. Matapos iyon, dumistansya muna siya at pinakatitigan nang seryoso ang binata.

"Oo nga pala, anong dapat kong gawin pagkatapos nito? Mag-iisang linggo na rin mula nang mapunta tayo rito isa isla. Gusto ko nang umuwi," prangkang sagot pa ni Anna.

"We have to wait sa pagbalik ni Marty. Pero sa totoo lang, hindi pa ako handang bumyahe, medyo nahihilo pa ako," pagtatapat naman ni Xander.

"So, aside sa pagiging translator, gusto mo naman akong maging nurse mo?" tanong naman ni Anna kasabay ng pag-ismid. Pero sa katunayan, nabayaran na rin naman ni Xander ang serbisyo niya bilang temporary tour guide at translator ni Mr. Walsh at makatarungan itong magpasahod. lahat din ng accommodation ay sinagot ni Xander. Hindi na siya lugi kung tutuusin.

"Oo. Kung pwede. At kung pwede rin, magpakilala na tayo sa isa't isa," pagtatapat naman ni Xander.

"For what? Bakit? Ay, oo nga pala. Hindi mo pa ako nai-interview. Per0 sa totoo lang, alam ko na mabait ka lang ngayon dahil nakuha mo ang deal," sabi naman ni Anna sabay ng kanyang apologetic smile.

"Pero, kaya mo na bang mag-interview? Sabi mo kasi hindi ka pa okay," pagpapatuloy ni Anna.

"Kakayanin. Dahil interesado ako sa'yo," straightforward na sagot ni Xander na lihim namang nagpabilis ng tibok ng puso ni Anna.

Nagsimula na nga si Anna na ilahad ang kanyang personal info pati ang kanyang degree at mga propesyon, hindi tuloy maiwasang ma-curious pa lalo ni Xander. Isiniwalat na rin ni Anna ang katotohanan kung bakit siya ang nagpakita sa date. Maluwag niyang ipinaalam ang naging sitwasyon ni Hyacinth.

"Baka nagtrabaho ka na rin sa isang kompanya na ka-partner na namin sa Poland," pag-assume naman ni Xander.

"Hindi ko alam. Pero sa Fast Innovations ako nagtatrabaho before pero somebody fired me at sinet-up pa ako para lang matanggal ako sa trabaho. Inako ko ang hindi ko naman pagkakamali dahil sa pagiging entitled ng isang business owner," paglalahad ni Anna.

"Nakakaawa ka naman pala. But look on the other side, kung hindi ka na-fire, hindi tayo magmi-meet, hindi mo matutulungan si Hyacinth na maialis sa kasal na hindi niya gusto. At higit sa lahat, hindi kita magiging employee kung nasa Poland ka pa rin. You helped me a lot, pasensya na kung na-underestimate kita," apologetic na tugon naman ni Xander. Hindi nga lang niya pinahahalata na parang pamilyar nga ang mga sinabi ni Anna tungkol sa pagkakasisante nito.

"Okay lang Sir Xander. At least, ngayon medyo kalmado ka nang makipag-usap at tumatanggap ka na rin ng pagkakamali. Ang advice ko lang sa'yo, matuto kang kumontrol ng galit at maging humble ka. Buti nga natitiis pa ni Marty na pakisamahan ka," payo naman ni Anna.

"Oo naman. Nagbabago na rin ako dahil tama ka naman. Nagpapa-counsel naman ako ng sarili pero talagang overwhelmed ako sa mga nangyayari sa'kin. Pero siguro, karma ko na ito sa panggagamit ng ibang tao para lang sa business," sincere na pag-amin naman ni Xander.

"Siya nga pala Ms. Anna, kung makakausap mo 'yong taong naging dahilan ng pagkasira ng career mo, magagalit ka ba sa kanya? Hindi mo ba siya mapapatawad kung humingi man siya ng sorry?" biglang tanong ni Xander.

"Dahil banned na akong magtrabaho sa ibang international company matapos na masira ang kredibilidad ko, may dahilan pa rin ako para magtanim ng galit doon sa pinoy na investor doon sa Poland. Naturingan siyang professional pero hindi siya nakaunawa ng iba kahit na sarili niyang kababayan. In short, hindi ko siya mapapatawad. Nag-struggle ako dahil sa ginawa niya," daing ni Anna habang nagpipigil ng luha.

"Kahit pa bumawi siya, the damage has been done. Hindi ko pa siya mapapatawad. Kung nasa Poland lang din sana ako, hindi na sana ako madadawit pa sa issue ni Hyacinth at ng kanyang ina," pagpapatuloy muli ni Anna. Natahimik na lang si Xander at napatingala rin sa ulap.

Kinabukasan sana ang schedule ng pagbalik ni Marty sa isla ngunit pinahinto niya muna ang empleyado na bumalik dahil sa impormasyon na kailangan niyang ma-verify tungkol sa work experience ni Anna. Ipinadala niya nga kay Marty ang information na nakalap niya kay Anna para kumpirmahin kung siya nga ba ang translator na pinatanggal niya sa Poland. Naisipan niyang lumabas para magpahangin saglit kahit alas otso na rin ng gabi.

"Mas okay nang lumabas, kaysa magmukmok sa kwarto. Feeling ko magkakasakit lang ako kapag lagi akong nakahiga," bulalas ni Xander at naglakad muna sa dalampasigan. Doon ay namataan niyang nasa isang tabi si Anna na nakatingala sa buwan.

"Hey, bakit hindi ka pa natutulog?" untag sa kanya ni Xander. Napalingon naman si Anna sa binatang pumukaw ng kanyang atensyon.

"Wala. Marami lang akong iniisip at isa na roon si Hyacinth," pag-amin naman ni Anna.

"Iniisip mo kung naging okay na ba siya? Anong gusto mong gawin kong favor sa pagtulong mo sa'kin? Gusto mo bang tawagan ko si Mrs. Sawyer tapos magkunwari pa rin akong interesado sa kanya pero ang totoo, makikipagkita lang ako para ipahatid ang mensahe mo, ayos ba 'yong naisip ko?" cheerful na tanong ni Xander na ikinangiti naman ni Anna.

"Nakakahiya na. Mag-focus ka na lang sa pag-i-improve ng sarili mo at bawasan mo na rin ang pagiging magalitin mo. Kailangan mo ring magpasuri ulit sa psychiatrist mo para makontrol ang galit mo," suhestyon pa ni Anna.

"Kung hindi rin naman dahil sa date na set-up lang sa amin, hindi ka madadamay. Kaya naman, I'll take responsibility for that. At pangako ko, hindi ko ipapaalam kay Mrs. Sawyer na kinuha kita bilang translator," pangako naman ni Xander. Bahagyang naantig ang damdamin ni Anna sa kanyang narinig. Tunay nga na mas makikilala niya ang isang tao kapag medyo tumagal na niya itong nakakasama. Hindi niya akalaing may soft side ang binatang si Xander na marunong din palang magpakumbaba at umamin ng pagkakamali.

"Sige na nga. Siguraduhin mong ipapadala mo sa kanya ang message ko ha? Bantay-sarado si Hyacinth at tingin ko, wala sa kanya ang phone niya para lang pigilan ang pakikipag-usap niya sa akin at sa boyfriend niya," sagot pa ni Anna. Mabilis na tumango si Xander at tumingala na rin sa buwan. Marami silang bagay na napag-usapan pa at sa simpleng pag-uusap lang pala ay tila nahuhulog na sila sa isa't isa.