( الحلقه التاسعه )
.....
شهد : لا لا بتوع شغل جدا وبنات شاطره ماشاء الله عليها . ده حتى حصلت حاجه النهارده ضحكتنى هههههههههه
احمد : حاجه ايه ؟
شهد : الواد شريف ابن وليد ... شكل عينه على اللى اسمها مى دى وعاوز يخطبها
احمد : نعم يامه
شهد : ايه يا احمد فيه ايه
احمد : مافيش بس المفروض ان دى شركه محترمه مش نادى الناس رايحه تدور على عرايس فيه .... بقولك ايه اقفلى وماتفتحيش السيره دى مع حد وانا ليا تصريفه مع وليد وابنه .. اقفلى اقفلى
......
( تانى يوم امام باب الشركه )
مى : اهلا صباح الخير يا احمد
احمد : صباح النور يا مى . صباح النور يا انسه سالى
سالى : اهلا يا مستر احمد صباح الفل
مى : مالك زى ماتكون متنشن كده
احمد : مافيش
مى : لا بجد فيه حاجه ولا ايه
احمد : خالص . هيكون فيه ايه يعنى . عن اذنكو
............
( ف مكتب احمد )
احمد : داليا . اتصليلى على وليد خليه يجيلى وبسرعه ومش عاوز لكاعه
داليا : حاضر يا فندم
...
داليا : الو ! شهد
شهد : ايه يا دودو
داليا : وصلينى بمستر وليد الله يكرمك ده باينه يوم مهبب
شهد : ليه !
داليا : احمد متعصب وشكل الجنونه هتطلع علينا كلنا النهارده
شهد : هههههههه طيب هوصلك على مستر وليد حالا
وليد : الو !
داليا : مستر وليد . مستر احمد كان عاوز حضرتك دلوقتى
وليد : بدرى كده ؟ طيب تمام انا جايله ......عن اذنكو يا جماعه دلوقتى اما اشوف مستر احمد
عصام : بدرى ع الصبح ليه كده داحنا لسا مفطرناش هههههههههههه
وليد : الموضوع فيه إن . ربنا يستر
مى : ان شاء الله خير .. ( بتبص ل سالى وبتقلق )
هذه القصة للكاتب احمد سعد و تم نشرها علي بيدج قصص و روايات للناشر محمد فريد
..............
( ف مكتب احمد )
وليد : صباح الخير يا مستر احمد
احمد : اهلا يا مستر وليد صباح النور ... ممكن افهم حضرتك دى شركه ولا نادى ؟
وليد : لا شركه يا فندم . خير
احمد : شركه محترمه يعنى ولا شركه على قدها وماتستاهلش ان حد يبقي مُحترف فيها
وليد : لا من اكبر الشركات اللى ف مصر كلها بفضل تعب والدك وتعبك من بعده ف بنا اسم الشركه دى ... وانا اقدم موظف هنا وعارف اللى بقوله
احمد : طيب يا فندم ممكن افهم ابن حضرتك كان عندك ف المكتب امبارح بيعمل ايه ؟
وليد : شريف ؟ كان جاى بيجيبلى حاجه م البيت
احمد : وليييييييييييييد .. انا مش بعتبرك موظف شغال عندنا هنا . انا طول عمرى بعتبرك أخ لابويا الله يرحمه وكتفك كان ف كتفه العمر كله بس اى تهاون واستهتار ف الشركه دى مش هسمح بيه ... لا منك ولا من ابنك ولا م التخين .... انت فاهمنى ؟
احنا ف شركه محترمه .. محدش يقوم ويسيب مكتبه غير لحاجتين ... يإما رايح بردو يشوف شغله يإما رايح الحمام .. لكن الافندى ابنك يسيب شغله ويفضل ف مكتب الحسابات عندك اكتر من نص ساعه ويعاكس ويضايق زمايله ده مش هسمح بيه
وليد : يا فندم عاكس مين وضايق مين بس ... ده كان بيسلم على الزمايل الجداد ومكملش اكتر من 5 دقايق
احمد : ويسلم ليه ؟ هما من بقيت أهله ؟ ولا قرايبه ؟ ... الووو ! انتى يا ابله داليا اتصليلى على الاستاذ شريف خليه يجيلى حالا دلوقتى
داليا : حاضر يا فندم ..
احمد : المرادى انا هكتفى بلفت نظر لحضرتك يا مستر وليد . احنا مش ف جمعيه للزواج هنا .. وانت عارف وانا عارف انا اقصد ايه .... قسما بالله لو شوفت ابنك ده واقف من بعيد او من قريب مع البنتين دول او مع غيرهم من اى بنت تبع الشركه مش هيكون ليه مكان هنا ف الشركه ... لاهو ... ولا انت ... لو كلامى غلط ياريت تفهمنى الصح
وليد : لا حضرتك كلامك صح وعلى دماغى
شريف : صباح الخير يا فندم
احمد : اهلا .. ممكن تعرفنى يا استاذ شريف انت شغلك عباره عن ايه ف الشركه ؟
شريف : IT يا فندم
احمد : طب وال IT ده معلش اختصاصه ايه او شغله عباره عن ايه فهمنى
شريف : نظام الحمايه لسيستم الشركه كومبيوتر وكاميرات وكل ما هو خاص بهندسه البرمجيات
احمد : طيب تمام ... ايه اللى خلى حضرتك تقف حوالي نص ساعه ف مكتب الحسابات امبارح
شريف : ايه ! مافيش حضرتك ... كنت واقف مع بابا بس شويه
احمد : بابا دى تقولهاله ف البيت وانتو بتتعشوا .. هنا مافيش لا بابا ولا ماما ... تانى مره يا افندى مش عاوز اشوفك بره مكتبك ..... وقبل ما تتحرك وتروح تشيك على كومبيوتر او اى حاجه خاصه بشغلك ف الشركه هنا اكون على علم بيها ... ووالله العظيم لو شوفتك واقف مع اى بنت ف الشركه تانى وخصوصا البنات الجديده هنا مش عاوزك معايا هنا زى ما قولت لابوك ... فاهمنى ؟
شريف : خلاص يا فندم
احمد : مخصوم منك 5 ايام ...وأبوك اللى هيخصمهم بنفسه وهينزله على المرتب بتاعك CL تمام يا مستر وليد
شريف : اللى تشوفه حضرتك
وليد : تمام يا مستر احمد
احمد : اتفضلو
.................
( مكتب الحسابات )
عصام : ايه يا مستر وليد كله تمام ولا ايه
وليد : كله يخليه ف شغله لو سمحتو مش عاوزين كلمه من حد .. يا عبد الله .. عبد الله
عبد الله ( الاوفيس بوى ) : امرك يا مستر وليد
وليد : ممنوع من النهارده منعا باتا اى حد يدخل مكتب الحسابات غير انا والمحاسبين دول وداليا سكرتيرة مستر احمد ومستر احمد شخصيا .... اى حد تانى مهما كان هو مين لو دخل هحاسبك انت . حتى لو شريف ابنى فاهم ؟
عبد الله : فاهم يا فندم
مى : ( بتبص ل سالى وبيفهموا .. وبتبتسم )
سالى : ( بتبص ل مى وبتبتسم هى كمان لانها فهمت عصبية احمد كان ليه )
هذه القصة للكاتب احمد سعد و تم نشرها علي بيدج قصص و روايات للناشر محمد فريد
..........
( ف البريك مى قاعده قصاد احمد من بعيد بتبصله ومسهمه وسرحانه )
احمد : ( شايفها من بعيد وكل شويه يبص عليها بس عامل انه مش واخد باله )
.......
( بالليل ف الكافيه )
مى : بت يا دودو احكيلنا كل حاجه حصلت النهارده
داليا : يا لهووووووى دا حصل اللى محصلش من زمان احكيلكو ايه ولا ايه بس
مى : كل حااااااااجه
داليا : زعيق وعصبيه وخناق ... ومسك وليد وشريف النهارده غسلهم ..
مى : بسبب ايه
داليا : بسببكو ....
مى : ياسلام . بسببنا احنا ؟ ازاى ؟
سالى : ازاى يا داليا بسببنا
داليا : بسبب ان شريف فضل واقف معاكو امبارح ف المكتب كتير .. وسلم عليكو . سمعته بيقولهم انتو ف شركه مش ف نادى ... وقال لشريف بردو لو شوفتك واقف مع اى بنت ف الشركه همشيك منها انت وابوك . وخصوصا البنتين اللى لسا متعينين جديد
مى : ( بتبتسم ابتسامه حلوه اوى تلقائي ) هاا وايه تانى ؟
داليا : بس .! انا كنت مرعوبه جدااا . احمد لما بيوصل للحاله دى بيبقي صعب انه يهدى بسرعه
مى : بس احنا شوفناه ف الكافيه كان شكله عادى جدا
داليا : تؤتؤتؤتؤ هو وشه بيبان عادى لكن من جواه بتبقي نار قايده ولو جربتى تكلميه هيسيبك ويمشى او هيبخ فيك
مى : بقولك ايه يا داليا انا عاوزاكى ف خدمه وعشان خاطرى تنفذيهالى
داليا : خير يا روحى
مى : انا عاوزه رقم مستر احمد
داليا : ممكن يزعل انى اديتك رقمه . هو مابيحبش يدى ارقامه لحد . واحنا عشان اصحابه وزمايله بس من زمان عارفينه ..
مى : انتى بره الموضوع ومش هيعرف انك انتى اللى اديتهولى ... عشان خاطرى بقا
داليا : ماشي ... اكتبي عندك بس حسك عينك تتصلى عليه بالليل من بعد الساعه 10
مى : لا مش هتصل عليه بالليل طبعا .... عيب اصلا
...........
(الساعه 1 بالليل )
( مى بتفضل ماسكه تليفونها وباصه ل رقم احمد اكتر من نص ساعه .... وفجاه بترن بالغلط والرنه بتوصل لاحمد ..... اللى بيشوفها .. وبعدين بيكشف عن الرقم بيلاقيه متسجل بإسم مى )
يتبع ....
هذه القصة للكاتب احمد سعد و تم نشرها علي بيدج قصص و روايات للناشر محمد فريد
لسا لسا الاكشن كله جاى 😃
التفاعل يا عسلات
