(الحلقه السابعه ) ❤ الجزء الثالث
........
مى : حاجه ايه . انطق .. اتكلم بقا
احمد : انا بصراحه ب....
بيرى : مساء الخير
احمد : ليه ؟ مساء الخير ليه يعنى دلوقتى ؟ اشمعنى يعنى
بيرى : هو فيه ايه
احمد : ايه ده بيرى ؟ تعالى يا بيرى اهلا وسهلا تعالى اتفضلى . دى الانسه مى زميلتنا ف الشركه
مى : ( بتبص ل احمد وبدات رإكشناتها تتغير ) اهلا يا حبيبتى
بيرى : اهلا بيكى يا مى
مى : حضرتك جميله اوى ماشاء الله . انتى كنتى ف الشركه الصبح النهارده
بيرى : اه كنت موجوده
مى : شوفتك انا . حتى سألت عليك قالولى ان حضرتك موديل . بصراحه زى القمر واكيد مش هيجيبو احلى من حضرتك
بيرى : متشكره جدا يا مى انتى اللى زى القمر .. ( بتبص ل مى بصات غيره ) طب ايه يا احمد هنكنسل ميعادنا ولا ايه
احمد : ميعاد ايه ؟
بيرى : ميعادنا مش انت متصل عليا قولتلى عاوزك
احمد : مين انا ؟ ( بيبص ل مى ) امتى ده .. اه اه افتكرت ساعة ما قولتلك هاتى العقود بتاعتك ابص عليها . صح .
بيرى : عقود ايه ؟
احمد : يا بنتى العقود .. المهم سيبك انتى تشربى ايه
بيرى : ولا حاجه
احمد : لا يمكن تشربى ايه
بيرى : استنى شويه بقا عشان ملك جايه كمان خمسه كده .... واحشنا انت والله ومن زمان ماقعدناش سوا ( بتبص ل مى وبتحاول تفرسها )
مى : طيب انا هستاذنكو بقي
بيرى : ليه يا حبيبتى مانتى قاعده . القعده حلوه بيكى والله
مى : لا معلش عشان تكونو على راحتكو .. اشوفك على خير بقا يا استاذ احمد .. وبالنسبه للموضوع اللى كلمت حضرتك فيه ف خلاص انا عرفت انا هعمل ايه لان كل شئ يعتبر انتهى
احمد : انتهى ايه بس لسا فيه شويه كلام . و .. و . وشويه نصايح كده حابب اقولهالك
مى : لا متشكره جدا ماتتعبش نفسك انا خلاص هنهى الموضوع وكأن شئ لم يكن
احمد : يا مى اقعدى بس كملى قهوتك
مى : متشكره .. عن اذنكو ...
احمد : يا مى .. يا مى استنى
عاجبك كده اهى مشيت
بيرى : ماتمشي ياعم وايه المشكله . وبعدين انت مقابلها صدفه ولا مديها ميعاد .. وموضوع ايه اللى كنتو بتتكلمو فيه
احمد : انتى مال أهلك انتى دلوقتى
بيرى : الله ! انتى عصبي ليه دلوقتى .. كلمتنى وقولتلى تعالى انا عاوزك عشان نخلص عقد الشغل قومت متصله على ملك قولتلها تعالى خدينى عشان عربيتى ف التوكيل بتتصلح .. فيها ايه . ولا انا المفروض كنت اتأخر شويه . عشان تحاول تظبط المزه الجديده
احمد : تصدقى انك قليلة الادب .. دى مش زى اى واحده يا ماما فوقى لنفسك .. وماتتكلميش عليها كلمه زياده .. اقولك على حاجه . انا قايم وسايبلك المكان ..
بيرى : يا احممممد .. احممممممد . ماتنسيبنيش وانا بكلمك . يا احمد
ملك : ايه ده ازيك يا احمد
احمد : خشى لصاحبتك مستنياك . .
...........
( مى بتركب تاكسي وعينيها غرقانه عياط وخاطرها مكسور وبتروح على البيت )
هذه الرواية للكاتب أحمد سعد وتم نشرها علي بيدج قصص و روايات للناشر محمد فريد
...........
( الساعه 12 بالليل )
ليلى : الو ! سالى
سالى : ايه يا لولا ..
ليلى : البت مى فين . تليفونها مقفول .
سالى : انا بردو مش عارفه اوصلها .. وخايفه ارن على مامتها لاحسن تحس بحاجه
ليلى : وبعدين بقا ف القلق ده .. حتى احمد اخويا لسا ماجاش وتليفونه مفتوح وكل حاجه بس مابيردش على حد ..
سالى : يكونش اتخانقوا طيب
ليلى : هما لحقوا يتخانقوا .. هو لسا اساسا فيه بينهم حاجه عشان يتخانقوا .. انا هبعت رساله لاحمد اخويا اقوله ان ماما عاوزه تكلمك اشوف هيعمل ايه . وانتى ابعتيلى رقم مامت مى على الواتس عشان هكلمها اسالها عليها
سالى : حاضر
........
( ليلى بتبعت رساله ل احمد ان والدته عاوزاه ضرورى وعاوزه تتطمن عليه ... بيقوم متصل عليها )
احمد : الو !
ليلى : ايه يا احمد انت فين
احمد : بره يا ليلى ... شويه وجاي . طمنى ماما يا حبيبتى انا نصايه كده ولا حاجه وجاى
ليلى : انت كويس يعنى بجد
احمد : اه يا حبيبتى خير ..
ليلى : ايه الصوت اللى جنبك ده بتقول ايه مش سامعه
احمد : ده مطعم تقريبا فاتح جديد وعاملين زفه وهيصه عشان الافتتاح . وانا قاعد مع جماعه اصحابي كده وشويه وهاجى
ليلى : ماشي يا حبيبى .. خلى بالك من نفسك
احمد : حاضر . سلام
...........
ملك : وبعدين بقا انتى من ساعة ما رجعتى من بره وانتى عماله تكسرى ف كل حاجه اهدى
بيرى : اهدى ايه ؟ انتى ماشوفتيش نظراته ليها كانت عامله ازاى .. النظرات دى انا ماشوفتهاش غير لواحده بس .. فيروز حبيبته القديمه .. وماشوفتوش بص لواحده تانيه البصات دى غير للبنت دى بس ..... معقوله البت دى احمد بيحبها
ملك : بيحب ايه يا بنتى بس ... دى تلاقيها سكه جديده وكان قاعد بيظبط البنت واتضايق بس عشان انتى دخلتى عليه مره واحده
بيرى : لا لا دى مش قعده واحد كان بيظبط واحده . ده كان قاعد ومسهم فيها وغرقان انا شوفته قبل ما ادخل عليهم .. وحياة امى ما هيحصل ولا هتفكر تاخده منى .. بقولك ايه . انا عاوزه كل حاجه عن البنت دى
ملك : ودى هنعرفها ازاى بقي
بيرى : استنى ! الواد شادى شغال ف ال HR عند احمد .. هكلمه وهيجيبلى كل حاجه عنها . وهو ما هيصدق انى بكلمه اصلا
ملك : تمام ... شغل دماغك انت يا وحش وخليها تخرب ههههههههههه
بيرى : هى مفكره نفسها هتعمل نمره عليا
هذه الرواية للكاتب أحمد سعد وتم نشرها علي بيدج قصص و روايات للناشر محمد فريد
...........
ليلى : الو ! ازي حضرتك يا طنط
ام مى : اهلا بيك . مين معايا يا حبيبتى
ليلى : نسيتى صوتى . هههههههههه انا ليلى
ام مى : اهلا ! ازيك يا لولا . عامله ايه يا حبيبتى وحشانى
ليلى : انا بخير يا حبيبتى والله انتى اخبار صحتك ايه
ام مى : بخير يا حبيبتى ..
ليلى : طنط هى فين مى انا برن على تليفونها مقفول
ام مى : مى من ساعة ما جات من بره وهى ف اوضتها . بتقول سيبونى انام
ليلى : طيب يا حبيبتى معلش هستاذنك بس لو تدخليلها او تدخليلها التليفون عاوزاها ضرورى ف حاجه تبع الشغل وناسيه اعملها ازاى
ام مى : بس كده . حاضر خليكى معايا
مييييي .. يا مييييييي افتحى يا حبيبتى صاحبتك عاوزاكى على التليفون
مى : يا ماما انا عاوزه انام شويه
ام مى : معلش دى ليلى بتقول عاوزاك ضرورى
مى : طيب ! اقفلى انتى وانا هتصل عليها م تليفونى
ام مى : طيب يا لولا هى هترن عليك حالا من تليفونها
ليلى : كتر خيرك يا حبيبتى معلش تعبتك
.............
ليلى : الو !
مى : بقولك ايه يا ابله انتى . الجيم انتهى .. خلص خلاص لا عاوزه اعرف عن اخوك اى حاجه ولا عاوزه يكونلى علاقه بيه لا من قريب ولا من بعيد ... هو خلاص كده جاب اخره معايا . ده حتى ماهانش عليه زعلى وسابنى امشي بعد ما حرقلى دمى ... والزفته اللى جاتله دى قعدت وفضلت تسم جسمى بكلام زى الزفت . لولا انى مش عاوزه احرج اخوك ولا اصغره قدامها كنت بهدلتها ف قلب الكافيه
ليلى : اهدى بس كده وصلى ع النبى . وقوليلى الدوشه اللى عندك دى ايه ؟ واوعاكى تقوليلى ان ده مطعم جديد بيفتتحوه وعاملين زفه وهيصه . عشان هيجيلى جلطه
يتبع ......
الدنيا بتسخن والمواضيع بتحلو .. وشكلها كده هتخرب خالص او هتتصلح خالص 🤣🤣
هذه الرواية للكاتب أحمد سعد وتم نشرها علي بيدج قصص و روايات للناشر محمد فريد
