سكره

سكره قبل الأخيره ٣

سكره قبل  الأخيره ٣
************
حدّثنا عبد الله، حدّثني أبو عبد الرحمن عبد الله بن عمر، حدثنا أبو معاوية، عن عبد الرحمن بن إسحاق القرشي، عن سيار أبي الحكم، عن أبي وائل، قال: أتى عليا رضي الله عنه رجل، فقال: يا أمير المؤمنين، إنّي عجزت عن مكاتبتي فأعنّي، فقال علي رضي الله عنه: ألا أعلّمك كلمات علمنيهن رسول الله صلى الله عليه وسلم، لو كان عليك مثل جبل صير دنانير لأداه الله عنك ؟ قلت: بلى، قال: قل: " اللّهم اكفني بحلالك عن حرامك، وأغنني بفضلك عمّن سواك " مسند أحمد بن حنبل - مُسْنَدُ الْعَشَرَةِ الْمُبَشَّرِينَ بِالْجَنَّةِ - مُسْنَدُ الْخُلَفَاءِ الرَّاشِدِينَ - وَمِنْ مُسْنَدِ عَلِيِّ بْنِ أَبِي طَالِبٍ رَضِيَ اللَّهُ عَنْهُ.

• يا من أظهر الجميل وستر القبيح، يا من لا يؤاخِذ بالجريرة يا من لا يهتك الستر يا عظيم العفو يا حَسَن التجاوز، يا واسع المغفرة، يا باسط اليدين بالرحمة، يا باسط اليدين بالعطايا يا سميع كلّ نجوى يا منتهى كلّ شكوى يا كريم الصفح يا عظيم المَنّ، يا مقيل العثرات يا مبتدئًا بالنعم قبل استحقاقها، اغفر لنا، وارضَ عنّا، وتب علينا ولا تحرمنا لذّة النظر لوجهك الكريم. 
اللهم صل وسلم وبارك على سيدنا محمد وعلى آله وصحبه اجمعين
❤❤❤❤🧡🧡🧡🧡🧡💛💛💛💛💚💚💚💙💙
رشا بتشد الكرسى براحه وبتنيم عصمت على الارض  بيتألم من الواقعه الجرس رن جريت مليكه  جابت الكرسى بتاعها الصغير وفتحت شاورت : بابى جدو نام أرض شان صلى
محمد هز راسه ومبتسم لها : نام على الارض ازاى
مليكه بسرسعه :  انا زقه نام ارض لاص مااات 
محمد تنح : هببتى إيه فى جدك
مليكه زعقت : هبب إيه روح معاك شوف جدو مات سلامه اطلع فوق ربنا .. إرميه كرسى
محمد دخل جرى لقى عصمت على الأرض بيتوجع  عدله مع رشا ونيمه على السرير براحه
رشا بأسف : والله يا دكتور محمد انا سيباه بيصلى ما اتخيلتش ان مليكه ها تقلبه على وشه
محمد بص على مليكه الا واقفه قدامه بتشاور له : لاص بابى  قام ..  قربت .. شهقت .. جدو مش مات لييييه
محمد بيجز على سنانه وشالها علقها فى إيده : أعمل فيكى إيه الراجل استوى منك هاتجيبى أجله بجد .. بيهزها جااامد .. نزلى إلا فى دماغك خلينا نخلص
عصمت ضحك رغم وجعه : سيبها يا محمد
مليكه طلعت بوذها ومدت إيديها : سيبو حمو سيبو
محمد هز راسه : لاء مش ها اسيبك يا مليكه غير لما تعقلى أنتى مجنونه والا هبله
مليكه ضحكت  : لا انتى مكنونه حمو سيبو إمشى بدنق
محمد هزها تانى  : حرام عليكى إرحمينا بقى بعد كدا ها اجيبك من القسم
عصمت : هههههههه هاتها جمبى هنا ملكش دعوه بيها والا اقولك استنى اصلى الاول الحمد لله انا فى اتجاه القبله
محمد بصله بقلق : لو فى حاجه قولى عشان ما نخشش فى متاهات
مليكه زعقت وهى لسا متشعلقه فى إيد محمد : سيبو حمو إمشى لاص بقى جدو نام سرير  تانى ايه يعنى ( عايز إيه تانى يعنى )
محمد : بعينك يا قرشانه  ارميكى برا بإيدى عشان اطمن إنك بعيده عنه
مليكه بملامح إستعطاف لعصمت  : ارميكى جدو
عصمت ضحك لأول مره جااامد وبيشاور : سيبها عشان خاطرى
محمد نزلها واداها بالرجل وهى طالعه تجرى بص لعصمت وضحك : فظيعه مخها جواه خفافيش بتصتاد اى حد
عصمت بطل ضحك واتخنق بالعياط : خليها تعيش طفولتها انا حرمت شيرى من اللعب عشان اربيها تكون برنسس أتارينا خطفت منها أحلى واجمل ايام .. ومليكه شكلها بتاخد حقها وحق أمها فى الطفوله   .. ياترى يابنتى  عامله إيه دلوقت
محمد بجديه : إن شاء الله انا مسافر دبى يوم الاربع ويوم الجمعه ها أروح أطمن عليها بنفسى واطمنك ودايما بتواصل بالدكاتره هناك نوعا ما فى تحسن
عصمت بصله بإمتنان : شكرا يا محمد شكرا
محمد رفع كتافه : على إيه دى ام بنتى .. اسيبك تصلى قبل ما العفريته تجيلك تقلب دماغك
عصمت ضحك تانى : انا بقيت احبها قوووى ماعرفش أقعد لو مش شغال على اللاب من غيرها
محمد : ههههه الحمد لله ان فى حد طايقها .. بعد إذنك وسابه وطلع راح لمليكه على أوضتها قعد معاها وكالعاده فضل وقت يفهمها إن كدا غلط وما ينفعش وهكذا بس على مين هو بيتعامل مع كوكب تانى غير كوكب الارض ههههههه
محمد بتحذير : انا رايح اجيب سكر عارفه يا مليكه لو هببتى حاجه تانى ها اعمل فيكى إيه
مليكه ميلت راسها : ها أعمل فيكى
محمد نطر إيده : منا عارف إنك إنتى إلا هاتعملى فيااا  بكلم نفسى
مليكه : سكر عند أمك
محمد ميل راسه زيها  : عند زنوبه
مليكه ضحكت : روح معاكى عند زلبوبه
محمد : هههههه  زلبوبه لو وافقت تربيكى ها اكون ممنون لها يمكن تكبت فيكى روح الأذى
مليكه : ميمون ليييه يا بابى
محمد : ميمون من إلا بيحصلى على إيدك انتى والمصيبه التانيه إلا أسمها سكر انا لو مفصل دماغكو على بعض مش هاتيجى كدا
بندق نط قعد على رجل محمد وبيكسر سودانى وبيرمى القشر وبياكل وكل شويه يبص لمحمد ومحمد باصصله ومتنح : مالك انت التانى حبك الأكل على رجلى
بندق هز راسه بأيوا
محمد زقه : غور يأخى أرحمو إلا جابونى
بندق تنح وشاور على نفسه قامت مليكه ناتشه السودانيه الا ماسكها وكلتها جرى جاب غيرها وبيستخبى وهو بياكلها
محمد : حتى بندق بتاكلى أكله وبتفترى عليه
مليكه نطت عليه وخدت السودانى من إيده وبتاكلها
محمد : ههههههههه ..  هرش فى راسه وواقف متنح بجد .. سابهم ومشى قبل ما يجراله حاجه  بعد وقت كبير وصل عند بيت زنوبه وطلع رن الجرس وزنوبه فتحت وهى بتاكل الكريب ابتسمت وشاورت : اتفضل يا دكتور محمد اتفضل .. زعقت .. يونس طلع  قرطاس كريب للدكتور
محمد كتم الضحكه ودخل وبيسئل : فين سكر مش باينه
زنوبه شاورت : جوا بتاكل قرطاس مع يونس
محمد بهمس : دانا ها البسها القرطاس فى وشها  .. دخل عليهم وهى بترمى الكريب على الترابيزه وبتنفض إيديها وبتتغطى
يونس قام وابتسم : اتفضل يا دكتور
محمد باصص على سكر وبيستهبل : هى نايمه
يونس نطر إيده : يوااااه من بدرى
سكره شرقت وهى بتبلع الاكل وفضلت تكح
محمد بتريقه : الف سلامه قومى كملى القرطاس
سكره أتعدلت : والله يا محمد اول قرطاس اكله .. إيه .  قصدى كريب اكله
محمد قرب عليها ومسكها شدها من قبتها : انا مش قايلك بلاش قراطيس عشان ما تتعبيش يتنقل ليكى مكروب والا أى قرف  وأنتى حامل ومناعتك ضعيفه وفى بطنك بنى أدم تانى
سكره بصعبانيه : اخر مره صدقنى
محمد : دى المره الخمسين الا بصدقك فيها
سكره : معلش خليها خمسه وخمسين  هزت راسه .. وإتلجلجت فى الكلام ... قصدى واحد وخمسين
يونس مسكه : والله جايب لها من واحد نضيف قوووى عارف مين من عند ال....
محمد : ماشى يا يونس عشان خاطرك وبصلها .. تبقى تتكرر تانى
سكره نتشت الكريب بتاعها بتاكله ونطرت إيديها : إديلو يا يونس بتاعه وخلى بتاع مليكه وعمو ورشا فى الشنطه
محمد : هو انتى ليه عندك مبدء يا نموت سوا يا نعيش سوا
سكره ضحكت : والله ها يعجبك قوووى صدقنى بجد خطييير كل
يونس مادد إيده : ماتكسفش إيدى
محمد خد منه وقعد جمبها بياكل
زنوبه بعد ما كلت عملت شاااى وجايه بيه : بصو بقى بعد القرطاس إحبسو بالشاى عشان تنسو طعمه وتجيبو تانى يوم تدقوه تانى تفتكر طمعه
التلاته : هههههههه
يونس : الله عليكى يا امااا تسلم إيدك
زنوبه : تسلم يا روح أمك ..
محمد : ممكن اقوم اغسل إيدى
زنوبه شاورت : اتفضل يا دكتور .. قام غسل إيده وشرب الشاى معاهم وبيستعجل سكر قالوله اقعد .. قال لاء عشان مليكه وحكى لهم عملت إيه فى عصمت .. سكره قامت جرى نزلت معاه لقت يونس نازل بشنطة الفلوس .. خدى كنتى ها تنسيها
سكره مدت إيديها خدتها
ومحمد طلع بالعربيه بصلها : إيه دا
سكره بصتله : دا ورثى فى ابويا
محمد هز راسه : ماشاء الله وطلع اد إيه
سكره ابتسمت وبصتله : مليون وربعميه و٦٠ الف
محمد رفع حواجبه :  ماشاء الله معقول كل دا مع ابوكى ماكنش باين عليه
سكره : هو كدا كان بيخاف من الحسد .. هههههه
محمد : بصلها : بقيتى من الاغنياء يا سكر
سكر ضربت على إيده : كلنا فقراء إلى الله يا اخ محمد . ربى إنى لما أنزلت إلى من خير فقير
محمد : لو انتى شاطره دعوة مين دى
سكره : سيدنا موسى عليه السلام
محمد : كدا انتى مذاكره .. ناويه تعملى إيه فى الفلوس
سكره : حطهالى فى حساب بإسمى فى البنك وإن شاء الله اول حاجه ها اعملها ها احج ليا ولأبويااا اهو حتى يكون له نصيب من الفلوس دى .. وعايزا اجيب عربيه
محمد : إن شاء الله بكرا أخدك ونروح سوا أفتحى الحساب وحطيهم ..  والحج ان شاء الله انا وانتى نطلع مع بعض يا حبيبتى .. شال إيديها باسها وغمز لها .. وحشتينى
سكره نامت على دراعه : وأنت كمان
محمد : على فكره قبل ما أنسى عصمت بينقل نص ثروته بأسمك أنتى ويونس وبيطلع حق زنوبه فلوس عشان بيقول حق زيد دخل فى حكم الورث لهم  ..  خلانى كلمت المحامى وجاله لما وصلتك وبيقولى كل الاوراق هاتكون جاهزه بكرا .. وغالبا كدا ها يتفق معاكى تجيبى يونس وزنوبه يتكلم معاكو
سكره بإهتمام : هو قالك
محمد ؛ لمح ان لازم كل واحد يعرف حقه ومحتاج يقعد معاكو
سكره بإستغراب : بس إزاى قدر يستغنى عن نص ثروته مره واحده وكمان بيديهلنا ليه فعلا كل حق ابويا زى ماقال يعنى ظلم بابا
محمد : كل حاجه ها نعرفها مستعجله لييييه .. ابتسم .. انا فرحان عشانك بس يارب ما تتغرى علينا وتشوفى نفسك
سكره بصتله : يارب انت ما تتغير يا محمد وتفضل زى مانت بقلبك الطيب وحبك ليا
محمد ضمها وباس راسها : حبيبتى إحنا نروح نقف قدام  الكعبه وندعى عشان هو دا الحل الوحيد إلا يخلى النفوس ما تشيلش من بعض
سكره : ههههههه باشى على رأى مليكه
محمد : مليكه دى نفسى أكلها علقه اتوبها وشكلى ها أعملها قريب التربيه الحديثه مش نافعه معاها
سكره شهقت واتعدلت : تاكل مين علقه دانا اكل إلا يجى جمبها
محمد شاور : شفتى انا قولت لازم نروح ندعى قدام الكعبه عشان يحوء فيكو .. قالبين وغدارين ملكوش أمان  مليكه وسكره
سكره : مانت بتستفزنى .  وبعدين هى نيتها سليمه خد بالنيه
محمد : ولو جابت اجله مين ها يحاسبنا بالنيه ياختى
سكره : ها يشوفوها طفله بريئه مسكينه هايقولو عفونا عنك
محمد : بريئه .. دا قربت تاكل بندق يا سكر انا شاكك انها عضته عشان تاخد منه السودانى
سكره : هههههههههه.. ههههههه بجد ههه بتتكلم بجد
محمد بضحكه : ركبت فوقه ونزلت براسها طالعه فى بوئها السودانى وشالت بندق رامته والمصيبه انه بيروح يجيب غيره  ويرجع لها تانى اتنين متخلفين
سكره هزت راسها : حبيبتى يا ملوكه شاطره خليها تاخد حقها من بوء السبع
محمد بصلها ورجع بص للطريق  : هو انا بكلم مين .. اخ يارب بجد إيدى بتاكلنى ولازم تتضربو لازم مفيش حل
****
نورا بقى قضت اجمل ايام عمرها مع حااازم واخيرا رجعو شقتهم بعد ما اتفسحو مع بعض لما شبعووو .. بس حازم واقف حيران قدامها مش عارف يعمل إيه او مالها قاعده على الكنبه بتعيط وحازم رايح جاااى ماسك دماغه إلا هاتطق : يابنتى قوليلى مالك طب حصل إيه زعلك قوووى كدا
نورا بصتله وبتتكلم بصوت رفيع : أنت إلا زعلتنى
حازم بدهشه شاور على نفسه : أناااا .. أنا يانورا .. بيفكر .. طب عملت إيه فيكى عينك ورمت من العياط يمكن ما أقصدش
نورا بتذمر : قولتلى أعملى غدا .. إهئ إهئ .. ما اتخيلتش أبدا أبدا تقولها أو ممكن تطلع من بوئك .. نطرت إيديها .. بالسهوله دى ياحازم .. حطت إيديها على صدرها .. للدرجه دى هونت عليك ماكنش العشم يابن بلدى  إهئ إهئ
حازم تنح ومبرق ومش مستوعب هو عمل إيه أو قال إيه يزعلها بيفكر بصوت مسموع وهى بصاله بنص عين : غدا وأزاى قولتها وطلعت منى .. هى كلمه عيب .. يمكن عيب ياحازم فى دبى وهى أختلط عليها الأمر ماهى سايبه مصر بقالها كتير بردو ونسيت إن فى فطار وغدا وعشا وطفاصه بين الواجبات  صلح غلطتك .. أبتسم ورفع راسه وهى نزلت وشها .. حبيبتى  انتى فهمتى إيه أنا مقصدش طبعااا لايمكن يكون إلا فى بالك
نورا اتعدلت وهى مبتسمه : بجد يازومى كنت عارفه إنك لايمكن تقصدها
حازم هز راسه وهى بنفس الأبتسامه : لايمكن طبعااا دى طلعت غلطه أنا قصدى مم أكل يعنى قومى حضرى أكل يعنى حطى حله على النار وبدعى بقى إيشى بط .. فراخ .. محشى مايضرش هز إيده بنفى مابيتخنيش .. وياسلام .. وبيمط الكلمه  يااااا سلاااام يانورا على صنية مكرونه باشمل سايحه ودايبه دوب كدا مع اللحمه والصوص الأبيض ياااه وحشنى أبن اللذينه .. ضحك ونطر إيده ..أظن كدا فهمتى
نورا رفعت راسها وعيطت بصوت عالى قلبها كان هايقف من إلا بتسمعه هى اخرها تاكل وبس مابتعرفش تعمل ولا صنف  : كنت عارفه إنك قاسى وغدار وكذبت نفسى إزاى ياربى يطلب طلب زى دا  إزاى أنا قلبى حزين..  حزين قوى
حازم  بعصبيه : فى إيه أطلبه أزاى عشان مايدايقكيش ولا يزعلك
نورا شاورت على الفون : بالفون حضرتك تتصل ألووو انا و مراتى جعانين عندكو إيه ناكلووو وبس وبتمسح إيديها فى بعض  فى أسهل من كدا
حازم اتنفض : نعم .. أطلب مين
نورا : دليفرى هو مفيش هنا دليفرى
حازم بضحكه رخمه هز راسه : لاء مفيش
نورا قامت : خمس دقايق ألبس وأجيلك ننزل نتغدى ياقلبى وبتبعتله بوسه فى الهوا وداخله جرى مسكها من دراعها : تعالى هنااا
نورا : إيه
حازم : أنا عايز أكل من إيدك أنتى
نورا نطرت إيده : لايمكن أنت بتقولها تانى اخواتنااا وقرايبنا السودانين عندهم الست تقعد خمس سنين ماتطبخش ولا تدخل مطبخ هما أحسن مننا فى إيه كلنا اخوه  .. كل الفرق إلا بينااا وبينهم خط ومسحناه ولازم ولبد أعمل زيهم طبعااا عارف كدا
حازم بنفى : ولاعمرى سمعت حتى .. بينقل إيده ..  ستات بتكنس وتمسح وتروق وتطبخ عادى جدا  فى السودان دى إشاعه وأكيد انتى إلا مطلعاها عليهم
نورا  : يبقى اكيد إخواتنا الصومالين
حازم قرب عليها وبتحذير : نورا صومالى لما يلهفك أنا عايز أكل أكلينى منك لله انا على لحم بطنى من إمبارح وها أبقى صومالى بجد أو زومبى أكل من لحمك وأشرب من دمك
نورا بتذمر : بصراحه
حازم خبط على إيده جااامد : إيه
نورا مدت إيديها لقدامه : إيدى بتوجعنى ومش قادره خالص أخرى أقلى بيض وجبنه
حازم باصص على إيديها  ورجع بصلها : حرام عليكى جعان انا مستنى اللحظه دى من يوم الجواز لاء من سنين يابنتى  اكلينى يامفتريه عايز اتصل على أمى واعد لها الأصناف والهنا إلا انا فيه
نورا بحزم  : هما صنفين ياحازم المتاحين قدامك دلوقت  .. يابيض بالجبنه .. يابيض بالبسطرمه .. يابيض .. وهانحلى بيض بالبلح 
حازم حط إيده على بوئها وهز راسها جااامد : كفايه بيض اتنفخت حتى لما أحلى ها أحلى بالبيض إيه يا شيخه
نورا زقت إيده : خلاص خد الصنف التانى ودا كادووو من عندى .  بطاطس مسلوقه .. بطاطس محمره  .. كورت إيديها .. بطاطس كور .. بطاطس نص نص
حازم : هى البطاطس الصنيه إلا بالفراخ مش فى المنيو ولا اختياراتك ليييه ماهى بطاطس وإلا دى الإبن العاق
نورا : دا المتاح عندى حاليا .. شاورت على المطبخ ..  أدخل أكورلك كورتين بطاطس وأفقشلك عليهم بيضتين
حازم رفع صباعه لفوق وتعابير وشه رهيبه : منك لله أنتى وكورك والبيض فى ساعه واحده حسبى الله ونعمه الوكيل   .. جرس الباب رن طلعت تجرى طلع وراها ومسكها .. ادخلى جوا بمنظرك دا انتى عارفه مين جاااى
نورا بتذمر : هايكون مين غير مهند
حازم : إفردى مش هووو ياله على جوا ..راح فتح وابتسم .. اهلاااا .. أهلااا بأخو أستت ست فى العالم ست بتكور وتدى وبيزقل إيده فى الهوا
مهند ضمه : عريسنااا وينها اجمل وألطف عروس بالعالم
نورا قربت جرررى ونطت فى حضنه : مهندد حبيبى وحشتنى موووز .. موووز
حازم كور إيده تانى  : قصدها تقولك وحشتنى كور .. وحشتنى بيض بالبسطرمه ..خد التقيله .. وحشتنى بيض بالبلح يا راجل
مهند بهمس : صدمتيه للزلمه عرف بالمنيووو بكير يابنت
نورا بتأكيد : أيوا اخبى عليه يعنى .. همست ..  انت جايب إيه فى الشنطه دى
مهند أبتسم : أكل كتيرر طيب كل شى بتحبيه وبيسعد جلبك
نورا نطت وباسته وشالت الشنطه وبتجرى : زومى انا ها اجهزلك أحلى أكل حالا كل إلا نفسك فيه ياقلبى ولايكون عندك فكره
حازم قرب على مهند وبنص عين : أنت قولتلها إيه أنا بقنع فيها من الضهر للعصر تيجى انت تقنعها مابين العصر والمغرب فى ثانيه  وإيه الشنطه إلا لهفتها منك وجريت بيها 
مهند خبط على صدر حازم : بنرحب فيك عريسنااا العروس ماينفع تطبخ اتركها
حازم تنح : حتى أنت طب مين هايطبخ سعتك أسيب مهنة الطب وأشتغل طباخ أريحلى
مهند شاور على نفسه : انا راح أطبخلك اطيب أكل
حازم : نعم أنت لييبه
مهند براحه خالص قرب منه : نورا إيديها عم توجعها هيك كانت عم تقولى بتريح إيشى سنه سنتين وبعدين بتطبخلك اطيب الأكلات وأشهاها
حازم عيط عياط مصطنع : هاتريح إيديها سنه سنتين وياترى بقى بوئنا هايريح هو والمعده معاها والا إيه .. نطر إيده لجوا .. أدخل يا راجل أدخل  ودخلو على الأنتريه قاااعدين بيتكلموو وبدء مهند يعرف حازم إن نورا للأسف مابتعرفش تطبخ أبدا وأخيرها حاجات بسيطه جدا وهو إلا كان بيقوم بمهمة الأكل .. وحازم اتدايق جدا جدا وحاول بقدر الإمكان يدارى دا .. مر الوقت ونورا جمب حازم على السرير حاساه متجاهلها أو مش معاها
نورا بحب وتعلق بحازم : مالك يازومى مدايق من إيه
حازم أتعدل وبمهاجمه : مش عارفه يا نورا
نورا أتعدلت وسانده بإيديها اتكلمت بخضه : لا والله ما واخده بالى
حازم بزعل : ماعرفش لاء أتصدمت أزاى مابتعرفيش تعملى أكل أنا بقالى سنين عايش على الدليفرى وأكل المطاعم وعكى إلا بيوجع بطنى ماصدقت أستقر واتجوز تقوم الهانم تطلع هى كمان عايشه على الدليفرى يعنى مش هاناكل لقمه نضيفه تسند صحتنا
نورا بزعل دموعها نزلت : أنا حاولت كتير ماعرفتش ياحازم والله الأكل بيبوظ منى
حازم بعصبيه : يبوظ ألف مره وها تتعلمى إنما نفضل كدا لاء وألف لاء أنا أساس جوازى واحده ست تهتم بيا وبأكلى وشربى
نورا بصدمه شاورت على نفسها : يعنى مش متجوزنى عشان شخصى عشان بتحب نورا وعايزها
حازم لف بصلها : وإفردى اتجوزتك عشان بحبك دا يمنع تكونى ست شاطره تسعدى جوزك
نورا بعصبيه : أنا ست وست الستات  فاااهم مليون واحده بتتعلم حاجات كتير بعد الجواز مش حاجه تقطم الوسط أو تهد الدنيااا حضرتك حسستنى إنى عملت جريمه فى حقك قاامت من على السرير وبصتله .. أكل
حازم بعصبيه : أنتى راحه فين
نورا : فى داهيه ها أسيبك تراجع حسابتك مع نفسك وأنا ها أعاقب نفسى عشان أتجوزت قبل ما أتعلم الأكل يا دكتور .. راحت أوضة الأطفال وقعدت فيها وبتعيط جااامد وكاتمه صوتها بالمخده ..
حازم بعد شويه قام راح لها وشد المخده إلا حاطها على وشها : بتعملى إيه
نورا زقت إيده وبصتله بعيون حمرا دم ودموع كتيررر : ملكش دعوه سيبنى فى حالى .. الصبح أنا ها أروح على شقتى ولما اتعلم الأكل ها أجيلك
حازم شد إيديها : بطلى هبل انا مدايق اه بس مش لدرجة إنك تزعلى وتمشى وتعملى حوار  .. يانورا بجد انا تعبت من أكل برا كنت بحلم باليوم إلا ها اتجوز فيه وأكل من إيد مراتى مفهاش حاجه
نورا : حقك أنا مش ها أنكره وعشان دا حقك أنا ها أمشى لما أتعلم الطبخ ها أرجع ما أتعلمتش ولا عرفت يبقى كل واحد يروح لحاله وشوف واحده تعرف تطبخ
حازم خد نفس طويل : أسلوبك مستفز على فكره أنا لحقت اتجوزك لما أتجوز غيرك .. قرب منها وباس راسها .. بطنى بتسوسو  أسيبها تسوسو وإلا اطمن على مستقبلها ..وبعدين ياستى أنا مش طايقك أاااه بس ماقدرش أستغنى عنك ولا ياخد غيرك مكان فى قلبى ولا حياااتى
نورا بتزقه براحه : أبعد عنى ماتضحكش عليا بكلمتين
حازم أبتسم : هو انا ورايا غير إنى بضحك عليكى يا هبله
نورا أبتسمت : ماتضحكنيش لو سمحت أنا لايمكن ها أتراجع
حازم هزها وهو بيضحك وبيبوس فى وشها : اتراجع ياواد ياتقيل بالله تتراجع هاتروح لمهندد وتملى كرشك وتسيبى كرش حبيبك جعان دانا أجى اقعد فوقك وفوق مهند وعلى قلبك غتاته وتناحه ولا أجوع يوووم
نورا ضحكت غصب عنها : مفجوووع
حازم ضحك هو كمان : محروم يأخت مش مفجوم .. بقولك إيه إحنا نجيب أمى هنااا وناكل بقى
نورا ضحكت بصوت عالى : قصدك نتهزق بقى .. زقته جاامد .. أوعى ياحازم فطستنى الله يسامحك كابس على نفسى
حازم بيشدها : قومى جاتك ضربه فى بوذك  مابتصدقى تتقمصى انا مفيش فيا حيل أصالح كل دقيقه والتانيه مره عليكى ومره عليااا أنا صالحتك الأسبوع دا قمصة الأسبوع الجاى عليكى فاهمه
نورا رفعت كتف :  بعينك طبعااا كل المصلاحات عليك أنا عليا القمص ..
حازم بضحك : قويه ومفتريه  .. تعالى نرجع اوضتنا دى اوضة عيالنا ان شاء الله
نورا قامت وراحت الاوضه التانيه قاعده معاه على السرير بصلها وبيسألها : يعنى انت  فى نيتك تتعلمى الطبخ
نورا بتأكيد : إن شاء الله انا حاولت كتير بس ها أحاول تانى ..  بصراحه كنت بخاف أصلى ببهدل الدنيا والنتيجه بتطلع استغفر الله
حازم شاور : أنتى بتخافى أنتى .. بقولك إيه بجد  مره عيشتى احساس انك تكونى خايفه على حاجه أو من حاجه
نورا بصتله ؛ إشمعنا السؤال دا
حازم : عادى يعنى يمكن تخافى على إحساسى   بطمن
نورا ضحكت وحطت إيديها على صدره ها اقولك
المره الوحيده إلا خوفت منها قوى وقعدت أعيط جااامد لدرجه تقطع قلبك
حازم بفضول : إيه حصل للدرجه دى
نورا بإندماج : جالى فى شعرى عووو يا حازم تخيل
حازم بصدمه : شعرك أتلبس .. بيلف إيده عليها كلها .. ساب كل حاجه فيكى ولبس شعرك لوحده أما عفريت قليل الذوق صحيح
نورا ضربت إيده : عفريت إيه بقولك عووو وعامله تنتوفه بصباعها قدام عيونه .. شعرررى أتملى عو كتير وأنا أعيييط قوووى خوفت ياكلنى
حازم قلب وشه : عو ياكلك وأد التنتوفه .. اااه يارب  .. طب عباره عن إيه العو دا عشان أنا سايب مصر من فتره كبيره .. تقريبا كدا من ساعة ماجالك العو فى شعرك
نورا : يابنى عو إلا بيمشى وله رجول كتير كدا وشنب كذا شنب
حازم قلب وشه : شنب فى العووو .. برق .. يا مصيبتك يانورا دماغك صرصرت ابو شنب سكنها وأنا أقول الدماغ دى مش طبيعيه ليييه
نورا : يواه بقى زهقتنى هو فى حد ميعرفش العوو الاسود دا ..  دا مقرف قوى وبيعض بياكلنى فى شعرى
حازم قلب وشه  : قمل قصدك قمل
نورا ضمت حواجبها : اه هو دا
حازم نطر إيده : ماتقولى قمل جاتك القرف خنقتينى .. عووو إيه وهباب إيه
نورا : اصلا طول عمرى أسمع من ماما تقول عليه عووو بتعلمنى ازاى اهتم بشعرى ونفسى وكانت تحذرنى منه وتخوفنى بس لما مشيت وسابتنى بقى جالى عو من زمايلى فى المدرسه وطبعااا ستات البيت مفروسين منى كنت أعيط وأهرش فى راسى يقولوى أحسن تستاهلى خليه ياكلك .. مدت بوذها .. أكتر فتره تعبت فيها
حازم : قصدك قملتى فيها
نورا : انت بتضحك ماهو لو كان معايا ماما فى الوقت دا مكنتش وصلت لكدا جدو وبابا اتخانقو معاهم وقعدوهم ينضفو شعرى وجدو حلف لو الموضوع دا اتكرر تانى مفيش ست هاتقعد فى البيت كان بيخاف على شعرى وطوله وجماله
حازم : هو جدك دا كان فارسهم بيكى
نورا ابتسمت  :  تقريبا كدا مفيش حد فيهم بيطقنى طب هو الحب بإيدى بذمتك
حازم ضحك جااامد : كياده وسماويه وتقوليلى حب يا شيخه حرام عليكى
نورا أبتسمت : أبدا عمرى ماكنت كدا بالعكس تماما إنما الغيره تعمل أكتر من كدا مفيش مبرر يخليك تغير من طفله محتاجه رعايه وإهتمام
حازم بتأكيد : فعلا من إلا شفته مع محمد بأكد كلامك بس سيبك أنتى إيه حكاية العو يابتاعت اللغه العربيه
نورا ضحكت وضربت على إيده : أنا مالى لو ثقافتكم على قدها أمى قالتلى أسمه عو يبقى عوووو تقريبا كدا كانت بتخوفنى بيه  فا لزقت فى دماغى ان دا يكون أسمه
حازم شهق وبص على راسها
نورا بخضه حطت إيديها على شعرها : إيه يا حازم فى إيه
حازم فرد إيده : عووووووو اد كدا ماشى وواخد العوايه بتاعته أهووو
نورا : ههههههه رخم والله خضتنى
حازم قرب عليها بينكشها : بس يا أم عووو أنا اتجوز واحده بعووو مالها إلا من غير عو مالها
نورا بدلع : بذمتك هاتلاقى عو حلو كدا
حازم بيتمايل مع حركتها : أبدا ابدا هناك فرق فى العوات
نورا ضحكت وميلت عليييه وهو خدها فى حضنه وناااام
** 
مها ماشيه جمب أمجد : ماتمد يا أمجد شويه مالك كدا
أمجد : يابنتى مانركب أنتى غاويه تعب وخلاص
مها : لاء انا عايزا أمشى شويه هو إحنا كل يوم بنخرج وبعدين دا شارع وهانكون قدام شقة سكر
أمجد هز راسه : ماشى يا مها .. بقولك إيه أجيب حاجه تانيه غير علبة الحلويات دى
مها هزت راسها بنفى : لا يا حبيبى كدا حلو قوى والحمد لله مش ولادك راح لها زيها
أمجد : ماشى يا مها بس بردو بنشرف بنتك قدام جوزها وعمها
مها نطرت إيديها : العيال كلها زى بعض احنا بنلف عليهم كلهم من الصبح مش هانميز حد .. ضحكت بس فاطمه دى حتة سكر ذوق انس طالع جااامد.
أمجد : ههههههه ربنا يهدى سره اهم حاجه .. ضحك ..  شوفتيها وهى بتقولى عمو هاااج نور عمو
مها ضحكت جااامد : أسكت يا أمجد كل ما تكلم أنس ها أموت وافهم كلمه واحده مفيش أكيد الإنجليزى بتاعنا مضروب
أمجد : يابنتى ما الإنجليزى بتاعهم لكنات مختلفه برضووو زى عندنا كدا .. الا بيتكلم صعيدى .. نوبى .. ريفى .. بندرى .. وهكذا كل مكان وله طريقه بيتكلم بيها
مها قربت ومدت كام خطوه وبتنادى : سلوى
سكره لفت وهى بتنزل من العربيه وأبتسمت : ماما يا محمد وعمو أمجد
محمد نزل وقفل العربيه وقفو سلمو عليهم وطلعو مع بعض فووووق
مها ماسكها على السلم : بتقولى إيه انتى
سكره : بقولك يا ماما يونس إدانى حقى فى فلوس بابا الا قولتلك عليها
مها أبتسمت : وطلع كااام بقى
سكره ضحكت : كتير يا ماما ماشاء الله وباستها .. كتير يا وش السعد .. همست .. تعالى جوا نتكلم عشان عمى عصمت مليكه مطلعه عينه
مها دخلت وهى مبسوطه لسكره قوووى مش مصدقه ان اخيرا ربنا عوضها خير وبتاخد حقها الا اتحرمت منه دخلو على عصمت سلمو عليه ومحمد عرفه على مها وأمجد
عصمت هز راسه : يعنى أنتى مرات زيد الاولانيه
مها بصت لأمجد وردت بتوتر : أيوا أناااا
عصمت هز راسه : اتطلقتى منه ليييه .. بص لأمجد .. معلش مش بدايقك بس عايز اعرف حياته كان شكلها إيه
أمجد بصله وأبتسم : عادى ولا يهمك زيد خلاص الله يرحمه بس ملوش لازمه نقلب فى القديم
عصمت بإصرار : عايز أعرف بس
محمد بصلها : معلش يا مها ريحيه
سكر بصت لمحمد وأبتسمت : ممكن تيجى معايااا يا حبيبى عايزاك فى حاجه
محمد هز راسه ومشى معاها : خييير
سكره بقلق : معلش عشان ماما ها تتحرج منك  تعالى ندخل لمليكه نصالحها شكلها زعلانه دى ما طلعتش استقبلتنى
محمد بصلها : سكر انتى بتخافى منى  .. يعنى فاكره انى ممكن اعايرك بحاجه
سكره هزت راسها ودموعها نزلت : لاء اصل كلنا عيوب يا محمد كلنا مفيش حد فينا برئ وانا مش عايزا اعرى ابويا قدامك هو بين إيدين ربنا
محمد برغم انه زعل بس هز راسه وسكت وإحترم رغبتها  دخلو لمليكه لقئوها نايمه وحاضنه بندق قوووى وحاطه راسها عليه
سكره ابتسمت
محمد بهمس : هو مش كدا يموت
سكرت هزت راسها بنفى : هو بيموت بس فى حبها .. عايزين نجوزه
محمد مط شفايفه : اجوز مين بندق ليييه هو انا ناقص هبل
سكره : لازم يتجوز حرام
محمد : ان شاء الله .. تعالى نقعد برا .   بعد وقت عصمت بعت لمحمد وسكر بعد ما سمع كل حاجه من مها وأمجد .. كلم سكر : تعالى يا بنتى
سكر بأدب : نعم يا عمى
عصمت : أتصلى على زنوبه وأخوكى يونس خليهم يجو حالا
سكر بصت لمحمد بإستفهام
عصمت : كلميهم يا سكر فى وجودكم كلكم هنا  كل إلا كان بينى وبين زيد والا حصل زمان والا حصل مع محمد كل دا ها يتفهم ويتحل لغزه إنهارده بالنسبه ليكووو .. رفع إيده .. انا الحمد لله برئت نفسى من حقكم فى فلوسه وورثه من ابويا إنهارده  ..
سكره هزت راسها : حاضررر فعلا أتصلت بيونس وزنوبه وبعد وقت كبير كانوووو وصلو .. عصمت خرج برا فى الصاله والكل قاااعد بيبصلهم  وبدء يتكلم
❤❤❤🧡🧡💛💛
بقلم : لبنى طارق
💚💙💜🤎🤎🤎🤎
إن شاء الله أخر حلقه و الاخيره يوم السبت .. واسفه انى مش متابعه مع حبايبى الا متفاعلين وبينزلو ريفيوهات يومياااا بشكركم من قلبى الف شكر ولكل حد قال كلمه من قلبه لياااا