حفار القبور💀مكتملة💀

💀الجزء 52💀

💀ﺣﻔﺎﺭ ﺍﻟﻘﺒﻮﺭ💀
🔰El Yakut
  ▫Part 52

جلس خليل حدى فاطمة شاد فواسو كيفكر... بانت ليه سخفات يعني فقدات الوعي... مغيقدرش يتشاور معاها... بقي غي بوحدو كيفكر بحال شي حمق و يعصر فمخو.
التماسيح كانو ضايرين بيهم من كل ناحية..

تنهد بانفعال.... جواب اللغز الأول كان هو الانسلن... و جواب اللغز الثاني كان هو النهر... يعني اللغز الثالث الحل ديالو غالبا غايكون مرتابط بالاجوبة اللولين.
و لكن السؤال هو شنو العلاقة لي غاتجمع الانسان و النهر و هاد اللغز المفقود.
شد راسو بين يديه و هو كيفكر بعصبية بالغة... دازت عشر دقائق و باقي مالقاش الجواب.
فاطمة حداه كانت صفرااااا و كتترعد... راسها طايب كيشوي... عجز يدير ليها شي حاجة.. كيشوفها فديك الحالة قلبو كيضرو.

شد عود و بدى كيرسم فالتراب... رسم انسان...و رسم نهر قدامو... و فكر فالحاجة لي تقدر تربط الانسان بالنهر...
الجواب ديال اللغز الثالث خاص يربط الألغاز الأولانيين بجوج.

غمض عينيه كيفكر... باقي خمس دقائق... التماسيح كيوجدو راسهم باش ينقضو عليه...
فجأة حل عينيه بالزربة كيلهث... و العرق كيقطر من جبهتو...

خليل بالغوات: وححشش النهر... فيينك؟ راني لقيت الجواااااب.
تكونت دوامة ديال الماء خرج من وسط منها الاناكوندا و هو كيخرج لسانو و قرب راسو من خليل كيشوف فيه بعينيه البلورية بخبث.

الوحش: لقيتي الجواب و لا؟ هههه
خليل بانفعال: لقييت الجواب... الجواب هو نتا.. الجواب هو وحش النهر... نتا لي كنتي وحيد من الولادة و ديما غاتبقى وحيد.

بدى وحش النهر كيحرك راسو يمين يسار و كيغوت:  كيييفاااش تجرأتي تغلبني... أنا لي ماعمر شي حد قدر يفلت مني... كيييفااش؟
خليل بعجرفة: و دابا جبد لينا المركب خلينا نقطعو هاد النهر راني محتاج للنبتة...
وحش النهر: جلس فوق ضهر تمساح من التماسيح ديالي و جلس لي معاك تا هي...  غايخدموكم و يوصلوكم للضفة الأخرى..

دار خليل الشيء لي گاليه وحش النهر و هو راد بالو علي فاطمة لاتمشي تطيح من فوق ضهر التمساح... عاد وصلو للضفة الأخرى.
مشا  كيجري جاب ديك النبتة و فرتتها بين يديك... بدا كيفيق فاطمة بالشوية... بعدما حلات عينيها خشاها ليها ففمها كيأمرها باش تسرطها.. و هادشي لي دارت.

بينما وحش النهر كان باقي كيشوف فيهم بحقد.
خليل: واش هادشي لي وكلتها كافي و لا نزيد؟
وحش النهر: كافي و وافي
خليل: شحال خاص ديال الوقت باش تبرى...

ماجاوبوش وحش النهر و هبط تحت الماء مخلي غي لعجاج... واحد خليل كرز على يديه.. ماعندو فين يمشي من هاد الجزيرة فهاد الحالة... بان ليه مركب خرج من أعماق النهر..  عرف بلي هادي هي المكافأة ديال وحش النهر حيت قدر يحل الأحاجي.

جر المركب لي حس بيه نوعا ما خفيف و ربطو حدى الشجرة... هز فاطمة فرش ليها بلاصة بأوراق الأشجار و تكي حداها عيااان لحمو كامل كيضرو... غي غمض عينيه مشى فسابع نومة.

بينما فاطمة لي كانت ناعسة كتحلم بدادا طامو لابسا البيض و كتودعها.
دادا طامو: بنيتي سمعيني مزيان... داك الراجل لي معاك شدي فيه بسنانك... تاحد ماغايدوم ليك... و كيشتي أنا تانا مشيت عند الله.... فهاد الزمان أبنتي الرجل بالهمة أما اللحية راها حتى عند العتروس.. ولكن هاد الراجل لي لاقاك ربي بيه غايكون فكاك وحايلك... و السند ديالك...
إيوا ابنتي تدوزي بخير... و ترحمي على روح جداتك و خودي لي حقي فلي كان حيلة و سباب.

فاقت فاطمة مفزوعة قلبها غايخرج من بلاصتو و دموع محجرين فعينيها كتشوف فالفراغ...
دابا تأكدت بلي  الشخص الوحيد لي كان عندها فهاد الحياة  معاونها و مساندها... مات...
دادا طامو مشات عند الله!
شكون بقا ليها اذن؟
ضارت من حولها بان ليها خليل ناعس و حاط راسو على فخاضها.
حطات يديها على شعرو كتدوز عليه... دابا ماشي وقت البكاء مابغاتش تخلعو عليها... أكيد عرفات دابا بلي هاد الانسان لي قدامها ثمين يزاف بالنسبة ليها ماغايعوضو حد.
شدات ليه يديه و باستها ليه بالخف قبل مايعيق...عاد بدات كتفيق فسه بالشوية.
ناض عينه مجبدين كيشوف فيها مفجوع... و عنقها بالجهد عندو كيقلب ليها فوجها و فجميع انحاء جسمها مامتيقش..  كيضحك بحال شي حمق و يحمد الله.
بدات كتضحك على حركاتو و تشوف فيه بتعجب من ردة فعلو..
فاطمة بمرح: صافي أخليل هانا حداك.. مامتش... الحمد الله رجعات فيا الروح.
بقاو شحال كيشوفو فبعضياتهم عاد ناضو و تعاونو باش يديو داك القارب للبحر و انطلقت الرحلة ديالهم للمجهول.

هههه واش عارفين آش باقي كيتسناكم و لا لا... الجزيرة لي غايزوروها غاتكون هي الجزيرة الأخيرة.. وجدو راسكم مزيااان😁
يتبع 💜