#دموع_مريرة
#الكاتبةورودالخالدي
رأفت:::
شفتها بعرس بت خالتها ..ولكون بت خالتها عروسة ابن عمتي فجنت متواجد..بالعرس بحكم گرابتي للعريس ..ومن دون البنات لفتت انتباهي اني صاعد بسيارة ويه الشباب يغنون ويصفكون وهيه بسيارة من سيارات الزفة...طبعا السيارة الي هي بيها شايلة النسوان كلهن والبنات والجهال..ناس تغني وناس تهلهل وناس تصفك وهي كاعدةيم الجامة..لابسه حجاب وردي..منقط..وجهه مدور چنه ماعون گيمر..والعيون تجذب من بعيدالي لفت انتباهي انه هي مو يم الناس مشفتها لا ضحكت لا صفكت لا اندمجت ويه العالم ولامعترفة باحد ساكته وكاعدة..نظرتها بريئة طبيعيه ممخليه قطرة مكياج..حواجبها طبيعيه يمكن الخيط مواصل وجهها..ومن اول نظرة كلت ..هذه البنية الي وراح تصير مرتي....ومن نزلنا من السيارات شفتها نزلت ويه البنات لابسه ملابس مستورة ومدنكة يعني مخابصه نفسها .....زفينا العريس وتعشينا جنت اتمنى اشوفها بعد بس لاطلعت ولا اني كدرت افوت..يعني شلون....بأي طريقه راح..اعرفها واعرف ..اسمها وبنت منو لان اني بالبداية مجنت اعرف هي بت خاله وسن ..منا لما الناس الي اجو بالزفة كلهم راحو وبقو بس المقربين من العروس واهل العريس وبما انه اني جنت واكف بالباب ..ومشفتها طلعت يعني هيه مقربه من العروس ..متحملت دخلت جوة سألت بت عمتي الجبيرة:
اكو بنيه لابسه حجاب وردي منقط...هذه منين البنية!!
هاا رأفت تباوع ع البنات ..اروح اكل لعمتك اخليها تشحوتك بهالليل:
اقبال ترة اني رايح ما ابات ..بس ردت اعرف منين هاي البنية:
بت خالة وسن .. اسمها هدى.جايه ويه امها وخالتها يباتن ويه العروس هسه ارتاحيت
ماشي ..مشكورة
رجعت للبيت حجيت ويه ابويه وكتله اريد اتزوج ..واريدك تخطبلي هاي البنية:
اي مو الزواج لعب ..شنو تتزوح ..من اروح اخطبلك شكلهم ابني عطال بطال واخوه معيشه لو شنو؟؟!!!
طبعا ابويه ميشتغل عايش ع راتب التقاعد واخويه احسان هو الي يصرف ع البيت باعتيار عندة مرة واطفال واني عازب وابويه رجال جبير ومتقاعد واخواتي كلمن ابيت رجلها ..اني ازغر واحد بالبيت وامي متوفيه قبل ٥ سنوات..
وطبعا ماسكتت بقيت الح على ابويه واخويه ..منا لما راحو خطبوها الي..بس اهلها رفضوني وجان عذرهم انه اني ما اشتغل..ومن حسن حظي ورة شهرين انفتح التطوع للجيش ..واطوعت....وصرت عسكري وعندي راتب محترم..ومرت سنه ونص بس ما نسيتها..لان ماحلت بعيني مرة غيرها..وطبعا اني اندل بيتهم واتعمد من اجي باجازتي امر من شارعهم بلكي اشوفها..بس اشهر مرت ومشفتها..وبعد صبر..وانتظار شفتها..طلعت ويه امها بس هالمرة ملابسه بس حجاب لا ..لابسه عباية....بس شطالعة تخبل بالعباية كبرانه وناضجة اكثر وصايرة تذبح ذبح..وهالمرة اني مصر ومستميت..وحتى فكرت اذا ما انطونياهيا اسوي الميصير حتى تصير من نصيببي ..دزيت اهلي مرة ثانيه ومن حسن حظي ابوها وافق..جانت الدنيا مسايعتني من الفرحة..وصارت هالبنية من نصيبي ..ومن اكلكم اني اسعد رجال بهالدنيا يمكن تكولون ابالغ..
