Blind Date With Mr. Arrogant [FINISHED]

Part 3

Nawindang na naman ang lahat ng empleyado sa Ideal Auto Corp o IAC dahil sa pagdating ni Xander mula sa ibang bansa at mukhang mainit pa ang ulo nitong bumungad sa kanyang mga empleyado.

"Make sure na mami-meet mo ang deadline or si Satanas ang mami-meet mo," naiinis na bungad ni Xander sa business consultant at padabog na isinara ang pinto ng office.

Habang naglalakad sa hallway, nakasunod naman sa kanya ang kanang-kamay na si Marty.

"Sir, tumatawag si Ms. Fatima sa inyo, pinangakuan n'yo raw siya ng date sa cruise ship niya. She just signed the business contract recently," mahinahong paglahad ni Marty habang nakatago sa mga bisig niya ang makakapal na folders.

"Tell her that I got sick. At isa pa, kakalapag ko lang ng eroplano. Also, hindi ko naman siya type. Nakuha ko na ang pirma niya sa deal so hindi ko na siya kailangan," aburidong sagot naman ni Xander.

"Kung gano'n po pala, sana hindi n'yo na lang siya pinangakuan at hindi na kayo nagpakita ng motive sa kanya. Mukhang gusto talaga kayo ni Ms. Fatima," sentimyento naman ni Marty.

"Kung naaawa ka sa babaeng 'yon, eh 'di ligawan mo siya," walang kaabog-abog na sagot naman ni Xander.

"Oo nga pala. Huwag mo nang ibibigay sa kahit sino ang number ko lalo na sa female investors, kahit pa sa mga anak nilang babae. Sobrang sumasakit na ang ulo ko sa kanila— sa mga pangungulit at tila panliligaw nila sa'kin," pagpapatuloy ni Xander sa kanyang pinagkakatiwalaang tauhan. kasama kasi sa business strategy niya ang manligaw ng investors sa pamamagitan ng paggamit ng karisma na mayro'n siya.

"Noted Sir. Remind ko lang pala kayo about doon sa Polish client. Si Mr. Walsh na nakausap ninyo sa Poland. Napa-revise na ang maling dokumento at mukhang maa-approve na ang deal natin sa corporation nila sa Fast Innovations," reminder naman ni Marty.

"Okay, pupunta nga pala siya rito sa susunod na araw, right? He wants a tour in my farmhouse, pagbigyan natin. Isipin na lang natin na para tayong magwe-welcome ng isang prime minister para lang sa deal na inaasam ng dad ko at para matigil na rin ang pakikipag-blind date ko," utos naman ni Xander.

"Pero Sir. Remind ko lang na may scheduled date kayo sa sunod na araw sa anak ni Mrs. Sawyer. Actually, wala raw idea ang anak niya tungkol sa magiging ka-date niya. Itutuloy pa po ba ninyo ang gano'ng setup o sasabihan ko na lang si Mrs. Sawyer na hindi na matutuloy?" tanong naman ni Marty.

"Since ito na ang huli, itutuloy ko. Actually kahit ako, hindi ko pa nga alam kung anong pangalan niya. May idea ka ba kung sino?" usisa naman ni Xander.

"Sa pagkakaalam ko, isa siyang baguhang model. Medyo kilala na rin siya dahil kay Mrs. Sawyer na mahilig tumulong sa mga foundation. Ito ang nahanap kong picture niya at alam kong siya ito dahil nag-iisa lang naman ang anak ni Mrs. Sawyer," tugon naman ni Marty saka ipinakita ang cellphone kay Xander. Tila hindi naman interesado ang kanyang boss nang makita ang larawan ng dalaga.

"Ayaw mo ba sa kanya? Sir?" usisa naman ni Marty.

"For me, she's fine. Maganda. Pero marami na akong nakitang magagandang babae pero kadalasan sa kanila, walang substance. Magaganda lang. Hindi ko pa nararanasang ma-move sa isang babae. Alam mo naman 'yan Marty. Lahat ng babaeng naka-date ko ay dahil lang din sa negosyo at kung walang kinalaman sa negosyo, hindi ko sila papansinin," pagpapaalala naman ni Xander.

"Kung talagang makikipag-date pa rin kayo sa kanya, sasabihan ko na si Mrs. Sawyer," sagot naman ni Marty na parang nagkikibit-balikat na lang dahil hindi naman talaga niya nagugustuhan ang strategy ng kanyang boss.

"Okay. paki-confirm na," tipid na sagot ni Xander.

Habang si Anna naman, agad nang bumili ng mga gamit para sa sanggol ni Hyacinth sa malapit na mall kahit na malapit na iyong magsara.

"Pwede na siguro itong ilang pares ng medyas at sapatos," nakangiting pakli ni Anna. Nagmadali rin siyang umalis sa mall after niyang mabayaran ang kanyang pinamili. Parang normal lang sana ang gawain na ito para sa kanya pero hindi niya inaasahang makakasalubong niya ang babaeng pinakauutangan niya ng loob na walang iba kundi ang nanay ni Hyacinth na si Madam Celia Sawyer at napahinto ito sa paglalakad kasama ang mga kaibigan nito.

"Wait lang mga amiga ko, kakausapin ko lang itong kakilala kong isa sa mga pinagmamalaki ko," sambit ni Madam Celia nang pansamantalang i-excuse ang sarili para lapitan si Anna sa kinatatayuan nito.

"Hello darling. Supposed to be, next few months pa kamo matatapos ang contract mo sa Poland. Anong nangyari at nandito ka na?" usisa ni Madam Celia kay Anna sa napakasarkastikong paraan.

Tila hindi nakagalaw si Anna sa mga sandaling iyon dahil alam niyang hindi naman talaga natutuwa ang ginang na makita siya. Pinakaayaw pa naman nito sa lahat ay 'yong pinaglilihiman. Kahit pa nakapagtapos si Anna dahil sa tulong ng pamilyang Sawyer, mino-monitor pa rin ni Madam Celia ang kanyang career dahil hindi siya pwedeng pumalpak. Palibhasa, madadamay ito sa kahihiyan kapag sumablay siya sa mga ginagawa niya. Kaya ikinababahala rin ni Anna ang pagkakatanggal sa kanya ng employer niya sa Poland at ayaw niyang malaman ni Madam Celia ang bagay na 'yon kaya hangga't maaari, ililhim na lamang niya ang kapalpakang nagawa.

"He-hello po, madam. Pinag-early leave lang ako ng boss ko. Reward niya raw sa hardwork ko," pagsisinungaling ni Anna habang itinago sa kanyang likuran ang paper bags ng mga pinamiling gamit ng bata.

"Gano'n ba? Pero bakit hindi mo man lang ako in-inform? At ano 'yang mga pinamili mo? Parang baby clothes, ah," puna naman ni Madam Celia. Halos mapamura naman si Anna sa isip niya dahil sa tila matanglawin na paningin ng ginang. Kahit kailan, walang bagay na nakakalusot dito.

"Para po ito sa inaanak ko sa binyag, madam. Sorry po kung hindi ko na kayo nasabihan. Sa totoo lang, balak ko po talaga kayong -surprise," muling pagsisinungaling pa ni Anna.

"Pero ang dami, marami ka na bang inaanak?" usisa naman ni Madam Celia na tila hindi kumbinsido sa kanyang sagot.

"Hindi naman po," sagot pa ni Anna. Sa katunayan gusto na niyang mag-walk out dahil ayaw na niyang maintriga pa ni Madam Celia.

"I hope na nagsasabi ka ng totoo. Sige, hija. Magpapatawag na lang ako ng dinner. Aasahan ka ni Hyacinth, okay?" nakangiting sagot naman ni Madam Celia bago bumalik sa mga kaibigan nitong mayayaman.