#فارس_الاحلام
#الكاتبةورودالخالدي
شيرين::::
اني ..شيرين عمري ٢٣ سنه ..اني الجبيرة باخواتي ..عنده ٣ اخوات و٢ اخوة كلهم ازغر مني رسبت بالسادس سنتين وبطلت كعدت بالبيت وحالي حال البنات منتظرة عريس مناسب يدك باب اهلي ..بس اني عندي مواصفات اباالي لهلعريس ..بصفتي بيضة ووجهي..مدور وع اساس اني احلى اخواتي ولو شعري بيه رده ..ومعذبني واسرحه بالكراتين والبروتين يصير يخبل هنه شهربن يطول الاساس ويرجعن عطوبي يبينن من يم الگصة المهم معليكم بشعري البس حجاب محد يشوفه..ولا عباللكم محد خطبني لا هوايه خطبوني ..مثلا خطبني ابن خالتي الجبيرة ورفضته كلت لماما مسلوع ومعنده شخصية ..وخطبني ابن خالتي الوسطانيه كتل نفسه عليه اسمه مخلد..وكل شويه داز امه ..كلتهم عشتوو اني اتزوج واحد سايق تكسي ووجهه مزرف ..امدايه والله ..امي تكلي .:
.انهجم بيتج يبت الشيخ مداد ..هو راتب ابوج نص شهر يكفينا وباقي الشهر نخلصه دين ..
يمه اني اريد اتزوج واحد يرفع مستوانه خو ما اتزوج من نفس المستوى
امي تدعي عليه وتكولي:
ضلي رفضي كل اليتقدملج..وتالي تعنسين حتى زبال ميرضه يخطبج..
جنت ما اسمع الكلمة ..وطبعا جان الشغل مال البيت كله على اخواتي ع اساس اني الجبيرة واتأمر عليهن اكعد بالعشره واكلهن سونلي ريوك واريد بيض نص ستاو..اذا مستوي البيض ابسطهن واخليهن ياكلنه ويسلكلي غيره ..هنه يخافن مني ....واخواني بعدهم زغار الجبير صف ثالث ابتدائي والزغير ..بالاول لان امي خلفتها بالبداية بنات وبعدين خلفت الولد..المهم اكعد متاخرة واضل اتأمر على اخواتي..لان الليل كله كاعده اقره قصص عايشه بعالم القصص وكل قصه اقراها احس نفسي البطله مره ..اصير بت ناس فقره وينعجب بيه مليونير. ..واشتغل خدامه عنده وهو حلو ..ونازك ويلبس قاط وساعات تلمع.. وتالي اعيش وياه قصه حب وتتزوج
..ومره اصير ..فصليه ياخذني الشيخ واشبع ضيم تالي الشيخ يوكع بغرامي ويطلك كل نسوانه لخاطر عيوني واخلفله كومه ولد واصير الشيخة ..شيرين
..ومره ..اني اميرة واحب واحد فقير عنده عضلات وحصان..واشرد من اهلي ويصير بيني وبينه موقف رومنسي بالجبل واصير حامل وابويه الملك يخاف من الفضيحة ويزوجني اله وابويه يموت وهو يصير الملك بمكانه.
.ومرة اني موظفه بشركه والمدير مالتي يدوخ يجنن يملخ...ونتصادم اني وياه بالمصعد ويدوخ بجمال عيوني وتالي يكوم ينطيني راتب زايد ..وبعدين يساومني على شرفي ..واني ارفض واضل ابجي ويجيني للشقه مالتي يكلي جنت اختبرج وانتي شريفه ويتزوجني ونسافر شهر العسل بجزر المالديف
..ومرة اني كاوليه اركص بدول الخليج ويتعرف عليه امير مدري شيخ خليجي جبير ويكتل نفسه عليه ...وتالي يتقدملي وينطيني مهر طيارة ..وتخم الماس بعدين اكتشف هو واحد شاذ..وتصير فضايح ومحاكم ..وطبعا اقطه واصير زنكيله وتالي اطلك منه واتزوج ..حبيبي..القديم ..الي جان مشغلني رقاصة ..ونعيش بسعاده.
