التاريخ: ٣٠/٠٩/٢٠٢١
موضوع: الحلقه الرابعه عشر ...♥
رواية/فيـنـوس ♥♒
للكاتبه/sαℓeмα🔏
ــــــــــــــــــــــــــــــ
أدم وهو يبحت فيها : اعتبريني جنى قدامك ....شن تبي تقوليلها
جهان حولت يديها من ع وجهها وبحتت ف ادم وقالت بعيون مليانه دموع : نبي انقوللها انحبك و...
قطع عليها أدم وهو يضحك وقال :حتى انا انحبك
جهان ضحكت من بين بكاها وقالت بحشمه : مش انت هي !
أدم ضحك ورفع حاجبه : تقوليلي فيها هكي ف وجهي يعني !!
جهان ناضت بعدما كانت منطرحه وقالت : مش هكي قصدي مـ ...
أدم جبدها من يدها لصقها فيه وقعدت جهان راقده بين يديه وقريبه منه
وقال : خلاص معش فيها ماترقعي !
جهان سكتت وهي تشوف لأدم كيف قريب منها ووقفت دوه وهي تبحت فيه ♥
أدم وهو يلعب بخصلات شعر جهان المسبوهه فيه قال : من اكبر انتي ولا هي!؟
جهان حطت صبعها ف فمها وهي تقشر ف طلاء الاظافر اللي عليه وقالت : هي اكبر مني بـِ8 دقائق ماما ديما تقول هكي وابتسمت وقالت ...اصلاً هي جنى ف كل حاجه سابقتني لانها ديما مستعجله
أدم ابتسم
وقعدت جهان تحكيله ع مواقفها هي واختها لعندما رقدوا
ــــــــــــــــــــــــــــــــ
الساعه 10:46م✴
مهاب راقد ف سريره يحس ف عظامه وظهره يوجع .... يديه يرعشن وراسه صداع ...خشمه ملتهب ومحمر وماتمرش دقيقه الا وهو حاكه الف مره ..هذين الاعراض اللي حس بيهن بعدما قرر انه يبطل المخدرات
خشت عليه امه : مهاب تعال العشاء واتي
مهاب غطا راسه بالغطاء بيش امه ماتشوفش حالته : ماعنديش نيه نبي نرقد ياأمي
امه بأستغراب : كنك مريض ....غريبه راقد بدري
مهاب : لا لا مافيه شي
امه سكرت باب الدار وهي تقول : باهي تو نعقبلك عشاك ف الثلاجه كان جعت ونضت ف الليل
مهاب اول ماطلعت امه استنى شويه وبعدها ناض بسرعه سكر باب داره
بالمفتاح ....وتلفت للدولاب فتحه بسرعه وطلع كيسه صغيره فيها البودره حط منها ع المكتب امتاعه واستنشقها وبعدها قعمز ع سريره وهو مغمض عيونه وتكا راسه براحه مع ابتسامه بسيطه مرسومه ع وجهه
ــــــــــــــــــــــــــــــــ
ثـانـي يـوم ....💞
السـاعه 11:00ص
ناض رضا من النوم خش للحمام دوش ....وطلع من الدار وقرر انه يكسد مع خواته شويه ، وهو ماشي ف الممر سمع امه تحكي فالتلفون
تأفأف وقال بتمتمه : صبح صبح
وكمل طريقه لكن لفت انتباهه كلام امه .... وقف يسمع فيها
امه : لالا رضا معش يطلع كيف قبل
الطرف الثاني .....
امه : انتي شن قتيلها بالزبط
الطرف الثاني .....
امه : انقولك حاجه العشيه تعالي وتو نهدرزوا فيه الموضوع
سكرت ام رضا التلفون ...ورضا كمل طريقه وهو يفكر و ركبه الشك وقرر انه يقعد ف العشيه عشان يعرف من اللي حيجيهم وامه شن تخطط امعاها
خش ع خواته ف المطبخ
رضا ابتسم : صباح الخير
نسيبه قربت منه : ياصباح الانوار ياصباح الفل والورد والياسمين
رياض اللي كان مقعمز يفطر عيط : ههييييه هيييييه هييه ياقرده انا لما قتلك صباح الخير مارديتيش عليه
نسيبه رقصتله حواجبها : مانبيش نرد عليك انت
رضا ابتسم وحضنها وغمز لرياض
رياض خبط بيده ع الطاوله وقال :ان شاء الله تموتوا باهي
نوره ضحكت وحضناته : تعال تعال انا نحضنك
رياض ابتسم : ايوه ودار بيده لرضا بمعني يقهر فيه
نوره ضحكت وهي حاضنته : نجيه ياربي خويا حبيبي الغيور
رياض بعدها من عليه وهو مصدوم : شنووو!
نوره ونسيبه ورضا انفلقوا بالضحك ورياض يبحت فيهم وهو حامق وبعدها قال : متفقين عليه انتم ولا ....والله انوريكم وطلع وسيبهم
ورضا قعمز مع خواته وهو يفطر ويفكر
ــــــــــــــــــــــــــــــــ
السـاعه 3:35م⭐
